“Mbufo Ẹkebọ ke Ikpîkpu, Ẹnọ N̄ko ke Ikpîkpu”

“MBUFO ẹkebọ ke ikpîkpu, ẹnọ n̄ko ke ikpîkpu.” (Matthew 10:8) Jesus ọkọnọ mme apostle esie item emi ke ini enye okosiode mmọ ọdọn̄ ẹkekwọrọ eti mbụk. Ndi mme apostle oro ẹma ẹnam item emi? Ih, ndien mmọ ẹma ẹka iso ndinam ntre idem ke Jesus ama ọkọkpọn̄ isọn̄.

Ke uwụtn̄kpọ, ke ini Simon emi ekedide abiaidiọn̄ ke mbemiso okokụtde utịbe utịbe odudu emi apostle Peter ye John ẹkenyenede, enye ama ọdọhọ inọ mmọ okụk man ẹnọ imọ odudu oro. Edi Peter ama asua ọnọ Simon, ọdọhọde ete: “Okụk fo etiene fi atak, koro afo ekerede ete iyada okụk idep enọ Abasi.”—Utom 8:18-20.

Apostle Paul ekenyene ukem edu Peter. Paul akpakayak nditọete Christian esie ke Corinth ẹbiom mbiomo esie ke n̄kan̄ okụk. Edi, enye ama ada ubọk esie anam utom ndida n̄n̄wam idem. (Utom 18:1-3) Ntem, enye ama enyene uko nditịn̄ nte ke imọ ikọkwọrọ gospel “ke mfọn” inọ mbon Corinth.—1 Corinth 4:12; 9:18.

Edi n̄kpọ mfụhọ nditịn̄, ediwak owo emi ẹdọhọde nte itienede Christ inyeneke utọ unyịmesịt oro ‘ndinọ ke ikpîkpu.’ Ke akpanikọ, ediwak mme adaiso ido ukpono ke Christendom “ẹteme owo ke inyene.” (Micah 3:11) Ndusụk mme adaiso ido ukpono ẹforo ke ntak okụk oro ẹbọde mme erọn̄ mmọ. Ke 1989, ẹma ẹbiere n̄kpọkọbi isua 45 ẹnọ ọkwọrọikọ kiet ke United States. Ntak-a? Enye ama “esiwo mbon ufọkabasi ediwak miliọn dollar onyụn̄ ada ndusụk okụk oro edep mme ufọk, ubomisọn̄, ekpe usụn̄ aka nduọkodudu, onyụn̄ ọbọp ufọk ebua emi ẹsịnde ukwak unam ufọk ebịt.”—People’s Daily Graphic, October 7, 1989.

Nte Ghanaian Times eke March 31, 1990, ọdọhọde, ke Ghana, oku Roman Catholic ama emen okụk emi ẹketịpde ke ederi ọduọk mme andidụk. N̄wedmbụk oro ọdọhọ ete: “Enye akanam emi koro enye okodori enyịn mme andidụk nditịp ata ediwak okụk sia mmọ ẹkedide ikpọ owo.” Ikpaha owo idem nte ediwak ufọkabasi ẹnamde mbon mmọ ẹdiọk itọn̄, ẹnen̄erede ẹtoro mme edinam mbre mfọniso ye mme n̄kari n̄kari edinam eken man ẹnyene okụk.

Ke edide isio ye oro, Mme Ntiense Jehovah ẹdomo ndikpebe Jesus ye mme akpa mbet esie. Mmọ inyeneke mme ọkwọrọ ederi oro ẹkpede-kpe okụk. Ntiense kiet kiet enyene mbiomo edikwọrọ “gospel Ubọn̄ Abasi emi” nnọ mbon efen. (Matthew 24:14) Se ibede mmọ owo miliọn itiokiet ke ofụri ererimbot ẹbuana ke ndida “mmọn̄ uwem” nsọk mme owo ke ikpîkpu. (Ediyarade 22:17) Ke ntem, idem mbon oro “mînyeneke okụk” ẹkeme ndibọ ufọn nto etop Bible. (Isaiah 55:1) Okposụkedi ẹdade etịbe unyịmesịt ẹse ẹban̄a utom ofụri ererimbot mmọ, akananam mmọ iben̄eke okụk. Nte ata mme asan̄autom Abasi, mmọ ‘inyamke-nyam Ikọ Abasi in̄wana udori,’  edi mmọ ẹtịn̄ ikọ “nte owo emi edide owo akpanikọ ye owo Abasi etịn̄de.”—2 Corinth 2:17.

