Enọ Oro Enemde Abasi Esịt

JESUS ye mme mbet esie ọkọrọ ye mme n̄kpet n̄kpet ufan esie, esịnede Mary, Martha, ye Lazarus oro ẹkenamde eset ke ndondo oro, ke ẹkedia inem inem udia ke Bethany. Ke ini Mary akadade ọsọn̄urua aran oro odobide ke pound kiet eyet Jesus ukot, Judas Iscariot ama okop iyatesịt. Enye ama obụp ete: “Nsinam mîkanyamke edifuọn̄ aran emi ibọ okụk ikie ita [emi edide ukem ye n̄kpọ nte okụkutom isua kiet], ida inọ mme ubuene?” Mbon en̄wen ẹma ẹsọsọp ẹbụp ukem mbụme oro.—John 12:1-6; Mark 14:3-5.

Nte ededi, Jesus ama ọbọrọ ete: “Ẹkpọn̄ enye; . . . Koro mbufo ẹmenyene mme ubuene ye mbufo kpukpru ini, ndien ini eke ẹmama, mbufo [ẹmekeme] ndifọn ido ye mmọ, edi mbufo inyeneke Mi kpukpru ini.” (Mark 14:6-9) Mme adaiso ido ukpono mme Jew ẹkekpep ẹte ke ndinọ enọ mfọn ikodotke itoro kpọt edi ama akam ekeme ndisio isop idiọkn̄kpọ. Ke n̄kan̄ eken, Jesus ama anam an̄wan̄a nte ke enọ oro enemde Abasi esịt ikụreke sụk ke ndifọn mfọn ye mme ubuene.

Edidụn̄ọde ibio ibio mban̄a usụn̄ oro ẹkesinọde enọ ke akpa esop Christian oyowụt ndusụk nti usụn̄ oro nnyịn ikemede ndiwụt edikere mban̄a ndien ke ntre idade enọ nnyịn inem Abasi esịt. Enye oyowụt n̄ko n̄wọrọnda orụk enọ oro enyenede n̄kponn̄kan ufọn.

Ẹnọ “Enọ Mbọm”

Ke ediwak idaha, Jesus ama esịn udọn̄ ọnọ mme mbet esie ndinọ “enọ mbọm,” m̀mê nte edikabade efen esịnde ubak udịmikọ emi, ‘ndifọn mfọn.’ (Luke 12:33, NW; New English Bible) Nte ededi, Jesus ama odụri owo utọn̄ ọbiọn̄ọ enọ n̄wụtidem emi uduak ekedide n̄kukụre man ẹkpono andinọ utu ke Abasi. Enye ọkọdọhọ ete: “Ke ini ọnọde eyen ubuene n̄kpọ [“enọ mbọm,” NW], kûtan̄ [ase], nte mbio mbubịk ẹnamde ke mme synagogue ye mme efak, ẹte owo ẹkpono mme imọ.” (Matthew 6:1-4) Ke ẹdade item emi ẹsịn ke edinam, akpa mme Christian ẹma ẹfep mme enọ n̄wụtidem eke mme adaiso ido ukpono eyo mmọ oro ẹkenịmde idem ke edisana, ẹma ẹnyụn̄ ẹmek ndin̄wam mbon unana ebe ke ndinam n̄kpọ nnọ mmọ m̀mê ndinọ mmọ enọ ke ndịbe.

Ke uwụtn̄kpọ, ẹsian nnyịn ke Luke 8:1-3 ẹte ke Mary Magdalene, Joanna, Susanna, ye mmọ eken ẹma ‘ẹda se mmọ ẹnyenede’ ẹse ẹban̄a Jesus ye mme apostle esie ye unana edisio idem  etop. Okposụkedi iren emi mîkananake n̄kpọ, mmọ ẹma ẹkpọn̄ mme n̄kpọ udu uwem mmọ man ẹsịn ofụri ukeme mmọ ke utom ukwọrọikọ. (Matthew 4:18-22; Luke 5:27, 28) Ke ndin̄wam mmọ ẹkụre utom oro Abasi ọkọnọde mmọ, iban emi ẹkekam ẹnọ Abasi ukpono. Ndien Abasi ama owụt unyịme esie ke nditịm n̄wetnnịm n̄kpọ aban̄ade enọ mbọm mmọ nnịm ke Bible man kpukpru emana ini iso ẹkpekot.—Mme N̄ke 19:17; Mme Hebrew 6:10.

