Mme Mbụme Ẹtode Mme Andikot

Nso idi baptism emi ẹnade ẹban̄a mme akpan̄kpa?

Ke ini ekewetde aban̄a ediset ke n̄kpa n̄ka heaven, apostle Paul ama ewet ubak udịmikọ oro enen̄erede edemede owo udọn̄. Ke Edisana Ŋwed Abasi Ibom, nnyịn ikot ite: “Edieke n̄kpọ mîbonoke ntem, mmọ emi ẹnade baptism ẹban̄a mme akpa-n̄kpa ẹdinam nso? Edieke mînamke nam mme akpa-n̄kpa ẹset, nsidi ndien ntak emi mmọ ẹnade baptism ẹban̄a mmọ oro?” Ndien The New Jerusalem Bible esịn ubak udịmikọ emi ntem: “Ntak emi mme owo ke idemmọ ẹnade baptism ke ibuot mme akpan̄kpa? Edieke mînamke-nam mme akpa-n̄kpa ẹset, nso idi ufọn edina baptism ke ibuot mmọ?”—1 Corinth 15:29.

Nte Paul mi ọkọnọ ekikere ete ke mme odu-uwem ẹnyene ndina baptism ke ibuot mbon oro ẹkekpan̄ade ke ini mînaha baptism? Emi ekeme nditie ntre ke ntak se ikotde ito mme edikabade Bible emi ye mme edikabade efen. Nte ededi, nditịm ndụn̄ọde N̄wed Abasi ye akpasarade ikọ Greek oro Paul akadade etịn̄ ikọ, ọnọ ekikere efen. Ikọ Paul ọkọwọrọ ete ke mme Christian oro ẹyetde aran ẹna baptism, m̀mê ẹbụhọ ke mmọn̄, ẹdụk usụn̄ uwem oro edidade ekesịm mmọ ndimụm nsọn̄ọnda n̄kama tutu esịm n̄kpa nte eke Christ. Ke oro ebede, ẹyenam mmọ ẹset ẹdidu uwem eke spirit kpa nte Christ.

N̄wed Abasi enyịme ye edinam an̄wan̄a emi. Ke leta oro enye ekewetde ọnọ ẹsọk mbon Rome, Paul ekewet ete: “Nte mbufo ifiọkke ite kpukpru nnyịn, emi ikanade baptism idụk ke Christ Jesus, ikana baptism idụk ke n̄kpa Esie?” (Rome 6:3) Ke leta oro enye ekewetde ọnọ ẹsọk mbon Philippi, Paul ama etịn̄ aban̄a idemesie nte ‘isan̄ade ke ndutụhọ Christ, inyụn̄ ikabarede ikpa n̄kpa eke ebietde n̄kpa Esie; man ke usụn̄ ekededi ikpesịm ediset ke n̄kpa.’ (Philippi 3:10, 11) Paul okowụt ete ke uwem anditiene Christ oro eyetde aran abuana edimụm nsọn̄ọnda n̄kama ke ini idomo, edisak iso nse n̄kpa eke usen ke usen, ndien ke akpatre, edikpa n̄kpa nsọn̄ọnda, ye idotenyịn ediset n̄ka heaven.

Odot ẹtịm ẹfiọk nte ke mme itien̄wed emi ye mme itie N̄wed Abasi efen oro ẹtịn̄de nnennen nnennen ẹban̄a n̄kpa ye mbon oro ẹnade baptism, ẹtịn̄ ẹban̄a mme odu-uwem oro ẹma ẹkena baptism, edi iban̄ake mbon oro ẹma ẹkekpan̄a. Paul n̄ko ama ọdọhọ ekemmọ mme Christian oro ẹyetde aran ete: “Mbufo ẹma ẹbụhọ ye Enye ke baptism; ke ẹnyụn̄ ẹda baptism ẹnam mbufo ẹset ye Enye, oto koro mbufo ẹbuọtde idem ke odudu Abasi, emi akanamde Enye eset ke n̄kpa.”—Colossae 2:12.

Ikọ Greek oro owụtde itie oro n̄kpọ odude, hy·perʹ, oro ẹkabarede nte, “kaban̄a” m̀mê “ke ibuot” ke nsio nsio edikabade Bible ke 1 Corinth 15:29, ekeme n̄ko ndiwọrọ “kaban̄a uduak.” Ke n̄kemuyo ye mme itien̄wed Bible eken, New World Translation of the Holy Scriptures esịn ufan̄ikọ 1Co 15:29 emi nnennen nnennen ete: “Mîdịghe ntre, nso ke mmọ eke ẹnade baptism kaban̄a uduak ẹdidi mme akpan̄kpa ẹdinam? Edieke owo mîdinamke mme akpan̄kpa ẹset, ntak emi ẹnịmde mmọ baptism kaban̄a utọ uduak oro?”