Ndi Akam Edi Ido m̀mê Ubọkedem?

KE NDUSỤK ikpọ ufọkn̄wed Poland, nditọ ufọkn̄wed ẹsibọ okụk ndida ndep mme enọ nnọ mme andikpep mmọ, ẹdoride enyịn mme andikpep emi ndinam mmọ ẹbe udomo ọfọn. Eyịghe idụhe n̄kpọ emi akafịnade uyen Christian kiet emi ekerede Katarzyna. Enye ama eyịk ete: “Ndi n̄kpọnọnọ okụk emi m̀mê n̄kpọnọhọ?” Mme ubọkn̄ka esie ẹma ẹkọk ibuot ye enye ẹte: “Emi edi ọsọ edinam. N̄kpọ ndomokiet itakke fi, edi afo emekeme ndibọ ekese ufọn, ntre ntak enyenede eyịghe?”

Katarzyna ọdọhọ ete: “Nnyene ndinyịme nte ke akpa isua mi ke ufọkn̄wed, mma nsitiene nnọ okụk oro. Edi nte ini akakade ke n̄kedifiọk nte ke ndinam emi edi ndinọ ubọkedem, emi ẹbiomde ikpe ke Bible.” Enye ama eti mme itie N̄wed Abasi emi ẹwụtde ke Jehovah enen̄ede asua ubọkedem. (Deuteronomy 10:17; 16:19; 2 Chronicles 19:7) Katarzyna ọdọhọ ete: “Mma n̄kụt nte edide mmemmem n̄kpọ owo ndiyak idem nnọ mfịghe ubọkn̄ka. Mma ntie n̄kere n̄kpọ emi ndien tọn̄ọde ke ini oro n̄kabuanake ke edinam emi aba.” Ke se ikande isua ita emi ẹkebede, kpa ye oro nditọ ufọkn̄wed eken ẹkesakde enye nsahi, enye ama ekeme ndinam an̄wan̄a ndusụk mmọ nte ke imọ itieneke inọ inua-okot enọ emi ke ntak mme edinịm ke akpanikọ imọ oro ẹkọn̄ọde ke Bible.

Ndusụk owo ẹma ẹsụk Katarzyna uyo ẹte ke enye edi ibụk inyụn̄ itarake ido. Enye ọdọhọ ete: “Ndusụk mmọ isụk imaha mi. Edi ke n̄kan̄ eken, ediwak owo ẹkpono idaha mi ndien emi anam n̄kop inemesịt.” Ẹma ẹdidiọn̄ọ Katarzyna nte kiet ke otu Mme Ntiense Jehovah, emi enịmde mme edumbet Bible kpukpru usen ke uwem.