Ẹfara ke Idem man Ẹbọ Utịp!
Ẹfara ke Idem man Ẹbọ Utịp!
“Owo ekededi eke onyụn̄ an̄wanade mbọk akama idem ke ufat ke kpukpru usụn̄.”—1 CORINTH 9:25.
1. Ke n̄kemuyo ye Ephesus 4:22-24, didie ke ediwak miliọn owo ẹkewụt ke imenyịme ndiyak idem nnọ Jehovah?
EDIEKE edide afo ama ana baptism nte kiet ke otu Mme Ntiense Jehovah, afo ama owụt an̄wan̄wa nte ke imọ imenyịme ndifehe mbuba oro utịp edide nsinsi uwem. Afo ama enyịme ke iyanam uduak Jehovah. Mbemiso ikayakde idem inọ Jehovah, ediwak nnyịn ikenyene ndinam ikpọ ukpụhọde man uyakidem nnyịn enyene se ọwọrọde, onyụn̄ enyene unyịme Abasi. Nnyịn ima itiene item oro apostle Paul ọkọnọde mme Christian ete: “Ẹsio akani owo ẹduọk, emi ekemde ye ido uwem mbufo ke eyo oko, onyụn̄ ọdiọn̄de diọn̄ abiara oto ke editiene eke mbufo ẹtienede idiọkitọn̄ eke ẹbian̄ade owo . . . ẹnyụn̄ ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” (Ephesus 4:22-24) Ke nditịn̄ ke usụn̄ efen, mbemiso ikọdọhọde ke imenyịme ndiyak idem nnọ Abasi, nnyịn ikenyene ndisịn akani usụn̄ uwem oro mîdotke.
2, 3. Didie ke 1 Corinth 6:9-12 owụt ke ana ẹnam orụk ukpụhọde iba man ẹnyene unyịme Abasi?
2 Ndusụk n̄kani edu oro anade mbon emi ẹyomde ndidi Mme Ntiense Jehovah ẹsion̄o ẹduọn̄ọ ẹdi se Ikọ Abasi obiomde ikpe nnennen nnennen. Paul ama asiak ndusụk mmọ ke leta oro enye ekewetde ọnọ ẹsọk mbon Corinth, ọdọhọde ete: “Mbon-use, ye mme okpono-ndem, ye mme esịn-efịbe, ye mmọ eke ẹbietde iban, ye mmọ eke ẹsabarede idem, ye mme inọ, ye mme ẹsịn esịt ke n̄kpọ owo, ye mme oyụhọ mmịn, ye mbon idiọk inua, ye mme akan owo ubọk ididaha Obio Ubọn̄ Abasi inyene.” Ekem enye ama owụt ke mme Christian akpa isua ikie ẹma ẹnam mme ukpụhọde oro ẹkeyomde ke edu uwem mmọ, adiande do ete: “Ndusụk mbufo ẹketie ntem.” Tim fiọk, ke ẹdọhọ ẹketie ntem, idịghe ẹtie ntem.—1 Corinth 6:9-11.
3 Paul ama ọnọ ekikere ete ke ekeme ndidi oyoyom ẹnam mme ukpụhọde efen efen n̄ko, koro enye ama aka iso ọdọhọ ete: “Kpukpru n̄kpọ enen mi ndinam; edi idịghe kpukpru n̄kpọ ẹfọn.” (1 Corinth 6:12) Ntem, ediwak owo mfịn oro ẹyomde ndidi Mme Ntiense Jehovah ẹkụt ke oyom mmimọ ikam isịn mme n̄kpọ oro mînyeneke ufọn m̀mê oro ẹnyenede esisịt ufọn oro mîbịghike, okposụkedi mme n̄kpọ oro ẹnende. Emi ekeme ndida ini nnyụn̄ n̄n̄wọn̄ọde ntịn̄enyịn mmọ n̄kpọn̄ ndibịne mme n̄kpọ oro ẹdide akpan n̄kpọ ẹkan.
