Ẹdian Edifara ke Idem ke Ifiọk
Ẹdian Edifara ke Idem ke Ifiọk
“Ẹdian edifara ke idem ke ifiọk.”—2 PETER 1:5-8.
1. Nso idi ntak ediwak mfịna oro mme owo ẹnyenede?
KE INI ẹkenamde akpan ubịnikọt man ẹtre edida ibọk ke idiọk usụn̄, item oro ẹkenọde n̄kparawa owo ke United States ekedi: “Ẹdọhọ nyomke.” Ọkpọfọn didie ntem edieke kpukpru owo ẹkpesịnde edida ibọk ke idiọk usụn̄, edin̄wọn̄ mmịn mbe ubọk, edidu oburobụt uwem oro mîwụtke eti ibuot, unana edinam akpanikọ ke mbubehe, ye “idiọk udọn̄ obụkidem”! (Rome 13:14) Edi, anie ekeme ndidọhọ ke esimem utom ndisịn ndinam se idiọkde?
2. (a) Ewe uwụtn̄kpọ Bible ẹwụt nte ke idịghe obufa n̄kpọ ndikụt nte ọsọn̄de ndisịn ndinam se idiọkde? (b) Mme uwụtn̄kpọ emi ẹkpesịn udọn̄ ẹnọ nnyịn ndinam nso?
2 Sia esisọn̄de kpukpru mme anana-mfọnmma owo ndifara ke idem, akpana nnyịn inyene udọn̄ ndikpep nte ikemede ndikan mmeme ekededi oro nnyịn inyenede. Bible asian nnyịn aban̄a mme owo ke eset oro ẹkedomode ndinam n̄kpọ Abasi edi oro ọkọsọn̄de mmọ ndusụk ini ndisịn ndinam se idiọkde. Ti David ye idiọkn̄kpọ oro enye akanamde ke ndisịn efịbe ye Bath-sheba. Oro ama osụn̄ọ ke eyen efịbe oro ye ebe Bath-sheba ndikpa, kpa ye oro mmọ mbiba mîkeduehe. (2 Samuel 11:1-27; 12:15-18) Mîdịghe kere ban̄a apostle Paul, oro eketịn̄de an̄wan̄wa ete: “Koro nnamke eti n̄kpọ eke ọdọn̄de mi ndinam, edi idiọk-n̄kpọ eke mîdọn̄ke mi ndinam, oro ke nnanam.” (Rome 7:19) Nte afo ndusụk ini emesikụt ukem edikpu emi? Paul ama aka iso ete: “Koro ndara ibet Abasi ke ọwọn̄esịt mi: edi n̄kụt ibet efen ke mbak idem mi, nte an̄wanade ye ibet eke esịt mi amade, onyụn̄ adade mi nte ibuot-ekọn̄ esịn ke idak ibet idiọk-n̄kpọ emi odude ke mbak idem mi. Mbọm mi, owo nditaha! anie edinyan̄a mi osio ke ikpọkidem n̄kpa emi?” (Rome 7:22-24) Mme uwụtn̄kpọ oro ẹdude ke Bible ẹkpenyene ndisọn̄ọ ubiere nnyịn ndika iso ke ukeme oro isịnde ndinen̄ede mfara ke idem.
Mfara ke Idem, Se Anade Ẹkpep
3. Nam an̄wan̄a ntak emi nnyịn mîkpodorike enyịn ke eyemem ndifara ke idem.
3 Ke 2 Peter 1:5-7, ẹsiak edifara ke idem, emi esịnede ukeme edisịn ndinam se idiọkde, ọtọkiet ye eti ido, mbuọtidem, ifiọk, ime, uten̄e Abasi, iman, ye ima. Idụhe ndomokiet ke otu nti edu emi, oro ẹsidade-da ẹmana. Ana ẹkpekpep mmọ. Oyom ọkpọsọn̄ ubiere ye ukeme man ẹnyene mmọ ke akamba udomo. Ntre, nte nnyịn ikpodori enyịn ke eyemem ndifara ke idem?
