Mbụk Eyouwem

Jehovah Esikere Kpukpru Ini Aban̄a Nnyịn

NTE ENELESI MZANGA OBỤKDE

Ekedi ke 1972. N̄kparawa duop, oro ẹdide mbon N̄ka N̄kparawa Malawi, ẹma ẹbụn̄ ẹdụk ufọk nnyịn, ẹmụm mi, ẹnyụn̄ ẹdụri mi ẹka in̄wan̄ mbọkọk oro okodude ekpere. Do, mmọ ẹma ẹmia mi tutu mmọ ẹkere ke mmakpa.

Ẹma ẹda ukem ibak ibak en̄wan emi ẹtiene ediwak Mme Ntiense Jehovah ke Malawi. Ntak emi ẹkekọbọde mmọ? Nso ikan̄wam mmọ ndiyọ? Mbọk ẹyak nnọ mbufo mbụk mban̄a ubon nnyịn.

N̄KAMANA ke December 31, 1921, ndụk ubon oro ẹmade ido ukpono. Ete mi ekedi pastọ Ufọkabasi Central African Presbyterian. N̄kokpon ke Nkhoma, ekpri obio oro ekperede Lilongwe, ibuot obio Malawi. Mma ndọ Emmas Mzanga ke ini n̄kedide isua 15.

Usen kiet, ufan ete mi, emi okonyụn̄ edide pastọ, ama edi ufọk nnyịn. Enye ama edikụt ke nnyịn idụn̄ọ ikpere Mme Ntiense Jehovah, ntre enye ama odụri nnyịn utọn̄ ete ikûnyene n̄kpọ ndomokiet ndinam ye mmọ. Enye ọkọdọhọ nnyịn ke Mme Ntiense ẹnyene demon, ye nte ke edieke nnyịn mîkpemeke idem, nnyịn n̄ko iyetiene inyene demon. Ntọt emi ama enen̄ede esịn nnyịn ndịk ke idem tutu nnyịn iwọrọ ikodụn̄ ke obio en̄wen; mi ke Emmas ekedinam utom nte anyam ufọkurua. Ke mîkebịghike, nnyịn ima idikụt nte ke obufa mbọhọidụn̄ nnyịn ekedi kpa Mme Ntiense Jehovah!

Nte ededi, ikebịghike, ọkpọsọn̄ ima oro Emmas akamade Bible ama onụk enye ndinyene nneme ye kiet ke otu Mme Ntiense. Ke ama ekenyene mme ibọrọ oro ẹnọde uyụhọ ke mme mbụme esie, Emmas ama enyịme Ntiense oro esidikpep Bible ye imọ. Ke ntọn̄ọ ntọn̄ọ, ẹkesinịm ukpepn̄kpọ Bible oro ke ufọkurua emi enye  akanamde utom, edi ekem ẹma ẹsio ukpepn̄kpọ eke urua ke urua emi ẹdinịm ke ufọk nnyịn. Ini ekededi oro Mme Ntiense Jehovah ẹkesidide, mma nsiwọrọ ke ufọk sia n̄kokopde ndịk mban̄a mmọ. Nte ededi, Emmas ama aka iso ndikpep Bible. Ke n̄kpọ nte ọfiọn̄ itiokiet ẹma ẹkebe tọn̄ọ nte enye ọkọtọn̄ọ ukpepn̄kpọ esie, enye ama ana baptism ke April 1951. Edi enye ikasianke mi sia enye ekekerede ke ami ndidọhọ imọ aba.

Mme Urua Afanikọn̄

Nte ededi, usen kiet, ufan mi Ellen Kadzalero ama asian mi ete ke ebe mi ama ana baptism nte kiet ke otu Mme Ntiense Jehovah. Esịt ama enen̄ede ofụt mi! Tọn̄ọ ke usen oro, n̄kenemeke nneme ye enye n̄konyụn̄ nnọhọ enye udia aba. Mma nnyụn̄ ntre ndikoi mmọn̄ ntem nnọ enye eyere—kpa utom oro ẹdade nte utom n̄wan ke edem nnyịn.

