Nte Afo ke “Atịgha Ukim-Enan̄”?

KE MME ini Bible, ẹkesida ukịm-enan̄, kpa anyan eto emi ekesinyenede ọsọbọ iso ukwak—ẹbịn ẹnyụn̄ ẹkpeme enan̄-mbiomo. Edieke enan̄ oro akpapde ke ini ẹdade ukịm-enan̄ ẹkịm enye, nso ikesitịbe inọ enye? Utu ke ndibọhọ ubiak, enye ekesikam ọnọ idemesie unan.

Jesus Christ oro ẹkenamde eset ama etịn̄ aban̄a ukịm-enan̄ ke ini enye okowụtde owo emi ekekerede Saul idem ke usụn̄ oro Saul akakade ndimụm ndusụk mbet Jesus. Ke ufọt ọkpọsọn̄ un̄wana, Saul ama okop Jesus ọdọhọde ete: “Saul, Saul, nso inam afo ọkọbọde mi? Edi ọkpọsọn̄ n̄kpọ ye afo nditịgha ukịm-enan̄.” Ke ndinam n̄kpọ ibak ibak ye mme Christian, Saul akakam an̄wana ye Abasi, onyụn̄ anam n̄kpọ ke usụn̄ oro n̄kukụre ẹkekemede ndinọ idemesie unan.—Utom 26:14.

Nte nnyịn n̄ko imekeme ke ndudue “nditịgha ukịm-enan̄”? Bible emen “uyo mbon eti ibuot” odomo ye ukịm-enan̄ oro onụkde nnyịn ndika iso nsan̄a ke nnennen usụn̄. (Ecclesiastes 12:11) Item eke odudu spirit emi odude ke Ikọ Abasi ekeme ndinụk nnyịn ndinam n̄kpọ nnyụn̄ nnọ nnyịn nnennen ndausụn̄—edieke nnyịn inyịmede. (2 Timothy 3:16) Ndisịn ndiyak enye ada nnyịn usụn̄ ekeme n̄kukụre ndinọ nnyịn unan.

Saul ama anam ikọ Jesus, okpụhọde usụn̄ uwem esie, onyụn̄ akabade edi Christian apostle Paul oro ẹkemade. Kpasụk ntre, nnyịn ndida item Abasi nsịn ke edinam ọyọnọ nnyịn nsinsi edidiọn̄.—Mme N̄ke 3:1-6.

[Ebiet Ẹdade Ndise Ẹto ke page 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers