Nso Itịbe inọ Edifọn Mfọn?

KE EDINAM oyomonsia ama eketịbe ke New York City ye Washington, D.C. ke September 11, 2001, un̄wam oro mme owo ẹkenọde mbon unọmọ n̄kpọ mmọn̄eyet oro ekedi n̄wọrọnda. Idem ama akpa mme n̄ka unam ufọn ndibọ $2.7 biliọn oro ẹketịpde man ẹda ẹse ẹban̄a mme ubon mbon unọmọ oro. Ke ẹkopde mfụhọ ẹban̄a udomo n̄kpọ oro ẹketabade, ama ọdọn̄ mme owo ke kpukpru ebiet ndin̄wam.

Nte ededi, ndusụk owo ẹma ẹsọsọp ẹkop idiọkesịt ke ini ẹkedide ẹdifiọk ẹte ke mme n̄ka unam ufọn oro ẹtịmde ẹdiọn̄ọ ikadaha okụk oro ẹketịpde inam n̄kpọ nte odotde. Ekese ndutịme ẹma ẹdu ke ini ẹketọtde ẹte ke akamba n̄ka unam ufọn kiet ama aduak ndimụm se ikperede ndisịm mbahade iba ke otu $546 miliọn oro enye ọkọbọde nnịm man ada anam mme n̄kpọ efen. Okposụkedi n̄ka oro ke ukperedem okokpụhọrede ekikere onyụn̄ ekpede ubọk, ọkọmbụk n̄kpọntịbe kiet ama ọdọhọ ete: “Mme okụt ndudue ẹse edikpụhọde ekikere emi nte mmanyan̄a emi ama ọkọdọduọhọ ke obu ye se mînyụn̄ inyeneke ufọn ndinam mme owo ẹfiak ẹnyene mbuọtidem oro mmọ ẹkenyenede ke n̄ka emi” mbemiso edinam oyomonsia oro. Nso kaban̄a fi? Ndi n̄kpọ anam enyene eyịghe aban̄a mme n̄ka unam ufọn ndondo emi?

Ndi Ẹda Ẹnam Ufọn m̀mê Ẹbabaha?

Ẹsiwak ndida edinọ mme n̄ka unam ufọn enọ nte se idotde itoro. Edi idịghe kpukpru owo ẹda enye ntre. Ke se ikande isua 200 emi ẹkebede, ewetn̄wed owo England oro Samuel Johnson ekewet ete: “Afo emetịm enịm ke akpanikọ ke anam eti n̄kpọ ke ini afo ekpede mbon oro ẹnamde utom okụk nte utịp utom mmọ, akan ke ini afo ọnọde n̄ka unam ufọn okụk.” Ndusụk owo mfịn ẹnyene ukem ekikere oro, ndien mme ntọt ẹwụtde nte mme n̄ka unam ufọn ẹdade okụk oro mme owo ẹtịpde ẹnam n̄kpọ ke idiọk usụn̄ ẹbiat mbuọtidem oro mme owo ẹnyenede ke idem mmọ. Kere ban̄a uwụtn̄kpọ iba eke ndondo emi.

Ẹma ẹbịn adausụn̄ n̄ka unam ufọn ido ukpono kiet ke San Francisco ke ntak oro enye ọkọdọhọde n̄ka oro ekpe okụk oro enye akabiatde anam usiakidem uyai ye okụk udia edide $500 oro enye ekesidiade ke itie unyamudia ke urua kiet kiet ke ufan̄ isua iba. Ke Britain, bụt ama anam mme anditịm akpan edinam ekebe ndise aban̄ade unam ufọn ke ini ẹkedide ẹdifiọk ẹte ke otu pound 6.5 miliọn  (n̄kpọ nte $10 miliọn, U.S.), oro ẹkenọde man an̄wam ke ndida mbọp itie ubọk nditọakpa ke Romania, ufọk 12 kpọt oro mîkemke ye se ẹkeyomde ke ẹkebọp ke adan̄aemi owo mîkekemeke nditịn̄ se ẹkedade ediwak tọsịn dollar oro ẹkebiatde, ẹnam. Ndiọi ntọt nte mmọ emi ẹnen̄ede ẹnam ndusụk mme etịp okụk ẹtetịm ẹdu ke ukpeme ẹban̄a adan̄a ibat okụk emi mmọ ẹtịpde ye mbon emi mmọ ẹtịpde ẹnọ.

Ndinọ m̀mê Nditre Ndinọ

Nte ededi, ekpedi n̄kpọ mfụhọ ndikpayak edinam ibat ibat owo m̀mê mme n̄ka abiat ata edikere mban̄a ye esịtmbọm oro nnyịn inyenede iban̄a mbon en̄wen. Bible ọdọhọ ete: “Ido Abasi eke asanade, mînyụn̄ ideheke ke iso Abasi Ete nnyịn edi, ndisan̄a nse nditọ-akpa ye mme ebe-akpa ke ukụt mmọ.” (James 1:27) Ih, ndinen̄ede n̄kere mban̄a mme ubuene ye mbon nnanenyịn edi akpan ikpehe Ido Ukpono Christ.

Edi, afo emekeme ndikere, ‘Ndi akpana n̄ka iso ndinọ n̄ka unam ufọn enọ, mîdịghe ndi n̄kpakam ndomo ndida enọ mi n̄n̄wam mme owo?’ Nso orụk enọ ke Abasi enyịme? Ibuotikọ oro etienede eyeneme mme mbụme emi.