Ke ama ọkọyọ mfiomo emi ke urua ita, Emmas ama ọdọhọ mi ke sụn̄sụn̄ ido ete nsụhọde ntetie ye imọ, do ndien ke enye eketịn̄ ọnọ mi ntak oro enye ekebierede ndikabade ndi Ntiense. Enye ama okot onyụn̄ anam ediwak itie N̄wed Abasi an̄wan̄a, utọ nte 1 Corinth 9:16. Oro ama enen̄ede otụk mi onyụn̄ anam mi n̄kere ke akpana ntiene n̄kwọrọ eti mbụk. Ntre mma mbiere nditọn̄ọ ndikpep Bible ye Mme Ntiense Jehovah. Kpa ke mbubịteyo oro, edima ebe mi ama enen̄ede okop inemesịt ke inem inem udia oro n̄ketemde nnọ enye.

Ndibuana Akpanikọ ye Ubon ye Mme Ufan

Ke ini mme ete ye eka nnyịn ẹkekopde ẹte ke nnyịn ima itọn̄ọ ndibuana ye Mme Ntiense Jehovah, mmọ ẹma ẹnen̄ede ẹbiọn̄ọ nnyịn. Ubon nnyịn ẹma ẹwet leta ẹnọ nnyịn ẹte ikûdi idise mmimọ aba tutu amama. Edinam emi ama anam nnyịn ikop mfụhọ, edi nnyịn ima inyene mbuọtidem ke un̄wọn̄ọ Jesus nte ke iyenyene ediwak nditọeka iren ye nditọeka iban ye mme ete ye mme eka eke spirit.—Matthew 19:29.

Mma nsọsọp nnam n̄kọri ke ukpepn̄kpọ Bible mi nnyụn̄ nna baptism ke August 1951, n̄kpasịp ọfiọn̄ ita ye ubak ke ebe mi ama akana baptism. Ama ọdọn̄ mi ndibuana akpanikọ emi ye Ellen, ufan mi. Ke mfọniso, enye ama enyịme nsikpep imọ Bible. Ke May 1952, Ellen ama ana baptism onyụn̄ akabade edi eyeneka mi eke spirit, ndien emi ama anam itieufan nnyịn enen̄ede ọsọn̄. Mfịn, nnyịn isụk idi ata n̄kpet n̄kpet ufan.

Ke 1954, ẹma ẹmek Emmas ndisisan̄a nse mme esop nte esenyịn circuit. Nnyịn ima inyenyene nditọ itiokiet adan̄aoro. Ke ini oro, esenyịn oro asan̄ade-san̄a oro enyenede ubon ekesinyene ndida urua kiet nse esop nnyụn̄ nda urua oro etienede ndu ye n̄wan ye nditọ esie. Nte ededi, ke ini Emmas esikade isan̄, enye ama esikụt ete ke mmenịm ukpepn̄kpọ Bible ubon. Nnyịn ima isidomo ndinam ukpepn̄kpọ oro ikesinịmde ye nditọ nnyịn enyene inem. Ima inyụn̄ isitịn̄ ke ofụri esịt iban̄a nte nnyịn imade Jehovah ye nte imade akpanikọ oro odude ke Ikọ esie, ima inyụn̄ isibuana ke utom ukwọrọikọ nte ubon. Ndutịm ubọ ukpep eke spirit emi ama ọsọn̄ọ mbuọtidem nditọ nnyịn onyụn̄ etịm mmọ idem ọnọ ukọbọ oro idisobode.

