Kpan̄ Utọn̄ Kop Se Spirit Ọdọhọde!

“Yak owo eke enyenede utọn̄ okop se Spirit ọdọhọde mme ufọk Abasi.”—EDIYARADE 3:22.

1, 2. Kaban̄a mme etop oro Jesus ọkọnọde ẹsọk esop itiaba oro ẹsiakde enyịn̄ ke Ediyarade, item ewe ke ẹtọn̄ọ ntak ẹnọ?

 ANA mme asan̄autom Jehovah ẹkpan̄ utọn̄ ẹkop mme ikọ oro spirit adade Jesus Christ usụn̄ nditịn̄ nnọ esop itiaba oro ẹsiakde enyịn̄ ke n̄wed Ediyarade eke Bible. Ke akpanikọ, mme etop emi kiet kiet esịne item emi: “Yak owo eke enyenede utọn̄ okop se Spirit ọdọhọde mme ufọk Abasi.”—Ediyarade 2:7, 11, 17, 29; 3:6, 13, 22.

² Nnyịn imeneneme iban̄a etop oro Jesus ọkọnọde ẹsọk mme angel, m̀mê mme esenyịn ke Ephesus, Smyrna, ye Pergamum. Didie ke nnyịn ikeme ndibọ ufọn nto se edisana spirit akadade enye usụn̄ nditịn̄ nnọ esop inan̄ eken?

Ẹnọ Ẹsọk Angel Emi Odude ke Thyatira

3. M̀mọ̀n̄ ke Thyatira okodu, ndien ẹketịm ẹdiọn̄ọ enye ke nso?

³ “Eyen Abasi” ọnọ esop Thyatira itoro ye nsuannọ. (Kot Ediyarade 2:18-29.) Ẹkebọp Thyatira (emi idahaemi edide Akhisar) ke mben idịm emi ekesiwetde okodụk Akpa Gediz (Hermus eset) emi odude ke n̄kan̄ edem usoputịn Asia Minor. Ẹma ẹtịm ẹdiọn̄ọ obio oro ke ntak ata ediwak utomusọ esie. Orụn̄ eto ẹkotde madder ke mme anam-ibọk ukpụhọde uduot oro ẹkedụn̄ọde ke obio emi ẹkesida ẹnam ọwọrọetop ididuot. Lydia, emi akakabarede edi  Christian ke ini Paul akakade Philippi ke Greece, ekedi ‘anyam ididuot ọfọn̄ emi otode ke obio Thyatira.’—Utom 16:12-15.

4. Ẹketoro esop emi okodude ke Thyatira ẹban̄a nso?

⁴ Jesus otoro esop emi okodude ke Thyatira aban̄a nti utom, ima, mbuọtidem, ime, ye utom ukwọrọikọ esie. Ke akpanikọ, ‘ukperedem utom mmọ ẹma ẹkpon ẹkan akpa.’ Nte ededi, idem edieke nnyịn iwọrọde eti etop, inaha nnyịn idede ifụmi ido uwem nnyịn.

5-7. (a) Anie ekedi “n̄wan oro, Jezebel,” ndien nso ke ẹkenyene ndinam mban̄a odudu esie? (b) Etop oro Christ ọkọnọde esop Thyatira an̄wam iban emi ẹten̄ede Abasi ndinam nso?

⁵ Esop emi okodude ke Thyatira ama ayak itie ọnọ ukpono ndem, nsunsu ukpepn̄kpọ, ye oburobụt ido idan̄. Mmọ ẹma ẹyak itie ẹnọ “n̄wan oro, Jezebel”—eyedi otu iban oro ẹkenyenede mme edu ẹbietde eke idiọk Ọbọn̄-an̄wan Jezebel eke obio ubọn̄ esien Israel duop. Ndusụk nditọ ukpepn̄kpọ ẹnọ ekikere ẹte ke ‘prọfet iban’ Thyatira ẹma ẹsidomo nditap mme Christian ndituak ibuot nnọ mme abasi ye mme abasi-iban n̄ka unyamurua ndinyụn̄ ntiene mbuana ke mme usọrọ oro ẹkesidiade udia oro ẹkewade ẹnọ ndem. Yak owo ndomokiet oro emekde idemesie prọfet an̄wan okûyom ndikara mbon en̄wen ke esop Christian eyomfịn!

