Nte Ẹkemede Ndikọri Ata Ima

“Ima edi ibọk udu anana-utịt uwem; ima edi uwem.”—Living to Purpose, oro Joseph Johnson ekewetde ke 1871.

DIDIE ke owo esikpep ndima ima? Ndi esikpep emi ebe ke ndikpep mban̄a ekikere? Ndi esibe ke ndikot mme n̄wed oro ẹnọde ọkpọkpọ un̄wam? M̀mê ke ndise mme ndise senima oro ẹwụtde nte ẹnamde idan̄? Baba. Mme owo ẹsibem iso ẹkpep ndima ima ebe ke uwụtn̄kpọ ye ukpep oro mmọ ẹbọde ẹto mme ete ye eka mmọ. Nditọwọn̄ ẹyefiọk se ndima ima ọwọrọde edieke mmọ ẹdude ke n̄kann̄kụk oro ẹwụtde ufiop ufiop ima, ẹkụtde nte ete ye eka mmọ ẹbọkde ẹnyụn̄ ẹkpemede mmọ, ẹnyenede nneme ye mmọ, ẹnyụn̄ ẹnyenede ọkpọkpọ udọn̄ ke idemmọ. Mmọ n̄ko ẹsikpep ndima ima ke ini mme ete ye eka mmọ ẹkpepde mmọ nditiene nti edumbet ẹban̄ade se ifọnde ye se idiọkde.

Ata ima aka anyan akan ima ntụk. Enye esiwak ndinam ẹnam utom ke ntak ufọn mbon en̄wen, idem ọkpọkọm mmọ inen̄ekede ikụt ufọn emi ini oro, nte esiwakde ndidi ye nditọwọn̄ ke ini ẹnọde mmọ ima ima ntụnọ. Andibot ke idemesie edi mfọnmma uwụtn̄kpọ owo oro owụtde ima unana ibụk. Apostle Paul ekewet ete: “Eyen mi, kûbat ntụnọ Jehovah ke ekpri n̄kpọ, kûnyụn̄ uyemede ke ini Enye asuade ọnọ fi. Koro Jehovah otụnọ owo eke Enye amade.”—Mme Hebrew 12:5, 6.

Mme ete ye eka, didie ke mbufo ẹkeme ndikpebe Jehovah ke ndima ubon mbufo? Ndien uwụtn̄kpọ oro mbufo ẹnịmde ke itie ebuana mbufo nte ebe ye n̄wan edi akpan n̄kpọ adan̄a didie?

Kpep Ima ke Ndinịm Uwụtn̄kpọ

Edieke afo edide ebe, nte afo amada n̄wan fo ke ọsọn̄urua onyụn̄ ọnọ enye ukpono ye uku? Edieke afo edide n̄wan, nte afo amama onyụn̄ ọnọ ebe fo ibetedem? Bible ọdọhọ ete ke ebe ye n̄wan ẹkpenyene ndima nnyụn̄ n̄kpono kiet eken. (Ephesus 5:28; Titus 2:4) Ke ini mmọ ẹnamde emi, nditọ mmọ ẹsinen̄ede ẹkụt nte ẹnamde-nam ima Christian ẹwụt. Nso okopodudu ye eti ukpepn̄kpọ ke emi ekeme ndinọ ntem!

Mme ete ye eka n̄ko ẹsiwụt ima ke ufọk ke ini mmọ ẹsọn̄ọde ẹyịre ke mme n̄kokon̄ idaha oro mmọ ẹnịmde ẹnọ ubon ke mme n̄kpọ ẹban̄ade unọ idem inemesịt, nti ido uwem, mme utịtmbuba, ye se idide mme ebeiso n̄kpọ. Ke ofụri ererimbot, mme owo ẹkụt nte ke Bible esinen̄ede an̄wam ke ndinịm mme utọ idaha oro nnọ ubon, ọnọde in̄wan̄-in̄wan̄ uyarade nte ke Bible enen̄ede edi se “ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ nnyụn̄ nsua nnọ  owo, nnyụn̄ nnam owo ẹsan̄a nte enende, nnyụn̄ nteme owo edinen ido.” (2 Timothy 3:16) Ke akpanikọ, ediwak owo ẹkam ẹda item ido uwem ye ndausụn̄ kaban̄a uwem oro ẹkụtde ke Ukwọrọikọ Oro ke Obot nte se mînyeneke mbiet.—Matthew, ibuot 5 esịm 7.