Ukọbọ Ido Ukpono Ọtọn̄ọ

Ke 1964, Malawi ama akabade edi idụt oro adade ke idem. Ke ini ikpọ owo n̄ka ukaraidem oro ẹkesụk ẹdude ke ukara ẹkedide ẹdifiọk ẹte ke nnyịn ibuanake ke mbre ukara, mmọ ẹma ẹdomo ndinyịk nnyịn idep kad mbre ukara man itiene idụk n̄ka mbre ukara. * Sia ami ye Emmas mîkenyịmeke ndinam oro, mbon N̄ka N̄kparawa idụt oro ẹma ẹbiat in̄wan̄ ibokpot nnyịn—kpa akpan n̄kpọ oro ikenyenede ndida ndu uwem ke isua oro ekedide. Nte mbon N̄ka N̄kparawa  emi ẹkesụk ẹkpen̄ede ibokpot nnyịn ẹduọn̄ọ, mmọ ẹma ẹkwọ ẹte: “Ebu ẹyeta ibokpot kpukpru mbon oro mînyịmeke ndidep kad Kamuzu Banda [Adaibuot Ukara], ndien mmọ ẹyetua eyet.” Edi, okposụkedi ẹkebiatde se ikpadade idu uwem, nnyịn ikọduọkke idotenyịn. Jehovah ama ese aban̄a nnyịn. Enye ama ọsọn̄ọ nnyịn idem ke ima ima usụn̄.—Philippi 4:12, 13.

Ke okoneyo usen kiet ke August 1964, n̄kodu ye nditọ mi ikpọn̄ ke ufọk. Kpukpru nnyịn ima ide idap, edi mma ndemede ke nnade n̄kop uyo ikwọ ke anyan usụn̄. Mme ọkwọikwọ emi ẹkedi mbon Gulewamkulu, kpa enyene-ndịk ndedịbe n̄ka emi esịnede mme ẹnek unek obio oro ẹsisịnde ntịme ye mme owo, ẹnyụn̄ ẹnamde nte idi spirit mme ete ete oro ẹkekpan̄ade. N̄ka N̄kparawa ẹkedọn̄ mbon Gulewamkulu emi ẹte ẹdisịn ntịme ye nnyịn. Mma nsọsọp ndemede nditọ mi ke idap, ndien mbemiso mmọ ẹkedide ẹdisịm ufọk nnyịn, nnyịn ima ifehe idụk ikọt.

Nnyịn ima isịne ke ikọt oro ikedịbede ikụt akwa un̄wana ikan̄. Mbon Gulewamkulu emi ẹma ẹfọp ufọk n̄kanya nnyịn. Ikan̄ ama ata ufọk oro ofụri ofụri, ọkọrọ ye kpukpru inyene nnyịn. Nte mbon ntịme oro ẹkekpọn̄de ufọk nnyịn oro okosụk odụn̄ọde nsụn̄ikan̄, nnyịn ima ikop mmọ ẹdọhọde ẹte, “Imabara eti ikan̄ inọ Ntiense oro ndiwebe.” Nnyịn imọkọm Jehovah ke ndikanam nnyịn ifehe ibọhọ ye uwem! Ke akpanikọ, ẹma ẹbiat kpukpru inyene nnyịn, edi mmọ ikabiatke ubiere nnyịn ndibuọt idem ke Jehovah n̄kan owo.—Psalm 118:8, NW.

Nnyịn ima idifiọk nte ke mbon Gulewamkulu emi ẹma ẹda ukem ibak ibak edinam emi ẹtiene ubon Mme Ntiense Jehovah ition ke n̄kann̄kụk nnyịn. Nnyịn ikokop inemesịt inyụn̄ iwụt esịtekọm didie ntem ke ini nditọete ke mme esop n̄kann̄kụk ẹkedide ẹdinyan̄a nnyịn! Mmọ ẹma ẹfiak ẹdibọp ufọk ẹnọ nnyịn ẹnyụn̄ ẹnọ nnyịn udia ke ediwak urua.

Ukọbọ Etetịm Ọsọn̄ubọk

Ke September 1967, ẹma ẹtọn̄ọ ndimụm kpukpru Mme Ntiense Jehovah ke ofụri idụt oro. Man ẹmụm nnyịn, n̄kparawa ukpọtiọ—kpa N̄ka N̄kparawa idụt oro ye N̄ka Mme Adaiso Ntịme ke Malawi, ẹma ẹkama ofụt ẹsan̄a ẹyom Mme Ntiense Jehovah ke ufọk ke ufọk. Ke ẹkụtde Mme Ntiense Jehovah, mmọ ẹma ẹnọ Mme Ntiense emi kad mbre ukara ẹte ẹdep.

