Ufọkn̄wed Gilead—Isua 60 eke Edinọ Mme Isụn̄utom Ukpep

“SIA nnyịn iketịmde ikpep Bible, nnyịn ima inen̄ede isan̄a ikpere Jehovah inyụn̄ ikpep n̄kpọ efen efen iban̄a esop esie. Emi ama etịm nnyịn idem eben̄e uwem ke utom esenidụt.” Ntre ke andikụre ukpep ke akpa otu nditọ ufọkn̄wed eketịn̄ aban̄a ukpep oro enye ọkọbọde ke Ufọkn̄wed Enyọn̄-Ukpeme Ukpep Bible eke Gilead. Tọn̄ọ nte ẹketọn̄ọ enye ke isua 60 emi ẹkebede, Ufọkn̄wed Gilead aka iso ndinọ mme owo ẹka utom isụn̄utom. Ke March 8, 2003, edinam ukụre ukpep ọyọhọ otu 114 ama ada itie ke Itie Unọ Ukpep Enyọn̄-Ukpeme ke Patterson, New York. Owo 6,404 oro ẹkesopde idem ke efe mbono ye ke mme nsannsan ebiet ẹma ẹnen̄ede ẹkpan̄ utọn̄ ke ndutịm, oro ekesịnede mme utịn̄ikọ, mme ndụn̄ọde, ye nneme otu.

Theodore Jaracz, owo Otu Ukara, ekedi etieibuot okpokoro. Ntọn̄ọikọ esie okodụri ntịn̄enyịn owụt otuowo, emi ekesịnede isenowo ẹtode Asia, Caribbean, Edem Usụk ye Ufọt Ufọt America, ye Europe. Ke ọkọn̄de utịn̄ikọ esie ke 2 Timothy 4:5, Brọda Jaracz ama owụt se idide akpan utom isụn̄utom oro ẹnọde ukpep ke Gilead—‘ndinam utom ọkwọrọ-gospel.’ Mme isụn̄utom emi ẹtie ntiense ẹnọ akpanikọ ebe ke ndikpep mme owo Bible.

Nditọ Ufọkn̄wed Ẹbọ Akpatre Item

Ke ndiberede akpa ke otu udịm udịm mbio mbio utịn̄ikọ, John Larson, andibuana ke Kọmiti N̄kọk Itieutom United States ama ọnọ utịn̄ikọ ke ibuotikọ oro ọsọn̄ọde owo mbuọtidem mi, “Edieke Abasi Adade ye Nnyịn, Anie Edikeme Ndibiọn̄ọ Nnyịn?” (Rome 8:31) Etịn̄ikọ ama anam an̄wan̄a nsọn̄ọ oro nditọ ufọkn̄wed ẹnyenede ẹto Bible ndinyene ọyọhọ mbuọtidem ke odudu Jehovah ndin̄wam mmọ ẹkan n̄kpọ ubiọn̄ọ ekededi oro mmọ ẹkemede ndisobo ke utom mmọ. Ke adade Rome 8:38, 39, Brọda Larson ama ọnọ nditọ ufọkn̄wed item ete: “Tuak da nyụn̄ tie kere ukpeme oro Abasi ọnọde fi, nyụn ti ete ke idụhe n̄kpọ ndomokiet emi ekemede ndibiat ọkpọkpọ udọn̄ emi Jehovah enyenede ke idem fo.”

Udiana etịn̄ikọ ekedi Guy Pierce, owo Otu Ukara. Enye ekemek ibuotikọ oro “Wụk Enyịn Fo ke Se Inọde Ata Inemesịt!” (Luke 10:23, NW) Enye ama anam an̄wan̄a nte ke ata inemesịt ọwọrọ owo ndidiọn̄ọ Jehovah nnyụn̄ mfiọk nsinsi uduak esie ọkọrọ ye edikụt edisu mme ntịn̄nnịm ikọ Bible. Ke ebiet ekededi oro mmọ ẹkade, nditọ ufọkn̄wed ẹkeme ndika iso nnyene ata inemesịt ebe ke ndiwụk enyịn ke se inọde ata inemesịt. Brọda Pierce ama esịn udọn̄ ọnọ mme andikụre ukpep oro ete ẹnen̄ede ẹtie ẹkere mfọnido Jehovah ẹnyụn̄ ẹwụk ekikere ye esịt mmọ ke ndinam uduak Esie. (Psalm 77:12) Ke ndika iso nnyene in̄wan̄-in̄wan̄ edu, mme andikụre ukpep oro ẹkeme ndikan mme mfịna ekededi oro mmọ ẹkemede ndisobo.