4. Ntak emi ediwak owo ẹkerede ke edifara ke idem idịghe mfịna inọ mmimọ, edi emi owụt nso?
4 Edi akpanikọ, ediwak miliọn owo ẹkeme ndikere ke edifara ke idem idịghe mfịna inọ mmimọ. Edide mmọ ẹfiọk m̀mê ifiọkke, mmọ ẹdu uwem nte mmọ ẹmade, ẹnam se idọn̄de anana-mfọnmma obụkidem mmọ, inyụn̄ ikereke mme utịp oro emi edidade ọsọk mmọ m̀mê mbon efen. (Jude 10) Ẹkụt mfịn akan nte akanam ẹkụtde, nte ke mme owo ikemeke inyụn̄ inyịmeke ndisịn ndinam se idiọkde. Emi edi uyarade nte ke nnyịn inen̄ede idu ke “ukperedem ini” oro Paul eketịn̄de aban̄a ke ini enye ọkọdọhọde ete: “Ndiọk eyo ẹyedu . . . Koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i . . . ẹyak idiọk itọn̄ akan mmọ ubọk [“ẹnana mfara ke idem,” NW].”—2 Timothy 3:1-3.
5. Ntak emi Mme Ntiense Jehovah ẹnyenede udọn̄ ke se iban̄ade edifara ke idem, ndien ewe item osụk enyene ufọn?
5 Mme Ntiense Jehovah ẹtịm ẹfiọk nte ọsọn̄de ndifara ke idem. Ukem nte Paul, mmọ ẹfiọk en̄wan oro anade ẹn̄wana man ẹnem Abasi esịt ke ndidu uwem ekekem ye mme edumbet esie nnyụn̄ n̄n̄wana ndisịn uwem oro anana-mfọnmma ikpọkidem mmọ oyomde mmọ ẹdu. Ke ntak emi, mmọ ke anyan ini ẹnyene udọn̄ ndikan ke en̄wan emi. Ko ke 1916, ntọn̄ọ ntọn̄ọ nsiondi magazine emi afo osụk okotde mi ama etịn̄ “nnennen usụn̄ oro nnyịn ikpanamde n̄kpọ man ikara idem nnyịn, ekikere nnyịn, ikọ nnyịn, ye edu uwem nnyịn.” Enye ama eteme ete ẹnyene Philippi 4:8 ke ekikere. Item Abasi emi odude ke itien̄wed emi osụk enyenyene ufọn, okposụkedi ẹkenọde enye akpa ini ke n̄kpọ nte isua 2,000 emi ẹkebede ndien eyedi item emi ọsọn̄ ndinam idahaemi akan nte ekedide ke ini ẹkewetde enye m̀mê ke 1916 oro. Kpa ye oro, mme Christian ẹsịn ọkpọsọn̄ ukeme ndisịn mme udọn̄ ererimbot, ẹfiọkde ẹte ke mmimọ ndinam ntre owụt ke imenyịme ndinam se Andibot amade.