Ke ẹdisịmde ufọk nnyịn, mmọ ẹma ẹbụp m̀mê nnyịn imenyene kad mbre ukara. Mma ndọhọ: “Baba-o, n̄kedepke. Nnyụn̄ mben̄eke idem ndidep enye idahaemi, ndinyụn̄ ndepke ke ini iso.” Do, mmọ ẹma ẹmụm mi ye ebe mi ẹda ẹka itieutom mme bodisi emi odude ke n̄kann̄kụk oro, ikonyụn̄ iyakke nnyịn imen n̄kpọ ndomokiet. Ke ini n̄kpri nditọ nnyịn ẹkenyọn̄de ufọkn̄wed ẹdi, mmọ ikọfiọkke ebiet oro nnyịn ikodude, ntre mmọ ẹma ẹnen̄ede ẹkop editịmede esịt. Ke mfọniso, Daniel, akpan nnyịn ama ababak ọnyọn̄ edi onyụn̄ edikop oto mbọhọidụn̄ se iketịbede. Inikiet inikiet, enye ama ada n̄kpri nditọeka esie ebịne nnyịn ke itieutom mme bodisi. Mmọ ẹma ẹdisịm kpa ke ini oro mme bodisi ẹkeyomde ndidọn̄ nnyịn ke ubomisọn̄ mbiomo n̄wat n̄ka Lilongwe. Nditọ nnyịn ẹma ẹtiene nnyịn.

Ke isịmde Lilongwe, ẹma ẹkot nnyịn abian̄a abian̄a ikpe ke ibuot itieutom mme bodisi. Mme bodisi emi ẹma ẹbụp nnyịn ẹte: “Ndi mbufo ẹyeka iso ẹdi Mme Ntiense Jehovah?” Nnyịn ima ibọrọ ite, “Ih!” okposụkedi emi ọkọwọrọde ndibiat isua itiaba ke ufọk-n̄kpọkọbi. Ẹkebiere n̄kpọkọbi isua 14 ẹnọ mbon oro mmọ ẹkedade nte mme “adausụn̄” ke mme esop.

Ke ima iketie biọn̄ inyụn̄ inyeneke nduọkodudu ke ofụri okoneyo kiet, mme bodisi ẹma ẹda nnyịn ẹka Ufọk-N̄kpọkọbi ke Maula. Mme owo ẹma ẹwak ẹkaha ke ubet n̄kpọkọbi oro tutu nnyịn ikakam ikwe ebiet oro ikpenịmde ibuot! Bọket ukaikọt kiet kpọt okodu ke ubet n̄kpọkọbi kiet kiet oro ata ediwak owo ẹkedude. Ẹkesinọ nnyịn ata esisịt udia oro owo mîketemke ọfọn. Ke urua iba ẹma ẹkebe, ikpọ mbonutom ufọk-n̄kpọkọbi ẹma ẹdikụt ke nnyịn idi mbon emem ẹnyụn̄ ẹyak nnyịn idu ke mme okụre ufọk-n̄kpọkọbi. Sia ediwak nnyịn ikodude ọtọkiet, ima isisịn udọn̄ inọ kiet eken kpukpru usen inyụn̄ inọ mbon n̄kpọkọbi eken eti ikọ ntiense. Ekedi n̄kpọ n̄kpaidem ndikụt ẹsiode nnyịn ke ufọk-n̄kpọkọbi ke ima ikabiat n̄kpọ nte ọfiọn̄ ita, ke ntak oro mme ukara ke ofụri ererimbot ẹkenyịkde ukara Malawi ẹte osio nnyịn.

 Mme bodisi ẹma ẹdọhọ nnyịn inyọn̄ọ ufọk, edi mmọ ẹma ẹdian do ẹte ke ẹdori ukpan ke utom Mme Ntiense Jehovah ke Malawi. Ukpan emi ọkọtọn̄ọ ke October 20, 1967, esịm August 12, 1993—n̄kpọ nte isua 26. Ata n̄kpọsọn̄ isua ẹkedi oro, edi ye un̄wam Jehovah, nnyịn ima ikeme ndimụm edida san̄asan̄a nnyịn n̄kama.

Ẹkebịne Nnyịn nte Mme Unam

Ke October 1972, ibet oro ukara okosiode edi ama edemede obufa ibak ibak ukọbọ. Ibet emi ama ọnọ uyo ete ẹbịn kpukpru Mme Ntiense Jehovah ke itieutom ye ke obio. Ẹkebịne Mme Ntiense nte mme unam.

