“Enye Ama Esịri Ufan̄ Oro Okodude ke Esịt Mi”

“M MỌKỌM mbufo ke ofụri esịt mban̄a ata eti enọ oro San̄a Kpere Jehovah. Enye ama esịri ufan̄ oro okodude ke esịt mi—ndifiọk nte ke Jehovah ama onyụn̄ ada mi ke ọsọn̄urua. Idahaemi mmenen̄ede n̄kpere Jehovah ye edima Eyen esie. Nyom nditịn̄ mban̄a n̄wed emi nnọ kpukpru owo ndinyụn̄ nnọ kpukpru mbon oro mmade idem n̄wed emi kiet.” Oro edi nte eketiede kiet ke otu Mme Ntiense Jehovah ke idem aban̄a obufa n̄wed enyenede page 320 oro ẹkesiode ke mme Mbono District “Mme Anditan̄a Obio Ubọn̄” oro ẹkenịmde ke 2002/03. Ẹyak nnyịn idụn̄ọde ndusụk ikpehe obufa n̄wed emi ye ntak emi ẹkesiode enye.

Ndusụk Ikpehe Obufa N̄wed Emi

Nso isịne ke obufa n̄wed emi? Enye esịne kpukpru ntọt oro ẹnemede ke ibuotikọ ukpepn̄kpọ iba ke nsiondi emi—ye ekese ntọt efen efen! N̄wed emi enyene ibuot 31, ibuot kiet kiet ọniọn̄ nte ibuotikọ ukpepn̄kpọ Enyọn̄-Ukpeme. Ke ẹbede mbemiso ikọ ye akpa ibuot ita, ẹbahade n̄wed emi ẹdọn̄ ke ikpehe inan̄, ikpehe kiet kiet eneme akpan edu Jehovah kiet. Ikpehe kiet kiet ọtọn̄ọ ye ibio ibio ndụn̄ọde aban̄ade edu emi. Ibuot ifan̄ oro ẹtienede ẹneme nte Jehovah owụtde edu oro. Ikpehe kiet kiet esịne ibuot oro enemede aban̄a Jesus. Ntak-a? Ọfọn, Jesus ọkọdọhọ ete: “Owo eke okokụtde Mi okokụt Ete.” (John 14:9) Nte enye emi ebietde Jehovah ke mfọnmma usụn̄, Jesus ọnọ nnyịn mme in̄wan̄-in̄wan̄ uwụtn̄kpọ ẹban̄ade mme edu oro Abasi esidade anam n̄kpọ. Eberi ikpehe kiet kiet ye ibuot oro ekpepde nnyịn nte ikpekpebede Jehovah ke ndiwụt edu oro ẹnemede ẹban̄a. Ke ndineme mban̄a mme edu Jehovah, obufa n̄wed emi etịn̄ n̄kpọ otụk kpukpru n̄wed Bible.

N̄wed emi San̄a Kpere Jehovah esịne n̄ko ndusụk akpan ikpehe. Ọtọn̄ọde ke ibuot 2, ibuot kiet kiet esịne ekebe oro ẹkotde “Mme Mbụme Nditie N̄kere.” Mme itie N̄wed Abasi ye mme mbụme oro ẹdude ke ekebe oro idịghe man ẹda ẹdụn̄ọde ibuot enye oro. Utu ke oro, ẹdọn̄ mmọ man ẹn̄wam fi ada Bible etie ekere ntotụn̄ọ ntotụn̄ọ aban̄a ibuot nneme oro. Ẹsịn udọn̄ ẹnọ fi ndikot udọn̄ikọ itie N̄wed Abasi oro kiet kiet ye ntịn̄enyịn. Ekem kere ban̄a mbụme oro, nyụn̄ domo ukeme ndida enye nsịn ke edinam ọkpọkpọ. Utọ editie n̄kere oro ekeme ndidemede fi esịt, an̄wamde fi ndinen̄ede nsan̄a n̄kpere Jehovah.—Psalm 19:14.

Ẹma ẹnen̄ede ẹnam ndụn̄ọde ke mme ndise oro ẹdude ke n̄wed San̄a Kpere Jehovah ẹnyụn̄ ẹtịm man mmọ ẹnọ ukpep ẹnyụn̄ ẹdemede udọn̄. Ibuotn̄wed 17 ẹsịne ndiye ndise ẹban̄ade mme n̄kpọntịbe Bible.

Ntak Ẹkesiode?

Ntak emi ẹkesiode n̄wed San̄a Kpere Jehovah? Akpan uduak obufa n̄wed emi edi ndin̄wam nnyịn nditịm mfiọk Jehovah man ikeme ndikọri ntotụn̄ọ ọkpọkpọ itie ebuana ye Abasi nnyịn.

Nte afo emekeme ndikere mban̄a owo emi ekemede ndibọ ufọn nto n̄wed San̄a Kpere Jehovah, ndusụk edide eyen ukpepn̄kpọ Bible m̀mê eyenete Christian eren m̀mê an̄wan oro mîwọrọke an̄wautom aba? Nso kaban̄a fi—ndi ama ọtọn̄ọ ndikot obufa n̄wed emi? Edieke mûkọtọn̄ọke, ntak mûdiomike ini nditọn̄ọ usọp usọp nte ekekeme? Da ini nditie n̄kere mban̄a se afo okotde. N̄wed emi akpakam an̄wam fi ndinen̄ede nsan̄a n̄kpere Jehovah Abasi, man otodo afo atan̄a eti mbụk Obio Ubọn̄ esie ye akwa idatesịt ye ifịk!