⁶ Christ ke ‘okoyom ndimen n̄wan emi Jezebel nduọk ke nna udọn̄ọ, nnyụn̄ nsịn mmọ eke ẹsịnde efịbe ye enye ke akwa ukụt, edieke mmọ mîdikabakede ikpọn̄ mme utom esie.’ Mme esenyịn ikpedehede iyak itie inọ mme utọ idiọk ukpepn̄kpọ ye odudu oro, ndien iyomke baba Christian kiet anam use eke spirit m̀mê ata use m̀mê abuana ke ukpono ndem man ọfiọk nte “udem Satan” enen̄erede ọdiọk. Edieke nnyịn ikopde item Jesus, ‘nnyịn iyọsọn̄ọ imụm se inyenede ikama,’ ndien idiọkn̄kpọ idikarake nnyịn. Sia mmọ ẹkesịnde mme edinam, udọn̄, ye uduak unana uten̄e Abasi, mbon oro ẹyetde aran oro ẹnamde ẹset ẹyebọ “odudu ndikara mme idụt” ndien ẹyediana ye Christ ke ndibom mme idụt mbai mbai. Mme esop eyomfịn ẹnyene mme ndamban̄a ntantaọfiọn̄, ndien ẹyenọ mbon oro ẹyetde aran “ediyama ntantaọfiọn̄ usenubọk,” emi edide Ebendọ, kpa Jesus Christ, ke ini ẹma ẹkenam mmọ ẹset ẹka heaven.—Ediyarade 22:16.

⁷ Ẹma ẹdụri esop Thyatira utọn̄ ẹban̄a ediyak itie nnọ idiọk odudu iban mfiakedem. Etop odudu spirit oro Christ ọkọnọde esop oro an̄wam iban emi ẹten̄ede Abasi ndika iso ke itie oro Abasi ọnọde mmọ mfịn. Mmọ idomoke ndikara iren m̀mê nditap nditọete iren ekededi nsịn ke edinam use eke spirit m̀mê ata use. (1 Timothy 2:12) Utu ke oro, utọ iban oro ẹnịm nti uwụtn̄kpọ ke ndinam nti utom ndien emi ada itoro ọsọk Abasi. (Psalm 68:11; 1 Peter 3:1-6) Edieke esop ekpemede se enye enyenede—edisana ukpepn̄kpọ ye edu uwem ye ọsọn̄urua utom Obio Ubọn̄—Christ ayada nti utịp edi, ididaha nsobo.

Ẹnọ Ẹsọk Angel Emi Odude ke Sardis

8. (a) M̀mọ̀n̄ ke Sardis okodu, ndien ndusụk ntọt ewe ke ẹnyene ẹban̄a enye? (b) Ntak emi esop oro okodude ke Sardis okoyomde un̄wam?

⁸ Ama oyom ẹsọsọp ẹnọ esop emi okodude ke Sardis un̄wam, koro enye ama akpa ke n̄kan̄ eke spirit. (Kot Ediyarade 3:1-6.) Sardis, emi okoyomde usụn̄ ke n̄kpọ nte kilomita 50 ọkpọn̄ edem usụk Thyatira, ekedi obio uforo. Unyamurua, isọn̄ obio oro ndifọn n̄kpọ, edinam ọfọn̄ ideterọn̄ ye ubrin̄kpọ isọn̄ufọk ẹma ẹn̄wam ndinam enye edi obio uforo emi ini kiet ko n̄kpọ nte owo 50,000 ẹkedụn̄ọde. Nte ewetmbụk oro Josephus ọdọhọde, ediwak mme Jew ẹma ẹdụn̄ ke Sardis ke akpa isua ikie M.E.N. Synagogue ye temple Artemis, abasi mbon Ephesus, ẹdu ke otu mme utak-usụhọ n̄kpọ obio emi.