Ke ini oro, akparawa Christian kiet ama edi ufọk nnyịn editobo Emmas usọp usọp etop nte ke ‘N̄ka N̄kparawa ke odiomi ndidi ndisịbe enye ibuot n̄kọn̄ ke eto, nnyụn̄ mmen enye nsọk ọbọn̄ obio.’ Emmas ama ọsọsọp ọkpọn̄ ufọk, edi mbemiso enye ọkọkpọn̄de ufọk, enye ama anam ndutịm ọnọ nnyịn nditiene imọ usọp usọp nte ikekeme. Mma nnam nditọ nnyịn ẹbịne enye usọp usọp. Edi, nte n̄kosụk nyomde nditiene mmọ, owo duop ke otu N̄ka N̄kparawa oro ẹma ẹbiọn̄ọde, ẹdiyom Emmas. Mmọ ẹma ẹbụn̄ ẹdụk ufọk nnyịn ẹnyụn̄ ẹdikụt ke Emmas ama efehe. Ke iyatesịt, irenowo emi ẹma ẹdụri mi ẹka in̄wan̄ mbọkọk oro okodude ekpere, ẹtịgha ẹnyụn̄ ẹkama mbọkọk oro ẹmia mi. Ekem, mmọ ẹma ẹdaha ẹkpọn̄ mi ẹkerede ẹte ke mmakpa. Ke mma n̄keset, mma nnyọni nnyọn̄ ufọk.

Ke okoneyo oro, Emmas ama esịn uwem esie ke itiendịk ke ndikafiak ndi ufọk ndiyom mi. Ke okụtde ke ẹma ẹmia mi idiọk idiọk, Emmas ye ufan esie oro enyenede ubomisọn̄ ẹma ẹmen mi sụn̄sụn̄ ẹsịn ke ubomisọn̄ oro. Do, nnyịn ima iwat ika edem eyenete kiet ke Lilongwe, mi ke n̄kọtọn̄ọ ndikop nsọn̄idem ndien Emmas ama ọtọn̄ọ ndinam ndutịm ndikpọn̄ idụt oro.

Mme Oyom Ubọhọ Oro Mînyeneke Ebiet Ndika

Dinesi, eyen nnyịn an̄wan ye ebe esie ẹma ẹnyene akamba ubomisọn̄ mbiomo. Mmọ ẹma ẹkpe awat-ubomisọn̄ oro ekedide akani owo N̄ka N̄kparawa Mme Adaiso Ntịme, oro okokopde mbọm aban̄a nnyịn. Enye ama enyịme ndin̄wam nnyịn ye Mme Ntiense eken. Ke ediwak mbubịteyo, enye ama esika itie udịbe oro ẹkediomide ekemen Mme Ntiense. Enye ekesisịne ọfọn̄idem oro N̄ka N̄kparawa Mme Adaiso Ntịme ẹsisịnede awat ubomisọn̄ mbiomo oro Mme Ntiense ẹkedọn̄ọde ẹyọhọ, ebe ediwak itie ukpeme-usụn̄ mme bodisi. Enye ama enen̄ede esịn uwem esie ke itiendịk man an̄wam ediwak Mme Ntiense ẹwọrọ ke idụt oro ẹka Zambia.

Ke ọfiọn̄ ifan̄ ẹma ẹkebe, ukara Zambia ama ọnọ nnyịn ifiak inyọn̄ọ Malawi; edi, nnyịn ikekemeke ndifiak nnyọn̄ obio nnyịn. Ẹma ẹyịp kpukpru se ikadahade ikpọn̄. Ẹma ẹkam ẹyan̄ade tian ke ọkọmufọk nnyịn. Sia nnyịn mîkenyeneke eti itie ndomokiet ndika, nnyịn ima ifehe ika Mozambique inyụn̄ ikodụn̄ ke itienna ekọn̄  Mlangeni ke ofụri isua iba ye ubak. Nte ededi, ke June 1975, obufa ukara ke Mozambique ama asuan itienna oro onyụn̄ ebịn nnyịn ifiak inyọn̄ọ Malawi, emi idaha ikọt Jehovah mîkokpụhọkede. N̄kukụre se ikenyenede ndinam ekedi ndifiak mfehe n̄ka Zambia. Nnyịn ima ikodu ke itienna ekọn̄ Chigumukire.