Ke ini ofụri ubon ẹberide edem ke Abasi kaban̄a ndausụn̄ ẹnyụn̄ ẹsọn̄ọde ẹyịre ye mme idaha esie, owo kiet kiet eyenen̄ede enyene ifụre, ndien etie nte nditọ ẹyeka iso ndima nnyụn̄ n̄kpono mme ete ye eka mmọ. Ke n̄kan̄ eken, ke ufọk oro ẹnyenede edumbet iba oro mîdotke, m̀mê oro owo mîtieneke mme idaha oro ẹnịmde, ekeme nditie nditọwọn̄ ke idem nte ke ẹfofiomo mmimọ, mmọ ẹnyụn̄ ẹkeme ndikop iyatesịt, nnyụn̄ nsọn̄ ibuot.—Rome 2:21; Colossae 3:21.

Nso kaban̄a ete m̀mê eka emi ọbọkde nditọ ikpọn̄? Nte ekeme ndinen̄ede nsọn̄ mmọ ndikpep n̄kpri nditọ mmọ ndima ima? Inen̄ekede idi ntre. Okposụkedi mîdụhe se ifọnde nte ete ye eka ndidiana kiet mbọk nditọ mmọ, ifiọk n̄kpọntịbe owụt nte ke eti itie ebuana ke ubon ekeme ke ndusụk udomo ndinam etie nte ke owo itabake ete m̀mê eka oro mîdụhe. Edieke afo edide ete m̀mê eka oro ọbọkde nditọ ikpọn̄, domo ndida mme edumbet Bible nsịn ke edinam ke ubon fo. Ih, n̄ke kiet asian nnyịn ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm”—esịnede usụn̄ edidi ete m̀mê eka.—Mme N̄ke 3:5, 6; James 1:5.

Ediwak nti n̄kparawa owo ẹkekọri ẹkpon ke ufọk emi ete m̀mê eka ọbọkde nditọ ikpọn̄ ndien idahaemi mmọ ke ẹnam akpanikọ ẹnọ Abasi ke ediwak tọsịn esop Christian eke Mme Ntiense Jehovah ke ofụri ererimbot. Emi ọnọ uyarade nte ke mme ete m̀mê mme eka emi ẹbọkde nditọ ikpọn̄ ẹkeme ndikụt unen ke ndikpep nditọ mmọ ndima ima.

Nte Kpukpru Owo Ẹkemede Ndikọri Ima

Bible ama ebem iso etịn̄ ete ke unana “ima uduot owo,” oro edi, mbonubon nditre ndiwụt kiet eken ndammana ima, edinịm “ukperedem ini” idiọn̄ọ. (2 Timothy 3:1, 3) Kpa ye oro, idem mbon oro ẹkekọride ẹkpon ke ufọk oro owo mîkesiwụtke ima ẹkeme ndikpep ndikọri ima. Didie? Ebe ke ndikpebe Jehovah, emi edide ata Ntọn̄ọ ima, emi amade kpukpru owo oro ẹwọn̄ọrede ẹtiene enye ke ofụri esịt. (1 John 4:7, 8) Kiet ke otu mme andiwet Psalm ọkọdọhọ ete: “Koro ete mi ye eka mi ẹkekpọn̄de mi, ndien Jehovah emen mi akama.”—Psalm 27:10.

Jehovah owụt ima oro enye amade nnyịn ke ediwak nsio nsio usụn̄. Emi esịne enye ndida Bible nnọ nnyịn ndausụn̄ nte ete, un̄wam edisana spirit, ye ima ima un̄wam itie nditọete Christian. (Psalm 119:97-105; Luke 11:13; Mme Hebrew 10:24, 25) Kere nte usụn̄ ita emi ẹkemede ndin̄wam fi ọkọri ke ima oro afo amade Abasi ye mbọhọidụn̄.

Ọnọ Nnyịn Ndausụn̄ eke Spirit nte Ete

Man ikọri ufiop ufiop ima inọ owo, ana nnyịn inen̄ede ifiọk owo oro. Ke ndida Bible nyarade owo emi enye edide, Jehovah ọdọhọ nnyịn isan̄a ikpere imọ. Nte ededi, ndikot Bible ikemke. Ana nnyịn ida se ikpepde ito Bible isịn ke edinam inyụn̄ ibọ mme ufọn oro ẹsụn̄ọde ẹto emi. (Psalm 19:7-10) Isaiah 48:17 ọdọhọ ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.” Ih, Jehovah, ata uwụtn̄kpọ ima, eteme nnyịn ke ufọn idem nnyịn—idịghe koro enye oyomde ndida mme  ibet ye ewụhọ oro mînyeneke ufọn mbiọn̄ọ ifụre nnyịn.