9. Nso ke ikpanam edieke inamde mme utom nnyịn enyọn̄ enyọn̄?

⁹ Christ ama ọdọhọ angel esop Sardis ete: “Mmọfiọk mme utom fo, nte emenyene enyịn̄,  ete ke odu uwem, ndien ama akpa.” Nso edieke mme owo ẹdiọn̄ọde ke imodu ke edidemede ke n̄kan̄ eke spirit ke ini inen̄erede ide ke se iban̄ade mme ifetutom Christian, edieke inamde mme utom nnyịn enyọn̄ enyọn̄, ndien ke n̄kan̄ eke spirit edi ke ‘imakpakpa’ ima? Do oyom nnyịn ika iso ‘iti ndien usụn̄ nte ikasan̄ade ibọ inyene, ye adan̄a nte ikokopde’ etop Obio Ubọn̄, ikponyụn̄ inyene nditetịm nsịn ukeme nnyịn ke edisana utom. Ke akpanikọ, nnyịn ikpenyene nditọn̄ọ nditiene mbuana ọyọhọ ọyọhọ ke mme mbono esop Christian. (Mme Hebrew 10:24, 25) Christ ama odụri esop emi okodude ke Sardis utọn̄ ete: “Edieke mûdukpemeke, nyedi nte inọ, ndien udufiọkke ini eke ndibuatde fi.” Nso kaban̄a eyo nnyịn? Ibịghike nnyịn iyanam ibat.

10. Idem ke ini ẹdude ke idaha ebietde enye oro okodude ke Sardis, nso ke ẹkeme nditin̄ mban̄a ibat ibat Christian?

¹⁰ Idem ke ini ẹdude ke idaha ebietde enye oro okodude ke Sardis, ndusụk owo ẹkeme ndidu oro “mîkasabakede edisịne-n̄kpọ mmọ; mmọ oro ẹyesịne afia ọfọn̄idem ẹsan̄a ye [Christ], koro mmọ ẹdotde.” Mmọ ẹka iso ndinam mme owo ẹdiọn̄ọ mmọ nte mme Christian, ẹkade iso ndidi se n̄kpọ mîsabakede, ẹnanade ntọi ke ererimbot emi, ke n̄kan̄ ido uwem ye ke n̄kan̄ ido ukpono. (James 1:27) Ntem, Jesus ‘idisioho enyịn̄ mmọ ifep ke n̄wed uwem, ndien eyenyịme enyịn̄ mmọ ke iso Ete Esie ye ke iso mme angel Esie.’ Sia ẹdọhọde ke mmọ ẹdot ndisan̄a ye Christ, ẹyesịne otu an̄wanndọ esie emi ẹdide mbon oro ẹyetde aran, ediye linen eke asanade onyụn̄ esemde onyụn̄ adade aban̄a edinen ido nti ikọt Abasi. (Ediyarade 19:8) Mme utịbe utịbe ifetutom oro ẹnade ẹbet mmọ ke heaven ẹnọ mmọ odudu ndikan ererimbot. Mme edidiọn̄ n̄ko ke ẹna ẹbet mbon oro ẹdidude nsinsi uwem ke isọn̄. Ẹwet enyịn̄ mmọ n̄ko ke n̄wed uwem.

11. Nso ke nnyịn ikpanam edieke iyetde idap ke n̄kan̄ eke spirit?

¹¹ Idụhe owo nnyịn ndomokiet oro okpoyomde ndiduọ ndụk mfụhọ mfụhọ idaha eke spirit oro esop Sardis okodude. Edi nso edieke ifiọkde ke nnyịn ke iyet idap ke n̄kan̄ eke spirit? Nnyịn ikpenyene ndinam n̄kpọ usọp usọp man ọfọn ye nnyịn. Yak idọhọ ke usụn̄ uwem unana uten̄e Abasi odụri nnyịn ada mîdịghe ke nnyịn ke itehede ube ke ndidụk mme mbono esop m̀mê ndiwọrọ an̄wautom. Ẹyak nnyịn ibọn̄ akam ke ofụri esịt iyom un̄wam Jehovah. (Philippi 4:6, 7, 13) Edikot Bible ke usen ke usen ye edikpep N̄wed Abasi ye mme n̄wed oro “akama-ukpọhọde, emi anamde akpanikọ” osion̄ode ẹyetịp ẹsịn ke nnyịn ndidu ke edidemede ke n̄kan̄ eke spirit. (Luke 12:42-44) Do nnyịn iyetie nte mbon Sardis oro ẹkenyenede unyịme Christ, ndien nnyịn iyedi edidiọn̄ inọ ekemmọ mme andinịm ke akpanikọ.