Ọfiọn̄ iba ke ukperedem, ẹma ẹwat udịm udịm bọs ye ubomisọn̄ mbiomo mbonekọn̄ ẹdibehe ke mbenusụn̄ ke itienna oro, ndien ata ediwak mbonekọn̄ Zambia oro ẹkamade ikan̄ ẹma ẹbụmede ẹdụk itienna oro. Mmọ ẹma ẹdọhọ nnyịn ẹte ke ẹbọp ndiye ufọk ẹnọ nnyịn ndien nte ke mmimọ idi ndimen nnyịn n̄ka do. Ima ifiọk ke mmọ ẹkebabian̄a nnyịn. Mbonekọn̄ oro ẹma ẹtọn̄ọ ndinụk mme owo ndọn̄ ke ubomisọn̄ mbiomo ye mme bọs oro, ndien mme owo ẹma ẹfen̄e ke nnyekidem. Mbonekọn̄ oro ẹma ẹtọn̄ọ nditop mme otop-idem-ikpọn̄ ikan̄ mmọ ke ofụm ntịme ntịme, ndien ediwak tọsịn nditọete nnyịn ẹma ẹsuana ke nnyekidem.

Ke ndutịme emi, Emmas ama ọduọ ke isọn̄ ndien mme owo ẹma ẹdịghi enye, edi eyenete nnyịn kiet ama an̄wam enye adaha ada. Nnyịn ikekere ke ntọn̄ọ akwa ukụt ekedi emi. Kpukpru mme andifehe nyom ubọhọ ẹma ẹfiak ẹfen̄e ẹka Malawi. Nte ikosụk inamde isan̄ ke Zambia, nnyịn ima idisịm inyan̄ kiet, ndien nditọete ẹma ẹmụm kiet eken ubọk tutu kpukpru owo ẹsan̄a ẹbe inyan̄ oro ke ifụre. Nte ededi, ke ima ikebe inyan̄ oro ikesịm edem n̄kan̄ oko, mbonekọn̄ Zambia ẹma ẹkan nnyịn ẹkụk ẹnyụn̄ ẹbịn nnyịn ẹte ifiak inyọn̄ọ Malawi.

Ke ifiakde isịm Malawi ini kiet efen, nnyịn ikọfiọkke ebiet oro ikpakade. Nnyịn ima idifiọk ite ke ẹma ẹdụri mme owo utọn̄ ke mme mboho mbre ukara ye ke mme n̄wedmbụk n̄kpọntịbe ẹte ẹdu ke ukpeme ẹban̄a “isen isen iso owo” oro ẹditode ẹdi mme obio mmọ; ẹketịn̄ emi ẹban̄a Mme Ntiense Jehovah. Ntre, nnyịn ima ibiere ndiwọn̄ọde n̄ka ibuot obio idụt oro, kpa ebiet oro owo mîdisọpke idiọn̄ọ nnyịn nte ẹkpekediọn̄ọde ke obio nnyịn. Nnyịn ima ibọ ekpri ufọk idụn̄ ke ukpeokụk, ndien Emmas ama afiak ọtọn̄ọ ndisan̄a nse mme esop ndedịbe ndedịbe nte esenyịn oro asan̄ade-san̄a.

Ndidụk Mme Mbono Esop

Nso ikan̄wam nnyịn ndisọn̄ọ nda nnam akpanikọ? Mme mbono esop! Ke mme itienna ekọn̄ oro ikodude ke Mozambique ye ke Zambia, nnyịn ima isinịm mme mbono esop ifụre ifụre ke mme uke uke Ufọkmbono Obio Ubọn̄ oro ẹkedade n̄kanya ẹbọp. Ndidụk mme mbono esop ke Malawi ekedi n̄kpọ-ata oro akakamade n̄kpọndịk—edi ukeme oro ikesịnde ama odot. Man ikûyak mme owo ẹkụt nnyịn, nnyịn ikesiwak ndinịm mme mbono esop ke okoneyo ke mme nsannsan ebiet. Man mme owo ẹkûfiọk ke nnyịn ikesinịm mme mbono esop do, nnyịn ikesikwakke ubọk ke utịn̄ikọ okụrede, edi nnyịn n̄kukụre ikesifọfiọn̄ọ ubọk.