Edi ntak emi Mme Ntiense Jehovah ẹnyịmede ndibiat okụk mmọ n̄n̄wam mbon efen? Nso inụk mmọ? Ndi ndinọ ke ikpîkpu ọwọrọ ke mmọ ẹnam oro ye unana edibọ utịp utom mmọ?

Ibọrọ Ata Oro Satan Akamiade

Udọn̄ edinem Jehovah esịt—idịghe udọn̄ ediforo—enen̄ede onụk ata mme Christian mfịn. Ntem mmọ ẹkeme ndibọrọ ata oro Satan kpa Devil akamiade ediwak isua ikie ko ke edem. Satan ama ada mbụme emi amia ata ye Jehovah aban̄a edinen owo oro Job: “Nte Job abak Abasi ke ikpîkpu?” Satan ọkọdọhọ ke Job anam n̄kpọ Abasi n̄kukụre koro Abasi esịnde ọkọ akanade enye okụk. Satan ama ọdọhọ ke edieke ẹbọde Job inyene obụkidem esie, ke enye ayakan̄ Abasi an̄wan̄wa!—Job 1:7-11.

Man ọbọrọ ata emi, Abasi ama ayak Satan odomo Job, ọdọhọde ete: “Kpukpru se inyenede enye odu fi ke ubọk.” (Job 1:12) Nso ikedi utịp? Job ama owụt ke Satan edi osu nsu. Se ededi afanikọn̄ oro enye okosobode, Job ama ọsọn̄ọ ada. Enye ọkọdọhọ ete: “Ndisioho mfọn-mma ke idem mi mfep tutu ndikpa.”—Job 27:5, 6.

Ata mme andituak ibuot mfịn ẹnyene ukem edu Job. Idịghe n̄kpọ obụkidem onụk mmọ ndinam n̄kpọ Abasi.

Mfọnido Oro Owo Mîdotke Emi Abasi Ọnọde

Ntak efen emi ata mme Christian ẹsinyịmede ‘ndinọ ke ikpîkpu’ edi nte ke mmọ ke idemmọ “ẹkebọ ke ikpîkpu” ẹto Abasi. Ubonowo odu ke ufụn idiọkn̄kpọ ye n̄kpa ke ntak idiọkn̄kpọ ete ete nnyịn Adam. (Rome 5:12) Ima okonụk Jehovah ndinam ndutịm man Eyen esie edikpa n̄kpa uwa—n̄kpọ emi akatakde Abasi n̄kpọ etieti. Ke akpanikọ ubonowo ikodotke emi. Enye edi enọ Abasi.—Rome 4:4; 5:8; 6:23.

Nte ẹwetde ke Rome 3:23, 24, Paul ama ọdọhọ mme Christian oro ẹyetde aran ete: “Kpukpru owo ẹma ẹnam idiọk-n̄kpọ, ẹnyụn̄ ẹtaba ubọn̄ Abasi. Edi ẹtebe mmọ ikpe ke ikpîkpu ke mfọn Esie, oto ke edifak emi odude ke Christ Jesus.” Mbon oro ẹnyenede idotenyịn edidu uwem ke nsinsi ke isọn̄ ẹdi n̄ko mme andibọ enọ “ke ikpîkpu.” Enọ emi esịne ifet edidi se ẹtebede ikpe nte mme ufan Jehovah.—James 2:23; Ediyarade 7:14.

Uwa ufak Christ n̄ko anam kpukpru Christian ẹkeme ndinam utom nte mme asan̄autom Abasi. Apostle Paul ekewet ete: “[N̄kedi isụn̄ ndịbe-n̄kpọ emi], adan̄a nte enọ mfọn Abasi emi Enye ọkọnọde mi edide.” (Ephesus 3:4-7) Mme ata asan̄autom Abasi idorike enyịn owo ndikpe mmọ okụk ke ndibuana etop emi ye mbon efen sia ẹkeyakde utom ukwọrọikọ oro mmọ mîdotke mi ẹnọ mmọ ke mfọn.

 Nte Ẹda Nsinsi Uwem Ẹtap Owo?

Ndi emi ọwọrọ nte ke Abasi odori enyịn mme Christian ndinam n̄kpọ nnọ enye ye unana edidori enyịn ndibọ utịp ndomokiet? Baba, koro apostle Paul ọkọdọhọ ekemmọ mme andinịm ke akpanikọ ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.” (Mme Hebrew 6:10) Jehovah inyụn̄ idiọkke. (Deuteronomy 32:4) Utu ke oro, Jehovah edi “Andinọ mmọ emi ẹyomde Enye utịp.” (Mme Hebrew 11:6) Edi nte un̄wọn̄ọ uwem nsinsi ke Paradise isịnke udọn̄ inọ ibụk?—Luke 23:43.