Ẹnọ Ẹsọk Angel Emi Odude ke Philadelphia

12. Didie ke afo ekpetịn̄ aban̄a idaha ido ukpono ke Philadelphia eset?

¹² Jesus ama otoro esop Philadelphia. (Kot Ediyarade 3:7-13.) Philadelphia (emi idahaemi edide Alasehir) ekedi enyene-uforo iwụk ebiet unam wine oro okodude ke ikpehe n̄kan̄ edem usoputịn Asia Minor. Ke nditịm ntịn̄, etubom abasi obio oro ekedi Dionysus, abasi wine. Etie nte mme Jew ke Philadelphia ẹma ẹdomo ndikpek mme Christian ẹdide mme Jew oro ẹkedụn̄ọde do ndika iso m̀mê ndifiak mbịne ndusụk mme edinam Ibet Moses, edi mmọ ikekwe unen.

13. Didie ke Christ ada “ukpọhọde David” eberede usụn̄?

¹³ Christ ‘enyene ukpọhọde David,’ ndien ke ntem ẹyak kpukpru mme ufọn n̄kpọ Obio Ubọn̄ ye edise mban̄a mbonufọk mbuọtidem ẹsịn enye ke ubọk. (Isaiah 22:22; Luke 1:32) Jesus ama ada ukpọhọde oro ọkpọhọde usụn̄ edinyene mme ifet Obio Ubọn̄ ọnọ mme Christian ẹkedude ke Philadelphia eset ye ke mme ebiet en̄wen. Toto ke 1919 enye emeberede ‘akamba usụn̄’ oro adade esịm edikwọrọ Obio Ubọn̄ oro andibiọn̄ọ ndomokiet mîkemeke ndiberi, ọnọ “akama-ukpọhọde, emi anamde akpanikọ.” (1 Corinth 16:9; Colossae 4:2-4) Nte ededi, ẹmeberi usụn̄ adade esịm mme ifet Obio Ubọn̄ ẹbaha mmọ emi ẹtode “Synagogue Satan,” koro mmọ mîdịghe Israel eke spirit.

14. (a) Nso un̄wọn̄ọ ke Jesus ọkọn̄wọn̄ọ ọnọ esop oro okodude ke Philadelphia? (b) Didie ke nnyịn ikeme nditre ndiduọ ke “ini idomo”?

¹⁴ Jesus ama ọn̄wọn̄ọ un̄wọn̄ọ emi ọnọ mme  Christian oro ẹkedude ke Philadelphia eset ete: “Sia ama ekekpeme uyo anyan ime Mi, Ami nyonyụn̄ n̄kpeme fi ke ini idomo, emi ọmọn̄ edisịm ofụri ererimbot, ndidomo mmọ emi ẹdụn̄de ke isọn̄.” Ukwọrọikọ oyom utọ anyan ime oro Jesus ekenyenede. Akananam enye ikayakke idem inọ mme asua edi ama aka iso ndinam uduak Ete esie. Ke ntre, ẹma ẹnam Christ eset ekenyene uwem eke heaven oro mîkemeke ndikpa. Edieke nnyịn isọn̄ọde ida ke ubiere nnyịn ndituak ibuot nnọ Jehovah inyụn̄ idade inọ Obio Ubọn̄ oro ke ndikwọrọ eti mbụk, ẹyekpeme nnyịn mbak nnyịn ididuọ ke “ini idomo.” Nnyịn ‘iyọsọn̄ọ imụm se inyenede ito Christ ikama’ ebe ke ndisịn ukeme nnam mme ufọn n̄kpọ Obio Ubọn̄ ẹkọri. Ndinam emi oyosụn̄ọ ke edinọ mbon oro ẹyetde aran ọsọn̄urua anyanya eke heaven ye edinọ mme anam-akpanikọ nsan̄a mmọ nsinsi uwem ke isọn̄.