4. Ewe ikọ Paul ke mme Christian oro ẹma ẹkeyak idem ẹnọ ẹnyịme?
4 Ediyak idem nnọ Abasi edi n̄kpọ oro ẹnamde ke edinyịme esịt, idịghe ke edinyenyịk, nte n̄kpọ eke emi oyomde n̄waidem emi okponde akaha. Mme Christian oro ẹma ẹkeyak idem ẹnọ ẹnyịme ikọ Paul, emi ke ama akakabade edi anditiene Christ, ọkọdọhọde ete: ‘N̄kayak kpukpru n̄kpọ ẹtak kaban̄a Jesus, mmonyụn̄ nsịn mmọ ke mbio, man mbọ Christ nda nnyene.’ (Philippi 3:8) Paul ke idatesịt ama esịn mme n̄kpọ oro ẹkenyenede esisịt ufọn man enye ekeme ndika iso nnam se Abasi amade.
5. Nso orụk mbuba ke Paul ekefehe uforo uforo, ndien didie ke nnyịn ikeme ndinam ntre?
5 Paul ama afara ke idem ke ndifehe mbuba eke spirit ndien ke akpatre enye ama ọdọhọ ete: “Mma n̄n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem n̄kama. Ẹma ẹnịm anyanya eti ido ẹben̄e mi, emi Ọbọn̄, kpa Edinen Ebiereikpe, edinọde mi ke usen oro; idinyụn̄ inọhọ mi ikpọn̄, edi oyonyụn̄ ọnọ kpukpru mmọ emi ẹmade ediyarade Esie.” (2 Timothy 4:7, 8) Ndi nnyịn iyekeme ndidọhọ ntre usen kiet? Iyekeme edieke nnyịn ke mbuọtidem ifarade ke idem nte ifehede mbuba Christian nnyịn mînyụn̄ ikpaha mba tutu esịm utịt.
Oyom Mfara ke Idem man Inam Se Ifọnde
6. Nso idi mfara ke idem, ndien ke ewe usụn̄ iba ke ana nnyịn ifara ke idem?
6 Ikọ Hebrew ye Greek oro ẹkabarede “mfara ke idem” ke Bible ke ata ata usụn̄ owụt ke owo enyene odudu ye ukeme ndimụm idem n̄kama. Mme ikọ emi ẹsiwak ndinọ ekikere mban̄a owo ndikpan idemesie ndinam idiọk. Ana in̄wan̄-in̄wan̄ nte ke oyom n̄ko ndusụk udomo mfara ke idem edieke anade nnyịn ida idem nnyịn inam nti utom. Ndammana ntụhọ mme anana-mfọnmma owo edi ndinam idiọk, ntre nnyịn inyene orụk en̄wan iba. (Ecclesiastes 7:29; 8:11) Ke adan̄aemi ifepde ndinam se idiọkde, ana nnyịn in̄wana n̄ko ndinam se ifọnde. Ke akpanikọ, ndimụm idem n̄kama man ikeme ndinam se ifọnde edi kiet ke otu mfọnn̄kan usụn̄ ndifep ndinam se idiọkde.
7. (a) Ukem nte David, nso ke nnyịn ikpọbọn̄ akam iben̄e? (b) Nditie n̄kere nso edin̄wam nnyịn ndinen̄ede mfara ke idem?
7 Nte an̄wan̄ade, mfara ke idem edi akpan n̄kpọ edieke anade nnyịn idu uwem ekekem ye uyakidem nnyịn nnọ Abasi. Oyom nnyịn ibọn̄ akam inọ Abasi ukem nte David ọkọbọn̄de ete: “Bot edisana esịt nọ mi, O Abasi; nyụn̄ nam obufa spirit eke ọsọn̄ọde ada, sịn mi ke idem.” (Psalm 51:10) Nnyịn imekeme nditie n̄kere mme ufọn edifep mme n̄kpọ oro ẹkwan̄ade ke n̄kan̄ ido uwem m̀mê oro ẹbiatde nsọn̄idem ikpọkidem. Kere ban̄a ndiọi utịp emi editre ndifep mme utọ n̄kpọ oro ẹkemede ndida ndi: ndiọi udọn̄ọ, mfịna mfịna itie ebuana, idem n̄kpa nsek. Ke n̄kan̄ eken, kere ban̄a ediwak ufọn ẹkemede ndinyene nto edisọn̄ọ mmụm usụn̄ uwem oro Jehovah etemede n̄kama. Nte ededi, ke nditịm ntịn̄, inaha nnyịn ifre ke esịt nnyịn ekeme ndibian̄a nnyịn. (Jeremiah 17:9) Ana nnyịn ibiere ndin̄wana mbiọn̄ọ ndikere ke ndimụm mme edumbet Jehovah n̄kama idịghe akpan n̄kpọ.