Ekem otu nditọ ufọkn̄wed ẹma ẹbọ mme ikọ nsịnudọn̄ unyọn̄ ẹto iba ke otu mme andikpep oro ẹkenọde mmọ ukpep ke usen ke usen. Ibuotikọ utịn̄ikọ Lawrence Bowen ekedi mbụme emi: “Nte Afo ke Oyom Ubọn̄?” Ata ediwak owo ẹkere ke ubọn̄ edi itoro, ukpono, ye uku idemowo. Nte  ededi, Asaph andiwet psalm, ama edifiọk ata ubọn̄—kpa ọsọn̄urua itie ebuana ye Jehovah oro odotde ukpono. (Psalm 73:24, 25) Ẹma ẹsịn udọn̄ ẹnọ nditọ ufọkn̄wed oro ẹkụrede ukpep ndika iso nnyene ntotụn̄ọ itie ebuana ye Jehovah ebe ke ndinen̄ede n̄ka iso n̄kpep Bible. “Ọdọn̄ mme angel ndinyụn̄ọ” nse ọyọhọ ntọt aban̄ade edisu uduak Jehovah ebe ke Christ. (1 Peter 1:12) Mmọ ẹyom ndinen̄ede n̄kpep n̄kpọ mban̄a Ete mmọ man otodo ẹwụt ubọn̄ esie. Ekem etịn̄ikọ ama esịn udọn̄ ọnọ nditọ ufọkn̄wed ete ẹnọ Jehovah ubọn̄ ke utom isụn̄utom mmọ ebe ke ndin̄wam mbon en̄wen ndikụt ọsọn̄urua n̄kpọuto.

Wallace Liverance, esịn-owo-enyịn̄ ke ufọkn̄wed, ama ada udịm udịm utịn̄ikọ ediberede ekesịm utịt ye ibuotikọ emi: “Tịn̄ Ọniọn̄ Abasi Emi Odude ke Edisana Ndịben̄kpọ.” (1 Corinth 2:7, NW) Nso idi ọniọn̄ Abasi emi apostle Paul eketịn̄de aban̄a ke ini utom isụn̄utom esie? Enye edi ọniọn̄ ye okopodudu usụn̄ oro Jehovah adade ndisịn emem ye edidianakiet ke ofụri ekondo. Ọniọn̄ emi ọkọn̄ọ ke Jesus. Utu ke ndikwọrọ gospel mfọnido, Paul akan̄wam mme owo ndikụt nte Abasi edibiatde mme utịp idiọkn̄kpọ Adam. (Ephesus 3:8, 9) Etịn̄ikọ ama eteme mme andikpan̄ utọn̄ nnọ enye ete: “Ẹda ifet utom mbufo ẹnam n̄kpọ nte  Paul, emi akadade utom isụn̄utom esie nte ifet ndida n̄n̄wam mme owo ndikụt nte Jehovah edinamde uduak esie.”

Ke etienede emi, Mark Noumair, andikpep efen ke Gilead, ama ada usụn̄ ke edemede-owo-udọn̄ nneme ye ibat ibat nditọ ufọkn̄wed. Ibuotikọ oro “Ndikpep Ikọ Abasi Osion̄o Ifịk Ifịk Mme Asan̄autom Edi” ama atat ikọ Paul ke N̄wed Rome 10:10. Otu nditọ ufọkn̄wed oro ẹma ẹbụk ata ediwak ifiọkutom an̄wautom emi mmọ ẹkenyenede ke adan̄aemi ẹkedude ke ufọkn̄wed. Mme Ifiọkutom mmọ ẹma ẹwụt nte ke ini nnyịn ikpepde inyụn̄ itiede ikere Ikọ Abasi, nti n̄kpọ ẹban̄ade Jehovah Abasi ye Obio Ubọn̄ esie ẹyeyọhọ esịt nnyịn ndien nnyịn iyetịn̄ mme n̄kpọ emi inọ mbon en̄wen. Ke ọfiọn̄ ition oro mmọ ẹkedude ke Itie Unọ Ukpep Enyọn̄-Ukpeme, nditọ ufọkn̄wed emi ẹma ẹtọn̄ọ se iwakde ibe ukpepn̄kpọ Bible 30 ye mbon oro ẹnyenede udọn̄ ke mme efakutom oro ẹnamde utom edifọn edifọn ke mme n̄kpet n̄kpet esop do.

Mbon Emi Ẹkọride Ẹsịm Ọyọhọ Idaha Ẹnọ Item

Ke ini ufọkn̄wed mmọ, nditọ ufọkn̄wed ẹma ẹbọ ufọn ẹto ebuana oro mmọ ẹkenyenede ye mme andibuana ke ubon Bethel ke United States. Robert Ciranko ye Robert P. Johnson, mme anamutom ke n̄kọk itieutom ẹma ẹnam ndụn̄ọde ye ibat ibat mme anam-akpanikọ asan̄autom Jehovah oro ẹnamde utom ke anyan ini, esịnede mme esenyịn oro ẹsan̄ade-san̄a emi ẹbọde san̄asan̄a ukpep ke ndondo emi ke Itie Unọ Ukpep Enyọn̄-Ukpeme. Kpukpru mbon oro ẹkedade ẹnam ndụn̄ọde ẹkedi mbon oro ẹkekụrede ukpep ke Gilead oro ini kiet ko ẹkenamde utom nte mme isụn̄utom. Ekedi n̄kpọ nsịnudọn̄ ọnọ nditọ ufọkn̄wed emi ye mme ubon ye ufan mmọ ndikop mme ikọ ọniọn̄ nto mme owo oro ẹmade n̄kpọ eke spirit ẹnyụn̄ ẹnyenede mbufiọk mi.

