Ẹsọn̄ọ Ẹda Ẹnyụn̄ Ẹkụt Edinyan̄a Jehovah!
Ẹsọn̄ọ Ẹda Ẹnyụn̄ Ẹkụt Edinyan̄a Jehovah!
“Ẹda ke itie mbufo, ẹsọn̄ọ ẹda ẹnyụn̄ ẹkụt edinyan̄a Jehovah ke ibuot mbufo.”—2 CHRONICLES 20:17, NW.
1, 2. Ntak emi utịp en̄wan ‘Gog isọn̄ Magog’ emi asan̄ade ekpere ọdiọkde akan ndịghe edinam oyomonsia eke ofụri ererimbot?
NDUSỤK owo ẹdọhọ ke edinam oyomonsia edi en̄wan oro ẹn̄wanade ye ofụri ererimbot, idem ẹn̄wanade ye ntatenyịn. Nte an̄wan̄ade, ana ẹnen̄ede ẹnam n̄kpọ ẹban̄a utọ ndịghe oro. Ke n̄kan̄ eken, odu en̄wan efen emi akam enyenede ndiọkn̄kan utịp, edi emi ererimbot ọnọde esisịt ntịn̄enyịn m̀mê mînọhọnọ. Nso ke enye edi?
2 Enye edi en̄wan ‘Gog isọn̄ Magog,’ emi Bible etịn̄de aban̄a ke Ezekiel ibuot 38. Nte edi ikọ n̄kponinua ndidọhọ ke utịp ekọn̄ emi ọdiọk akan ndịghe edinam oyomonsia eke ofụri ererimbot? Baba-o, koro en̄wan Gog akan edin̄wana ye mme ukara owo. Enye an̄wana ye ukara Abasi eke heaven! Nte ededi, ke mîbietke mme owo, emi ẹkemede ndikpu ke ndibiọn̄ọ mme en̄wan oro ẹdade ẹtiene ukara mmọ, Andibot enen̄ede enyene ukeme ndinam n̄kpọ mban̄a ata idiọk ekọn̄ Gog.
Edin̄wana ye Ukara Abasi
3. Nso ke ẹkedọhọ mme andikara ererimbot ẹnam toto ke 1914, ndien mmọ ẹnam n̄kpọ didie?
3 En̄wan oro ẹn̄wanade ke ufọt Edidem Abasi emi akarade idahaemi ye idiọk editịm n̄kpọ Satan amaka iso tọn̄ọ nte ẹkewụk Obio Ubọn̄ Abasi ke heaven ke 1914. Ke ini oro, ẹma ẹdọhọ mme andikara ẹdide owo ẹsụk ibuot ẹnọ Andikara oro Abasi emekde. Edi mmọ ẹmesịn ndinam ntre, nte ẹkebemde iso ẹtịn̄ ẹte: “Ndidem ererimbot ẹdaha ẹda, mbọn̄ ẹnyụn̄ ẹbono ẹdụk odu ẹban̄a Jehovah ye Messiah esie, ẹte, Ẹyak nnyịn ibụn̄ n̄kpọkọbi mmọ, inyụn̄ ikịbi urụk mmọ ke idem nnyịn iduọk.” (Psalm 2:1-3) Edibiọn̄ọ ukara Obio Ubọn̄ eyenen̄ede esịm ata-utịt esie ke ini en̄wan Gog eke Magog.
4, 5. Didie ke mme owo ẹkeme ndin̄wana ye ukara Abasi eke heaven oro enyịn mîkwe?
4 Nnyịn imekeme ndiyịk nte mme owo ẹkemede ndin̄wana ye ukara eke heaven oro enyịn mîkwe. Bible owụt nte ke “thousand owo ikie ye aba ye inan̄, kpa mmọ oro ẹkefakde ẹsio ẹfep ke isọn̄,” ọkọrọ ye “Eyen-erọn̄,” kpa Christ Jesus, ẹnam ukara emi. (Ediyarade 14:1, 3; John 1:29) Sia obufa ukara oro odude ke heaven, ẹkot enye “obufa enyọn̄,” ke adan̄aemi ẹkotde mme andidu ke idak esie ke isọn̄, nte owụtde ifiọk, “obufa isọn̄.” (Isaiah 65:17; 2 Peter 3:13) Ata ediwak ke otu owo 144,000 oro ẹdikarade ye Christ ẹma ẹkokụre utom mmọ eke isọn̄ ke edinam akpanikọ. Mmọ ke ntem ẹwụt ke mmimọ imodot nditọn̄ọ obufa utom mmimọ ke heaven.
