‘Solomon Ikesịneke Se Iyede nte Kiet ke Otu Mmọ’

MME utọ flawa ikọt oro ẹkụtde mi ẹdi ọsọ n̄kpọ ke mbenusụn̄ n̄kan̄ edem usụk Africa. Ẹkot mmọ cosmos ndien mmọ ẹkebem iso ẹdu ke ufiop ufiop ikpehe America. Utọ ndiye flawa oro ẹkeme nditi nnyịn n̄kpọ oro Jesus ekekpepde. Ediwak owo ke otu mbon oro ẹkekopde ikọ esie ẹkedi ubuene, ndien mmọ ẹma ẹsitịmede esịt ẹban̄a mme n̄kpọ eke obụk oro mmọ ẹkeyomde, oro edi udia ye edisịnen̄kpọ.

Jesus ama obụp ete: “Nsinyụn̄ idi ntak eke mbufo ẹtịmerede esịt mbufo ẹban̄a edisịne-n̄kpọ? Ẹkere ekpọn̄idịm ke ikọt nte mmọ ẹkọride; mmọ inamke ọkpọsọn̄ utom, inyụn̄ ifiakke ndidi: edi ndọhọ mbufo nte, kpa Solomon ke ofụri ubọn̄ esie ikesịneke se iyede nte kiet ke otu mmọ.”—Matthew 6:28, 29.

Ẹnọ nsio nsio ekikere ẹban̄a akpan orụk flawa ikọt emi Jesus eketịn̄de aban̄a. Nte ededi, Jesus ama aka iso ndimen enye ndomo ye ikpîkpụ mbiet, ọdọhọde ete: “Edi edieke Abasi esịnede mbiet in̄wan̄ n̄kpọ ntem, kpa mbiet eke odude mfịn, ndien n̄kpọn̄ ẹmen ẹsịn ke usan̄-uyo, nte Enye idisịneke mbufo n̄kpọ ikan, O mbufo nditọ ekpri mbuọtidem?”—Matthew 6:30.

Okposụkedi cosmos mîdụhe ke Israel, mmọ ẹnen̄ede ẹsọn̄ọ n̄kpọ oro Jesus ekekpepde. Edide ẹda nsannsan ẹse m̀mê ẹnenen̄ede ẹsan̄a ẹkpere, mmọ ẹye etieti ẹnyụn̄ ẹdi flawa oro mme osio ndise ye mme ewet ndise ẹmade. Ke akpanikọ, Jesus ikokponke inuaikọ ke ini enye ọkọdọhọde ete: “Kpa Solomon ke ofụri ubọn̄ esie ikesịneke se iyede nte kiet ke otu mmọ.”

Nso ke emi ekpep nnyịn mfịn? Mbon oro ẹnamde n̄kpọ Abasi ẹkeme nditịm nnịm nte ke enye ayan̄wam mmimọ inyene mme n̄kpọ oro iyomde idem ke ini nsọn̄ọn̄kpọ. Jesus ama anam an̄wan̄a ete: “Ẹkam ẹyom Obio Ubọn̄ Abasi, ndien ẹyedian mme n̄kpọ emi [utọ nte udia ye edisịnen̄kpọ oro ẹyomde] ẹnọ mbufo.” (Luke 12:31) Ih, mme ata ufọn ẹto ediyom Obio Ubọn̄ Abasi. Edi ndi afo ọmọfiọk se Obio Ubọn̄ Abasi edide ye se enye edinamde ọnọ ubonowo? Mme Ntiense Jehovah ẹyedat esịt ndin̄wam fi enyene ibọrọ oto Bible.