Dorcas ekedi ọfọnido an̄wan efen emi ‘ọkọyọhọde ye nti utom ye ntatubọk [“enọ mbọm,” NW]. Enye ama esikịm ọfọn̄ ọnọ mme ubuene ebeakpa ke Joppa emi edide obio mben inyan̄ oro enye okodụn̄de. Nnyịn ifiọkke m̀mê enye ekesida okụk esie edep mme ọfọn̄ oro m̀mê enye n̄kukụre ekesikekịm ọnọ mmọ ke mfọn. Nte ededi, eti utom esie ama anam mbon oro enye akan̄wamde, ọkọrọ ye Abasi, emi akatuade enye mbọm onyụn̄ ọdiọn̄de enye ke mfọnido esie, ẹma enye.—Utom 9:36-41.

Nnennen Uduakesịt Edi Akpan N̄kpọ

Nso ikonụk mme owo emi ndinọ enọ? Ikedịghe ikpîkpu udọn̄ emi esịtmbọm onụkde ndinọ un̄wam. Mmọ ẹma ẹkụt ke obiomo mmimọ ke idem ndinam se ikemede ke usen kiet kiet ndin̄wam mbon unana, mbon oro ẹdude ke afanikọn̄, ẹdọn̄ọde, m̀mê mbon oro ẹsobode mme mfịna eken. (Mme N̄ke 3:27, 28; James 2:15, 16) Orụk edinọ enọ emi enem Abasi esịt. Ntotụn̄ọ ima oro ẹnyenede ẹnọ Abasi ye udọn̄ ndikpebe edu mbọm ye ntatubọk esie ẹdi akpan n̄kpọ oro ẹnụkde mme owo ndinọ enọ.—Matthew 5:44, 45; James 1:17.

Apostle John ama osio akpan ikpehe edinọ enọ emi owụt ke ini enye okobụpde ete: “Owo eke enyenede inyene ererimbot emi, onyụn̄ okụtde eyen-ete esie ke unana, onyụn̄ eberide mbọm abaha enye, ima Abasi ekeme didie ndidụn̄ owo oro ke esịt?” (1 John 3:17) Ibọrọ ana in̄wan̄-in̄wan̄. Ima oro mme owo ẹmade Abasi esinụk mmọ ndinọ enọ mfọn. Abasi esiwụt esịtekọm onyụn̄ ọnọ mmọ emi ẹkpebede edu ntatubọk esie, utịp. (Mme N̄ke 22:9; 2 Corinth 9:6-11) Ndi nnyịn imokụt utọ edu ntatubọk emi mfịn? Kere ban̄a se iketịbede ke esop Mme Ntiense Jehovah kiet ke ndondo emi.

Ufọk akanian̄wan Christian kiet ama abiara idiọk idiọk ama onyụn̄ oyom ẹsọsọp ẹdiọn̄. Enye okodụn̄ ikpọn̄ ikonyụn̄ inyeneke ubon ndin̄wam enye. Ke mme isua emi ẹbede, ẹkesida ufọk esie ẹnịm mme mbono esop Christian, ndien enye ama esiwak ndibuana udia ndia ye owo ekededi oro akamade ndidia. (Utom 16:14, 15, 40) Ke ẹkụtde nnanenyịn esie, mme andibuana ke esop ẹma ẹdiana kiet ẹn̄wam enye. Ndusụk owo ẹma ẹtịp okụk ke adan̄aemi mbon eken ẹken̄wamde ke utom. Ke utịturua ifan̄, mbonutom unyịmesịt ẹma ẹdori obufa ọkọm, ẹbọp obufa itie uyere mmọn̄, ẹyọn̄ọ ẹnyụn̄ ẹyet ndom ke ofụri akpa ufọkenyọn̄ oro, ẹnyụn̄ ẹkọn̄ mbufa n̄kpọ udọn̄n̄kpọ ke itie utem udia. Edinọ mmọ ikoyụhọke udọn̄ n̄wan emi kpọt edi n̄ko ama anam esop ẹtetịm  ẹdiana kiet ndien uwụtn̄kpọ enọ mme Christian akpanikọ emi ama otụk mme mbọhọidụn̄.

