Mme Mbụme Ẹtode Mme Andikot

Ntak emi Enyọn̄-Ukpeme April 1, 2002, page 11, ikpehe ekikere 7, ọdọhọde ke baptism mmọn̄ oro mbufa mme andinịm ke akpanikọ oro ẹkedide mme Jew ẹkenade ke Pentecost 33 E.N. ekedi uyarade “ọkpọkpọ uyakidem mmọ nnọ Abasi ebe ke Christ,” ke adan̄aemi ẹkenịmde ke akpanikọ ke mbemiso nte ke edibụhọ ke mmọn̄ oro mme Jew ẹkebụhọde ọtọn̄ọde ke 33 E.N. tutu esịm 36 E.N. ikoyomke utọ ọkpọkpọ uyakidem oro?

Ke 1513 M.E.N., Jehovah Abasi ama ọnọ nditọ Israel ifet ndikabade ndi edisana idụt nnọ imọ ama akam edi mmọ ‘ẹyekop uyo imọ ẹnyụn̄ ẹnịm ediomi imọ.’ Mmọ ẹma ẹbọrọ ẹte: “Iyanam kpukpru se Jehovah ọdọhọde.”—Exodus 19:3-8; 24:1-8.

Ebede ke ndinyịme ndinịm Ibet ediomi Moses, nditọ Israel ẹma ẹyak idem ẹnọ Abasi. Emana mme Jew oro ẹketienede ẹkemamana ẹdidụk idụt oro ẹma ẹkeyak idem ẹnọ mi. Nte ededi, baptism mme Jew oro ẹkekabarede ẹdi mme anditiene Jesus Christ ọtọn̄ọde ke Pentecost 33 E.N. ka iso ama abuana se idide isio ye ediyak idem nnọ Abasi nte mme andibuana ke idụt oro ẹma ẹkeyak idem ẹnọ. Enye akada aban̄a mmọ ndiyak idem nnọ Jehovah Abasi ke obufa itie ebuana oro mmọ ẹkenyenede ye enye ebe ke Jesus Christ. Didie ke oro ekedi ntre?

Ke ẹma ẹken̄wan̄a edisana spirit ẹduọk n̄kpọ nte mbet 120 oro ẹkedude ke ubet enyọn̄ ke Jerusalem ke Pentecost 33 E.N., apostle Peter ama adaha ke enyọn̄ ọtọn̄ọ ndikwọrọ ikọ nnọ ediwak mme Jew ye mme okpono Abasi ke ido mme Jew oro ẹkedide ẹdisop idem ọtọkiet man ẹse se itịbede. Ke ama ọkọnọ ọyọhọ ọyọhọ ikọ ntiense, enye ama ọdọhọ mme Jew oro esịt okobiomde ikpe ete: “Mbufo ẹkabade esịt, ẹnyụn̄ ẹna baptism, kpukpru mbufo, ke enyịn̄ Jesus Christ, man ẹfen mme idiọk-n̄kpọ mbufo.” Ke ẹnamde n̄kpọ ẹban̄a n̄kaiso item Peter, “mmọ emi ẹnyịmede ikọ esie ẹna baptism: ndien usen oro adan̄a nte tọsịn owo ita ẹdiana ye mmọ.”—Utom 2:1-41.

Nte mme Jew emi ẹkenade baptism ke ntak item Peter emi ikedịghe-di mme andibuana ke idụt oro ẹma ẹkeyak idem ẹnọ? Nte mmọ ikenyeneke itie ebuana oro mmọ ẹma ẹkeyayak idem ẹnọ Abasi? Baba. Apostle Paul ama ewet ete ke ‘Abasi ama emen Ibet efep ebe ke ndikọn̄ enye ndian ke eto ndutụhọ.’ (Colossae 2:14, NW) Ebede ke n̄kpa Christ ke 33 E.N., Jehovah  Abasi ama emen Ibet ediomi efep—kpa akpan ntak oro akanamde enye anam nditọ Israel ẹnyene itie ebuana oro mmọ ẹma ẹkeyak idem ẹnọ Enye. Idahaemi Abasi ke idemesie ama esịn idụt oro ẹkesịnde Eyen Abasi. “Israel eke obụkidem” ikekemeke aba ndidi idụt oro ẹyakde idem ẹnọ Abasi.—1 Corinth 10:18; Matthew 21:43.