8. Nso ke ifiọk n̄kpọntịbe ekpep nnyịn? Nam an̄wan̄a.
8 Ata ediwak nnyịn imọdiọn̄ọ ito ifiọk n̄kpọntịbe nte ke obụkidem esiwak ndinam owo etek ke ifịk. Da edikwọrọ Obio Ubọn̄ ke uwụtn̄kpọ. Jehovah esidat esịt nte mme owo ẹnyịmede nditiene mbuana ke utom oro ọnọde uwem mi. (Psalm 110:3; Matthew 24:14) Ndikpep ndikwọrọ ikọ an̄wa an̄wa ikedịghe mmemmem n̄kpọ inọ ata ediwak nnyịn. Emi ama oyom—ndien eyedi ke osụk oyoyom—ete nnyịn imụm idem nnyịn ikama, ‘itọn̄ọ enye ita’ inyụn̄ ‘inam enye odụk ufụn,’ utu ke ndiyak enye anam nnyịn itre ndikwọrọ ikọ.—1 Corinth 9:16, 27; 1 Thessalonica 2:2.
“Ke Kpukpru Usụn̄”?
9, 10. Nso ke ‘ndikama idem ke ufat ke kpukpru usụn̄’ abuana?
9 Item Bible oro ọdọhọde “[ikama] idem ke ufat ke kpukpru usụn̄” owụt ke se ibuanade akan sụk ndikara esịt nnyịn nnyụn̄ ntre ndinam oburobụt ido. Nnyịn imekeme ndikere ke nnyịn imafara ke idem ke mme afan̄ emi, ndien edieke edide ntre, nnyịn imekeme ndinen̄ede n̄kop inemesịt. Edi nso kaban̄a mme ikpehe eken ke uwem oro ẹtiede nte inen̄ekede iyom ifara ke idem? Ke ndinam an̄wan̄a, yak idọhọ ke nnyịn idụn̄ ke idụt oro ẹnyenede uforo ke ndusụk udomo ẹnyụn̄ ẹdude n̄kokon̄ uwem. Ndi ikpowụtke eti ibuot ndikpep nditre ndibiat okụk nte mîdotke? Ọkpọfọn mme ete ye eka ẹkpep nditọ mmọ nditre ndidep se ededi oro mmọ ẹkụtde, n̄kukụre koro mme n̄kpọ oro ẹdude, ẹyede, m̀mê koro mmọ ẹnyenede ukeme ndidep. Nte ededi, man utọ item emi enyene ufọn, ana mme ete ye eka ẹnịm eti uwụtn̄kpọ.—Luke 10:38-42.
10 Ndikpep ndidu uwem ye unana edinyene ndusụk n̄kpọ ekeme ndisọn̄ọ ubiere nnyịn ndifara ke idem. Enye n̄ko ekeme nditịp nsịn ke nnyịn ndiwụt esịtekọm mban̄a mme n̄kpọ obụkidem oro nnyịn inyenede, onyụn̄ ekeme ndinam nnyịn inen̄ede ikop mbọm iban̄a mbon oro ẹnanade ndusụk n̄kpọ, idịghe koro mîyomke, edi ke ntak unana. Ke akpanikọ, uke uke usụn̄ udu uwem okpụhọde ye utọ ọsọ ekikere nte “nam se ifọnde nọ idem fo” m̀mê “afo omodot ndinyene se ifọnde ikan.” Ererimbot usuanetop n̄kpọurua esịn udọn̄ ọnọ owo ndiyụhọ mme udọn̄ idemesie ke ebe oro, edi enye anam oro man adia udori. Utọ idaha emi ekeme ndibiọn̄ọ ukeme nnyịn ndifara ke idem. Magazine kiet ke idụt uforo Europe kiet ọkọdọhọ ke ndondo emi ete: “Edieke esiyomde mbon emi ẹdide ata ọkpọikpọi ubuene ẹn̄wana man ẹkan ndiọi udọn̄, n̄wan̄wadise mbon emi ẹdụn̄de ke isọn̄ emi ọfiọrọde mmọn̄eba ye aran ọkwọk ke idụt uforo eyomfịn!”