5 Nte ededi, ekpri nsụhọ ke owo 144,000 ke ẹsụk ẹdodu ke isọn̄. Ke se iwakde ibe owo 15,000,000 emi ẹkedụkde usọrọ Udia Mbubịteyo Ọbọn̄ ke 2002, owo 8,760 kpọt ẹkewụt idotenyịn mmọ nte mbon oro ẹmekde kaban̄a utom eke heaven emi. Owo ekededi oro odomode ndin̄wana ye nsụhọ mbon oro ẹdibuanade ke Obio Ubọn̄ oro, ke nditịm ntịn̄, an̄wana ye Obio Ubọn̄ Abasi.—Ediyarade 12:17.
Edidem Ọdọdiọn̄ Akan
6. Didie ke Jehovah ye Christ ẹse edibiọn̄ọ oro ẹbiọn̄ọde ikọt Abasi?
6 Ẹma ẹbem iso ẹtịn̄ nte Jehovah edinamde n̄kpọ aban̄a edibiọn̄ọ oro ẹbiọn̄ọde Obio Ubọn̄ esie oro ẹma ẹkewụk, ẹte: “Enye etie ke enyọn̄ asak: Ọbọn̄ ababian̄a mmọ. Ndien enye ọdọhọ ye mmọ ke iyatesịt esie, onyụn̄ ada ikan̄ ifụtesịt esie esịn mmọ ndịk. Ndien edi ami mmenịm edidem mi ke enyọn̄ Zion edisana obot mi.” (Psalm 2:4-6) Ini ekem idahaemi ọnọ Christ ‘ndidọdiọn̄ n̄kan’ ke idak ndausụn̄ Jehovah. (Ediyarade 6:2) Didie ke Jehovah ese edibiọn̄ọ oro ẹbiọn̄ọde ikọt esie ke ini akpatre edikan? Jehovah ese edibiọn̄ọ emi nte ke ẹnen̄ede ẹbiọn̄ọ imọ ye Edidem imọ oro akarade. Jehovah ọdọhọ ete: ‘Enye emi otụkde mbufo otụk eyen enyịn Mi.’ (Zechariah 2:8) Ndien Jesus ama etịn̄ ye nsọn̄uyo ete ke imọ ida se mme owo ẹnamde m̀mê ẹtrede ndinam nnọ nditọete imọ oro ẹyetde aran nte ẹnam m̀mê ẹtre ndinam nnọ imọ.—Matthew 25:40, 45.
7. Kaban̄a mme ntak ewe ke Gog ada iyatesịt esie etiene “akwa otu owo,” oro ẹtịn̄de ẹban̄a ke Ediyarade 7:9?
7 Nte ededi, Gog n̄ko ayada iyatesịt esie etiene mbon oro ẹnọde nsụhọ oro ẹyetde aran ifịk ifịk ibetedem. Mbon oro ẹdibuanade ke “obufa isọn̄” ẹdi “akwa otu owo” eke “ẹtode ke kpukpru obio ye esien ye idụt ye usem.” (Ediyarade 7:9) Ẹtịn̄ ẹban̄a mmọ nte ‘ẹdade ke iso ebekpo ye ke iso Eyen-erọn̄, ẹsịnede mfia ọfọn̄idem.’ Mmọ ke ntem ẹnyene eti idaha ke iso Abasi ye Christ Jesus. Ke ẹkamade “ndak eyop ke ubọk,” mmọ ẹtoro Jehovah nte edinen Andikara ekondo, emi owụtde itie edikara esie ebe ke ukara Edidem esie oro ẹdoride ke ebekpo, Jesus Christ, kpa “Eyen-erọn̄ Abasi.”—John 1:29, 36.
8. Christ edinam nso ke ini en̄wan Gog, ye nso utịp?
8 En̄wan Gog ayanam Edidem emi Abasi odoride ke ebekpo anam n̄kpọ onyụn̄ an̄wana ekọn̄ Armageddon. (Ediyarade 16:14, 16) Ẹyesobo mbon oro ẹsịnde ndinyịme itie edikara Jehovah. Ke n̄kan̄ eken, mbon oro ẹyọde ukụt ke ntak edisọn̄ọ nda nnọ Obio Ubọn̄ Abasi ẹyenyene nsinsi ubọhọ. Apostle Paul ama ewet aban̄a emi ete: “Emi [edi] in̄wan̄-in̄wan̄ idiọn̄ọ edinen ikpe Abasi; man ẹbat ẹte mbufo ẹmedot ndidụk Obio Ubọn̄ Abasi, emi ẹkụtde ndutụhọ ẹban̄a enye; edieke enende Abasi ke enyịn ndida ukụt nsio usiene nnọ mmọ emi ẹsịnde mbufo ẹkụt ukụt, ndinyụn̄ nda nduọk-odudu nnọ mbufo emi ẹkụtde ukụt, kpa nte Enye edinamde ye nnyịn n̄ko, ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọ emi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus.”—2 Thessalonica 1:5-8.