N̄wan̄ansa-o. Abasi ke idemesie akam ọnọ owo idotenyịn edidu uwem ke nsinsi ke Paradise ke isọn̄. Enye ọkọnọ akpa ebe ye n̄wan idotenyịn emi. (Genesis 1:28; 2:15-17) Enye n̄ko ama anam ẹkeme ndifiak nnyene idotenyịn emi ke ini Adam ye Eve ẹkenamde nditọ mmọ ẹduọk enye. Ntem Abasi ọn̄wọn̄ọ ke Ikọ esie ete ke “ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.” (Rome 8:21) Enen̄ede enen mme Christian mfịn ‘ndiwụk enyịn nse utịp eke ẹdinọde mmọ,’ ukem nte Moses eke eset. (Mme Hebrew 11:26) Abasi inọhọ utịp emi nte ubọkedem. Enye ọnọ utịp ke ntak ata ima oro enye amade mbon oro ẹnamde n̄kpọ esie. (2 Thessalonica 2:16, 17) Ke ntre, “nnyịn ima ima, koro Enye ekebemde iso ama nnyịn.”—1 John 4:19.

Nnennen Uduak Edinam N̄kpọ Abasi

Nte ededi, kpukpru ini ana mme Christian mfịn ẹdụn̄ọde ntak emi mmọ ẹnamde n̄kpọ Abasi. Ke John 6:10-13, nnyịn ikot nte ke Jesus ama ọnọ otuowo emi ẹwakde ẹbe tọsịn ition udia ke utịbe utịbe usụn̄. Ke oro ebede, ndusụk owo ẹma ẹtọn̄ọ nditiene Jesus ke ntak idiọkitọn̄. Jesus ama ọdọhọ mmọ ete: “Mbufo . . . ẹyom Mi koro mbufo ẹkediade uyo ẹyụhọ.” (John 6:26) Ediwak iduọk isua ke ukperedem, ndusụk Christian oro ẹma ẹkeyak idem ẹnọ ikanamke n̄kpọ Abasi “ke esịt akpanikọ.” (Philippi 1:17) Ndusụk owo emi ‘mîkenyịmeke inọ nti ikọ Ọbọn̄ nnyịn Jesus Christ’ ẹma ẹkam ẹyom usụn̄ ndidia udori nto itie ebuana Christian mmọ.—1 Timothy 6:3-5.

Mfịn, ekeme ndidi Christian emi anamde n̄kpọ Abasi n̄kukụre koro enye oyomde ndidu uwem ke nsinsi ke Paradise, anam oro ke ntak ibụk. Ke akpatre emi ekeme ndinam enye ọduọ ke n̄kan̄ eke spirit. Sia etiede nte editịm n̄kpọ Satan ebịghi akan nte enye okodoride enyịn, ‘idem ekeme ndimem’ enye, ekerede nte ke utịt ebịghi akaha ndidi. (Galatia 6:9) Enye akam ekeme nditua ukụt mban̄a mme n̄kpọ obụkidem oro enye akayakde ẹtak. Jesus eti nnyịn ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” (Matthew 22:37) Ih, owo emi anamde n̄kpọ Abasi ke ntak ima inịmke ini oro enye editrede. Enye ebiere ndinam n̄kpọ Jehovah ke nsinsi! (Micah 4:5) Enye ituaha ukụt n̄kpọ ekededi oro enye ayakde atak ke utom oro enye anamde ọnọ Abasi. (Mme Hebrew 13:15, 16) Ima oro enye enyenede ọnọ Abasi onụk enye ndinịm n̄kpọ Abasi akpa ke uwem esie.—Matthew 6:33.

Mfịn, se ibede ata mme andituak ibuot miliọn itiokiet “ẹnọ idemmọ unyịme unyịme” ke utom Jehovah. (Psalm 110:3, NW) Ndi afo edi kiet ke otu mmọ? Edieke mûdịghe, do kere ban̄a se Abasi ọnọde: edisana ifiọk akpanikọ; (John 17:3) ubọhọ ufụn nsunsu ukpepn̄kpọ ido ukpono; (John 8:32) ye idotenyịn edidu uwem ke nsinsi. (Ediyarade 21:3, 4) Mme Ntiense Jehovah ẹkeme ndin̄wam fi ekpep nte ekemede ndibọ Abasi kpukpru emi—ke ikpîkpu.

[Se Ẹwetde ke Ikpọ Abisi ke page 22]

Udọn̄ edinem Jehovah esịt—idịghe udọn̄ ediforo—enen̄ede onụk ata mme Christian mfịn

[Ndise ke page 21]

Abasi ndinọ ufak ke ikpîkpu onụk mme Christian ndibuana eti mbụk ke ikpîkpu