Toro Jehovah “ke Ufọt Mbon Esop”

MME mbono esop Christian ẹdi ndutịm oro Jehovah anamde man ikọt esie ẹsọn̄ idem ke n̄kan̄ eke spirit. Nnyịn iwụt esịtekọm iban̄a mme ndutịm Jehovah, ebe ke ndidụk mme mbono esop kpukpru ini. Akan oro, mme mbono esop ẹn̄wam nnyịn ‘ndidemede nditọete nnyịn nnọ ima ye nti utom,’ emi edide akpan usụn̄ kiet ndiwụt ima oro nnyịn imade kiet eken. (Mme Hebrew 10:24; John 13:35) Nte ededi, didie ke nnyịn ikeme ndidemede nditọete nnyịn ke mme mbono esop?

Toro Jehovah An̄wan̄wa

Edidem David ama ewet aban̄a idemesie ete: “Nyobụk enyịn̄ fo nnọ nditọ-ete mi: nyotoro fi ke ufọt mbon-esop. Itoro mi oyoto fi ke akamba esop.” “Nyọkọm fi ke akwa esop: nyotoro fi ke otu ediwak owo.” “Mmọkwọrọ eti ido ke akwa esop: sese, n̄kịbike n̄kpọk-inua mi.”—Psalm 22:22, 25; 35:18; 40: 9.

Ke eyo apostle Paul, ke ini mme Christian ẹkesisopde idem kaban̄a utuakibuot, mmọ n̄ko ẹma ẹsitan̄a mbuọtidem oro mmọ ẹnyenede ke Jehovah ẹnyụn̄ ẹtan̄a ubọn̄ esie. Ke usụn̄ emi, mmọ ẹma ẹsisịn udọn̄ ẹnọ ẹnyụn̄ ẹdemede kiet eken ẹnọ ima ye nti utom. Ke eyo nnyịn, ediwak isua ikie ke David ye Paul ẹma ẹkekpan̄a, nnyịn imenen̄ede ‘ikụt ke usen Jehovah ke asan̄a ekpere.’ (Mme Hebrew 10:24, 25) Editịm n̄kpọ Satan  ke eten̄ aka nsobo, ndien mme mfịna ke ẹdọdiọn̄ ẹkọri. Oyom nnyịn ‘inyene ime’ ikan nte akanam inyenede. (Mme Hebrew 10:36) Mmanie ẹkeme ndisịn udọn̄ nnọ nnyịn ndiyọ ke mîbọhọke nditọete nnyịn?

Mfịn, kpa nte ekedide ke eset, ẹnọ mme andinịm ke akpanikọ kiet kiet mme ifet nditan̄a mbuọtidem mmọ “ke ufọt mbon esop.” Ifet kiet oro ebererede ọnọ kpukpru owo edi ndinọ mme ibọrọ ke mme mbụme oro ẹsibụpde otuowo ke mme mbono esop. Kûdede uda ufọn oro emi ekemede ndinyene ke ekpri n̄kpọ. Ke uwụtn̄kpọ, mme ibọrọ oro ẹwụtde nte ẹkpekande m̀mê ẹkpefepde mme mfịna ẹsisọn̄ọ ubiere nditọete nnyịn nditiene mme edumbet Bible. Mme ibọrọ oro ẹnamde mme itien̄wed Bible oro ẹsiakde-siak edi oro owo mîkotke isịn ẹn̄wan̄a m̀mê oro ẹsịnede ntọt ẹnyenede ẹto ọkpọkpọ ndụn̄ọde ẹkeme ndisịn udọn̄ nnọ mbon en̄wen ndikọri nti edu ukpepn̄kpọ.

Ndifiọk nte ke nnyịn ye mbon en̄wen iyọbọ ufọn edieke inọde ibọrọ ke mme mbono esop ekpenyene ndinụk kpukpru Mme Ntiense Jehovah ndikan bụt m̀mê ndimen̄e ndinọ ibọrọ. Enen̄ede edi akpan n̄kpọ mbiowo ye mme asan̄autom unamutom ndinọ ibọrọ ke mme mbono esop, sia ẹdoride enyịn mmọ ndida usụn̄ ke ndibuana nnyụn̄ ndụk mme mbono esop. Edi, didie ke owo ekeme ndinam n̄kọri edieke enye okụtde ke edinọ ibọrọ ke mme mbono esop edi n̄kpọ-ata?

