Ndinam Utom ye N̄wọrọnda Otu Usem ke Korea

OTU oro ẹkenen̄erede ẹkop nduaidem ẹnyụn̄ ẹtiede sụn̄ ẹma ẹsop idem ndidụk mbono district Mme Ntiense Jehovah ke ndaeyo 1997. Mbono oro ẹkenịmde mi ke Korea ẹnọ mme inan ye mbon oro mîkopke n̄kpọ ọfọn ikenyeneke mbiet. N̄wakn̄kan ibat mme andidụk ekedi 1,174. Ẹkenam ofụri ndutịm emi—esịnede mme utịn̄ikọ, mme ndụn̄ọde, ye drama—ke Usem Idiọn̄ọ Mbon Korea ndien ẹkewụt enye ke akamba ekebe ndise oro kpukpru owo ẹkekemede nditie ke itie mmọ ke Ufọkmbono oro n̄kụt ofụri ndutịm oro. Emi ekedi utịp ọkpọsọn̄ utom oro ediwak mme anamutom unyịmesịt ẹkedade ediwak isua ẹtịm.

Ini ke edi ke paradise isọn̄ oro ‘utọn̄ edisịrerede mbon inan.’ (Isaiah 35:5) Man idu ke Paradise oro, ana kpukpru owo, esịnede mbon inan ẹbem iso ẹdu ke paradise eke spirit, kpa eti idaha eke spirit oro mbon oro Abasi ọdiọn̄de, ẹnyenede. Ana mmọ ẹkabade ẹdi Mme Ntiense Jehovah oro ẹyakde idem ẹnọ, ẹnade baptism, ẹnyụn̄ ẹbọde item oro enye ọnọde.—Micah 4:1-4.

Ekpri Ntọn̄ọ

Okposụkedi ẹkekwọrọde ikọ ke ndusụk udomo ẹnọ mme inan emi ke mme iduọk isua eke 1960, akakam edi ke mme iduọk isua eke 1970 ke ibat ibat ke otu mmọ ẹketọn̄ọ ndidụk mme mbono esop Mme Ntiense Jehovah ke Seoul, kpa ibuot obio ukara Korea. Eyenete Christian oro ọkọsọpde ubọkn̄wed ama esiwet mme akpan n̄kpọ ke mme utịn̄ikọ, ọkọrọ ye mme itie Bible ke obukpọk.

Ke 1971 ke Taejon, Ntiense kiet oro eyeneren esie ekedide inan ama ọtọn̄ọ ndikpep eyen esie emi ye mme ufan esie oro ẹkedide inan etop Obio Ubọn̄. Otu emi aman ediwak ifịk ifịk mbon oro ẹkabarede ẹdi adaha ke ediwak efakutom oro ẹsemde usem idiọn̄ọ.—Zechariah 4:10.

N̄kparawa Ẹnọ Idem Unyịme Unyịme

Mbemiso mme inan ẹkekemede ndifiọk Jehovah ye Jesus nnyụn̄ nsan̄a ke usụn̄ oro adade esịm uwem, mbon efen oro ẹkenọde idem unyịme unyịme ẹkenyene ndinen̄ede  nsịn idem nnam utom. (John 17:3) Ke ntak emi, ata ediwak owo ke otu Mme Ntiense Jehovah ẹmekpep usem idiọn̄ọ ẹnyụn̄ ẹnyene mme inem inem ifiọkutom.

Park In-sun, emi ekedide isua 15, ama anam edi utịtmbuba esie ndikpep usem idiọn̄ọ. Man anam emi, enye ama ọtọn̄ọ ndikpep utom ke ufọkutom kiet, emi inan 20 ẹkenamde utom. Ke ofụri ọfiọn̄ itiaita, enye ama enen̄ede adiana kiet anam utom ye mmọ man ekpep usem ye usụn̄ unam n̄kpọ mbon inan. Ke isua oro eketienede, enye ama akabade edi asiakusụn̄ ofụri ini, m̀mê anditan̄a Obio Ubọn̄ uyọhọ ini, onyụn̄ anam utom ye otu mbon inan oro ẹkenyenede udọn̄ ke akpanikọ Bible. Otu emi ama anam n̄kọri usọp usọp, ndien ke mîkebịghike, se iwakde ibe owo 35 ẹma ẹsidụk mme mbono esop ke Sunday.—Psalm 110:3.