6. Ntak emi nnyịn mînyeneke ntak ndomokiet ndiduọk idotenyịn ke ini ikpepde ndifara ke idem?
6 Ẹtịn̄ ẹban̄a mfara ke idem ke Galatia 5:22, 23 nte ubak “mbun̄wụm [edisana] Spirit.” Edieke nnyịn inyenede edu emi ọkọrọ ye ‘ima, idatesịt, emem, ime, mfọn-ido, eti ido, edinam akpanikọ, ye ifụre ifụre ido,’ nnyịn iyọbọ akamba ufọn. Nte Peter akanamde an̄wan̄a, ndinam ntre idiyakke nnyịn ‘itie ifu, m̀mê ndinana mfri’ ke utom oro inamde inọ Abasi. (2 Peter 1:8) Edi nnyịn ikpenyeneke ndiduọk idotenyịn m̀mê ndikere ke nnyịn idikwe unen edieke nnyịn mîkemeke ndinyene mme edu emi usọp usọp ye ke ọyọhọ ọyọhọ udomo nte nnyịn ikpamade. Eyedi afo emesikụt ke ufọkn̄wed nte ke n̄kpọ esisọp an̄wan̄a eyen ufọkn̄wed kiet akan eken. Mîdịghe ke itieutom, owo kiet ekeme ndisọp mfiọk obufa utom n̄kan mme nsan̄autom esie. Kpasụk ntre, ndusụk owo ẹsikpep ndiwụt mme edu Christian usọp usọp n̄kan mbon en̄wen. Akpan n̄kpọ edi ndika iso n̄kọri mme edu Abasi ke mfọnn̄kan usụn̄ nte ikekeme. Nnyịn ikeme ndinam emi ke ndida un̄wam oro Jehovah ọnọde ke Ikọ ye esop esie nnam n̄kpọ. Akpan n̄kpọ idịghe ndisọsọp nsịm utịtmbuba nnyịn, edi akam edi ndisịn ọkpọsọn̄ ukeme man ika iso inam n̄kọri.
7. Nso iwụt ke mfara ke idem edi akpan edu?
7 Kpa ye oro ẹwetde enye akpatre ke otu mbun̄wụm spirit, oro inamke mfara ke idem ekpri akan mme edu eken. Utu ke oro, enye n̄ko edi akpan edu. Ana nnyịn inyene ke ekikere nte ke imekeme ndifep kpukpru “ubọk-utom obụkidem” edieke nnyịn inen̄erede ifara ke idem. Edi, mme anana-mfọnmma owo ẹwak ndinam ndusụk orụk “ubọk-utom obụkidem . . . , [ẹdide] use, ye mbubiam ido, ye obukpo ido, ye edikpono-ndem, ye edibre-idiọn̄, ye usua, ye utọk, ye ufụp, ye iyatesịt, ye ndomoidem, ye ubahade, ye edisiak isio n̄ka.” (Galatia 5:19-21a) Ke ntre ana nnyịn in̄wana kpukpru ini, ibiere ndision̄o kpukpru ndiọi ekikere mfep ke esịt ye ke ekikere.
Ndusụk Owo Ẹnyene San̄asan̄a En̄wan
8. Nso inam enen̄ede ọsọn̄ ndusụk owo ndifara ke idem?
8 Esisọn̄ ndusụk Christian ndifara ke idem akan ndusụk. Ntak-a? Ukpep oro ete ye eka ẹnọde m̀mê ifiọk n̄kpọntịbe ini edem ekeme nditịp nsịn ke emi. Edieke etiede nte edikpep nnyụn̄ n̄wụt mfara ke idem idịghe ọkpọsọn̄ n̄kpọ inọ nnyịn, oro edi n̄kpọ idatesịt. Edi nnyịn ikpenyene ndiwụt mbọm ye mbufiọk ke ini inamde n̄kpọ ye mbon oro ẹnen̄erede ọsọn̄ mmọ ndifara ke idem, idem ọkpọkọm unana edifara ke idem mmọ ada ndusụk mfịna ọsọk nnyịn. Ke ntak unana mfọnmma nnyịn, anie ke otu nnyịn enyene ntak ndikụt idem ke edinen?—Rome 3:23; Ephesus 4:2.