Nnennen ifiọk Bible n̄ko an̄wam nnyịn ndikọri ima nnọ ekemmọ owo. Emi edi koro akpanikọ Bible ekpep nnyịn nte Abasi esede mme owo onyụn̄ owụt nnyịn mme edumbet oro ẹkpekarade nte nnyịn inamde n̄kpọ ye kiet eken. Ye utọ ntọt emi, nnyịn imenyene eti ntak ndikọri ima mbọhọidụn̄. Apostle Paul ọkọdọhọ ete: “Mmeben̄e ntem nte, ima mbufo akpakam ọdọdiọn̄ awak ke ifiọk ye kpukpru ikike.”—Sịghisịghi ubọkn̄wed edi eke nnyịn; Philippi 1:9.

Ke ndinam an̄wan̄a nte ‘nnennen ifiọk’ ekemede ndinam ẹnen̄ede ẹnam n̄kpọ ke ima, kere ban̄a isọn̄ akpanikọ oro ẹtịn̄de ke Utom 10:34, 35 ẹte: “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” Edieke Abasi adarade mme owo oro ẹbakde enye ẹnyụn̄ ẹnamde nti ido inamke n̄kpọ m̀mê ewe idụt m̀mê orụk ke mmọ ẹto, nte nnyịn ikpanamke n̄kpọ ke ukem usụn̄ oro ye ekemmọ owo ye unana asari?—Utom 17:26, 27; 1 John 4:7-11, 20, 21.

Ima—Mbun̄wụm Spirit Abasi

Kpa nte edịm oro edepde ebịt in̄wan̄ mfri ke nnennen ini esinamde ẹnyene eti idọk, spirit Abasi ekeme ndinam mbon eti esịt ẹnyene mme edu oro Bible okotde “mbun̄wụm Spirit.” (Galatia 5:22, 23) Akakan ke otu mbun̄wụm emi edi ima. (1 Corinth 13:13) Edi didie ke nnyịn ikeme ndinyene spirit Abasi? Akpan usụn̄ kiet edi ke akam. Edieke nnyịn ibọn̄de akam iben̄e spirit Abasi, enye ọyọnọ nnyịn. (Luke 11:9-13) Nte afo ke aka iso ndibọn̄ akam mben̄e edisana spirit? Edieke anamde ntre, do, ẹyetịm ẹkụt ọsọn̄urua mbun̄wụm esie, esịnede ima, ke uwem fo.

Nte ededi, enyene utọ spirit en̄wen oro esibiọn̄ọde spirit Abasi. Bible okot enye “spirit ererimbot emi.” (1 Corinth 2:12; Ephesus 2:2) Spirit emi enyene idiọk odudu inyụn̄ itoho owo en̄wen ke mîbọhọke Satan kpa Devil, “ọbọn̄ ererimbot” ubonowo oro adian̄arede ọkpọn̄ Abasi. (John 12:31) Ukem nte ofụm oro abarade ntọn̄ ye mbio, “spirit ererimbot emi” esidemerede mme idiọk udọn̄ oro ẹbiatde-biat ima ẹnyụn̄ ẹsịnde udọn̄ ẹnọ ediyụhọ mmeme obụkidem.—Galatia 5:19-21.

Mme owo ẹsinyịme idiọk spirit oro ada mmọ usụn̄ ke ini mmọ ẹsiode idem ẹnyan ẹnọ uma inyene obụkidem, ekikere ami-ndi-akpa, afai afai ido, ye ukwan̄ ọsọ ekikere oro ererimbot enyenede aban̄a ima. Edieke afo oyomde ndikọri ata ima, ana afo ọsọn̄ọ ọbiọn̄ọ spirit ererimbot emi. (James 4:7) Nte ededi, kûbuọt idem ke ukeme fo; ben̄e Jehovah un̄wam. Spirit esie—kpa akakan odudu ke ekondo—ekeme ndisọn̄ọ fi idem nnyụn̄ nnam fi okụt unen.—Psalm 121:2.

Kpep Ima to Itie Nditọete Christian

Kpa nte nditọwọn̄ ẹsikpepde ndiwụt ima ke ini ẹwụtde mmọ ima ke ufọk, kpukpru nnyịn—n̄kpri ye ikpọ—imekeme ndikọri ima ebe ke ndidụk nsan̄a ye mme Christian eken. (John 13:34, 35) Ke akpanikọ, kiet ke otu akpan utom esop Christian edi ndinam idaha odu emi mme  owo ẹkemede ‘ndidemerede kiet eken nnọ ima ye nti utom.’—Mme Hebrew 10:24.