11. Ntak emi ọfọnde nnyịn ikpep ndidu uwem ye unana edinyene ndusụk n̄kpọ, edi ntak ọsọn̄de ndinam emi?
11 Edieke ọsọn̄de nnyịn ndidiọn̄ọ ukpụhọde oro odude ke ufọt se idọn̄de nnyịn ye se nnyịn inen̄erede iyom, ọkpọfọn nnyịn inam n̄kpọ iban̄a oro man ikûnam n̄kpọ ke usụn̄ oro mîdotke. Ke uwụtn̄kpọ, edieke nnyịn iyomde ndibiọn̄ọ ntụhọ edibiat okụk ntre ntre, nnyịn imekeme ndibiere nditre ndidep n̄kpọ ke isọn, mîdịghe ke ini ikade ndidep n̄kpọ, imekeme ndikama sụk okụk oro ekemde se nnyịn iyomde ndidep. Ti ete ke Paul ọkọdọhọ ke “uten̄e Abasi edi akwa udori, ke ini asan̄ade ye esịt eke okụtde ete se inyenede ekem.” Enye okonyụn̄ ọdọhọ ete: “Nnyịn ikadaha baba n̄kpọ kiet idụk ke ererimbot, idinyụn̄ ikemeke ndida baba n̄kpọ kiet n̄wọrọ. Mmọdo edieke nnyịn inyenede se idiade ye se idade ifụk iferi, nnyịn iyokụt ite oro ekem.” (1 Timothy 6:6-8) Nte nnyịn imokụt ke se inyenede ekem? Ndikpep ndidu mmemmem uwem oro mîwakke n̄kukọhọ, ke ntak ebeubọk ediyụhọ udọn̄ idemowo—ke usụn̄ ekededi—oyom ọkpọsọn̄ ubiere ye mfara ke idem. Nte ededi, emi edi n̄kpọ oro odotde nnyịn ikpep ndinam.
12, 13. (a) Ke mme usụn̄ ewe ke edidụk mme mbono esop Christian abuana ediwụt mfara ke idem? (b) Nso idi mme ikpehe en̄wen oro oyomde nnyịn ikpep ndifara ke idem?
12 Ndidụk mme mbono esop Christian ye n̄kpri ye ikpọ mbono abuana n̄ko ndiwụt akpan mfara ke idem. Ke uwụtn̄kpọ, oyom nnyịn inyene edu emi man ekikere nnyịn okûyo ke ini edinam osụk akade iso. (Mme N̄ke 1:5) Ekeme ndiyom ifara ke idem man ikûtịmede mbon en̄wen ke ndidọn̄ odu ye mme owo oro ẹtiede ẹkpere nnyịn utu ke ndinọ etịn̄ikọ ọyọhọ n̄kpan̄utọn̄. Ndinam mme ukpụhọde ke ndutịm nnyịn man nnyịn ikeme ndisịm ke ini ekeme ndiyom mfara ke idem. Ke adianade do, ekeme ndidi oyoyom ifara ke idem man isio ini inịm nditịm idem nnọ mme mbono esop ndien ekem itiene ibuana ke mmọ.
13 Ndifara ke idem ke n̄kpri n̄kpọ ọyọsọn̄ọ ukeme nnyịn ndinam ntre ke ikpọ n̄kpọ. (Luke 16:10) Ke ntre, ọfọn didie ntem ndinọ idem nnyịn ntụnọ ke ndikot Ikọ Abasi ye mme n̄wed ẹkọn̄ọde ke Bible kpukpru ini, ikpepde mmọ inyụn̄ itiede ikere se ikpepde! Owụt eti ibuot didie ntem ndinọ idem ntụnọ ke se iban̄ade utom, mme nsan̄a, mme ido, ye mme nnam-mmehe ido oro mîdotke, m̀mê ndinọ idem nnyịn ntụnọ ke ndisịn ndinam mme n̄kpọ oro ẹkemede ndibọ nnyịn ọsọn̄urua ini oro ikpadade inam utom Abasi! Ke akpanikọ, ndiyọhọ ye utom Jehovah enen̄ede edi ukpeme ọnọ nnyịn ndibiọn̄ọ mme n̄kpọ oro ẹkemede ndidụri nnyịn n̄kpọn̄ paradise eke spirit oro esop Jehovah eke ofụri ererimbot odude.