15. Nso ke ẹyom ẹto mbon oro ẹdidide “adaha ke temple Abasi”?

¹⁵ Christ adian do ete: “Owo eke akande, nyanam enye edi adaha ke temple Abasi Mi, . . . nyonyụn̄ n̄wet enye enyịn̄ Abasi Mi ke idem, ye enyịn̄ Obio Abasi Mi, kpa obufa Jerusalem, emi otode Abasi Mi osụhọde ke heaven edi, ye obufa enyịn̄ Idem Mi.” Ana mme esenyịn oro ẹyetde aran ẹsọn̄ọ ẹmụm utuakibuot akpanikọ ẹkama. Ana mmọ ẹdot nditiene mbuana ke “obufa Jerusalem” ebe ke ndikwọrọ mban̄a Obio Ubọn̄ Abasi  nnyụn̄ n̄ka iso nsana ke n̄kan̄ eke spirit. Ẹyom emi edieke mmọ ẹyomde ndidi adaha ke ubọn̄ ubọn̄ temple eke heaven ye edieke mmọ ẹyomde ndikere enyịn̄ obio Abasi nte mme andidụn̄ heaven ndinyụn̄ ntiene n̄kere enyịn̄ Christ nte n̄wanndọ esie. Ndien ana mmọ ‘ẹkop se spirit ọdọhọde mme esop.’

Ẹnọ Ẹsọk Angel Emi Odude ke Laodicea

16. Nso idi ndusụk n̄kpọ ẹban̄ade Laodicea?

¹⁶ Christ ama asua ọnọ esop oro okodude ke Laodicea oro okokopde uyụhọ. (Kot Ediyarade 3:14-22.) Laodicea emi okoyomde usụn̄ ke n̄kpọ nte kilomita 150 ọkpọn̄ edem usiahautịn Ephesus, okonyụn̄ odude ke isobo mme akpan usụn̄ mbonurua ke itịghede Akpa Lycus oro ọkọfọnde n̄kpọ, ekedi enyene-uforo obio ubot n̄kpọ ye iwụk ebiet itie unịm okụk. Mme ọfọn̄ oro ẹkesidade obubịt idet erọn̄ otode obio emi ẹnam, ẹma ẹnen̄ede ẹwọrọ etop. Nte iwụk ebiet ọwọrọetop ufọkn̄wed ukpep ibọkusọbọ, eyedi Laodicea okosio ibọk enyịn ẹdiọn̄ọde nte ndom ibọk mbon Phrygia, edi. Asclepius, abasi ibọkusọbọ, ekedi kiet ke otu etubom mme abasi obio oro. Etie nte ata ediwak mme Jew ẹma ẹdụn̄ ke Laodicea, onyụn̄ etie nte ndusụk mmọ ẹkedi mme imọ owo.

17. Ntak ẹkesuade ẹnọ mbon Laodicea?

¹⁷ Ke adade “angel” esop oro etịn̄ ikọ ọnọ esop odude ke Laodicea, Jesus etịn̄ ikọ uko uko nte “ata ntiense akpanikọ, ebeiso ke kpukpru se Abasi obotde.” (Colossae 1:13-16) Ẹma ẹsua ẹnọ mbon Laodicea sia mmọ ‘mîkebịtke mîkonyụn̄ ifiopke’ ke n̄kan̄ eke spirit. Sia mmọ ẹkedide ndebe, Christ ama oyom ndikpọhi mmọ nsion̄o ke inua esie. Anaedi ikọsọn̄ke mmọ ndifiọk se ikọ emi ọkọwọrọde. Ufiop idịm ama odu ke Hierapolis oro okodude ekpere, ndien mbịtmbịt mmọn̄ ama odu ke Colossae. Nte ededi, sia ẹkesikotde mmọn̄ ke esan̄ukwak ẹto anyan ebiet ẹdika Laodicea, eyedi mmọn̄ oro ekesitie ndebe ndebe ke ini edide edisịm obio emi. Ke ekperede mbahade iba ndisịm obio oro, ẹma ẹwọn̄ọde mmọn̄ oro ẹsịn ke afua. Ke ekperede ndisịm Laodicea, ẹma ẹwọn̄ọde mmọn̄ oro ẹsịn ke usụn̄ mmọn̄ ẹdade simen ye itiat ẹnam.

18, 19. Didie ke ẹkeme ndin̄wam mme Christian eyomfịn oro ẹtiede nte mbon Laodicea?