Ikesinịm mme owo baptism ke okoneyo. Eyen nnyịn oro ekerede Abiyudi akana baptism ke utọ idaha emi. Ke ẹma ẹkenọ utịn̄ikọ baptism ẹma, ẹma ẹda enye ye mbon baptism eken ke okoneyo oro ẹka edep kiet emi ẹkedọkde obube mmọn̄. Do, ke mmọ ẹkena baptism.

Ekpri Ufọk Nnyịn Ekedi Ebiet Udịbe

Ke ediwak isua ẹma ẹkebe tọn̄ọ nte ukara okodori ukpan ke utom nnyịn, ufọk nnyịn ama akabade edi ndedịbe itie ubonn̄wed. Ẹkesida mme n̄wed ye mme leta ẹtode ọfis n̄kọk itieutom Zambia ẹdibon ke ufọk nnyịn ndedịbe ndedịbe. Nditọete oro ẹkesidade enan̄ukwak ẹmen n̄wed ẹma ẹsidi ufọk nnyịn ẹdimen mme n̄kpọ oro ẹketode Zambia ẹdibehe ẹnyụn̄ ẹsuan mmọ ke ofụri ikpehe Malawi. Mme magazine Enyọn̄-Ukpeme oro ẹkesisuande ẹketie mfefere mfefere sia ẹkedade ukem ikọn̄n̄wed oro ẹsidade ẹmịn̄ Bible ẹmịn̄ mmọ. Emi ama anam mme asuan-n̄wed emi ẹkeme ndimen magazine oro ẹwakde utịm ikaba ẹkan ibat oro mmọ ẹkpekemende edieke ẹkpekedade ndodobi ikọn̄n̄wed oro ẹsidade ẹmịn̄ n̄wed, ẹmịn̄. Mme asuan-n̄wed emi n̄ko ẹma ẹsisuan n̄kpri magazine Enyọn̄-Ukpeme oro ẹkesịnede sụk mme ikpehe oro ẹdikpepde. Ama esimem utom ndisisọp ndịp n̄kpri magazine emi ke ekpat ọfọn̄ sia ẹkemịn̄de mmọ ke ikọn̄n̄wed kiet kpọt.

Mme asuan-n̄wed emi ẹma ẹsisịn uwem ye ifụre mmọ ke itiendịk nte mmọ ẹkesiwatde  enan̄ukwak ke ikọt, ndusụk ini ke okoneyo, ẹmende ke edem enan̄ukwak mmọ ikpọ katọn n̄wed oro ẹkedoride ukpan. Kpa ye oro mme bodisi ẹkesikpemede usụn̄ ọkọrọ ye mme n̄kpọndịk eken oro ẹkesidude ke usụn̄, mmọ ẹma ẹsiwat ediwak kilomita ke kpukpru idaha man ẹkenọ nditọete mmọ udia eke spirit. Ndima mme asuan-n̄wed emi ẹkenyene uko didie ntem!

Jehovah Esikere Aban̄a Mme Ebeakpa

Ke December 1992, ke ini Emmas okosụk ọnọde utịn̄ikọ ke esop oro enye akakade ndise nte esenyịn circuit, enye ama ọduọ udọn̄ọ akpauben̄ ekpo. Ke oro ebede, enye ikekemeke nditịn̄ ikọ aba. Nte ini akakade, enye ama afiak ọdọn̄ọ akpauben̄ ekpo. Kpa ye oro mîkememke utom inọ enye ndiyọ unana nsọn̄idem esie, ima ima un̄wam oro esop ọkọnọde nnyịn ikayakke mi nduọk idotenyịn. Mma n̄keme ndise mban̄a ebe mi ke ufọk tutu esịm usen oro enye akpade ke November 1994, ke esịmde isua 76. Ndọ nnyịn ekebịghi ke isua 57, Emmas ama onyụn̄ okụt nte ẹkedorode ukpan oro mbemiso enye akakpade. Edi ke mfofụhọ n̄kpa anam-akpanikọ nsan̄a mi.