Mme Ekikere oro Ẹnọde man Ẹnam N̄kọri

Ti ete ke edinọ ibọrọ edi ubak utuakibuot nnyịn nnọ Jehovah. Christian an̄wan kiet emi odụn̄de ke Germany anam an̄wan̄a nte enye esede mme ibọrọ oro enye esinọde. “Mmọ ẹdi ọkpọkpọ ibọrọ mi ndida mbiat ukeme oro Satan esịnde ndibiọn̄ọ ikọt Abasi nditan̄a mbuọtidem mmọ.” Eyenete eren oro anade baptism obufa emi abuanade ke esop oro ọdọhọ ete: “Mmesibọn̄ akam etieti man n̄keme ndinọ ibọrọ.”

Tịm idem mfọn mfọn. Edieke afo mûbemke iso ukpep se ẹdinemede ẹban̄a, ọyọsọn̄ fi ndinọ ibọrọ ndien mme ibọrọ fo iditịmke inyene uforo. Ẹnọ mme ekikere ke nte ẹkpenọde ibọrọ ke mme mbono esop, ke n̄wed Bọ Ufọn to Ukpepn̄kpọ Ufọkn̄wed Utom Ukara Abasi, page 70. *

Nam edi utịtmbuba fo ndibọrọ ke nsụhọde n̄kaha mbụme kiet ke mbono esop kiet kiet. Emi ọwọrọ kûtịm idem unọ mbụme kiet kpọt, koro adan̄a nte afo emenede ubọk, idotenyịn odu nte ke ada ukpepn̄kpọ iditreke ndikot fi. Afo emekeme ndikam mbem iso nsian enye mme mbụme oro afo eketịmde idem ndibọrọ. Emi enen̄ede enyene ufọn edieke edide afo ọtọtọn̄ọ ndinọ ibọrọ. Sia ekemede ndidi afo emesimen̄e ndimenede ubọk “ke akamba esop,” ndifiọk nte ke emi edi ikpehe ekikere oro afo eketịmde idem ọnọ ye nte ke ada ukpepn̄kpọ oyoyom ubọk fo, eyesịn udọn̄ ọnọ fi ndinọ ibọrọ.

 Babak nọ ibọrọ. Owo ndisịk ọkpọsọn̄ utom nnịm isikam inamke utom oro emem. Ndibabak nnọ ibọrọ ke mbono esop ekeme ndin̄wam. Idem ayakpa fi ndikụt nte etịmde emem utom ndibọrọ mbụme nsịm iba m̀mê ita, ndondo oro ọnọde akpa ibọrọ.

Tie ke eti itie. Ndusụk owo ẹkụt nte ememde utom ndinọ ibọrọ ke ini mmọ ẹtiede ẹkpere n̄kpọitie iso Ufọkmbono Obio Ubọn̄. Mme n̄kpọ oro ẹwọn̄ọrede owo ntịn̄enyịn isiwakke, ndien etie nte ada ukpepn̄kpọ ọyọsọp okụt ubọk mmọ. Edieke afo odomode emi ese, ti nditịn̄ ikọ uyo ọsọn̄ ekem man kpukpru owo ẹkop, akpan akpan edieke esop mbufo mînyeneke ukwak utịn̄ikọ oro ẹsidade ẹnọ ibọrọ.

Tịm nọ n̄kpan̄utọn̄. Emi ayan̄wam fi etre ndifiak ntịn̄ se owo efen ama eketetịn̄. N̄ko, mme ibọrọ oro mbon en̄wen ẹnọde ẹkeme nditi fi itie N̄wed Abasi m̀mê akpan n̄kpọ oro afo ekemede ndidian ke ibọrọ oro ẹma ẹkenọnọ. Ke ini ke ini, ibio ibio ifiọkutom ekeme ndinam akpan n̄kpọ oro ẹnemede an̄wan̄a. Mme utọ ibọrọ oro ẹsinen̄ede ẹnyene ufọn.

Kpep ndinọ ibọrọ ke ikọ idemfo. Ndikot ibọrọ ke n̄wed ukpepn̄kpọ ekeme ndiwụt nte ke afo omokụt nnennen ibọrọ, ndien emi ekeme ndidi eti usụn̄ ndida ntọn̄ọ ndinọ ibọrọ. Edi ndinam n̄kọri ebe ke ndinọ ibọrọ ke ikọ idemfo owụt ke se ẹnemede an̄wan̄a fi. Iyomke ẹkot ukem ukem ikọ oro ẹwetde ke mme n̄wed nnyịn. Mme Ntiense Jehovah isikam ikotke mme ukem ukem ikọ oro ẹwetde ke mme n̄wed mmọ ke ini mmọ ẹnọde mme ibọrọ.