9, 10. (a) Didie ke Jehovah akanam Judah ẹkan enyene-ndịk asua? (b) Nso ke ana mme Christian mfịn ẹka iso ẹnam?
9 Ke akwa ukụt oro edide, emi edisịmde utịt ke Armageddon, Christ ayan̄wana ọbiọn̄ọ kpukpru idiọkn̄kpọ. Edi idiyomke mme anditiene enye ẹn̄wana, idem kpa nte mîkoyomke mme andidụn̄ ke obio ubọn̄ esien iba eke Judah ẹn̄wana ke ediwak tọsịn isua oro ẹkebede. Ekọn̄ oro ekenyene Jehovah, ndien enye ama ọnọ edikan. N̄wetnnịm n̄kpọ oro okot ete: “Jehovah anam mbon-udịbe ẹbịne nditọ Ammon, ye Moab, ye eke obot Seir, emi ẹkedide ekọn̄ ye Judah; ndien mmọ ẹsuana. Ndien nditọ Ammon ye Moab ẹdaha ke enyọn̄ ẹn̄wana ekọn̄ ye mme andidụn̄ obot Seir, ẹnyụn̄ ẹwot ẹnyụn̄ ẹsobo mmọ: ndien ẹma ẹkesuan mme andidụn̄ obot Seir ẹma, kpukpru owo ufan anyan̄a ndisobo ufan. Ekem adan̄aemi Judah esịmde ke ọtọ-ukpeme ke wilderness, mmọ ẹkabade ẹse otu owo oro, ndien, sese, mmọ ẹyedi okpo-okpo emi ẹduọn̄ọde ke isọn̄; baba owo kiet ikonyụn̄ ibọhọke.”—2 Chronicles 20:22-24.
10 Ekedi ukem nte Jehovah ekebemde iso etịn̄ ete: “Mbufo ẹkûkpa ndin̄wana.” (2 Chronicles 20:17) Emi enịm uwụtn̄kpọ ọnọ mme Christian nditiene ke ini Jesus Christ ediwọrọde aka ‘ndidọdiọn̄ n̄kan.’ Kan̄a ke emi, mmọ ẹka iso ndin̄wana mbiọn̄ọ idiọkido, idaha ata ata n̄kpọekọn̄ in̄wana, edi ẹda mme n̄kpọekọn̄ eke spirit. Mmọ ke ntre “ẹda nti edinam ẹkan idiọk ubọk.”—Rome 6:13; 12:17-21; 13:12; 2 Corinth 10:3-5.
Anie Edida Iso ke En̄wan Gog?
11. (a) Mmanie ke Gog edida an̄wana ekọn̄ esie? (b) Nso ke ndidu ke edidemede ke n̄kan̄ eke spirit abuana?
11 Ẹnam ẹdiọn̄ọ Gog eke Magog nte Satan kpa Devil ke idiọk idaha esie toto ke 1914. Sia edide edibotn̄kpọ eke spirit, enye ikemeke ndin̄wana en̄wan esie nnennen nnennen, edi enye edida mme owo inam mme uduak esie. Mmanie ke mme owo emi ẹdidi? Bible inọhọ nnyịn ọyọhọ ntọt, edi enye ọnọ nnyịn ndusụk idiọn̄ọ oro ẹkemede ndin̄wam nnyịn ndidiọn̄ọ mbon emi mmọ ẹdidide. Nte mme n̄kpọntịbe ererimbot ẹdade itie ke ndisu mme ntịn̄nnịm ikọ Bible, sụn̄sụn̄ nnyịn iyenyene ifiọk oro an̄wan̄ade akan. Ikọt Jehovah ẹfep n̄kpọ oro ẹkerede-kere edi ẹdu ke edidemede ke n̄kan̄ eke spirit, ẹnen̄erede ẹwụk ntịn̄enyịn ke mme edinam ukaraidem ye eke ido ukpono oro ẹsan̄ade ẹkekem ye edisu ntịn̄nnịm ikọ Bible.
12, 13. Didie ke prọfet Daniel ekebem iso etịn̄ aban̄a akpatre en̄wan oro ẹdidade ẹtiene ikọt Abasi?
