Mme Mbụme Ẹtode Mme Andikot

Nte Satan kpa Devil enyene ukeme ndifiọk ekikere esịt owo?

Okposụkedi nnyịn mîkemeke ndisọn̄ọ ntịn̄, etie nte Satan m̀mê mme demon esie inyeneke ukeme ndifiọk se idude nnyịn ke ekikere.

Kere ban̄a mme enyịn̄ oro ẹkotde Satan. Ẹkot enye Satan (Andibiọn̄ọ), Devil (Ọdọk-Edidọk), Urụkikọt (emi edide ukem n̄kpọ ye Andibian̄a), Andidomo, ye Osu Nsu. (Job 1:6; Matthew 4:3; John 8:44; 2 Corinth 11:3; Ediyarade 12:9) Idụhe ndomokiet ke otu mme enyịn̄ ẹkotde Satan mi oro owụtde ke enye enyene ukeme ndifiọk ekikere esịt owo.

Nte ededi, ke ndiwụt ukpụhọde oro odude, ẹkot Jehovah Abasi ‘andidomo esịt owo.’ (Mme N̄ke 17:3; 1 Samuel 16:7; 1 Chronicles 29:17) Mme Hebrew 4:13 ọdọhọ ete: “Baba n̄kpọ kiet eke edịbede Enye ke enyịn inyụn̄ idụhe; edi kpukpru n̄kpọ ẹna iferi ye ata in̄wan̄-in̄wan̄ ke enyịn Abasi, emi nnyịn isan̄ade n̄kpọ ye Enye.” Idịghe n̄kpọ n̄kpaidem Jehovah ọnọde Jesus Eyen esie ukeme ndidụn̄ọde esịt. Jesus oro ẹkenamde eset ọkọdọhọ ete: “Ami ndi Andidụn̄ọde ekpụt ye esịt; nyonyụn̄ nnọ kpukpru mbufo kiet kiet nte ekemde ye utom mbufo.”—Ediyarade 2:23.

Bible idọhọke ke Satan ekeme ndidụn̄ọde esịt ye ekikere owo. Emi edi akpan n̄kpọ sia apostle Paul ọnọde nnyịn nsọn̄ọ ete ke mme Christian ‘inanake ifiọk iban̄a n̄kari ye n̄kukan Satan.’ (2 Corinth 2:11) Ntre inaha nnyịn ikop ndịk nte ke Satan enyene n̄wọrọnda ukeme oro nnyịn inanade ifiọk ofụri ofụri iban̄a.

Kpa ye oro, emi iwọrọke ite ke Asua nnyịn emi ikemeke ndifiọk mme mmeme nnyịn. Satan ada ediwak isua ekpep usụn̄ oro mme owo ẹsinamde n̄kpọ. Idịghe tutu enye ọfọfiọk mme ekikere owo mbemiso enye ekemede ndifiọk usụn̄ ye edu unamn̄kpọ nnyịn, usụn̄ unọ idem inemesịt oro nnyịn imade, m̀mê mbemiso ekemede ndikpan̄ utọn̄ n̄kop se nnyịn itịn̄de, ye mme n̄kpọ ntre eken. Nte nnyịn inịmde iso ye nte ikamade idem ẹkeme ndinọ enye ifiọk mban̄a se nnyịn ikerede m̀mê nte etiede nnyịn ke idem.

Nte ededi, ke ofụri ofụri, Satan esida ukem usụn̄ oro enye akadade anam n̄kpọ ke in̄wan̄ Eden—nsu, abian̄a, ye ukwan̄ ekikere. (Genesis 3:1-5) Ke adan̄aemi mme Christian mîkpokopke ndịk ke Satan ọyọfiọk ekikere mmimọ, oyom mmọ ẹkere m̀mê nso ekikere ke Satan edidomo ndisịn mmimọ ke esịt. Enye oyom ‘ekikere mme Christian abiara, akpanikọ onyụn̄ ọbọhọ mmọ.’ (1 Timothy 6:5) Eyịghe idụhe ererimbot Satan osion̄ode akpakịp mbiara ntọt ye usụn̄ unọ idem inemesịt edi. Man ẹkeme ndikan ke en̄wan emi, ana mme Christian ẹkpeme ekikere mmọ ebe ke ndiyara “edinyan̄a nte ndụn ke ibuot.” (Ephesus 6:17) Mmọ ẹnam emi ebe ke ndinam akpanikọ Bible ọyọhọ ekikere mmọ ndinyụn̄ mfep ndiọi odudu ererimbot Satan.

Satan edi ata idiọk asua. Edi iyomke nnyịn iyomo nsia iban̄a enye m̀mê mme demon esie. James 4:7 ọnọ nnyịn nsọn̄ọ emi ete: “Ẹn̄wana ye Satan, ndien enye eyefehe ọkpọn̄ mbufo.” Edieke nnyịn inamde item emi, ukem nte Jesus, nnyịn iyekeme nditịn̄ nte ke Satan inyeneke baba n̄kpọ kiet ke esịt nnyịn.—John 14:30.