Ke ebe mi ama akakpa, ebe eyen mi ama ọtọn̄ọ ndise mban̄a mi ke adianade ye ndise mban̄a n̄wan ye nditọ esie ition. Ke mfụhọ, ke enye ama ọkọdọn̄ọ ke ekpri ibio ini, enye ama akpa ke August 2000. Eyen mi edida udia ye ufọk ke mmọn̄ ọnọ nnyịn? Ami mma mfiak n̄kụt nte Jehovah ekerede aban̄a nnyịn ye nte enye enen̄erede edi “ete nditọ-akpa, ye ebiereikpe mme ebe-akpa.” (Psalm 68:5) Jehovah ama ọnọ nnyịn ediye obufa ufọk ebe ke mme asan̄autom esie eke isọn̄. Oro akasan̄a didie etịbe? Ke ini nditọete ke esop nnyịn ẹkekụtde nnanenyịn nnyịn, mmọ ẹma ẹda urua ition kpọt ẹbọp ufọk ẹnọ nnyịn! Nditọete oro ẹkedide mme ọkọkufọk ke mme esop efen ẹma ẹdinọ un̄wam n̄ko. Ima ye mfọnido oro kpukpru Mme Ntiense ẹkewụtde ama enen̄ede otụk nnyịn sia ufọk oro mmọ ẹkebọpde ẹnọ nnyịn ama akam eye akan ufọk oro ediwak mmọ ẹkedụn̄de. Ima ima edinam oro esop ẹkewụtde nnyịn mi ama ọnọ eti ikọ ntiense ke n̄kann̄kụk nnyịn. Ke ini ndụkde idap, esitie mi ke idem nte ke ndu ke Paradise! Ih, ẹkeda kọrikọri ye mbat ẹbọp obufa ufọk nnyịn, edi ediwak owo ẹdọhọ ke ẹkekam ẹda ima ẹbọp ufọk emi.—Galatia 6:10.

Jehovah Akaiso Ndikere Mban̄a Mi

Okposụkedi mfụhọ ekesikperede ndikan mi ubọk ndusụk ini, Jehovah ikasanake mi iyak. Ke otu nditọ usụkkiet oro n̄kenyenede, itiaba ke ẹsụk ẹdodu ke uwem, ndien mbonubon mi ẹwak ẹsịm owo 123 idahaemi. Edi n̄kpọ inemesịt didie ntem ndikụt nte ke ata ediwak ke otu mmọ ke ẹnam n̄kpọ Jehovah ke edinam akpanikọ!

Ami ndi isua 82 idahaemi, ndien esịt mi ọyọhọ ye idatesịt ke ini n̄kụtde se spirit Abasi anamde ke Malawi. Ke ufan̄ isua inan̄ oro ẹbede, ami mmokụt nte ibat Ufọkmbono Obio Ubọn̄ ọkọride oto ke kiet esịm 600. Nnyịn n̄ko imenyene obufa ọfis n̄kọk itieutom ke Lilongwe, imonyụn̄ inyene uwak nti udia eke spirit kpukpru ini. N̄kere ke mmenen̄ede n̄kụt edisu un̄wọn̄ọ Abasi oro ẹkụtde ke Isaiah 54:17, emi ẹn̄wọn̄ọde ẹnọ nnyịn ẹte: “Baba n̄kpọ ekọn̄ kiet eke ẹbotde ẹban̄a fi idikwe unen.” Ke mma n̄kanam n̄kpọ Jehovah ke se ibede isua 50 idahaemi, ami mmetịm mbụre mfiọk nte ke Jehovah esikere kpukpru ini aban̄a nnyịn ke idomo ekededi oro isobode.

[Ikọ idakisọn̄]

[Ndise ke page 24]

Ebe mi, Emmas, akana baptism ke April 1951

[Ndise ke page 26]

Otu uko uko mme asuan-n̄wed

[Ndise ke page 28]

Ufọk oro ẹkedade ima ẹbọp