12 Prọfet Daniel esịn un̄wana ke akpatre en̄wan oro ẹdidade ẹtiene ikọt Abasi, ewetde ete: “Enye [edidem edem edere] ọyọwọrọ ke akwa ifụtesịt, ete isuan inyụn̄ isobo ediwak owo fap. Ndien enye oyowụk mme tent ebiet-idụn̄ esie ke ufan̄ mme [akamba inyan̄] ke ediye ye edisana obot.”—Daniel 11:44, 45.
13 Ke mme ini Bible, “akamba inyan̄” ekedi Akwa Inyan̄, m̀mê Mediterranean, ndien “edisana obot” ekedi Zion, emi Jehovah ọkọdọhọde ete: “Ndien edi ami mmenịm edidem mi ke enyọn̄ Zion edisana obot mi.” (Psalm 2:6; Joshua 1:4) Ntem, ke usụn̄ifiọk eke spirit, isọn̄ emi odude “ke ufan̄ [akamba inyan̄] ke ediye ye edisana obot” ada aban̄a uforo uforo idaha eke spirit mme Christian oro ẹyetde aran. Mmọ ẹmetre ndibuana ye inyan̄ ubonowo emi adian̄arede ọkpọn̄ Abasi, ndien mmọ ẹdori enyịn ndikara ye Christ Jesus ke Obio Ubọn̄ eke heaven. Nte an̄wan̄ade, mme asan̄autom Abasi oro ẹyetde aran, ọkọrọ ye akwa otuowo ẹdide mme anam-akpanikọ nsan̄a mmọ, ẹdidi iso en̄wan edidem edem edere ke ini enye ọtọn̄ọde ibak ibak en̄wan esie ke ndisu ntịn̄nnịm ikọ Daniel.—Isaiah 57:20; Mme Hebrew 12:22; Ediyarade 14:1.
Mme Asan̄autom Abasi Ẹdinam N̄kpọ Didie?
14. Nso n̄kpọ ita ke ikọt Abasi ẹdinam ke ini ẹdade en̄wan ẹtiene mmọ?
14 Nso ke ẹdidori enyịn mme asan̄autom Abasi ndinam ke ndondo oro ẹdade en̄wan ẹtiene mmọ? Ini kiet efen, nte idụt Abasi ke eyo Jehoshaphat ẹkenamde n̄kpọ enịm uwụtn̄kpọ. Tịm fiọk ete ke ẹkewụk nditọisọn̄ idụt oro ndinam n̄kpọ ita: (1) ndida ke itie mmọ, (2) ndisọn̄ọ nda, ye (3) ndikụt edinyan̄a Jehovah. Didie ke ikọt Abasi mfịn ẹdinam n̄kpọ ke n̄kemuyo ye mme ikọ emi?—2 Chronicles 20:17.
15. Nso ke ikọt Jehovah ndida ke itie mmọ ọwọrọ?
15 Ndida ke itie mmọ: Ye unana ediyok, ikọt Abasi ẹyeka iso ndida ke itie mmọ ke ndinọ Obio Ubọn̄ Abasi ọyọhọ ibetedem. Mmọ ẹyeka iso ndimụm idaha edida san̄asan̄a Christian mmọ n̄kama. Mmọ ‘ẹyesọn̄ọ ẹda, iyakke n̄kpọ esehede mmọ’ ke utom edinam akpanikọ oro mmọ ẹnamde ẹnọ Jehovah, ẹyenyụn̄ ẹka iso nditoro Jehovah an̄wan̄wa kaban̄a ima-mfọnido esie. (1 Corinth 15:58; Psalm 118:28, 29) Idụhe mfịghe idahaemi m̀mê eke ini iso oro ekemede ndinam mmọ ẹkpọn̄ idaha oro Abasi enyịmede mi.
16. Ke nso usụn̄ ke mme asan̄autom Jehovah ẹdisọn̄ọ ẹda?
16 Ndisọn̄ọ nda: Mme asan̄autom Jehovah ididomoke ndinyan̄a idemmọ edi ẹyekọn̄ ọyọhọ mbuọtidem mmọ ke Jehovah. Enye ikpọn̄ ekeme ndinyan̄a mme asan̄autom esie nsio ke ndutịme ererimbot, ndien enye ọn̄wọn̄ọ ndinam oro. (Isaiah 43:10, 11; 54:15; Eseme 3:26) Ndikọn̄ mbuọtidem ke Jehovah eyesịne ndikọn̄ mbuọtidem ke usụn̄ oro ẹkụtde ke enyịn mfịn, emi enye adade in̄wan̄-in̄wan̄ anam mme uduak esie ke se iwakde ibe isua ikie. Eyenen̄ede oyom mme Christian akpanikọ ẹkọn̄ mbuọtidem ke ekemmọ mme andituak ibuot emi Jehovah ye Edidem esie emi akarade ẹnọde odudu ndida usụn̄. Mme anam-akpanikọ iren emi ẹyeda ikọt Abasi usụn̄. Ndifụmi ndausụn̄ mmọ ekeme ndida nsịm afanikọn̄.—Matthew 24:45-47; Mme Hebrew 13:7, 17.