Yak ibọrọ fo ọkọn̄ọ ke se ẹnemede. Mme ibọrọ oro mînyeneke ebuana ye se ẹnemede m̀mê oro ẹwọrọde ẹkpọn̄ mme akpan n̄kpọ oro ẹnemede, idotke. Emi ọwọrọ nte ke mme ibọrọ fo ẹkpenyene ndikọn̄ọ ke se ẹnemede. Adan̄aoro kpọt ke mmọ ẹditịp ẹsịn ke nneme eke spirit oro ọbọpde-bọp.

Yak uduak fo edi edinọ nsịnudọn̄. Sia akpan ntak edinọ ibọrọ edide man isịn udọn̄ inọ mbon en̄wen, ana nnyịn ifep nditịn̄ mme n̄kpọ oro ẹdinamde mmọ ẹkop mmemidem. Ke adianade do, kûtịn̄ ofụri se idude ke ikpehe ekikere tutu n̄kpọ ndomokiet idụhe inọ mbon en̄wen nditịn̄. Nnyan m̀mê mme awak-n̄kukọhọ ibọrọ ẹsisọn̄ ndin̄wan̄a owo. Mbio mbio ibọrọ oro ẹnọde ke mme ikọ ifan̄ ẹkeme ndinen̄ede nnyene uforo, ndien mmọ ẹyesịn udọn̄ ẹnọ mbufa owo ndinọ mbio mbio ibọrọ.

Se Mme Ada Ukpepn̄kpọ Ẹkpenamde

Man mbono esop enen̄ede ọnọ nsịnudọn̄, ada ukpepn̄kpọ enyene akamba mbiomo. Ana enye owụt ata udọn̄ ke kpukpru ibọrọ oro ẹnọde ebe ke nditịm nnọ n̄kpan̄utọn̄ nnyụn̄ ntịm nse andinọ ibọrọ ke ufan ufan ido utu ke ndinam n̄kpọ efen. Ọkpọdiọk didie ntem edieke enye mîketịmke inọ n̄kpan̄utọn̄ ndien, nte utịp, afiakde etịn̄ se ẹma ẹketetịn̄ mîdịghe afiakde obụp mbụme oro ẹma ẹkebọbọrọ!

Mme owo n̄ko ẹyemen̄e ndinọ ibọrọ edieke ada ukpepn̄kpọ esiwakde ndida ikọ idemesie mfiak ntịn̄ se ẹma ẹkebọbọrọ, nte n̄kpọ eke ẹdọhọde ke ibọrọ oro ẹkenọde ikọfọnke. Ke n̄kan̄ eken, esidi n̄kpọ nsịnudọn̄ didie ntem ke ini ikọ ada ukpepn̄kpọ ẹtịpde ẹsịn ke ndinam otuowo ẹsion̄o mme akpan n̄kpọ  efen efen ẹdi. Mme utọ mbụme nte, ‘Didie ke nnyịn ikeme ndibuan emi ke esop nnyịn?’ m̀mê, ‘Ewe itie N̄wed Abasi ke ikpehe ekikere emi ọsọn̄ọ ibọrọ oro ẹkesụk ẹnọde do?’ ẹsitịp ẹsịn ke ndinam ẹnọ nti ibọrọ oro ẹnyenede ufọn.

Nte ededi, ẹkpenyene ndinen̄ede ntoro mbufa owo m̀mê mbon o-bụt ke ini mmọ ẹnọde ibọrọ. Ada ukpepn̄kpọ ke idemesie ekeme ndika n̄kotoro mmọ ke mbono esop ama akasuana man efep n̄kpọ o-bụt ekededi onyụn̄ ọnọ enye ifet ndinọ item ke ini odotde.

Ke nneme ofụri usen, owo emi esikarade nneme isiyakke mbon en̄wen ẹnyene ifụre ndisịn uyo. Mme andikpan̄ utọn̄ nnọ enye ẹsikere ke ufọn idụhe mmimọ nditiene mbuana ke nneme oro. Mmọ n̄kukụre ẹsikpakpan̄ utọn̄ edieke edide ẹsikam ẹkpakpan̄. Ukem n̄kpọ emi ekeme nditịbe ke ini ada ukpepn̄kpọ etịn̄de ikọ awak akaha. Nte ededi, ada ukpepn̄kpọ ke ini ke ini ekeme ndida mme mbụme efen efen ndemede ekikere otuowo mban̄a se ẹnemede. Mme utọ mbụme oro ikpenyeneke ndiwawak n̄kaha.