¹⁸ Mfịn mme owo oro ẹbietde mbon Laodicea ifiopke-fiop inyụn̄ ibịtke-bịt. Ukem nte ndebe ndebe mmọn̄, ẹyekpọhi mmọ ẹsion̄o ke inua! Jesus iyomke mmọ ẹtịn̄ ikọ ke ibuot imọ, nte ‘mme isụn̄utom oro ẹyetde aran emi ẹdide ke enyịn̄ Christ.’ (2 Corinth 5:20) Ibọhọke mmọ ẹkabade esịt, mmọ ẹyetaba akwa ifet oro mmọ ẹnyenede nte mme anditan̄a Obio Ubọn̄. Mbon Laodicea ẹkeyom inyene isọn̄ ikonyụn̄ ‘idiọn̄ọke ite ke mmimọ idi ata mbon nditaha, emi inyenede mbọm, ibuenede, idọn̄ọde nnan, inyụn̄ inanade edisịne n̄kpọ.’ Man ẹmen ubuene, nnan, ye iferi eke spirit mmọ ẹfep, oyom mbon oro ẹtiede nte mmọ mfịn ẹdep ke ubọk Christ gold “eke ẹtemde asana ke ikan̄,” kpa mbuọtidem oro ẹma ẹkedomo, ye “afia edisịne-n̄kpọ” emi adade aban̄a edinen ido, ye “ibọk enyịn” oro edinamde mmọ ẹkụt usụn̄ ke n̄kan̄ eke spirit. Mme esenyịn Christian ẹsikop idatesịt ndin̄wam mmọ ẹfiọk se mmọ ẹnanade ke n̄kan̄ eke spirit man mmọ ẹkeme ndikabade ‘mforo ke mbuọtidem.’ (James 2:5; Matthew 5:3) N̄ko-n̄ko, oyom mme esenyịn ẹn̄wam mmọ ndida “ibọk enyịn” nyet ke enyịn—ndinyịme nnyụn̄ ndu uwem ke n̄kemuyo ye ukpepn̄kpọ, item, uwụtn̄kpọ, ye edu ukere n̄kpọ Jesus. Emi edi usọbọ ọnọ “mbumek obụkidem, ye mbumek enyịn, ye ikpîkpu ubọn̄ uwem emi.”—1 John 2:15-17.

¹⁹ Jesus esinọ kpukpru mbon oro enye amade nsuannọ ye ntụnọ. Ana mme esenyịn oro ẹdude ke idak esie ẹda mbọm ẹnam ukem oro. (Utom 20:28, 29) Ama oyom mbon Laodicea ‘ẹnyene ifiopesịt ẹnyụn̄ ẹkabade esịt,’ ẹnam mme ukpụhọde ke ekikere ye ke usụn̄ uwem mmọ. Okûdi ndusụk nnyịn imayak usụn̄ uwem oro adade edisana utom oro inamde inọ Abasi nte usụhọde n̄kpọ ke uwem akabade emehe nnyịn? Do, ẹyak nnyịn ‘idep ibọk enyịn ke ubọk Jesus’ man ikeme ndikụt nte edibem iso nyom Obio Ubọn̄ ifịk ifịk edide akpan n̄kpọ.—Matthew 6:33.

20, 21. Mmanie ẹnam n̄kpọ nte ọfọnde ke ini Jesus ‘atuakde usụn̄’ mfịn, ndien nso idotenyịn ke mmọ ẹnyene?

²⁰ Christ ọdọhọ ete: “Sese, ndada ke usụn̄  ntuak; edieke owo okopde uyo Mi onyụn̄ osiode usụn̄, nyodụk ntiene enye, ndia n̄kpọ ye enye, enye onyụn̄ adia n̄kpọ ye Ami.” Jesus ama esiwak ndinọ item eke spirit nte enye ekesidiade udia. (Luke 5:29-39; 7:36-50; 14:1-24) Idahaemi enye atuak usụn̄ esop oro ebietde esop Laodicea. Nte mme andibuana ke esop oro ẹyesio usụn̄ ẹnọ enye, ẹfiak ẹdemede ima mmọ, ẹdara enye ke ufọt mmọ, ẹnyụn̄ ẹyak enye ekpep mmimọ n̄kpọ? Ke edide ntre, Christ ayadia n̄kpọ ye mmọ ndien mmọ ẹyebọ akamba ufọn eke spirit.

