Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Nso idi ndusụk usụn̄ emi Ruth ekenịmde eti uwụtn̄kpọ?

Enye ama enịm eti uwụtn̄kpọ ke ima oro enye akamade Jehovah, ke ima nsọn̄ọnda oro enye ekenyenede ọnọ Naomi, ye ke ifịk unamutom ye nsụhọdeidem. Ye eti ntak, mme owo ẹkedọhọ ke enye edi “enyene-ido an̄wan.” (Ruth 3:11)—4/15, page 23-26.

• Nnyịn isan̄a didie ifiọk ke Jehovah ekere aban̄a mme usụhọde owo?

Enye ọkọdọhọ nditọ Israel oro ẹkefịkde ke Egypt ete mmọ ẹkûfịk mme usụhọde owo. (Exodus 22:21-24) Jesus, emi ekekpebede Ete esie, ama owụt ata udọn̄ ke idem mme usụhọde owo, ndien enye ekemek iren oro “mîkọfiọkke n̄wed ye mme usụhọde owo” nte mme apostle. (Utom 4:13, NW; Matthew 9:36) Nnyịn imekeme ndikpebe Abasi ke ndikere mban̄a mbon en̄wen, utọ nte n̄kparawa owo.—4/15, page 28-31.

• Nnyịn isan̄a didie ifiọk nte ke Jehovah esikụt se nnyịn inamde?

Mme mbụk Bible ẹwụt nte ke Jehovah esikụt mme n̄kpọ oro mme owo ẹnamde. Enye ama okụt uwa oro Abel akawade, ndien enye esikụt ‘uwa ekọm, kpa mfri n̄kpọkinua’ nnyịn. (Mme Hebrew 13:15) Jehovah ama ọfiọk ete ke Enoch ama odomo ndinem imọ esịt ebe ke ndidu edisana uwem. Ndien Abasi ama okụt nte ebeakpa Zarephath oro mîkedịghe n̄wan Israel abuanade ekpri se enye ekenyenede ye prọfet Elijah. Jehovah n̄ko esikụt mme utom mbuọtidem nnyịn.—5/1, page 28-31.

• Ntak emi ẹkemede ndidọhọ ke mme Jew oro ẹkekabarede ẹdi mme Christian ke Pentecost 33 E.N. ebede ẹkenyene ndinam ọkpọkpọ uyakidem nnọ Abasi?

Ke 1513 M.E.N., nditọ Israel eset ẹma ẹnyene itie ebuana oro mmọ ẹkeyakde idem ẹnọ Jehovah. (Exodus 19:3-8) Ke oro ebede, mme Jew ẹma ẹmana ẹdụk idụt oro ẹkeyakde idem ẹnọ ke idak Ibet ediomi. Edi ebede ke n̄kpa Christ ke 33 E.N., Jehovah ama emen Ibet ediomi efep. (Colossae 2:14) Ke oro ebede, ama oyom mme Jew oro ẹkeyomde ndinam n̄kpọ Abasi ke usụn̄ oro enye enyịmede ẹyak idem ẹnọ enye ẹnyụn̄ ẹna baptism ke enyịn̄ Jesus Christ.—5/15, page 30-31.

• Nte edifọp incense enyene itie ke utuakibuot akpanikọ mfịn?

Edifọp incense ekedi ubak utuakibuot akpanikọ ke Israel eset. (Exodus 30:37, 38; Leviticus 16:12, 13) Edi Ibet ediomi, esịnede edifọp incense, ama etre ke ini Christ akakpade. Mme Christian ẹkeme ndibiere nnọ idemmọ m̀mê ẹkpenyene ndifọp incense ke mme edinam oro mînyeneke ebuana ye ido ukpono, edi enye idịghe ubak utuakibuot akpanikọ mfịn. Ẹkpenyene ndikere mban̄a se mbon en̄wen ẹkerede man ẹfep ndinam mmọ ẹtuak ukot ẹduọ.—6/1, page 28-30.

• Ewe mbụk n̄kpọntịbe ndondo emi onụk ediwak owo ndinen̄ede n̄kere nte ke Jesus ama enen̄ede odu ke isọn̄?

Ekebe itiat udọn̄ ọkpọ mme akpan̄kpa oro ẹkefiọhọde ke Israel enen̄ede ọwọrọ etop. Etie nte enye okodu ọtọn̄ọde ke akpa isua ikie, ndien odu n̄kpọ emi ẹkapde ke enye emi okotde ete: “James, eyen Joseph, eyeneka Jesus.” Ndusụk owo ẹda emi nte “mbịghi-n̄kan n̄kpọeset emi ẹdọkde ke isọn̄” oro owụtde ke Jesus ama odu, ke ẹsiode Bible ẹfep.—6/15, page 3-4.

• Didie ke owo esikpep ndima ima?

Mme owo ẹsibem iso ẹkpep ndima ima ebe ke uwụtn̄kpọ ye ukpep oro mmọ ẹbọde ẹto mme ete ye eka mmọ. Ke ini ebe ye n̄wan ẹmade ẹnyụn̄ ẹkponode kiet eken, nditọ ẹkeme ndikpep ndima ima. (Ephesus 5:28; Titus 2:4) Idem ọkpọkọm owo itoho ubon oro ẹmade ima, enye ekeme ndikpep ndima ima ebe ke ndinyịme ndausụn̄ Jehovah, ọbọde un̄wam edisana spirit, onyụn̄ ọbọde ufọn oto ufiop ufiop ibetedem itie nditọete Christian.—7/1, page 4-7.

• Anie ekedi Eusebius, ndien nso ke nnyịn ikeme ndikpep nto uwem esie?

Eusebius ekedi ewetmbụk eset emi okokụrede n̄wed esie oro ekedide eboho duop oro ẹkotde History of the Christian Church ke 324 E.N. Okposụkedi enye ekenịmde nte ke Ete ama odu mbemiso Eyen, Eusebius ama enyịme isio isio ekikere ke esop Nicaea. Nte an̄wan̄ade enye ama ofụmi se Jesus okoyomde oto mme anditiene Enye nte ke mmọ ‘ikpedịghe eke ererimbot.’ (John 17:16)—7/15, page 29-31.

• Nte Jehovah okpụhọ nte enye esede udọ uwak iban?

Baba, Jehovah ikpụhọkede nte enye esede udọ uwak iban. (Malachi 3:6) Ndutịm Abasi kaban̄a akpa owo ekedi enye ‘ndidiana ye n̄wan esiemmọ’ nnyụn̄ n̄kabade ndi obụk kiet. (Genesis 2:24) Jesus ọkọdọhọ ete ke ndisio ndọ nnyụn̄ ndọ owo efen ibọhọke ke ini nsan̄a ndọ esịnde efịbe anam owo edi esịn-efịbe. (Matthew 19:4-6, 9) Jehovah ndinyịme udọ uwak iban ama etre ke ini ẹkesiakde esop Christian.—8/1, page 28.