Enye Ama Ama Mfọnido

MILTON G. HENSCHEL, andikabuana ke Otu Ukara eke Mme Ntiense Jehovah ke anyan ini, ama okụre utom esie eke isọn̄ ke Saturday, March 22, 2003. Enye ekedi isua 82.

Nte akparawa, Milton Henschel ekedi andibuana ke ibuot itieutom Mme Ntiense Jehovah onyụn̄ anam utom ke edinam akpanikọ ke se iwakde ibe isua 60. Ẹma ẹsọsọp ẹdiọn̄ọ enye kaban̄a eti ubiere esie ye ọkpọsọn̄ udọn̄ ke utom edikwọrọ Obio Ubọn̄. Ke 1939, enye ama akabade edi ewetn̄wed N. H. Knorr, emi ekedide esenyịn ufọk umịn̄n̄wed eke Mme Ntiense Jehovah ke Brooklyn. Ke ini Brọda Knorr ọkọtọn̄ọde ndida usụn̄ ke otu Mme Ntiense ke ofụri ererimbot ke 1942, enye okosụk ada Brọda Henschel nte udiana esie. Brọda Henschel ama ọdọ Lucille Bennett ke 1956, ndien mmọ ẹma ẹbuana mme idatesịt ye mme n̄kpọ-ata oro uwem akamade.

Brọda Henschel ama anam utom ọtọkiet ye Brọda Knorr tutu n̄kpa esie ke 1977. Sia ekesiwakde ndisan̄a ye Brọda Knorr, Brọda Henschel ama aka se iwakde ibe idụt 150, akade ekese onyụn̄ esịnde udọn̄ ọnọ Mme Ntiense Jehovah ke ofụri ererimbot, akpan akpan mme isụn̄utom ye mbon oro ẹdude ke mme ọfis n̄kọk itieutom. Mme utọ isan̄ oro ẹma ẹsisọn̄ ke ndusụk idaha, idem enyenede ndịk. Ke 1963, ke ini akakade mbono ke Liberia, Brọda Henschel ama osobo ibak ibak ukọbọ ke ndisịn ndibuana ke edinam ufreidụt. * Sia mîkokopke ndịk, Brọda Henschel ama afiak aka Liberia ọfiọn̄ ifan̄ ke ukperedem man okosobo ye adaibuot ukara idụt oro onyụn̄ oyom ifụre utuakibuot oro okponde akan ọnọ Mme Ntiense Jehovah emi ẹdude do.

Ẹma ẹdiọn̄ọ Brọda Henschel nte owo mbufiọk, emi okpụhọrede ada ekekem ye mme idaha, onyụn̄ enyenede eti ibuot ke ndise mban̄a mme mfịna ye mme n̄kpọ-ata. Mme nsan̄a esie ẹma ẹnen̄ede ẹma eti ndutịm, nsụkidem, ye edu mbubru esie. Sia ekenyenede n̄wọrọnda ibuot uti n̄kpọ, enye ama esinam ediwak isụn̄utom ke ofụri ererimbot ẹdat esịt ke enye ndisọsọp nti enyịn̄ mmọ, etịn̄de ubak udịmikọ kiet m̀mê iba ke usem n̄kann̄kụk, onyụn̄ etịn̄ ikọ mbubru, otopde idet enyịn.

Micah 6:8 (NW) eti nnyịn ete ke Jehovah Abasi oyom nnyịn “ima mfọnido.” Ẹyeti Milton Henschel ke ndinịm uwụtn̄kpọ ke afan̄ oro. Kpa ye ikpọ ifetutom esie, enye ekedi owo oro ẹkemede ndisan̄a n̄kpere, enyenede sụn̄sụn̄ edu, onyụn̄ ọfọnde ido. Enye ama esima ndidọhọ, “Ke ini enyenede eyịghe, ti ete ke mfọnido edi se inende.” Okposụkedi nnyịn ifụhọde iban̄a n̄kpa edima eyenete emi, nnyịn imadat esịt ite ke enye ama anam akpanikọ tutu esịm akpatre, enyenede nsọn̄ọ ndibọ utịp esie, kpa “anyanya uwem.”—Ediyarade 2:10.

[Ikọ idakisọn̄]

[Ndise ke page 31]

M. G. Henschel ye N. H. Knorr

[Ndise ke page 31]

Ye Lucille n̄wan esie