Edemede-Owo-Udọn̄ N̄wetnnịm N̄kpọ Isan̄ Ubom

ANAM-NDỤNỌDE oro Richard E. Byrd ama anam isan̄ ndụn̄ọde utịm ikotion ke Ata Edem Usụk ọtọn̄ọde ke 1928 esịm 1956. Ebede ke ndinịm n̄wetnnịm n̄kpọ eke usen ke usen ye mme nnennen n̄wetnnịm n̄kpọ isan̄, enye ye mme nsan̄a esie ẹma ẹkeme ndidiọn̄ọ ebiet ofụm otode, nditịm mme n̄wed usụn̄isan̄, ndinyụn̄ nnyene ekese ntọt mban̄a akamba ubak isọn̄ Ata Edem Usụk.

Isan̄ ndụn̄ọde Byrd owụt ufọn edinyene n̄wetnnịm n̄kpọ isan̄. Ẹsiwet ọyọhọ ntọt ẹban̄ade isan̄ mmọn̄ m̀mê eke ofụm ke n̄wetnnịm n̄kpọ isan̄. Ke ukperedem, ẹkeme ndida ntọt emi mfiak ndụn̄ọde se iketịbede m̀mê ndidụn̄ọde nyom ntọt emi ekemede ndinyene ufọn ke mme isan̄ ini iso.

N̄wed Abasi obụk edemede-owo-udọn̄ mbụk aban̄a Ukwọ eyo Noah. Ukwọ ofụri ekondo oro ama ebịghi ebe isua kiet. Ke nditịm idem nnọ Ukwọ oro, Noah, n̄wan esie, ye nditọiren mmọ mbita ye iban mmọ ẹma ẹda isua 50 m̀mê 60 ẹkọn̄ ubom—akwa ubom emi okokponde ke n̄kpọ nte mita 40,000. Ntak ẹkekọn̄de ubom emi? Man ẹda ẹnyan̄a uwem ndusụk owo ye mme unam ke Ukwọ oro.—Genesis 7:1-3.

Ke nditịm ntịn̄, n̄wed Genesis eke Bible ọdọn̄ọ se ẹkemede ndikot n̄wetnnịm n̄kpọ isan̄ ubom Noah aban̄ade se iketịbede ọtọn̄ọde ke ntọn̄ọ Ukwọ oro tutu esịm ini emi enye ye ubon esie ẹkewọn̄ọde ke ubom. Nte enye esịne n̄kpọ ekededi oro enyenede ufọn ọnọ nnyịn mfịn?