17. Ntak emi mme anam-akpanikọ asan̄autom Abasi ẹdikụtde edinyan̄a Jehovah?
17 Ndikụt edinyan̄a Jehovah: Edinyan̄a edidi utịp oro ẹnọde kpukpru mbon oro ẹmụmde nsọn̄ọnda Christian mmọ ẹkama, emi ẹnyụn̄ ẹberide edem ke Jehovah kaban̄a edinyan̄a. Tutu esịm akpatre ini—ndien adan̄a nte mmọ ẹkekeme—mmọ ẹyetọt edidi usen ubiereikpe Jehovah. Ana kpukpru edibotn̄kpọ ẹfiọk ẹte ke Jehovah edi Abasi akpanikọ ye nte ke enye enyene mme anam-akpanikọ asan̄autom ke isọn̄. Tutu amama, owo idifiakke ineni iban̄a unen itie edikara Jehovah.—Ezekiel 33:33; 36:23.
18, 19. (a) Didie ke ikwọ edikan ke Exodus ibuot 15 owụt nte editiede mbon oro ẹdibọhọde en̄wan Gog ke idem? (b) Nso ke odot ikọt Abasi ẹnam idahaemi?
18 Ikọt Abasi ẹdida obufa odudu ẹdụk obufa ererimbot, ẹkopde nduaidem ndikwọ ikwọ edikan, kpa nte nditọ Israel eset ẹkekwọde ke ẹma ẹkenyan̄a mmọ ẹsio ke Ididuot Inyan̄. Ke ndiwụt esịtekọm nnọ Jehovah mban̄a ukpeme esie, mmọ nte owo kiet kiet ye nte otu ẹyetịn̄ mme ikọ oro ẹketịn̄de ke anyan ini ko ẹte: “Nyọkwọ nnọ Jehovah, koro enye okon̄de. . . . Jehovah edi owo ekọn̄, Jehovah edi enyịn̄ esie. . . . Ubọk nnasia fo, O Jehovah, amanuak mme asua fo mbai-mbai. Afo omonyụn̄ ada akwa ubom ubọn̄ fo abiat mmọ emi ẹn̄wanade ye afo: afo ọdọn̄ iyatesịt fo utom: enye [ata] mmọ nte etak nnyanyan̄a. . . . Ima fo esịn fi ada ikọt emi afo akafakde, ọwọrọ; ada odudu fo eteme mmọ usụn̄ edisana ebiet fo. . . . Afo ayada mmọ odụk, onyụn̄ ọtọ mmọ ke obot emi afo enyenede, ebiet emi afo anamde ete edi idụn̄ fo, O Jehovah, edisana ebiet emi ubọk fo owụkde, O Ọbọn̄. Jehovah ayada ubọn̄ ke nsinsi.”—Exodus 15:1-19.
19 Idahaemi, ye idotenyịn nsinsi uwem ayamade akan nte akanam ayamade, nso ifet ke mme asan̄autom Abasi ẹnyene ntem ndiwụt ima oro mmọ ẹmade Jehovah ndinyụn̄ mfiak nsọn̄ọ ubiere mmọ ndinam n̄kpọ esie nte nsinsi Edidem mmọ.—1 Chronicles 29:11-13.
Nte Afo Emekeme Ndinam An̄wan̄a?
• Ntak emi Gog edidade ekọn̄ etiene mbon oro ẹyetde aran ye mme erọn̄ en̄wen?
• Didie ke ikọt Abasi ẹdida ke itie mmọ?
• Nso ke ndisọn̄ọ nda ọwọrọ?
• Didie ke ikọt Abasi ẹdikụt edinyan̄a Jehovah?
[Mme Mbụme Ukpepn̄kpọ]
[Ndise ke page 18]
Jehovah ama ọnọ Jehoshaphat ye ikọt esie edikan, ndien ikoyomke mmọ ẹn̄wana
[Ndise ke page 20]
Mbon oro ẹyetde aran ye mme erọn̄ en̄wen ẹbuana ke ndida nnọ itie edikara Jehovah
[Ndise ke page 22]
Nte nditọ Israel eset, ibịghike ikọt Abasi ẹyekwọ ikwọ edikan