Iyomke ada ukpepn̄kpọ ọsọsọp okot akpa owo oro emenede ubọk. Emi ekeme ndinam mbon oro ẹkesụk ẹben̄ede idem ndimenede ubọk, ẹnana udọn̄. Ke ndibet esisịt, enye ọyọnọ owo oro mîbọrọke mbụme kan̄a ifet ndinam ntre. Enye oyowụt mbufiọk n̄ko ke nditre ndikot n̄kpri nditọwọn̄ ẹbọrọ mme mbụme oro ẹkponde ẹkan mmọ.

Nso edieke ẹnọde ibọrọ oro mînenke? Ada ukpepn̄kpọ ekpenyene ndifep ndinam owo oro ọkọnọde ibọrọ oro okop bụt. Idem mme ibọrọ oro mînenke ẹsiwak ndisịne mme n̄kpọ oro ẹnende. Ada ukpepn̄kpọ ekeme ndinen̄ede ibọrọ oro akwan̄ade ye unana edinam owo oro ọkọnọde ibọrọ oro okop bụt ebe ke ndida mbufiọk nsat mme n̄kpọ oro ẹnende, ndifiak mbụp mbụme oro ke usụn̄ efen, m̀mê ndibụp mbụme efen efen.

Man esịn udọn̄ ọnọ mme owo ndinọ ibọrọ, ada ukpepn̄kpọ ayanam ọfọn ndifep mme utọ mbụme nte, ‘Ndi owo efen ekededi enyene ibọrọ?’ Ẹkeme ndinyene eti uduak ke ekikere ke ini ẹbụpde utọ mbụme nte, ‘Anie mîbọrọke mbụme kan̄a? Emi edi akpatre ifet esie ndinam oro!’ edi, edisọsọn̄ mme utọ mbụme emi ndisịn udọn̄ nnọ owo ndinọ ibọrọ ke eferife. Owo ikpenyeneke ndinam nditọete ẹbiom idemmọ ikpe ke ntak mmọ mîkabakke inọ ibọrọ ke mbono esop. Utu ke oro, ẹkpenyene ndisịn udọn̄ nnọ mmọ ndibuana ye nditọete se mmọ ẹfiọkde koro edibuana n̄kpọ edi edinam ima. Ke adianade do, ke ini ada ukpepn̄kpọ okotde owo ọnọ ibọrọ, idifọnke enye ndidọhọ, “Ke eyenete oro ama ọkọbọrọ okụre, nnyịn iyakpan̄ utọn̄ inọ ibọrọ Brọda Ntem-ye-ntem ndien ekem eke Sista Ntem-ye-ntem.” Ada ukpepn̄kpọ ekpenyene ndibem iso n̄kpan̄ utọn̄ ke ibọrọ oro akpa owo ọnọde ndien ekem ebiere m̀mê oyoyom ẹnọ ibọrọ efen efen.

Edinọ Ibọrọ Edi Akwa Ifet

Edidụk mme mbono esop Christian edi se ẹyomde ke n̄kan̄ eke spirit; edinọ ibọrọ ke mme mbono esop edi akwa ifet. Nte nnyịn ikade iso ndida n̄wọrọnda ifet emi ntoro Jehovah “ke ufọt mbon esop,” emi owụt nte ke nnyịn ke itiene uwụtn̄kpọ David ke imonyụn̄ ida item Paul ke akpan n̄kpọ. Nnyịn ndibuana ke mme mbono esop owụt ke nnyịn imama nditọete nnyịn ye nte ke nnyịn idi ubak akamba esop Jehovah. M̀mọ̀n̄ efen ke afo akpama ndidu ‘nte afo okụtde ke usen oro ke asan̄a ekpere’?—Mme Hebrew 10:25.

[Ikọ idakisọn̄]

[Mme ndise ke page 20]

Edikpan̄ utọn̄ ye edinọ ibọrọ ke mme mbono esop Christian ẹdi akpan n̄kpọ

[Ndise ke page 21]

Ada ukpepn̄kpọ ekpenyene ndiwụt ata udọn̄ ke kpukpru ibọrọ oro ẹnọde