Ẹnen̄ede Ẹyom Ima

INAMKE n̄kpọ m̀mê owo edi isua ifan̄ ke emana, m̀mê obio ewe ke owo oto, m̀mê ewe usem ke owo esem, m̀mê nso orụk ke owo oto, kpukpru owo ẹnen̄ede ẹyom ẹma mmimọ. Edieke owo mîyụhọke udọn̄ emi, mmọ ikemeke ndikop inemesịt. Anam ndụn̄ọde ibọkusọbọ ekewet ete: “Ima ye itie ufan ẹkeme ndinam nnyịn idọn̄ọ ẹnyụn̄ ẹkeme ndinam nnyịn ikop nsọn̄idem, ẹkeme ndinam nnyịn ifụhọ ẹnyụn̄ ẹkeme ndinam nnyịn ikop inemesịt, ẹkeme ndinam nnyịn ikop ubiak ẹnyụn̄ ẹkeme ndikọk mme mfịna nnyịn. Edieke okpodude obufa ibọkusọbọ oro ekpekemede ndinam emi, ekpere ndidi kpukpru mbiausọbọ ke idụt ẹkpetoro enye ẹnọ mbon udọn̄ọ mmọ. Ọkpọdiọk edieke mbiausọbọ mîkpọdọhọke ẹda ibọk emi.”

Kpa ye oro, n̄kaowo eyomfịn, akpan akpan ndutịm usuanetop ye mme ọwọrọetop owo oro ẹkpebede, ẹsiwak ndidori nsọn̄uyo ke inyene, odudu, uwọrọetop, ye idan̄ ẹkan nte ẹdoride ke udọn̄ oro owo enyenede aban̄a ufiop ufiop, ima ima itie ebuana. Ediwak mme andikpep ẹsisọn̄ọ ẹtịn̄ ẹban̄a mme utịtmbuba ye ubọkọkọ ererimbot, ẹdọhọde ke edikụt unen ọkọn̄ọ akpan akpan ke mme n̄kpọ emi. Ke akpanikọ, ubọ ukpep ye edikọri mme usọ ẹdi akpan n̄kpọ, edi nte ẹkpenyene ndisịn idem ofụri ofụri ke edibịne mme n̄kpọ emi tutu owo inyeneke aba ini inọ ubon ye mme ufan? Ọfiọkn̄wed kiet ke eset oro ekedide ewetn̄wed ye anam-ndụn̄ọde mban̄a obot owo ama emen owo emi enyenede ndammana ukeme edi oro mînyeneke ima odomo ye ‘akpan̄kpan̄ oro oyomode uyom, m̀mê ekpri n̄kanika oro osiorode uyo.’ (1 Corinth 13:1) Utọ mme owo emi ẹkeme ndinyene inyene, idem ẹwọrọde etop, edi inen̄ekede ikop inemesịt.

Jesus Christ oro ekenyenede ntotụn̄ọ ifiọk aban̄a owo okonyụn̄ enyenede san̄asan̄a ima ọnọ mme owo ama ada ima Abasi ye mbọhọidụn̄ nte ata akpan n̄kpọ ke ukpepn̄kpọ esie. Enye ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo. . . . Ma mbọhọidụn̄ fo nte idem fo.” (Matthew 22:37-39) Sụk mbon oro ẹdade mme ikọ emi ẹsịn ke edinam ẹkeme ndinen̄ede ndi mme anditiene Jesus. Ntem, enye ama ọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:35.

Nte ededi, didie ke owo ekeme ndikọri ima ke ererimbot mfịn? Ndien didie ke mme ete ye eka ẹkeme ndikpep nditọ mmọ ndima ima? Ibuotikọ oro etienede eyeneme mme mbụme emi.

[Mme ndise ke page 3]

Edi n̄kpọ-ata ndikọri ima ke ererimbot idiọkitọn̄