Ke oro ebede, ke ata akpa ini ke Seoul, ẹma ẹtọn̄ọ ndinịm mme mbono esop Christian san̄asan̄a ke usem idiọn̄ọ. Brọda Park In-sun akanam utom nte akpan asiakusụn̄ ye otu oro akakade iso ndinam n̄kọri mi. Idahaemi enye enen̄ede ọfiọk usem idiọn̄ọ. Ke n̄kpọ nte ọfiọn̄ ifan̄, enye ama enịm ukpepn̄kpọ Bible 28 ye mbon inan. Ediwak ke otu emi ẹma ẹnam n̄kọri ẹnyụn̄ ẹkabade ẹdi Mme Ntiense Jehovah.

Nte utịp ifịk ifịk utom oro mbon unyịmesịt emi ẹkenamde, ẹma ẹtọn̄ọ akpa esop usem idiọn̄ọ ke Seoul ke October 1976, ye mme asuanetop 40 ye mme asiakusụn̄ ofụri ini 2. Emi ama anam utom ọkọri ke mme ikpehe obio efen ke Korea. Ediwak mbon inan ẹma ẹkop biọn̄ eti mbụk ẹnyụn̄ ẹsitie ẹbet owo edi ebịne mmimọ.

Ndinam Utom ye Mme Inan

Afo emekeme ndikere nte ẹkesan̄ade ẹnyene mme inan emi. Ẹkenyene ekese mmọ ebe ke ndibụp mme owo. N̄ko, ẹma ẹbụp mme anyam edesi ke n̄kann̄kụk oro, ndien mmọ ẹma ẹnọ enyịn̄ ye mme adres mbon inan. Ndusụk ọfis ukara ẹma ẹn̄wam n̄ko ke ndinọ mme utọ ntọt oro. Ẹma ẹnen̄ede ẹtịn̄ enyịn ẹkụre utom ke efakutom oro mme inan ẹkedụn̄de tutu edi se ẹketọn̄ọde esop usem idiọn̄ọ inan̄. Ẹma ẹsịn udọn̄ ẹnọ ediwak uyen Christian ndikpep usem idiọn̄ọ.

Ọfis n̄kọk itieutom Mme Ntiense Jehovah ama ọnọ mme akpan asiakusụn̄ oro ẹfiọkde usem idiọn̄ọ ẹkenam utom ke mme esop emi. Ke ata ndondo emi, ẹma ẹnọ mme andikụre ukpep ke Ufọkn̄wed Unọ Mme Asan̄autom Ukpep ẹka mme esop emi ndien mmọ ẹsọn̄ọ esop emi idem ke n̄kan̄ eke spirit.

N̄kpọsọn̄ idaha ẹdu oro oyomde ẹkan. Man ẹnam utom ke efakutom emi, esiyom owo esịn ukeme mbemiso ekemede ndifiọk nte mme inan ẹsinamde n̄kpọ. Mmọ ẹsinen̄ede ẹtie in̄wan̄-in̄wan̄ ke ekikere ye ke edinam. Ndusụk ini, emi esikpa mme owo idem esinyụn̄ anam ẹnyene ukwan̄ ekikere ẹban̄a mmọ. N̄ko-n̄ko, ke ini Mme Ntiense ẹnịmde ukpepn̄kpọ Bible ye mme inan, esiyom ẹn̄wam mmọ nditịm mfiọk usem mmọ esinyụn̄ oyom ẹsịn udọn̄ ẹnọ mmọ ndika iso nnam n̄kọri ke ndikpep nnyụn̄ n̄kot mme n̄wed mmọ.

Ke edinam eke usen ke usen, mme inan ẹsisobo n̄kpọsọn̄ idaha oro mbon oro mîdịghe inan mînyeneke ifiọk ndomo esisịt iban̄a. Ndinyene nneme ke mme ọfis ukara ye ke mme itie usọbọidem, ọkọrọ ye ke mme mbubehe eken esidi akpan mfịna ọnọ mme inan emi. Ke esop Christian, mme inan ẹmenyene eti itie ebuana nditọete, otode ima ima un̄wam oro  Mme Ntiense oro ẹdude ke mme esop n̄kann̄kụk ẹnọde.—John 13:34, 35.