Ẹma ẹbiat Ibet ediomi ẹfep ke 33 E.N., edi ini akpan mfọn ye ntịn̄enyịn Abasi ke idem mme Jew iketreke ini oro. * Ini oro ekenyene ndika iso tutu esịm 36 E.N., ke ini Peter ọkọkwọrọde ikọ ọnọ Cornelius, enyene-ifịk owo Italy, ye ikọtufọk esie ọkọrọ ye mme Gentile en̄wen. (Utom 10:1-48) Nso ikedi ntak ẹkeyakde ini mfọn emi osụk aka iso odu?

Daniel 9:27 ọdọhọ ete: “[Messiah] oyonyụn̄ ọsọn̄ọ enịm ediomi ọnọ ediwak owo ke urua kiet.” Ediomi oro ẹkesọn̄ọde ẹnịm ke isua itiaba, m̀mê “urua kiet,” ọtọn̄ọde ke baptism Jesus ye ke ntọn̄ọ an̄wan̄wa utom ukwọrọikọ Messiah ke 29 E.N. ekedi ediomi Abraham. Man etiene abuana ke ediomi oro, owo n̄kukụre ekenyene ndidi kiet ke otu nditọ Hebrew emi otode ubon Abraham. Ediomi n̄kan̄ kiet oro ikanamke owo enyene itie ebuana oro ẹyakde idem ẹnọ Jehovah. Ntem, okposụkedi ẹkenọde mmọ akpan ntịn̄enyịn nte ata mme Jew, mme Jew oro ẹkenịmde ke akpanikọ ẹkenyụn̄ ẹnade baptism ke Peter ama eketịn̄ ikọ okụre ke Pentecost 33 E.N. ikenyeneke itie ebuana oro ẹyakde idem ẹnọ Abasi sia ẹma ẹkemen Ibet ediomi ẹfep. Ama oyom mmọ ke idemmọ ẹyak idem ẹnọ Abasi.

Ama oyom mme Jew ye mbon oro ẹkponode Abasi ke ido mme Jew ẹnam ọkpọkpọ uyakidem ẹnyụn̄ ẹna baptism ke usen Pentecost 33 E.N. ke ntak efen. Apostle Peter ama eteme mme andikpan̄ utọn̄ nnọ enye ete ẹkabade esịt ẹnyụn̄ ẹna baptism ke enyịn̄ Jesus. Ndinam oro ama oyom mmọ ẹsọn usụn̄ ererimbot ẹnyụn̄ ẹnyịme Jesus nte Ọbọn̄ ye Messiah, nte Akwa Oku, ye nte enye oro etiede ke ubọk nnasia Abasi ke heaven. Ama oyom mmọ ẹseme ẹkot enyịn̄ Jehovah Abasi man ẹnyene edinyan̄a ebe ke Christ Jesus, oro abuanade edibuọt idem ke Christ ye edidiọn̄ọ enye nte Adausụn̄ mmọ. Ofụri ntak ndinyene itie ebuana ye Abasi nnyụn̄ nnyene edifen mme idiọkn̄kpọ ẹma ẹkpụhọde idahaemi. Nte owo kiet kiet, ama oyom mme Jew oro ẹnịmde ke akpanikọ ẹnyịme obufa ndutịm emi. Didie? Ebe ke ndiyak idem nnọ Abasi ye ke ndiyarade an̄wan̄wa nte ke mmimọ ima inam ntre ebe ke ndibụhọ ke mmọn̄ ke enyịn̄ Jesus Christ. Baptism mmọn̄ ekedi idiọn̄ọ uyakidem mmọ nnọ Abasi, adade mmọ edisịn ke obufa itie ebuana ye enye ebe ke Jesus Christ.—Utom 2:21, 33-36; 3:19-23.

[Ikọ idakisọn̄]