Item mmọ ẹma ẹsịne: “Ka iso sịn idem nte ekekeme ke utom ukwọrọikọ ye ke utom esop.” “Kûda idem ke n̄kpọ ukaha.” Wụk ntịn̄enyịn ke se inamde edi isụn̄utom, nyụn̄ nam efakutom isụn̄utom fo edi obio fo.” Nti ikọ en̄wen ẹma ẹwụt nte ukpep Gilead etịmde asan̄autom idem ọnọ eti utom, inamke n̄kpọ m̀mê ẹnọ enye aka m̀mọ̀n̄. Ndusụk ke otu mmọ ẹdi emi: “Nnyịn ima ikpep ndidiana kiet nnyụn̄ nnam utom ọtọkiet.” “Ufọkn̄wed emi ama an̄wam nnyịn ndinyịme mbufa ido.” “Ẹma ẹkpep nnyịn ndida mme itie N̄wed Abasi nnam n̄kpọ ke mbufa usụn̄.”

John E. Barr, oro edide owo Otu Ukara ke anyan ini, ọkọnọ akpan utịn̄ikọ ke ndutịm emi. Ibuotikọ esie oro ọkọn̄ọde ke N̄wed Abasi ekedi, “Uyom Mmọ Ọmọwọrọ ke Ofụri Isọn̄.” (Rome 10:18) Enye ama obụp mbụme emi, Nte ikọt Abasi ẹkeme ndinam ọkpọsọn̄ utom emi mfịn? Ih, ẹkeme! Ko ke edem ke 1881, ẹma ẹbụp mme andikot magazine Enyọn̄-Ukpeme ẹte: “Nte mbufo ke ẹkwọrọ ikọ?” Ekem etịn̄ikọ ama eti ofụri otuowo aban̄a enịm-mbụk ikot ẹkenọde ke akamba mbono oro ẹkenịmde ke 1922 ke Cedar Point, Ohio, U.S.A., ete: “Ẹtan̄a Edidem ye Obio Ubọn̄ esie!” Nte ini ebede, ifịk emi mme anam-akpanikọ asan̄autom Abasi ẹnyenede onụk mmọ nditan̄a mme utịbe utịbe akpanikọ Obio Ubọn̄ nnọ kpukpru mme idụt. Ebede ke mme n̄wed ye ke ikọ inua, eti mbụk emi emesịm utịt ererimbot—kpukpru emi ẹda ukpono ye itoro ẹsọk Jehovah. Ke inem inem edida n̄keberi, Brọda Barr ama eteme mme andikụre ukpep ete ẹti mme edidiọn̄ oro mmọ ẹbọde, ọdọhọde ete: “Ke usen ke usen, ke ini ọbọn̄de akam ọnọ Jehovah ke utom fo, kọm enye ke ofụri esịt ban̄a udeme emi afo enyenede ke ndisu mme ikọ emi, ‘Uyom mmọ ọmọwọrọ ke ofụri isọn̄.’”

Ke utịn̄ikọ emi ama okokụre, ẹma ẹkot etop ekọm, ndien etieibuot okpokoro ama edeme n̄weditoro ọnọ kpukpru mme andikụre ukpep. Ekem, ke mbuaha idatesịt ye mfụhọ ke ndikpọn̄ ufọkn̄wed oro mmọ ẹmade, andida ke ibuot otu nditọ ufọkn̄wed ama okot ubiere ofụri esịt oro mmọ ẹkewetde ẹnọ Otu Ukara ye ubon Bethel, ẹwụtde ubiere mme andikụre ukpep oro nditoro Jehovah “ke emi ye ke nsinsi.”—Psalm 115:18.

Nnyịn ibọn̄ akam ite mme andikụre ukpep emi ẹkeme ndikpụhọde nda ekekem ye mme idaha ke mbufa obio mmọ ẹnyụn̄ ẹtịp ẹsịn ke n̄kọri utom ukwọrọikọ ofụri ererimbot, ukem nte mbon oro ẹkebemde mmọ iso ẹdi ufọkn̄wed emi ẹnamde ke isua 60 emi.

[Ekebe ke page 23]

IDAHA OTU

Ibat idụt ẹtode: 12

Ibat idụt ẹnọde ẹka: 16

Ibat nditọ ufọkn̄wed: 48

Isua emana ke ẹbaharede ukem ukem: 34.4

Isua ẹdude ke akpanikọ ke ẹbaharede ukem ukem: 17.6

Isua ẹdude ke utom uyọhọ ini ke ẹbaharede ukem ukem: 13.5

[Ndise ke page 24]

Ọyọhọ Otu 114 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.