9. Mme mmeme ewe ke ndusụk owo ẹnyene, ndien ini ewe ke ẹdikan mme mmeme emi taktak?
9 Ke ndinọ uwụtn̄kpọ: Nnyịn imekeme ndifiọk ndusụk ekemmọ Christian oro ẹma ẹketre ndida un̄wọn̄ m̀mê ndida inua-okot n̄kpọsọn̄ ibọk oro ẹnamde owo efre uwa, edi oro ẹkemede ndinen̄ede ndọn̄ mmọ ndusụk ini ndifiak n̄kada mme n̄kpọ emi. Mîdịghe ekeme ndidi ọkpọsọn̄ n̄kpọ nnọ ndusụk owo ndisụhọde udomo udia oro mmọ ẹdiade m̀mê udomo ọkpọsọn̄ mmịn oro mmọ ẹn̄wọn̄de. Mbon efen ẹkeme ndinyene mfịna edifara edeme, ntre mmọ ẹkeme ndidue ke ikọ inua ediwak ini. Oyom ẹsịn ifịk ẹkpep ndifara ke idem man ẹkeme ndinam n̄kpọ mban̄a mme utọ mmeme oro. Ntak-a? James 3:2 etịn̄ nte enende ete: “Kpukpru nnyịn idedue ke ediwak n̄kpọ. Edieke owo ekededi mîduehe ke ikọ-inua, enye ọfọn ama, onyụn̄ ekeme ndikara ofụri idem esie nde.” Esinen̄ede ọdọn̄ mbon efen n̄ko ndibre mbre mfọniso. Mîdịghe ekeme ndidi ọkpọsọn̄ n̄kpọ nnọ mmọ ndikara iyatesịt mmọ. Ekeme ndida ini ndikpep ndiyọ mme mmeme emi m̀mê mbon oro ẹbietde mmọ. Okposụkedi nnyịn ikemede ndinam akamba n̄kọri idahaemi, nnyịn idikeme ndikan ndiọi udọn̄ taktak n̄kukụre ke ini isịmde mfọnmma. Kan̄a ke emi, ndin̄wana ndifara ke idem ayan̄wam nnyịn ifep ndifiak nduọ ndụk idiọk usụn̄ uwem. Nte ikade iso ke en̄wan emi, ẹyak nnyịn in̄wam kiet eken man mmọ ẹkûkpa mba.—Utom 14:21, 22.
10. (a) Ntak emi enen̄erede ọsọn̄ ndusụk owo ndifara ke idem ke n̄kpọ ẹban̄ade idan̄? (b) Nso akpan ukpụhọde ke eyenete eren kiet akanam? (Se ekebe ke page 16.)
10 Ikpehe efen oro ọsọn̄de ndusụk owo ndifara ke idem edi ke n̄kpọ ẹban̄ade idan̄. Edi akpanikọ, Jehovah Abasi okobot nnyịn ye udọn̄ idan̄. Edi, akpan mfịna emi ndusụk owo ẹnyenede edi ndinịm idan̄ ke nnennen itie esie, nte ekemde ye mme edumbet Abasi. Mfịna mmọ ekeme nditetịm nsọn̄ ubọk ke ntak emi mmọ ẹnyenede ata ọkpọsọn̄ udọn̄ idan̄. Nnyịn idu ke ererimbot oro adamade idat kaban̄a idan̄, onyụn̄ etịmde-tịm esịn udọn̄ ọnọ idan̄ ke ediwak usụn̄. Emi ekeme ndidi akamba mfịna nnọ mme Christian oro mîyomke ndidọ ndọ—ke nsụhọde n̄kaha ke ndusụk ini—man ẹnyene ifụre ndinam n̄kpọ Abasi, mfịna ndọ okûtịmede mmọ. (1 Corinth 7:32, 33, 37, 38) Edi nte ekemde ye item N̄wed Abasi oro “ọfọn ndidọ ndọ akan ndikpa udọn̄,” mmọ ẹkeme ndibiere ndidọ ndọ, ndien emi edi n̄kpọ oro etịmde odot ukpono. Ke ukem ini oro, mmọ ẹsibiere ndidọ “owo Abasi ikpọn̄-ikpọn̄” nte N̄wed Abasi etemede. (1 Corinth 7:9, 39) Nnyịn imekeme ndinịm ke akpanikọ nte ke Jehovah adat esịt ke udọn̄ oro mmọ ẹnyenede ndimụm ndinen edumbet n̄kama. Edi n̄kpọ idatesịt ọnọ ekemmọ Christian ndibuana ye ata mme andituak ibuot oro ẹnyenede utọ n̄kokon̄ idaha ido uwem ye nsọn̄ọnda oro.
