Ntọt Mme Anditan̄a Obio Ubọn̄

“N̄kpọ Emi Akpa Mi Idem-o!”

DOROTA, asan̄autom uyọhọ ini eke Mme Ntiense Jehovah ke Poland, ama ada eyeneren esie isua 14 ekebet useidem ke ufọkibọk nditọ ufọkn̄wed nte enye esinamde kpukpru ini. Ke ini useidem oro, abiausọbọ oro Janina ama obụp Dorota utom oro eyen esie emi esinamde ke ufọk. *

Dorota ama ọbọrọ ete: “Ke ini mmen̄kemeke, eyen mi emi esitem udia oro kpukpru nnyịn owo itiokiet ke ubon idiade. Enye n̄ko esinam ufọk asana onyụn̄ an̄wam ke ndidiọn̄ mme n̄kpọ ke ufọk. Enye esima ndikot n̄wed. Edi eti eyen ufọkn̄wed.”

Janina ama ọdọhọ ete: “Ọsọn̄ ndinịm emi ke akpanikọ-o! Mmanam utom mi ke isua 12, ndien akanam n̄kopke utọ n̄kpọ emi.”

Ke okụtde ifet oro ebererede ndinọ ikọ ntiense, Dorota ama anam an̄wan̄a ete: “Mfịn, ediwak mme ete ye eka inọhọ nditọ mmọ eti ukpep. Ntak edi oro nditọ mmọ mîsiwakke ndinọ idemmọ ukpono.”

Janina ama obụp ete: “Afo asan̄a didie ọfiọk kpukpru emi? Ata ediwak mme ete ye eka ifiọkke mme n̄kpọ emi.”

Dorota ama ọbọrọ ete: “Bible edi ata eti n̄wed oro ẹkemede ndikụt utọ ifiọk emi. Ke uwụtn̄kpọ, nte Deuteronomy 6:6-9 ọdọhọde, ndinọ nditọ nnyịn ukpep ọtọn̄ọ ye nnyịn ndinọ idem nnyịn ukpep. Nte nnyịn ikpebemke iso isịn mme edumbet oro iyomde ndisịn ke esịt nditọ nnyịn ke esịt ye ekikere nnyịn?”

Janina ama ọbọrọ ete: “Kûtịn̄ aba. Ọsọn̄ ndinịm emi ke akpanikọ-o!” Ekem enye ama obụp Dorota nte Bible akan̄wamde enye ndibọk nnyụn̄ nteme nditọ esie.

Dorota ama anam an̄wan̄a ete: “Nnyịn imesikpep Bible ye nditọ nnyịn kpukpru urua. Nnyịn isikama n̄wed oro ẹkotde Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn.” * Ekem enye ama etịn̄ nte n̄wed emi etiede onyụn̄ asiak ndusụk ibuotikọ oro ẹdude ke n̄wed emi.

Janina ama ofiori ete: “N̄kpọ emi akpa mi idem-o! Ndi mmekeme ndikụt n̄wed emi?”

Ke hour kiet ama ekebe, Dorota ama ada n̄wed oro edi.

Nte enye okụbọrede n̄wed oro ese, Janina ama obụp ete: “Afo edi owo ido ukpono ewe?”

“Ami ndi kiet ke otu Mme Ntiense Jehovah.”

“Didie ke Mme Ntiense Jehovah ẹsinam n̄kpọ ye mbon ido ukpono en̄wen?”

Dorota ama ọbọrọ ete: “Ẹsinam kpa nte nnamde emi ye afo—ke ukpono.” Ekem enye ama adian do ete: “Edi ọdọn̄ nnyịn mmọ ndidi ndifiọk akpanikọ Bible.”

Janina ama etịn̄ ke ofụri esịt ete: “Se n̄kopde emi ọtọtọn̄ọ ndinem mi.”

Ke oyomde ndinyọn̄, Dorota ama esịn udọn̄ ọnọ Janina ndikot Bible. “Enye ayanam uwem fo enyene inem onyụn̄ an̄wam fi ke utom fo.”

Janina ama ọdọhọ ete: “Afo amanam ọdọn̄ mi ndinam oro.”

Ke adade usọ ye uko anam n̄kpọ, Dorota ama ọwọn̄ọde kiet ke otu mme ini edika n̄kokụt abiausọbọ ke ọfis esịn ke edinọ ikọ ntiense.—1 Peter 3:15.

[Mme Ikọ idakisọn̄]