Utuakibuot Akpanikọ Adian Ubon Ọtọkiet

MARIA ekedi isua 13 ke ini iman esie eketịn̄de aban̄a Jehovah ọnọ enye ye Lucy, udun̄wan eka esie. Iman oro n̄ko ama anam idotenyịn Paradise isọn̄ an̄wan̄a. Sia ẹkekopde nduaidem, mmọ ẹma ẹtiene enye ẹka Ufọkmbono Obio Ubọn̄ Mme Ntiense Jehovah. In̄wan̄-in̄wan̄ n̄kpọ oro ẹkenemede do ama otụk Maria. Emi ama enen̄ede okpụhọde ọkpọn̄ ufọkabasi mmọ, emi n̄kponn̄kan ikpehe edinam ekesidide ndikwọ ikwọ! Ikebịghike, Maria ye Lucy ẹma ẹkpep Bible ye kiet ke otu Mme Ntiense Jehovah.

Hugo, akpaneka mmọ, ekenyene udọn̄ ke ukpepn̄kpọ akwaifiọk ye ke ukpepn̄kpọ edito ke unam mforo owo. Enye ọkọdọhọ ke imọ inịmke ke Abasi odu. Edi ke ini akanamde utom ekọn̄, enye ama okot n̄wed oro Life—How Did It Get Here? By Evolution or by Creation?  * Enye ama enyene mme ibọrọ mbụme oro ido ukpono efen mîkemeke ndinọ. Ke ama okokụre utom ekọn̄ esie, enye ama ọtọn̄ọ ndisọn̄ọ obufa mbuọtidem esie ke Abasi ebe ke ndikpep Bible nnyụn̄ ndụk mme mbono esop ye nditọeka esie iban. Maria ye Lucy ẹma ẹna baptism ke 1992, isua iba ke mmọ ẹma ẹkebọ akpanikọ, ndien akpaneka mmọ ama ana baptism ke 1994.

Kan̄a ke emi, ete ye eka mmọ, emi ẹkesịnde idem ke mme ido edinam Catholic, ikenen̄ekede inyene udọn̄ ke akpanikọ. Ama ẹsibiak mmọ ndikụt Mme Ntiense Jehovah, okposụkedi mmọ ẹkesimade nti edu ye usịnen̄kpọ emi owụtde iso o-bụt oro mme uyen ẹdide Mme Ntiense emi nditọ mmọ ẹkesikotde ẹdi ufọk mmimọ, ẹkesisịnede. N̄ko, ke mme ini udia, nditọ emi ẹma ẹsidemede udọn̄ ete ye eka mmọ ke ini ẹtịn̄de ẹban̄a se mmọ ẹkekpepde ke mme mbono esop.

Kpa ye oro, ete ye eka mmọ ẹkenyene udọn̄ ke ifọt. Ete ekedi akpammịn oro ekesimiade eka mmọ. Akayak esisịt ubon oro ndibahade. Ndien ete ama esịne urua iba ke ufọk-n̄kpọkọbi ke ntak etịme etịme ido oro enye akanamde sia akakpade mmịn. Ke adan̄aemi okodude ke ufọk-n̄kpọkọbi, enye ama ọtọn̄ọ ndikot Bible. Nte enye okokotde, enye ama okụt mme ikọ Jesus ẹban̄ade idiọn̄ọ ukperedem ini. Sia emi akafịnade mmọ, ete ye eka emi ẹma ẹka Ufọkmbono Obio Ubọn̄ ẹnyụn̄ ẹnyịme ukpepn̄kpọ Bible. Ke ẹkpepde akpanikọ, mmọ ẹma ẹbiat kpukpru n̄wed ifọt mmọ ẹnyụn̄ ẹbọhọ mme en̄wan demon ebe ke ndikot enyịn̄ Jehovah. Mmọ ẹma ẹtọn̄ọ ndinam ikpọ ukpụhọde ke mme edu uwem mmọ.

Nte afo emekeme ndikere mban̄a idatesịt oro Maria ye Lucy ẹkenyenede ndikụt nte Hugo enịmde ete ye eka mmọ baptism ke kiet ke otu mbono district ke Bolivia ke 1999? N̄kpọ nte isua usụkkiet ẹmebe tọn̄ọ nte Maria ye Lucy ẹkebem iso ẹkpep ẹban̄a Jehovah ye mme un̄wọn̄ọ esie. Ke adianade ye Hugo, mmọ idahaemi ẹdu ke utom ukwọrọikọ uyọhọ ini. Mmọ ẹkop inemesịt didie ntem nte ke utuakibuot akpanikọ anam ubon mmimọ adiana kiet!

[Ikọ idakisọn̄]