Ẹda Mfara ke Idem Ẹkọri Ẹsịm Ọyọhọ Idaha
14. (a) Didie ke nditọwọn̄ ẹkpekpep ndifara ke idem? (b) Mme ufọn ewe ke ẹkeme ndinyene ke ini nditọwọn̄ ẹbakde ẹbọ utọ ukpep oro?
14 Nsekeyen isinyeneke mfara ke idem. Ekpri n̄wed emi nta mme ekpep n̄kpọ mban̄a edu uwem nditọwọn̄ ẹwetde anam an̄wan̄a ete: “Owo idaha-da mfara ke idem imana inyụn̄ inyeneke enye ke mbuari. Nseknditọ m̀mê mmọemi ẹkpepde-kpep isan̄ ẹyom ndausụn̄ ye un̄wam ete ye eka man ẹkpep ndifara ke idem. . . . Ke ini ete ye eka ẹdade usụn̄ ke edinam emi, nditọ ẹyekpep edu emi ke ofụri isua oro mmọ ẹdude ke ufọkn̄wed.” Ndụn̄ọde oro ẹnamde ẹban̄a nditọ isua inan̄ owụt ke mbon oro ẹkekpepde ndinyene mfara ke idem “ẹsikọri ẹwọrọ owo ẹkabade ẹdi mme uyen oro ẹkemede ndikpụhọde nda n̄kekem ye mme idaha, ẹdi se ẹnen̄erede ẹma, ẹnyene uko, ẹnyụn̄ ẹdi se ẹberede edem.” Mbon oro mîkekpepke edu emi “ẹsiwak ndikop ndobo, ẹsọp ndikụt edikpu, ẹnyụn̄ ẹsọn̄ ibuot. Mmọ ẹsikop mmemidem ke ini ẹsobode mfịghe ẹnyụn̄ ẹfep mme n̄kpọ-ata.” Nte an̄wan̄ade, man ọkọri akabade edi akwa owo emi ekemede ndikpụhọde nda n̄kekem ye mme idaha, ana eyenọwọn̄ ekpep ndifara ke idem.
15. Nditre ndifara ke idem owụt nso, ndien emi atuaha ye ewe uduak oro ẹwetde ke Bible?
15 Ukem ntre, edieke nnyịn iyomde ndidi mme Christian emi ẹkọride ẹsịm ọyọhọ idaha, ana nnyịn ikpep ndifara ke idem. Nnyịn nditre ndifara ke idem ediwụt ke nnyịn isụk idi nseknditọ ke n̄kan̄ eke spirit. Bible eteme nnyịn ete: “Ke ekikere ẹtie nte ikpọ owo.” (1 Corinth 14:20) Uduak nnyịn edi ‘ndikabade ndi kiet ke mbuọtidem ye ke ifiọk Eyen Abasi, ikọri ikpon iwọrọ owo, isịm ofụri idaha uyọhọ Christ.’ Ntak-a? “Man nnyịn ikûdi aba nditọwọn̄, emi ukpepn̄kpọ ẹtode ke nsio-nsio edem ẹbara nte ofụm ẹmen ẹtop ẹduọk, ẹda nnyịn ẹdiyo ke n̄kari owo eke ẹfiọkde nditịbi usụn̄ abian̄a.” (Ephesus 4:13, 14) Nte an̄wan̄ade, oyom ikpep ndifara ke idem man ikeme ndisọn̄ idem ke n̄kan̄ eke spirit.
Ndikpep Mfara ke Idem
16. Didie ke Jehovah ọnọ un̄wam?
16 Man ifara ke idem, nnyịn imoyom un̄wam Abasi, ndien un̄wam emi odu. Ikọ Abasi, emi ebietde mfọnmma ukụtiso, owụt nnyịn ebiet oyomde nnyịn inam mme ọkpọkpọ ukpụhọde, ndien enye ọnọ item ke nte ikemede ndinam emi. (James 1:22-25) Ima ima nditọete nnyịn ẹdu ke mben̄eidem ndinọ un̄wam n̄ko. Mbiowo Christian ẹnyene mbufiọk ke ndinọ ọkpọkpọ un̄wam. Jehovah ke idemesie ọyọnọ nnyịn edisana spirit esie ke ntatubọk edieke ibọn̄de akam iben̄e enye. (Luke 11:13; Rome 8:26) Ke ntre, ẹyak nnyịn ke idatesịt ida mme ndutịm emi inam n̄kpọ. Mme ekikere oro ẹnọde ke page 21 ekeme ndin̄wam.
