Vidio oro Otụkde Esịt Mme Uyen

EDIWAK n̄kparawa owo ẹma ẹbọ nsịnudọn̄ ndinen̄ede n̄kere mban̄a edu uwem mmọ ke ini mmọ ẹkesede vidio Young People Ask—How Can I Make Real Friends? * Vidio oro ọdọn̄ọ nti item N̄wed Abasi, mme ikọ oro mme uyen Christian ẹtịn̄de, ye edemede-owo-udọn̄ drama eyomfịn oro ọkọn̄ọde ke mbụk Bible aban̄ade Dinah. (Genesis, ibuot 34) Mme ikọ oro ẹtienede mi oro ẹtịn̄de ẹban̄a vidio emi ẹto Mexico.

Martha ọdọhọ ete: “Vidio oro ama enen̄ede otụk mi esịt. Etie nte ẹkenam enye akpan akpan ẹnọ mi. N̄kekere ke mme andikpep ye mme nsan̄a ufọkn̄wed mi ndidiọn̄ọ mi nte kiet ke otu Mme Ntiense Jehovah ama ekem. Mma n̄kpu ndisọn̄ọ emi ke ndiketre ndikwọrọ ikọ nnọ mmọ. Mmowụt esịtekọm mban̄a kpukpru ntọt oro Jehovah ọnọde, akpan akpan ke ini enye enen̄erede otụk nnyịn nte vidio emi.”

Juan Carlos ọdọhọ ete: “Vidio emi enen̄ede anam fi ekere n̄kpọ. Nte akparawa owo, mma nnam ndusụk ndudue nnyụn̄ ndu uwem nte ndusụk mbon drama emi. Ke ndusụk isua emi ẹkebede, mma ndu uwem esịt iba, edi mma mfiọk nte ke utọ uwem oro ekeme ndida ndiọi utịp ndi. Ke mma n̄kese vidio oro, mmebiere ndinam akpanikọ nnọ Jehovah.”

Sulem ọdọhọ ete: “Vidio oro ama enen̄ede otụk mi ke ini n̄kesede enye. Mbemiso ini emi, mma ntre ndisikot Bible, ndien n̄kesinen̄ekede mbọn̄ akam nnọ Jehovah. Ke ini n̄kakpan̄de utọn̄ nnọ mme ikọ oro n̄kparawa owo ẹketịn̄de ke vidio oro, ama onụk mi ndifiak ntọn̄ọ n̄kpep Bible nnyụn̄ mbọn̄ akam nnọ Jehovah.”

N̄kparawa owo mfịn ẹsobo ediwak n̄kpọ-ata, ndien mme ufan oro mmọ ẹmekde ẹsiwak ndinen̄ede ntụk nte mmọ ẹdude uwem. (Psalm 26:4; Mme N̄ke 13:20) Vidio Young People Ask—How Can I Make Real Friends? ke an̄wam ediwak n̄kparawa owo ndinam nti ubiere ke afan̄ emi.

[Ikọ idakisọn̄]