Ediwak usụn̄ ẹdu oro nnyịn ke idem nnyịn ikemede ndin̄wam mbon en̄wen. Ndi nnyịn imekeme ndibiat ini ye eyenakpa? Ndi nnyịn imekeme ndin̄wam ndidep n̄kpọ ke urua nsọk m̀mê ndikịm ọfọn̄ nnọ akanian̄wan ebeakpa oro nnyịn idiọn̄ọde? Ndi nnyịn imekeme nditem udia nnọ m̀mê ndin̄wam ndise mban̄a ubiatokụk owo oro enyenede esisịt okụk? Nnyịn inyeneke ndidi mme imọ owo mbemiso inọde un̄wam. Apostle Paul ekewet ete: “Edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” (2 Corinth 8:12) Nte ededi, ndi utọ ọkpọkpọ enọ oro edi n̄kukụre enọ oro Abasi edidiọn̄de? Baba-o.

Nso Kaban̄a Edinam Ndutịm man Ẹnọ Un̄wam?

Ndusụk ini ọkpọkpọ un̄wam isikemke. Ke akpanikọ, Jesus ye mme apostle esie ẹma ẹsinyene ekpat okụk ndida n̄n̄wam mme ubuene, ẹma ẹsinyụn̄ ẹbọ etịbe ẹto mbon esịtmbọm oro mmọ ẹkesobode ke utom mmọ. (John 12:6; 13:29) Kpasụk ntre, mme esop akpa isua ikie ẹma ẹsitịp etịbe ke ini okoyomde ẹnam oro ẹnyụn̄ ẹnam ndutịm unọ un̄wam ke akamba udomo.—Utom 2:44, 45; 6:1-3; 1 Timothy 5:9, 10.

Utọ idaha oro ama edemede ke 55 E.N. Mme esop ke Judea ẹkedu ke unana, ndusụk ke ntak akamba akan̄ oro okodude ke ndondo oro. (Utom 11:27-30) Apostle Paul emi ekesikerede aban̄a mme ubuene kpukpru ini ama oyom un̄wam oto mme nsannsan esop oro ẹkedude ke Macedonia. Enye ke idemesie ama anam ndutịm man ẹtịp etịbe onyụn̄ ọnọ iren oro ẹdotde ndida nsọk mmọ. (1 Corinth 16:1-4; Galatia 2:10) Enye m̀mê mbon eken oro ẹkesede ẹban̄a etịbe emi ikadaha okụk do ikpe idemmọ.—2 Corinth 8:20, 21.

Mme Ntiense Jehovah mfịn ẹsisọp ndinọ un̄wam ke ini afanikọn̄ etịbede. Ke uwụtn̄kpọ, ke ndaeyo eke 2001, ọkpọsọn̄ edịm oro akasan̄ade ye oyobio ama anam akwa ukwọ ọtọ emen Houston, Texas, ke U.S.A. Ke ofụri ofụri, ufọk 723 emi ẹkenyenede Mme Ntiense ẹma ẹbiara ke ndusụk udomo, ediwak ẹbiarade ata idiọk idiọk. Ẹma ẹsọsọp ẹtịm kọmiti unọ un̄wam ini afanikọn̄ emi ekesịnede mbiowo Christian oro ẹdotde, ndidụn̄ọde mfiọk se owo kiet kiet oyomde nnyụn̄ nnọ etịbe man Mme Ntiense n̄kann̄kụk ẹse ẹban̄a idaha oro ẹnyụn̄ ẹdiọn̄ mme ufọk mmọ. Mbonutom unyịmesịt ẹtode mme n̄kpet n̄kpet esop oro ẹkenam kpukpru utom oro. Ntiense kiet ama enen̄ede owụt esịtekọm aban̄a un̄wam emi tutu ke ini enye ọkọbọde okụk oto usiakifia insurance ke se enye akabiatde ọdiọn̄ ufọk esie, enye ama ọsọsọp ayak okụk oro ọnọ man ẹkeme ndida n̄n̄wam mbon efen oro ẹkeyomde un̄wam.