11. Didie ke nnyịn ikeme ndin̄wam eyenete oro enyenede udọn̄ ndidọ ndọ edi oro mîkemeke kan̄a ndinam ntre?
11 Nso edieke owo mîkwe nsan̄a ndọ oro odotde? Kere ban̄a editịmede esịt oro owo emi enyenede udọn̄ ndidọ ndọ edi oro mîkemeke ndinam ntre ekemede ndinyene! Enye ekeme ndikụt mme ufan esie ẹdọde ndọ ẹnyụn̄ ẹkopde inemesịt, ke adan̄aemi enye osụk oyomde-yom nsan̄andọ oro odotde. Ndedehe edu edifiọn̄ọ ndido idan̄ n̄kop uyụhọ ekeme ndikabade ndi akpan mfịna nnọ ndusụk owo emi ẹdude ke utọ idaha oro. Ke usụn̄ ekededi, idụhe Christian oro ediyomde ndinam ndudue nnam esịt etịmede owo efen oro odomode ndimụm edisana idaha n̄kama. Ke ndudue, nnyịn imekeme ndinam owo enyene editịmede esịt edieke nnyịn itịn̄de ikọ oro mîwụtke edikere mban̄a utọ nte, “Ini ewe ke afo emi edidọ ndọ?” Owo ekeme ndibụp utọ mbụme oro ye eti uduak, edi ekpetịm ọfọn didie ntem nnyịn ndifara ke idem ke ndikpeme edeme nnyịn! (Psalm 39:1) Odot nnyịn inen̄ede itoro mbon oro mîdọhọ ndọ ke otu nnyịn edi oro ẹmụmde edisana idaha ẹkama. Utu ke nditịn̄ n̄kpọ oro ekemede nditịmede mmọ esịt, nnyịn imekeme ndin̄wana ndinọ nsịnudọn̄. Ke uwụtn̄kpọ, nnyịn imekeme ndisịn ukeme ndibuan utọ mbon oro mîdọhọ ndọ do ke ini ekpri otu mme Christian oro ẹkọride ẹsịm ọyọhọ idaha ẹsopde idem ndidia udia m̀mê ke ini mme Christian ẹnyenede ebuana ọtọkiet.
Edifara ke Idem ke Ndọ
12. Ntak emi oyomde idem mbon oro ẹdọde ndọ ẹfara ke idem?
12 Owo ndidọ ndọ ikpanke edifara ke idem ke ebuana idan̄. Ke uwụtn̄kpọ, udọn̄ idan̄ ebe ye n̄wan ekeme ndidi ata isio isio. Mîdịghe nte etiede nsan̄a ndọ kiet ke idem ekeme ndinam mmọ ẹkûkeme ndinyene ebuana idan̄ nte ido esidide. Ndusụk ke ntak ifiọk n̄kpọntịbe ini edem, ekeme ndidi ọkpọsọn̄ n̄kpọ nnọ nsan̄a ndọ kiet ndinam ewụhọ emi: “Yak ebe ọnọ n̄wan se idide udeme n̄wan: n̄wan onyụn̄ anam kpa ntre ye ebe.” Ke utọ idaha oro, ekeme ndidi oyoyom nsan̄a ndọ eken enen̄ede afara ke idem. Edi mmọ mbiba ẹkeme ndikere ima ima item oro Paul ọnọde mme Christian oro ẹdọde ndọ ete: “Ẹkûbọ kiet eken se idide unen esie, ibọhọke oto edinyịme n̄kan̄ mbiba ke ekpri ini, man mbufo ẹsịn idem ke akam, ẹnyụn̄ ẹfiak ẹdidiana; mbak Satan editap mbufo oto koro mbufo mîkemeke ndikara esịt mbufo.”—1 Corinth 7:3, 5.