Ikọ Ntiense Ido Nneme Ada Mme Utịp Edi

Ke Pusan, oro edide akpan obio mbehe ke edem usụk Korea, Ntiense kiet ama osobo ye inan iba oro ẹkewetde ikọ emi ke ekpri babru: “Nnyịn imama Paradise. Nnyịn iyom ndifiọk mme itie N̄wed Abasi oro ẹtịn̄de ẹban̄a nsinsi uwem.” Eyenete emi ama ewet adres mmọ onyụn̄ odiomi ndika n̄kese mmọ. Ke ini enye akanamde oro, enye ama okokụt mbon inan ẹtiede ẹyọhọ ufọk ẹbet ndikop etop Obio Ubọn̄. N̄kpọntịbe emi ama onụk enye nditọn̄ọ ndikpep usem idiọn̄ọ. Ke mîbịghike, ẹma ẹtọn̄ọ esop usem idiọn̄ọ ke Pusan.

Eyenete kiet oro odude ke esop oro ama okụt inan iba ẹdade usem idiọn̄ọ ẹnyene nneme ye kiet eken onyụn̄ asan̄a ekpere mmọ. Ke ọfiọkde ete ke mmọ ndisụk nto ufọkabasi ndi edi oro, enye ama ọnọ mmọ ikot ndidi Ufọkmbono Obio Ubọn̄ ke n̄kanika iba uwemeyo usen oro. Mmọ ẹma ẹyere ikot emi, ndien ẹma ẹtọn̄ọ ukpepn̄kpọ Bible ye mmọ. Esisịt ini ke oro ebede, inan 2 oro ẹma ẹsan̄a ye mme ufan mmọ 20 oro ẹdide inan ẹkedụk mbono district. Idahaemi, ediwak ke otu oro ẹma ẹyak idem ẹnọ Jehovah. Owo mmọ iba ẹdidi mbiowo esop, ke adan̄aemi kiet edide asan̄autom unamutom ke esop usem idiọn̄ọ.

 Ubiere Oro Ẹdiọn̄de

Sia ndusụk mbon inan mîdụn̄ke ikpere esop usem idiọn̄ọ ndomokiet, esinen̄ede oyom ukeme ye ọkpọsọn̄ ubiere man ẹnọ mmọ udia eke spirit otode Bible kpukpru ini. Ke uwụtn̄kpọ, eren isua 31 emi edide inan ekesikọ iyak ke isuo kiet. Enye okokop etop Bible oto ekpri eyeneka esie oro ekenyenede nneme ye Mme Ntiense Jehovah. Man oyụhọ udọn̄ eke spirit esie, ọkọiyak emi ama awat kilomita 16 ke ubom aka Tongyoung, oro odude ke usụk usụk mbenesụk Korea. Enye akanam emi man okosobo akpan asiakusụn̄ oro odude ke esop usem idiọn̄ọ ke Masan City. Kpukpru Monday, akpan asiakusụn̄ emi ama esinam isan̄ kilomita 65 man ekenịm ukpepn̄kpọ Bible ye ọkọiyak oro edide inan do.

Eyen ukpepn̄kpọ Bible oro edide inan mi ekesinyene ndiwat kilomita 16 ke ubom ndien ekem asan̄a ke bọs kilomita 65 efen aka Masan City man okodụk mbono esop ke Sunday. Ubiere esie ama ada nti utịp edi. Ke ọfiọn̄ ifan̄ ẹbede, enye ama enen̄ede ọfiọk usem idiọn̄ọ, ekpep mme abisi Korea efen efen, ndien ke akande kpukpru—enye ama ekpep n̄kukụre usụn̄ oro enye ekemede ndikọri itie ebuana ye Jehovah. Ke ọfiọkde ufọn mbono esop ye eke edinọ ikọ ntiense kpukpru ini, enye ama ọwọrọ okodụn̄ ke efakutom oro esop usem idiọn̄ọ odude. Nte oro ekedi mmemmem n̄kpọ? Baba. Enye ekenyene ndikpọn̄ utom ukọiyak esie oro ekesinọde enye n̄kpọ nte dollar $3,800 ke ọfiọn̄, edi enye ama ọbọ utịp ke ubiere oro enye akanamde. Ke ama akanam n̄kọri ke akpanikọ, enye ama ana baptism ndien idahaemi, enye ye ubon esie ke ẹnam n̄kpọ Jehovah idara idara.

