Mme Mbụme Ẹtode Mme Andikot

Nso ke ndinyene “uwem ke Idem Esie” ọwọrọ?

Bible ọdọhọ ke Jesus Christ enyene “uwem ke Idem Esie” ye nte ke mme anditiene enye ẹnyene ‘uwem ke esịt mmọ.’ (John 5:26; 6:53) Nte ededi, itie N̄wed Abasi iba emi iwọrọke ukem n̄kpọ.

Jesus ọkọdọhọ ete: “Kpa nte Ete enyenede uwem ke Idem Esie, sụk ntre ke Enye ọkọnọ Eyen ndinyene uwem ke Idem Esie n̄ko.” Mbemiso etịn̄de n̄wọrọnda ikọ emi, Jesus ọkọdọhọ ete: “Ke akpanikọ ke ndọhọ mbufo, Owo eke okopde uyo Mi, onyụn̄ ọbuọtde idem ye Enye emi ọkọdọn̄de Mi, enyene nsinsi uwem . . . Ini ke edi, onyụn̄ ededi ama, eke mme akpa-n̄kpa ẹdikopde uyo Eyen Abasi, ndien mmọ emi ẹkopde ẹyedu uwem.” Mi Jesus eketịn̄ aban̄a n̄wọrọnda odudu emi Ete esie ọnọde enye—kpa ukeme ndinam mme owo ẹnyene eti itie ebuana ye Abasi. Akan oro, Jesus ekeme ndinam mbon oro ẹdede ke n̄kpa ẹset nnyụn̄ nnọ mmọ uwem. Amaedi Jesus, ndinyene “uwem ke Idem Esie” ọwọrọ ke ẹnọ enye odudu emi. Ukem nte Ete, Eyen n̄ko enyene “enọ uwem ke idem esie,” oro edi usụn̄ efen emi ẹkemede ndikabade ikọ oro. (John 5:24-26) Nso kaban̄a mme anditiene enye?

N̄kpọ nte isua kiet ke ukperedem, Jesus ama etịn̄ ikọ ọnọ mme andikpan̄ utọn̄ nnọ enye, ete: “Ke akpanikọ ke ndọhọ mbufo, Edieke mbufo mîdiaha obụkidem Eyen owo, mînyụn̄ in̄wọn̄ke iyịp Esie, mbufo inyeneke uwem ke esịt mbufo. Owo eke adiade obụkidem Mi, onyụn̄ ọn̄wọn̄de iyịp Mi enyene nsinsi uwem; Ami nyonyụn̄ nnam enye eset ke akpatre usen.” (John 6:53, 54) Mi Jesus akada edinyene “uwem ke esịt mbufo” ukem nte edinyene “nsinsi uwem.” Ẹkụt mme ikọ emi ẹbietde edinyene “uwem ke esịt mbufo” ke ebiet en̄wen ke N̄wed Abasi Usem Greek. Uwụtn̄kpọ iba ẹdi, “Ẹnyene inụn̄ ke esịt mbufo” ye “ẹbọ ke idem mmọ utịp eke odotde.” (Mark 9:50; Rome 1:27) Ke mme itie emi, ubak udịmikọ oro iwọrọke edinyene odudu ndinọ mbon en̄wen inụn̄ m̀mê ndinọ owo ekededi utịp. Utu ke oro, enye owụt nte ẹdide ọyọhọ ọyọhọ ke esịtidem. Ntem, ikọ oro “uwem ke esịt mbufo” nte ẹdade ke John 6:53 ọwọrọ ndinyene ọyọhọ ọyọhọ uwem.

 Ke ini Jesus eketịn̄de aban̄a mme anditiene enye ndinyene uwem ke esịt mmọ, enye ama etịn̄ aban̄a obụkidem esie ye iyịp esie. Ke ukperedem, ke ini enye ọkọtọn̄ọde Udia Mbubịteyo Ọbọn̄, Jesus ama afiak etịn̄ aban̄a obụkidem ye iyịp esie onyụn̄ ọdọhọ mme anditiene enye oro ẹdidade ẹsịn ke obufa ediomi ete ẹdia uyo eke leaven mîdụhe ẹnyụn̄ ẹn̄wọn̄ wine emi ẹkedade ẹban̄a obụkidem ye iyịp imọ. Ndi emi ọwọrọ ke edi sụk mme Christian emi ẹyetde aran, emi ẹdude ke obufa ediomi ye Jehovah Abasi, ẹnyene utọ ọyọhọ ọyọhọ uwem oro? Baba. Isua kiet ama ebe tọn̄ọ akpa n̄kpọntịbe akada itie. Mbon oro ẹkekopde ikọ Jesus oro ẹwetde ke John 6:53, 54 ikọfiọkke n̄kpọ ndomokiet iban̄a edida mme n̄kpọ oro ẹdade ẹban̄a obụkidem ye iyịp Christ nnịm editi eke isua ke isua.

Nte John ibuot 6 owụtde, Jesus ekebem iso emen obụkidem esie odomo ye manna, ọdọhọde ete: “Mme ete mbufo ẹma ẹdia manna ke desert, ẹnyụn̄ ẹkpan̄a. Emi edi uyo eke otode ke heaven osụhọde, man owo adia, okûkpa. Ami ndi odu-uwem uyo emi okotode ke heaven osụhọde: edieke owo ekededi adiade uyo emi, enye oyodu uwem ke nsinsi.” Obụkidem ye iyịp Jesus ẹma ẹkan ata manna. Didie? Koro ẹkenọ obụkidem esie “man ererimbot odu uwem,” anamde ẹkeme ndinyene nsinsi uwem. * Ntem, ikọ oro aban̄ade edinyene “uwem ke esịt mbufo” ke John 6:53 abuana kpukpru mbon oro ẹdinyenede nsinsi uwem—ke heaven m̀mê ke isọn̄.—John 6:48-51.

Ini ewe ke mme anditiene Christ ẹdinyene uwem ke esịt mmọ, m̀mê ẹdinyene ọyọhọ ọyọhọ uwem? Ye mme anditiene nnyene udeme Obio Ubọn̄ emi ẹyetde aran, emi ada itie ke ini mmọ ẹsetde ke n̄kpa ẹdụk uwem eke heaven nte mme edibotn̄kpọ eke spirit emi mîkemeke ndikpa. (1 Corinth 15:52, 53; 1 John 3:2) “Mme erọn̄ en̄wen” Jesus ẹnyene ọyọhọ ọyọhọ uwem ke utịt Tọsịn Isua Ukara Jesus. Etisịm ini oro, ẹma ẹdomo, ẹkụt ke mmọ ẹnam akpanikọ, ẹnyụn̄ ẹbat mmọ ke edinen man ẹdu nsinsi uwem ke Paradise isọn̄.—John 10:16; Ediyarade 20:5, 7-10.

[Ikọ idakisọn̄]

[Mme ndise ke page 31]

Kpukpru ata Christian ẹkeme ndinyene ‘uwem ke esịt mmọ’