²¹ Mfịn “mme erọn̄ en̄wen” ke ẹsio usụn̄ ẹnọ Christ ke ndamban̄a usụn̄, ndien utọ edinam oro ada esịm nsinsi uwem. (John 10:16; Matthew 25:34-40, 46) Christ ọyọnọ mme owo kiet kiet, kpa mme andikan oro ẹyetde aran akwa ifet ‘editie ye imọ ke ebekpo imọ, kpa nte imọ ikakande, inyụn̄ isụhọrede itie ye Ete imọ ke ebekpo Esie.’ Ih, Jesus ọn̄wọn̄ọ ndinọ mme andikan oro ẹyetde aran utịbe utịbe utịp eke editie ke ebekpo ye imọ ke ubọk nnasia Ete imọ ke heaven. Ndien mme erọn̄ en̄wen oro ẹkande ẹdori enyịn ndinyene utịbe utịbe itie ke isọn̄ ke idak ukara Obio Ubọn̄.

Se Kpukpru Nnyịn Ikpepde

22, 23. (a) Didie ke kpukpru Christian ẹkeme ndibọ ufọn nto mme ikọ oro Jesus eketịn̄de ọnọ esop itiaba oro? (b) Nso ikpedi ubiere nnyịn?

²² Eyịghe idụhe nte ke kpukpru mme Christian ẹkeme ndibọ ufọn akamba akamba nto mme ikọ oro Jesus eketịn̄de ọnọ esop itiaba oro ẹkedude ke Asia Minor. Ke uwụtn̄kpọ, ke ẹkụtde nte ke Christ ama esinọ item oro odotde, esinụk ima ima mbiowo Christian nditoro mme owo ye mme esop oro ẹnamde ọfọn ke n̄kan̄ eke spirit. Ke ebiet emi ẹnamde ndudue, mbiowo ẹsin̄wam ekemmọ mme andinịm ke akpanikọ ndida usọbọ N̄wed Abasi. Kpukpru nnyịn imekeme ndika iso mbọ ufọn nto nsio nsio ikpehe item oro Christ ọkọnọde esop itiaba oro, adan̄a nte nnyịn idade mmọ isịn ke edinam ye unana ubiatini inyụn̄ inamde emi ye akam ofụri esịt. *

²³ Ukperedem ini emi idịghe ini ndikop uyụhọ, ndima inyene, m̀mê n̄kpọ efen ekededi oro ekemede ndinam nnyịn ikûnam utom ofụri esịt nnọ Abasi. Ke ntre, ẹyak kpukpru esop ẹka iso ẹyama nte udiọk-utuenikan̄ oro Jesus ayakde ẹdu ke itie mmọ. Nte mme anam-akpanikọ Christian, kpukpru nnyịn ikpakam ibiere ndikpan̄ utọn̄ ke ini Christ etịn̄de ikọ nnyụn̄ n̄kop se spirit ọdọhọde. Do, nnyịn iyenyene nsinsi idatesịt nte mme ọnọ un̄wana ndien emi ayada ubọn̄ ọsọk Jehovah.

[Ikọ idakisọn̄]

Didie ke Afo Ọkpọbọrọ?

• “N̄wan oro, Jezebel,” ekedi anie, ndien ntak emi iban emi ẹten̄ede Abasi mîkpebeke enye?

• Nso idaha ikodu ke esop emi okodude ke Sardis, ndien nso ke nnyịn ikeme ndinam man ifep ndikabade ntie nte ediwak mme Christian oro ẹkedụn̄ọde do?

• Mme un̄wọn̄ọ ewe ke Jesus ọkọn̄wọn̄ọ ọnọ esop Philadelphia, ndien didie ke mmọ ẹnyene n̄kpọ ndinam mfịn?

• Ntak emi ẹkesuade ẹnọ mbon Laodicea, edi mme idotenyịn ewe ke mme ifịk ifịk Christian ẹnyene?

[Mme Mbụme Ukpepn̄kpọ]

[Ndise ke page 16]

Ana ẹfep ndiọi usụn̄ “n̄wan oro, Jezebel”

[Mme ndise ke page 18]

Jesus emeberede ‘akamba usụn̄’ edinyene mme ifet Obio Ubọn̄ ọnọ mme anditiene enye

[Ndise ke page 20]

Ndi afo amadara Jesus onyụn̄ akpan̄ utọn̄ ọnọ enye