Mme Mbụme Ẹtode Mme Andikot

Ndi Akwan̄a Ndiwot Ufene Oro Enen̄erede Ọdọn̄ọ m̀mê Oro Ọsọn̄de?

Ata ediwak owo ẹsima nsio nsio unam ẹnyụn̄ ẹda mmọ nte se inọde inemesịt. Ndusụk ufene ẹsikabade ẹdi nti nsan̄a oro ẹmade. Ke uwụtn̄kpọ, ẹdiọn̄ọ ke mme ebua ẹsikop uyo ẹnyụn̄ ẹnen̄ede ẹma mme andinyene mmọ. Ntem, an̄wan̄a ntak emi mme owo ẹkemede ndinen̄ede mma utọ ufene oro, akpan akpan ufene oro mmọ ẹma ẹkenyene ke ediwak isua.

Nte ededi, ata ediwak ufene isibịghike uwem. Mme ebua ye mme an̄wa ẹkeme ndidu uwem isua 10 esịm 15, etienede orụk ebua m̀mê an̄wa. Ke ẹma ẹkesọn̄, mme ufene ẹkeme ndidọn̄ọ nnyụn̄ mbiomo ndo ndien emi ekeme ndibiak mme andinyene mmọ, ke ẹtide ini emi mme ufene emi ẹkedide n̄kpri ẹnyụn̄ ẹnyenede odudu. Ndi akpakwan̄a ndiwot mmọ man ẹtre ubiak mmọ?

Oyom Christian anam n̄kpọ ke n̄kemuyo ye uduak Abasi ke ini anamde n̄kpọ ye mme unam. Ke akpanikọ, ndifiomo mmọ atuaha ye uduak Abasi, koro Ikọ esie ọdọhọ ete: “Eti owo ekere uwem unam esie.” (Mme N̄ke 12:10) Nte ededi, emi iwọrọke ite ke Abasi ada mme unam nte enye adade mme owo. Ke ini Abasi okobotde mme owo, enye ama owụt nte ke in̄wan̄-in̄wan̄ ukpụhọde odu ke ufọt mmọ ye mme unam. Ke uwụtn̄kpọ, enye ama ọnọ mme owo idotenyịn nsinsi uwem, edi enye ikọnọhọ mme unam idotenyịn emi. (Rome 6:23; 2 Peter 2:12) Sia edide Andibot, enye enyene unen ndibiere se idide nnennen ebuana ke ufọt mme owo ye mme unam.

Genesis 1:28 asian nnyịn ebuana oro. Abasi ọkọdọhọ akpa owo iba oro ete: “Ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.” Kpasụk ntre, Psalm 8:6-8 ọdọhọ ete: “[Abasi] ada kpukpru n̄kpọ adak [owo] ke ukot; n̄kpri ufene, ye kpukpru enan̄, ye mme unam ikọt nde; inuen enyọn̄, ye iyak ke mmọn̄, emi ẹsan̄ade ke usụn̄ inyan̄ ẹbe.”

Abasi ama anam an̄wan̄a nte ke owo ekeme ndiwot unam nnyụn̄ nda enye nnam n̄kpọ nte odotde. Ke uwụtn̄kpọ, ẹkeme ndida ikpa unam nnam edisịnen̄kpọ. Abasi n̄ko ama enyịme mme owo ẹta unam ke Ukwọ eyo Noah ama ekebe, ke adianade ye ikọn̄ oro ẹkebemde iso ẹnọ mmọ.—Genesis 3:21; 4:4; 9:3.

Emi inyịmeke ebe-ubọk ediwot mme unam nte mbre. Ke Genesis 10:9 (NW), Bible okot Nimrod “akwa ata-utop.” Ufan̄ikọ oro ọdọhọ n̄ko ete ke emi ama anam enye ‘ọbiọn̄ọ Jehovah.’

Ntem, ke adan̄aemi owo akarade mme unam, enye ikpadaha odudu ukara oro inam n̄kpọ ke idiọk usụn̄ edi akpada anam n̄kpọ ke n̄kemuyo ye mme edumbet Ikọ Abasi. Emi ekeme ndisịne nditre ndiyak ufene ọbọ ufen nte mîdotke ke ntak enen̄erede ọsọn̄, adade akwa unan, m̀mê ọdọn̄ọde udọn̄ọ n̄kpa. Ke utọ idaha oro, edi mbiomo Christian ndibiere se enye edinamde. Edieke enye ebierede ke oyowụt mbọm nditre ndiyak ufene aka iso ọbọ ufen ye unana idotenyịn ke ufene oro oyokop nsọn̄idem, do enye ekeme ndimek ndiwot enye.