17. Nso nsịnudọn̄ ke Mme N̄ke 24:16 ọnọ nnyịn?
17 Edi n̄kpọ ndọn̄esịt didie ntem ndifiọk nte ke Jehovah enen̄ede okụt ukeme oro nnyịn isịnde ke ini idomode ndinem enye esịt! Emi ekpenyene ndinụk nnyịn ndika iso n̄n̄wana ndinen̄ede mfara ke idem. Inamke n̄kpọ m̀mê adan̄a ediwak ini didie ke nnyịn ikpu ndifara ke idem, inaha nnyịn ikpa mba. “Koro eti owo ọduọde utịm ikatiaba, ndien adaha ke enyọn̄.” (Mme N̄ke 24:16) Kpukpru ini oro nnyịn ikụtde unen ke ndinem Abasi esịt, nnyịn imenyene ntak ndikop inemesịt. Nnyịn n̄ko imenịm ke akpanikọ ke Jehovah enem esịt ye nnyịn. Ntiense kiet ọdọhọ ete ke mbemiso imọ ikayakde idem inọ Jehovah, kpukpru ini oro imọ iketrede ndin̄wọn̄ sika ke urua kiet, imọ ima isida okụk oro mfara ke idem akanamde imọ ibọk inịm, idep eti n̄kpọ inọ idem imọ.
18. (a) Nso ibuana ke en̄wan oro nnyịn in̄wan̄ade ndifara ke idem? (b) Nso nsịnudọn̄ ke Jehovah ọnọ?
18 Ke akande kpukpru, nnyịn ikpenyene nditi nte ke mfara ke idem abuana ekikere ye ntụk. Nnyịn imekeme ndikụt emi ke mme ikọ Jesus emi: “Owo ekededi eke esede n̄wan ke enyịn use ama esịn efịbe ye enye ama ke esịt esie.” (Matthew 5:28; James 1:14, 15) Owo emi ekpepde ndikara ekikere ye ntụk esie eyekeme ndikara ofụri idem esie mmemmem mmemmem. Mmọdo, ẹyak nnyịn isọn̄ọ ibiere ndifep ndinam se idiọkde m̀mê ndikam n̄kekere mban̄a enye. Edieke ndiọi ekikere ẹdemerede, sọsọp sion̄o mmọ fep ke esịt fo. Nnyịn imekeme ndifehe mbọhọ idomo ebe ke ndibọn̄ akam nnyụn̄ n̄wụk enyịn nse Jesus. (1 Timothy 6:11; 2 Timothy 2:22; Mme Hebrew 4:15, 16) Nte nnyịn isịnde ofụri ukeme ndinam emi, nnyịn iyanam item odude ke Psalm 55:22: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.”
Nte Afo Emeti?
• Usụn̄ iba ewe ke ana nnyịn ifara ke idem?
• Nso ke ọwọrọ ‘ndikama idem ke ufat ke kpukpru usụn̄’?
• Nti ekikere ewe ẹban̄ade edikpep ndifara ke idem ke afo ekenen̄ede okụt ke ukpepn̄kpọ nnyịn?
• M̀mọ̀n̄ ke mfara ke idem esitọn̄ọ?
[Mme Mbụme Ukpepn̄kpọ]
[Ekebe/Mme ndise ke page 21]
Nte Ikemede Ndika Iso Mfara ke Idem
• Kpep ndinyene edu emi idem ke n̄kpri n̄kpọ
• Tie kere mme ufọn esie eke idahaemi ye eke ini iso
• Nam mme n̄kpọ oro Abasi esịnde udọn̄ ọnọ utu ke ndinam mme n̄kpọ oro enye asuade
• Sọsọp sion̄o ndiọi ekikere fep ke esịt fo
• Da mme n̄kpọ eke spirit oro ẹbọpde-bọp dọn̄ ke ekikere
• Nyịme un̄wam oro ekemmọ mme Christian oro ẹkọride ẹsịm ọyọhọ idaha ẹnọde
• Fep mme idaha oro ẹtiede idomo idomo
• Bọn̄ akam yom un̄wam Abasi ke mme ini idomo
[Mme ndise ke page 18, 19]
Mfara ke idem onụk nnyịn ndinam se ifọnde