13. Nso ke nnyịn ikpanam ndin̄wam mbon oro ẹn̄wanade ndifara ke idem?
13 Ebe ye n̄wan ẹdikop inemesịt didie ntem edieke mmọ mbiba ẹkpepde ndifara ke idem nte odotde ke ata ntotụn̄ọ ebuana emi. Ke ukem ini oro, oyoyom mmọ ẹnam n̄kpọ ke mbufiọk ye ekemmọ mme andituak ibuot oro ẹsụk ẹn̄wanade ndifara ke idem ke afan̄ emi. Nnyịn ikpedehede ifre ndibọn̄ akam mben̄e Jehovah ọnọ nditọete nnyịn eke spirit ifiọk, uko, ye ukeme ndika iso n̄n̄wana man ẹfara ke idem ẹnyụn̄ ẹnam n̄kpọ ndikan ndiọi udọn̄.—Philippi 4:6, 7.
Ẹka Iso Ndin̄wam Kiet Eken
14. Ntak emi nnyịn ikpanamde n̄kpọ ke mbọm ye mbufiọk ye ekemmọ mme Christian?
14 Ndusụk ini, ekeme ndidi ọkpọsọn̄ n̄kpọ ndinam n̄kpọ ke mbufiọk ye ekemmọ mme Christian oro ẹdomode ndifara ke idem ke ikpehe oro mîdịghe mfịna inọ nnyịn. Edi, obot owo edi nsio nsio. Ntụk ndusụk owo esisọp edemede akan eke mbon eken. Esidi mmemmem ọnọ ndusụk owo ndimụm idem n̄kama, ntre isọn̄ke mmọ ndifara ke idem. Edi esinen̄ede ọsọn̄ ye mbon efen. Kpa ye oro, ti ete ke owo oro esịnde ukeme ndinam n̄kpọ idịghe idiọkowo. Oyom nnyịn iwụt mbufiọk ye mbọm ke ini inamde n̄kpọ ye ekemmọ mme Christian. Nnyịn iyokop inemesịt nte nnyịn ikade iso ndiwụt mbọm nnọ mbon oro ẹsụk ẹn̄wanade ndifara ke idem. Nnyịn imekeme ndikụt oro ke ikọ Jesus oro ẹwetde ke Matthew 5:7.
15. Ntak emi ikọ Psalm 130:3 ọnọde ndọn̄esịt ke se iban̄ade edifara ke idem?
15 Nnyịn ikpedehede idomo ndikụt ndudue nnọ ekemmọ Christian oro ekemede ndidi okpu ndiwụt edu Christian emi ke ndusụk idaha. Nso n̄kpọ nsịnudọn̄ ke edi ntem ndifiọk nte ke adianade ye edikụt ini kiet oro nnyịn ikokpude ndifara ke idem, Jehovah esikụt ediwak ini oro nnyịn ikanamde ọfọn, idem ọkpọkọm ekemmọ mme Christian ikekwe. Edi ata n̄kpọ ndọn̄esịt nditi ikọ Psalm 130:3 emi ọdọhọde ete: “O Jehovah, afo ekpese mme idiọk ido, O Ọbọn̄, anie ekpekeme ndida?”
16, 17. (a) Didie ke nnyịn ikeme ndibuan Galatia 6:2, 5 ye edifara ke idem? (b) Nso efen ke nnyịn idineme iban̄a edifara ke idem?
