Ndi ‘Ufọkabasi Akpanikọ’ Kiet Kpọt Odu?

“KPA nte Christ edide kiet, ntre ke idem Christ edi kiet; N̄wanndọ Christ onyụn̄ edi kiet: kpa ‘Ufọkabasi Catholic ye apostolic kiet.’”—Dominus Iesus.

Oro edi se Joseph Ratzinger, Cardinal Roman Catholic eketịn̄de ke ukpepn̄kpọ ufọkabasi esie nte ke ufọkabasi akpanikọ kiet kpọt okpodu. Enye ọkọdọhọ ke ufọkabasi oro edi “Ufọkabasi Christ kiet, emi edide Ufọkabasi Catholic.”

“Idịghe Mme Ata Ufọkabasi”

Okposụkedi Pope John Paul II ọkọsọn̄ọde ọdọhọ ke n̄wed oro Dominus Iesus idọhọke ke “Ufọkabasi Catholic ọfọn akan m̀mê ndise mme ido ukpono eken ke mbio,” mme adaiso ufọkabasi Protestant ẹma ẹnen̄ede ẹyat esịt ẹban̄a uwetn̄kpọ emi. Ke uwụtn̄kpọ, ke Akwa Mbono Ufọkabasi Presbyterian oro ẹkenịmde ke Belfast, Northern Ireland, ke June 2001, ọkwọrọikọ kiet ọkọdọhọ ke “ọkpọsọn̄ n̄ka kiet ke Ufọkabasi Roman Catholic . . . oro okokopde ndịk aban̄a ifụre ekikere oro esop Vatican II ọkọnọde,” ekewet n̄wed emi.

Robin Eames, Akwa Bishop Ufọkabasi Ireland, ama ọdọhọ ete ke “imọ iyenen̄ede ikop iyatesịt” edieke uwetn̄kpọ oro “akafiakde ebịne ekikere oro Ufọkabasi Catholic ekenyenede ke mbemiso, oro ọwọrọde ọkpọn̄ ubiere oro esop Vatican II ekesịmde.” Ke etịn̄de aban̄a se Ufọkabasi Roman Catholic ọdọhọde nte ke mme ufọkabasi oro ẹsịnde ndusụk ukpepn̄kpọ Catholic “idịghe mme ata ufọkabasi,” Eames ama ọdọhọ ete: “Ami nda emi nte ata ikọ usọn̄enyịn.”

Nso ikanam ẹwet Dominus Iesus? Etie nte ẹdidọhọ ke ido ukpono edi mbubehe idemowo akafịna esop ukara Ufọkabasi Roman Catholic. Nte The Irish Times ọdọhọde, “edisiak nsio nsio ido ukpono—ndisọn̄ọ ndọhọ nte ke kpukpru ido ukpono ẹfọn . . . ekenen̄ede afịna Cardinal Ratzinger.” Etie nte ekikere emi akanam enye ọdọhọ ke ufọkabasi akpanikọ kiet kpọt okpodu.

Ndi Anam N̄kpọ m̀mê Ewe Ufọkabasi ke Afo Aka?

Nte ededi, ndusụk owo ẹkere ke ndiyak “ido ukpono edi mbubehe idemowo” m̀mê “edisiak nsio nsio ido ukpono” enen̄ede owụt ifiọk onyụn̄ edemede owo udọn̄ akan ndidọhọ ke ufọkabasi akpanikọ kiet kpọt okpodu. Mmọ ẹkere ke ido ukpono ekpedi ọkpọkpọ mbubehe. ‘Ke ofụri ofụri,’ mmọ ẹdọhọ, ‘ke inamke n̄kpọ m̀mê ewe ufọkabasi ke owo aka.’

Oro ekeme nditie nte ekikere oro ediwak owo ẹnyịmede—okposụkedi utịp kiet otode  emi edide edisiak nsio nsio n̄ka ido ukpono. Ediwak owo ẹdọhọ ke ‘edisiak nsio nsio n̄ka ido ukpono ntre edi eti usụn̄ owo ndida ifụre esie nnam n̄kpọ.’ Nte ededi, nte ewetn̄wed oro Steve Bruce ọdọhọde, “edinyịme nsio nsio n̄ka ido ukpono” ke nditịm ntịn̄ edi “edu nsibehe mi do.”—A House Divided: Protestantism, Schism, and Secularization.

Nso, ndien idi nnennen ekikere? Ndi ufọkabasi akpanikọ kiet kpọt odu? Ndi enye akam edi Ufọkabasi Roman Catholic? Ndi Abasi enyịme mme ufọkabasi eken n̄ko? Sia mme mbụme emi ẹnyenede n̄kpọ ndinam ye itie ebuana nnyịn ye Andibot nnyịn, ke akpanikọ edi akpan n̄kpọ ndifiọk ekikere esie ke n̄kpọ emi. Didie ke nnyịn ikeme ndinam oro? Ebe ke ndidụn̄ọde Ikọ Abasi eke odudu spirit, kpa Bible. (Utom 17:11; 2 Timothy 3:16, 17) Ẹyak nnyịn idụn̄ọde se enye enyenede nditịn̄ mban̄a ufọkabasi akpanikọ kiet ndidu.

 [Ebiet ẹdade ndise ẹto ke page 2]

IKPAEDEM: Mark Gibson/Index Stock Photography