 Nte ededi, ke ini edide edisịm editịp etịbe nnọ n̄ka unam ufọn, oyom nnyịn idu ke ukpeme ke ini ẹdọhọde nnyịn inọ enọ unam ufọn. Ediwak n̄ka unam ufọn ẹsibiat ekese okụk ndise mban̄a mbonutom mmọ m̀mê ndisuan etop mben̄e okụk, anamde esisịt okụk ọyọhọ osụhọ ndida nse mban̄a akpan uduak oro ẹketịpde okụk emi ẹnọ. Mme N̄ke 14:15 ọdọhọ ete: “Ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.” Ntre owụt eti ibuot nditịn̄ enyịn ndụn̄ọde idaha oro odude.

Enọ Oro Enyenede N̄kponn̄kan Ufọn

Odu orụk enọ oro akam edide akpan n̄kpọ akan unam ufọn. Jesus ama etịn̄ aban̄a emi ke ini akparawa edide owo inyene ye andikara okobụpde m̀mê imọ ikpanam nso man inyene nsinsi uwem. Jesus ọkọdọhọ enye ete: “Ka kanyam se enyenede, da nọ mme ubuene, ndien eyenyene inyene ke heaven: nyụn̄ di disan̄a ye Ami.” (Matthew 19:16-22) Tịm fiọk ete ke Jesus ikakam idọhọke, ‘Da nọ mme ubuene ndien afo eyenyene uwem.’ Utu ke oro, enye ama adian do ete: “Nyụn̄ di disan̄a ye Ami.” Ke ikọ efen, okposụkedi mme edinam mfọn ẹdotde itoro ẹnyụn̄ ẹnyenede ufọn, edidi mbet Christian abuana se ikande oro.

Akpan udọn̄ Jesus ekedi ndin̄wam mbon en̄wen ke n̄kan̄ eke spirit. Enye ama asian Pilate esisịt ini mbemiso n̄kpa esie ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.” (John 18:37) Okposụkedi enye akadade usụn̄ ke ndin̄wam mme ubuene, ndinam mbon udọn̄ọ ẹkop nsọn̄idem, ndinyụn̄ nnọ mbon ọbiọn̄ udia, Jesus ekenen̄ede ekpep mme mbet esie ndikwọrọ ikọ. (Matthew 10:7, 8) Ke nditịm ntịn̄, ewụhọ emi ama esịne ke otu mme akpatre item oro enye ọkọnọde mmọ: “Mbufo ẹka ẹkenam kpukpru mme idụt ẹdi mbet Mi.”—Matthew 28:19, 20.

Nte ededi, ukwọrọikọ idikọkke kpukpru mfịna ererimbot. Edi, ndibuana eti mbụk Obio Ubọn̄ Abasi ye kpukpru orụk owo ọnọ Abasi ukpono koro ukwọrọikọ ọyọhọ uduak Abasi onyụn̄ eberede usụn̄ nsinsi ufọn ọnọ mbon oro ẹnyịmede etop Abasi emi. (John 17:3; 1 Timothy 2:3, 4) Ntak mûkpan̄ke utọn̄ unọ Mme Ntiense Jehovah isan̄ efen emi mmọ ẹwahade ufọk fo? Mmọ ẹda enọ eke spirit ẹsọk fi. Mmọ ẹnyụn̄ ẹfiọk ẹte ke emi edi mfọnn̄kan usụn̄ oro mmimọ ikemede ndin̄wam fi.

[Mme ndise ke page 6]

Ediwak usụn̄ ẹdu ndiwụt nte ke nnyịn imekere iban̄a

[Ndise ke page 7]

Nnyịn ndikwọrọ eti mbụk enem Abasi esịt onyụn̄ eberede usụn̄ ọnọ nsinsi ufọn