Ntọt Mme Anditan̄a Obio Ubọn̄

Nti Utịp Ẹtode Ime ye Edisọn̄ọ Nyịre

JESUS CHRIST ama ebem iso etịn̄ ete ke ukperedem ini “ima ediwak owo oyosụhọ.” Nte utịp, ke ediwak ikpehe ererimbot mfịn, mme owo ke ofụri ofụri inyeneke udọn̄ ke eti mbụk Obio Ubọn̄. Ndusụk owo ẹkam ẹsịn ido ukpono ke ndek.—Matthew 24:12, 14.

Kpa ye oro, ke ntak mbuọtidem ye ime, mme asuanetop Obio Ubọn̄ ke ẹkan n̄kpọ-ata emi uforo uforo, nte ifiọkutom otode Czech Republic mi owụtde.

Ntiense iba ẹma ẹtịn̄ ikọ ye n̄wan kiet emi ekeberide usụn̄ esịne ke ufọk. Ke esisịt ini ebede, n̄wan oro ama eberede usụn̄ esisịt onyụn̄ anyan ubọk ọbọ magazine Enyọn̄-Ukpeme ye Awake! emi Mme Ntiense oro ẹkenọde. Enye ama ọkọm mmọ onyụn̄ afiak eberi usụn̄. Mme Ntiense oro ẹma ẹkere ẹte “Nte nnyịn ikpafafiak ika?” Kiet ke otu mmọ emi edide asiakusụn̄, m̀mê asan̄autom uyọhọ ini, ama ebiere ndifiak n̄ka, edi ukem n̄kpọ oro ama afiak etịbe, ndien emi ama aka iso ntre ke isua kiet.

Ke ama ekebiere ndikpụhọde ido utọn̄ọ nneme esie, asiakusụn̄ emi ama ọbọn̄ akam ọnọ Jehovah oyom un̄wam. Isan̄ en̄wen oro enye ọkọnọde n̄wan oro magazine, enye ama obụp n̄wan oro ke ido ufan ete: “Idem fo? Mmọn̄ọ, ndi ama ama mme magazine oro?” Ke akpa, enye ikọbọrọke, edi ke asiakusụn̄ oro ama akafiak aka ikafan̄ efen, n̄wan oro ama ọtọn̄ọ ndinam n̄kpọ ufan ufan. Isan̄ kiet enye ama eberede usụn̄ enịm in̄wan̄, edi nneme ekedi ibio ibio.

Sia n̄wan oro ekesimen̄ede ndineme nneme ke enyịnusụn̄, asiakusụn̄ oro ama ebiere ndiwet enye leta man anam ntak oro enye esidide an̄wan̄a onyụn̄ asian enye nte ke imoyom ndikpep Bible ye enye. Ke akpatre, ke ama ekesịn ukeme oro asan̄ade ye ime ke isua kiet ye ubak, asiakusụn̄ oro ama ọtọn̄ọ ukpepn̄kpọ Bible ye enyeneufọk oro. Idem ama akpa enye edi enye ama okop inemesịt ke ini n̄wan oro ke ukperedem ọkọdọhọde enye ete: “Mma nnịm ke Abasi odu toto ke ini oro afo ọkọtọn̄ọde ndisida mme magazine nsọk mi.”

Ke akpanikọ, ime ye edisọn̄ọ nyịre ẹkeme ndida nti utịp ndi ke utom edikwọrọ Obio Ubọn̄ ye edinam mbet.—Matthew 28:19, 20.