Mbon oro “ẹdude ke nnanenyịn ẹnyụn̄ ẹsuanade,” ke ererimbot unana ima emi akande nnyịn okụk mi, ẹsinen̄ede ẹwụt esịtekọm ẹban̄a utọ ima emi. (Matthew 9:36) Ifiọk n̄kpọntịbe owụt nte ke owo ndinyene ima ima itie ebuana ke ini akwa owo ekeme ndibiat ndiọi utịp ẹtode unana ndikowụt enye ima ke ini uyen. Ke ntre, edi akpan n̄kpọ didie ntem ọnọ kpukpru mme Christian oro ẹma ẹkeyak idem ẹnọ ndinen̄ede ndara mbufa owo oro ẹdụkde ẹdi otu mmọ ke ofụri esịt!

‘Ima Idibehe Ifep ke Nsinsi’

Bible ọdọhọ ete ke “ima idibehe ifep [ke] nsinsi.” (1 Corinth 13:8) Didie ke oro edi ntre? Apostle Paul asian nnyịn ete: “Ima enyenyene anyan ime, onyụn̄ ọfọn ido; ima ifịbeke ufụp; ima inamke inua, ikohokede idem, inamke ido eke mîdotke, iyomke ufọn esiemmọ, isọpke iyatesịt, ikamake udu.” (1 Corinth 13:4, 5) Nte an̄wan̄ade, utọ ima emi idịghe ikpîkpu ekikere m̀mê enyọn̄ enyọn̄ ntụk. Ke edide isio—mbon oro ẹwụtde utọ ima emi, ẹfiọk edikpu ye ubiak oro uwem akamade, edi mmọ iyakke emi abiat ima oro mmọ ẹmade ekemmọ owo. Utọ ima oro enen̄ede edi “se ibọpde uwem adiana inam ọfọn ama.”—Colossae 3:12-14.

Kere ban̄a uwụtn̄kpọ n̄kaiferi Christian kiet ke Korea oro edide isua 17. Ke ini enye ọkọtọn̄ọde ndinam n̄kpọ Jehovah Abasi, ubon esie ikenyịmeke emi ndien enye ekenyene ndikpọn̄ ufọk. Nte ededi, utu ke ndiyat esịt, enye ama ọbọn̄ akam aban̄a mfịna emi, ayakde Ikọ ye spirit Abasi akara ekikere esie. Ke oro ebede, enye ama esiwet ubon esie leta, etịn̄de ọnọ mmọ aban̄a ata ufiop ufiop ima oro enye amade mmọ. Ke ẹnamde n̄kpọ ẹban̄a mme leta esie, ikpọ nditọeka esie iren iba ẹma ẹtọn̄ọ ndikpep Bible ndien idahaemi mmọ ẹdi mme Christian oro ẹma ẹkeyak idem ẹnọ. Eka esie ye ekpri eyeneka esie eren ẹma ẹtọn̄ọ n̄ko ndikpep akpanikọ Bible. Ke akpatre, ete esie, oro ekenen̄erede ọbiọn̄ọ enye ama okpụhọde ekikere esie. N̄kaiferi edide Ntiense mi ewet ete: “Kpukpru nnyịn ima idọ ekemmọ Christian, ndien mbonubon nnyịn oro ẹdide mme andituak ibuot oro ẹdianade kiet ẹdi 23 idahaemi.” Nso edikan ke ima akakan ntem!

Nte afo omoyom ndikọri ata ima nnyụn̄ n̄n̄wam mbon en̄wen ndinam ntre? Do, wọn̄ọde tiene Jehovah, kpa Ntọn̄ọ ọsọn̄urua edu emi. Ih, kere ban̄a Ikọ esie, bọn̄ akam yom edisana spirit, nyụn̄ buana kpukpru ini ye nditọete Christian. (Isaiah 11:9; Matthew 5:5) Edi n̄kpọ inemesịt didie ntem ndifiọk nte ke mîbịghike kpukpru mme idiọk owo ididụhe aba, ndien sụk mbon oro ẹnamde-nam ata ima Christian ẹwụt, ẹdisụhọ! Ke akpanikọ, ima edi ukpọhọde inemesịt ye uwem.—Psalm 37:10, 11; 1 John 3:14.

[Mme ndise ke page 6]

Akam ye edikpep Ikọ Abasi ayan̄wam nnyịn ndikọri ata ima