16 Man inem Jehovah esịt, ana nnyịn owo kiet kiet ikpep ndifara ke idem, edi nnyịn imetịm ifiọk ke nditọete Christian nnyịn ẹyen̄wam. Ke adan̄aemi anade nnyịn owo kiet kiet ibiom mbiomo nnyịn, ẹsịn udọn̄ ẹnọ nnyịn ndin̄wam kiet eken ọyọ mme mmeme esie. (Galatia 6:2, 5) Nnyịn ikpenyene ndinen̄ede mma ete m̀mê eka, nsan̄a ndọ m̀mê ufan, oro ọbiọn̄ọde nnyịn ndika mme itie oro mîkpanaha ika, etrede nnyịn ndise mme n̄kpọ oro mîkpanaha ise, m̀mê etrede nnyịn ndinam mme n̄kpọ oro mîkpanaha nnyịn inam. Mme owo emi ẹsin̄wam nnyịn ndifara ke idem, ẹnamde nnyịn ikeme ndisịn ndinam se mîkpanaha inam nnyụn̄ nsọn̄ọ nda ke oro!
17 Ediwak Christian ẹkeme ndinyịme ye kpukpru n̄kpọ oro nnyịn inemede mi iban̄a mfara ke idem, edi mmọ ẹkeme ndikụt ke oyom mmimọ inam ekese ukpụhọde. Mmọ ẹkpema ndinen̄ede mfara ke idem, ke udomo oro mmọ ẹkerede nte ẹyomde ẹto mme anana-mfọnmma owo. Nte afo omokụt ntre? Nso ndien ke afo ekeme ndinam man on̄wụm mbun̄wụm spirit Abasi emi? Ndien didie ke ndinam emi ekeme ndin̄wam fi esịm utịtmbuba oro afo ebịnede nte Christian? Ẹyak nnyịn ise emi ke ibuotikọ oro etienede.
Nte Afo Emeti?
Ntak Emi Edifara ke Idem . . .
• edide akpan edu oro ẹyomde mme Christian ẹkpep?
• enen̄erede ọsọn̄ ndusụk owo?
• edide akpan n̄kpọ ke ndọ?
• edide edu oro nnyịn ikemede ndin̄wam kiet eken ndinyene?
[Mme Mbụme Ukpepn̄kpọ]
[Ekebe/Ndise ke page 16]
Enye Ama Ekpep Ndisịn Ndinam Se Idiọkde
Owo kiet ke otu Mme Ntiense Jehovah oro odụn̄de ke Germany akanam utom nte ewetn̄wed ke ufọkutom usuanetop. Utom esie ama esịne edise mban̄a nsio nsio edinam 30 ke ekebe ndise ye ekebe utịn̄ikọ. Ke ini ekebe ndise mîsioho n̄kpọ ọfọn m̀mê ke ini ekebe utịn̄ikọ mîtịn̄ke ikọ an̄wan̄a, enye ekesinyene ndinọ ntịn̄enyịn ke edinam oro man ọfiọk se idide mfịna. Enye ọdọhọ ete: “Mfịna emi ekesiwak ndidu ke ini ẹwụtde se mîdotke, ke ata ini oro ẹwụtde afai m̀mê idan̄. Mme oburobụt edinam oro ẹma ẹsidu mi ke ekikere ke ediwak usen m̀mê ke ediwak urua, nte n̄kpọ eke ẹkesiakde-siak mi ibuot ẹdọn̄ mmọ.” Enye ọdọhọ ete ke emi ama otụk idaha eke spirit imọ idiọk idiọk: “Esitie mi ke idem nte nyom ndikabade nnam n̄kpọ ibụmede ibụmede, ntre mme ikpehe oro ẹkewụtde afai ẹma ẹnam etetịm ọsọn̄ mi ndifara ke idem. Mme ikpehe oro ẹkewụtde idan̄ ẹma ẹsidemede mfịna ke ufọt mi ye n̄wan mi. N̄kenyene ndisịn ọkpọsọn̄ ukeme ke usen ke usen man n̄kan idiọk ekikere. Man n̄kan ke en̄wan oro, mma mbiere ndiyom utom efen, idem ọkpọkọm enye oro ẹkpede esisịt okụk. Ke mînen̄ekede ibịghi, mma nnyene utom efen. Mmoyụhọ udọn̄ mi ndien.”
[Mme ndise ke page 15]
Ifiọk oro inyenede ito edikpep Bible an̄wam nnyịn ndifara ke idem