Mme Mbụme Ẹtode Mme Andikot

Jehovah ama enyịme mme asan̄autom esie eke eset, nditọ Israel, ẹdọ uwak iban edi enye inyịmeke aba idahaemi. Ndi idaha esie okpụhọde?

Ekikere Jehovah kaban̄a udọ uwak iban ikpụhọkede. (Psalm 19:7; Malachi 3:6) Toto ke editọn̄ọ enye ikaduakke ite mme owo ẹdọ uwak iban, inyụn̄ iduakke idahaemi. Ke ini enye okobotde Eve ọnọ Adam nte n̄wan esie, Jehovah ama etịn̄ nte ke idaha imọ ekedi eren ndidọ n̄wan kiet. “Mmọdo owo edikpọn̄de ete esie ye eka esie, edinyụn̄ adiana ye n̄wan esiemmọ; ndien mmọ ẹyekabade obụk kiet.”—Genesis 2:24.

Ke ini Jesus Christ okodude ke isọn̄, enye ama afiak ọsọn̄ọ idaha emi ke ibọrọ oro enye ọkọnọde mbon oro ẹkebụpde ẹban̄a usiondọ ye edifiak ndọ ndọ. Enye ọkọdọhọ ete: “Nte mbufo ikokotke ite, Enye emi okobotde mmọ obot mmọ eren ye n̄wan toto ke editọn̄ọ? N̄ko, ke ntak emi owo ọyọkpọn̄ ete ye eka esie akadiana ye n̄wan esie, ndien mmọ mbiba ẹyekabade ẹdi obụk kiet. Ntre ke mmọ idịghe aba owo iba, edi ẹdi obụk kiet.” Jesus ama adian do ete: “Owo ekededi eke edisiode n̄wan esie ndọ, ke mîtoho ke edidue ye erenowo, onyụn̄ ọdọde efen, esịn efịbe.” (Matthew 19:4-6, 9) Emi enen̄ede owụt nte ke owo ndidọ awak akan n̄wan kiet edi edisịn efịbe.

Edi ntak emi ẹkeyakde ẹdọ uwak iban ke eset-e? Ti ete ke idịghe Jehovah ọkọtọn̄ọ edinam emi. Akpa owo emi ẹsiakde ke Bible nte ọkọdọde awak akan n̄wan kiet ekedi Lamech, emi okotode ubon Cain. (Genesis 4:19-24) Ke ini Jehovah akadade Ukwọ edi ke eyo Noah, Noah ye nditọiren esie ita ẹkenyene n̄wan kiet kiet. Ẹma ẹsobo kpukpru mbon oro ẹkedọde uwak iban ke Ukwọ oro.

Ediwak isua ikie ke ukperedem ke ini Jehovah ekemekde nditọ Israel nte ikọt esie, udọ uwak iban ama ododu ke otu mmọ, kpa ye oro ata ediwak owo ẹkedọde n̄wan kiet kpọt. Abasi ikọdọhọke mbon emi ẹdọde uwak iban ẹsio ndọ. Utu ke oro, enye ama ọnọ ibet ndikara edinam oro.—Exodus 21:10, 11; Deuteronomy 21:15-17.

Se Jesus eketịn̄de aban̄a akpasarade idaha Jehovah kaban̄a ndọ ye se apostle Paul ekewetde ke idak ndausụn̄ edisana spirit Abasi ẹwụt nte ke ẹkenyịme udọ uwak iban n̄kukụre ke ibio ini. Paul ọkọdọhọ ete: “Yak owo enyene n̄wan esiemmọ, n̄wan onyụn̄ enyene ebe esiemmọ.” (1 Corinth 7:2) Ẹma ẹnọ Paul odudu spirit ndiwet n̄ko nte ke owo emi ẹmekde nte esenyịn m̀mê asan̄autom unamutom ke esop Christian “enyene ndidi ebe n̄wan kiet.”—1 Timothy 3:2, 12; Titus 1:6.

Ntem, Jehovah ikenyịmeke udọ uwak iban aba ke ini ẹkesiakde esop Christian ke n̄kpọ nte isua 2,000 emi ẹkebede. Ke ini oro, ndutịm ndọ ama afiak eketie nte eketiede ke editọn̄ọ emi Abasi okobotde eren ye n̄wan: ebe kiet, n̄wan kiet. Mfịn, ikọt Abasi ke ofụri ererimbot ẹtiene idaha emi.—Mark 10:11, 12; 1 Corinth 6:9, 10.