Mme Mbụme Ẹtode Mme Andikot

Ke ediwak idụt, edi ido ndinọ enọ ke ini owo ọdọde ndọ. Mme edumbet Bible ewe ke nnyịn ikpekere iban̄a ke ini inọde m̀mê ibọde mme utọ enọ oro?

Bible enyịme ẹnọ enọ ama akam edi ẹnam oro ye eti uduak ye ke nnennen ini. Kaban̄a unọ enọ, Bible esịn udọn̄ ọnọ ata mme Christian ndikpebe Jehovah emi esinọde owo n̄kpọ ke ntatubọk. (James 1:17) Apostle Paul ama esịn udọn̄ ọnọ ekemmọ mme Christian ete: “Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” Ntem, ẹsịn udọn̄ ẹnọ mme Christian ndinọ enọ.—Mme Hebrew 13:16; Luke 6:38.

Ke ndusụk idụt, mbon oro ẹyomde ndidọ ndọ ẹsika akamba ufọkurua ẹkemek mme n̄kpọ oro mmọ ẹkpemade mme owo ẹnọ mmimọ. Mbon oro ẹyomde ndidọ ndọ mi ẹsiteme mme iman ye mme ufan ufọkurua oro mmimọ ikemekde mme n̄kpọ, man mmọ ẹkedep se ẹkpemade ndinọ mmimọ ke otu mme n̄kpọ oro mmimọ ikemekde. Ke nditịm ntịn̄, ndutịm emi esinam owo oro oyomde ndinọ enọ okûbiat ekese ini oyom se enye edinọde, esinyụn̄ osio mme ọdọ ndọ ke mfịna edimen mme enọ oro mmọ mîyomke nda n̄kayak ke ufọkurua oro ẹkedepde.

Edi mbubehe mbon oro ẹyomde ndidọ ndọ ndibiere m̀mê mmimọ iyetiene ndutịm emi m̀mê iditieneke. Nte ededi, ana Christian ekpeme ọbiọn̄ọ edinam ekededi oro ẹkemede ndibiat mme edumbet Bible. Ke uwụtn̄kpọ, nso edieke mbon oro ẹyomde ndidọ ndọ ẹkpemekde mme n̄kpọ oro ẹsọn̄de urua ẹkaha? Ke utọ idaha oro, mbon oro ẹnyenede ekpri okụk idikemeke ndinọ n̄kpọ ndomokiet, mîdịghe mmọ ẹkeme ndikere ke ayakam ọfọn nditre ndidụk ndọ oro mbak ididia esuene ke ntak edinọ enọ oro mîsọn̄ke urua. Christian an̄wan kiet ekewet ete: “Ndinọ enọ ke itie ndọ edidi akwa n̄kpọ. Mmesidomo nditat ubọk, edi idahaemi, nnyeneke aba idatesịt oro n̄kesinyenede ke ndinọ enọ.” Nso n̄kpọ mfụhọ ke ekpedi ntem edieke edinam ndọ akpanamde owo okop iduọesịt!

Ke akpanikọ, owo ikpenyeneke ndinam mbon oro ẹyomde ndinọ enọ ẹkere ke mbemiso ẹbọde enọ mmimọ, ke ana idep enye ke akpan ufọkurua mîdịghe ke ana enọ oro akpa akpan ekọmurua. Kamse, Jesus Christ okowụt ete ke esịt andinọ enọ edi akpan n̄kpọ akan ke enyịn Abasi, idịghe se enọ oro akpade. (Luke 21:1-4) Kpasụk ntre, kaban̄a edinọ mme ubuene enọ, apostle Paul ekewet ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.”—2 Corinth 9:7.

Nte ekemde ye Bible, idiọk idụhe owo ndinam ẹdiọn̄ọ ke imọ idi andinọ enọ, ndusụk ebe ke ndiwet ekpri n̄kpọ ndian ke enọ oro. Nte ededi, ke ndusụk itie, edi ido ndinam kpukpru mme andidu ke mboho ẹfiọk enye emi ọnọde enọ. Ido emi ekeme ndida mfịna ndi. Ekeme ndidi mbon oro ẹnọde enọ idiyomke ẹsiak enyịn̄ mmimọ man ẹkûwọn̄ọde ntịn̄enyịn ẹnọ idem nte mîdotke. Utọ mbon oro ẹnam n̄kpọ ekekem ye edumbet oro ẹkụtde ke Matthew 6:3, emi Jesus ọdọhọde ete: “Edi ke ini afo ọnọde eyen ubuene n̄kpọ, kûyak ubọk ufien fo ọfiọk se ubọk nnasia fo anamde.” Mbon eken ẹkeme ndikere ke ndinọ enọ edi ọkpọkpọ mbubehe, ntre ke owo efen ikpenyeneke ndifiọk se ẹnọde ke mîbọhọke andinọ ye andibọ. Akan oro, ndifiọk andinọ enọ ekeme ndinam ẹmen enọ owo kiet ẹdomo ye eken, ke ntre adade ndomoidem edi. Mme Christian inyeneke ndinam owo ndomokiet okop bụt ke ndisiak enyịn̄ andinọ enọ an̄wan̄wa.—1 Peter 3:8.

Ih, ebe ke ndinam n̄kpọ ekekem ye mme edumbet oro ẹdude ke Ikọ Abasi, ndinọ enọ ayaka iso ndidi n̄kpọ oro akamade inemesịt.—Utom 20:35.