Ndikabade Ikọ nnọ Mme Inan

Ẹsiwak nditetịn̄ eti mbụk Obio Ubọn̄ nnọ mme owo ke inua. Nte ededi, man ẹkeme ndikpep mbon efen etop Ikọ Abasi nnennen nnennen, ana ẹnam mme ukpepn̄kpọ Bible emi ẹdu ke usụn̄ oro ekemede ndibịghi. Ntem, ke akpa isua ikie, mbiowo emi ẹnyenede mbufiọk ẹma ẹsiwet mme leta ye mme n̄wed. (Utom 15:22-31; Ephesus 3:4; Colossae 1:2; 4:16) Ke eyo nnyịn, ẹda mme n̄wed Christian ẹnọ nnyịn akpakịp udia eke spirit. Ẹkabade mmọ ẹsịn ke ediwak usem, esịnede nsio nsio usem idiọn̄ọ. Man ẹkeme ndinam emi ke Usem Idiọn̄ọ Mbon Korea, ọfis n̄kọk itieutom ke Korea enyene itieutom ukabade ikọ nsịn ke usem idiọn̄ọ. Itieutom unam vidio osion̄o mme vidio ke usem idiọn̄ọ. Emi anam udia eke spirit odu ọnọ mme inan oro ẹtan̄ade eti mbụk ye mme inan oro ẹnyenede udọn̄, ke mme esop ke ofụri Korea.

Okposụkedi ediwak owo ẹnen̄erede ẹfiọk ndisem usem idiọn̄ọ ẹnyụn̄ ẹn̄wamde ke ndision̄o mme vidio, nte ido edide, mbon oro ẹsikemede nditịm n̄kabade ikọ nsịn ke usem idiọn̄ọ n̄kan ẹdi nditọwọn̄ oro ete m̀mê eka mmọ ẹdide inan. Mmọ ẹkpep usem idiọn̄ọ emi toto ke uyen. Ke adianade ye edida usem emi nnyene nneme edifọn edifọn, mmọ n̄ko ẹsikeme ndinen̄ede n̄wụt se mmọ ẹtịn̄de, ẹnyụn̄ ẹdori nsọn̄uyo ke etop mmọ ebe ke nte mmọ ẹdade idem ẹtịn̄ ikọ ye nte ẹnịmde iso, ke ntem ẹsịmde esịt ye ekikere mme owo.

Nte ẹma ẹketetịn̄, ẹsinịm ikpọ ye n̄kpri mbono idahaemi ke usem idiọn̄ọ kpukpru ini ke Korea. Esiyom ekese utom, okụk, ye ukeme man ẹnam emi. Nte ededi, mbon oro ẹdụkde mme mbono emi ẹsiwụt esịtekọm ẹban̄a ndutịm emi. Ke ẹma ẹkeberi mme mbono ntem, ediwak owo isimaha ndisọp nnyọn̄, ẹyomde ndika iso ke inem inem ebuana oro ndinyụn̄ ntie ndụn̄ọde nti udia eke spirit oro ẹkenọde. Ke akpanikọ, ndinam utom ye n̄wọrọnda otu emi asan̄a ye mme n̄kpọ-ata, edi mme edidiọn̄ eke spirit oro enye akamade anam enye enem.

[Ndise ke page 10]

Mme vidio usem idiọn̄ọ oro ẹsion̄ode ke Korea: “Nso ke Abasi Oyom Oto Nnyịn?,” “Ndiwụt Esịtekọm Mban̄a N̄kpọ-Akpa eke Spirit Nnyịn,” “Mme Ntọt Uwụtn̄kpọ Ẹnyenede Eyo Nnyịn,” ye “Kpono Odudu Ukara Jehovah”

[Mme ndise ke page 10]

Ẹtode ke ufien ẹka nnasia: Vidio usem idiọn̄ọ oro ẹnamde ke n̄kọk itieutom Korea; nditịm mme ikọ ukara Abasi nsịn ke usem idiọn̄ọ; otu mme akabade ikọ nsịn ke usem idiọn̄ọ; nditi anam usem idiọn̄ọ se akpanamde ke ini ẹtịmde vidio