Mme Mbụme Ẹtode Mme Andikot

Anie ke Jehovah eketịn̄ aban̄a nte owo “nnyịn kiet” ke Genesis 3:22?

Etie nte Jehovah eketịn̄ aban̄a idemesie ye ikpọn̄-ikpọn̄ edibon Eyen esie ke ini enye ọkọdọhọde ete: “Owo amakabade edi nte nnyịn kiet, ke edifiọk eti ye idiọk.” (Genesis 3:22) Yak ise ntak oro idọhọde ntre.

Jehovah eketịn̄ mme ikọ emi ke enye ama ekebiere ikpe ọnọ akpa eren ye n̄wan oro. Ndusụk owo ẹdọhọ ke ẹda ikọ oro owo “nnyịn kiet” ẹtịn̄ ikọ kpa nte edidem ekemede ndidọhọ, “nnyịn ikopke inemesịt” ke ini enye etịn̄de aban̄a n̄kpọ oro enye ke idemesie mîmaha. Nte ededi, kaban̄a Genesis 1:26 ye 3:22, eyen ukpepn̄kpọ Bible oro Donald E. Gowan ọdọhọ ete: “N̄kpọ ndomokiet idụhe ke A[kani] T[estament] ndisọn̄ọ nsio nsio ekikere oro ẹnọde mi: edidem ndidọhọ ‘nnyịn’ ke ini enye etịn̄de aban̄a idemesie, owo ndidọhọ, ‘nte nnyịn ima iketetịn̄’ ke ini edide enye ke idemesie eketịn̄, m̀mê ndida ikọ emi n̄wụt mme owo oro ẹnamde Abasi-Ita-ke-Kiet. . . . Ekikere emi ndomokiet isịneke ifiọk inyụn̄ itatke se idude ke Genesis 3:22, emi etịn̄de aban̄a owo ‘nnyịn kiet.’”

Nte ekeme ndidi Jehovah eketịn̄ aban̄a Satan kpa Devil, oro ama ọkọtọtọn̄ọ ndibiere “eti ye idiọk” ke idemesie nnyụn̄ nnam akpa owo iba oro ẹtiene enye ẹnam ntre? Iwụtke ifiọk ndikere ntre. Mi, Jehovah ọkọdọhọ owo “nnyịn kiet.” Satan ikodụhe aba ke otu mme anam-akpanikọ angel Jehovah, ntre owo ikpekekemeke ndisịn enye ke otu mbon oro ẹkedude ke n̄kan̄ Jehovah.

Ndi Abasi eketịn̄ aban̄a mme anam-akpanikọ angel? Nnyịn ikemeke nditịn̄ ye nsọn̄uyo. Nte ededi, mbiet ikọ oro odude ke Genesis 1:26 ye 3:22 esịn un̄wana ke n̄kpọ emi. Ke Genesis 1:26, nnyịn ikot ke Jehovah ọkọdọhọ ete: “Ẹyak nnyịn inam owo isịn ke mbiet nnyịn, etie nte nnyịn.” Enye eketịn̄ mme ikọ emi ọnọ anie? Ke etịn̄de aban̄a edibotn̄kpọ eke spirit oro akakabarede edi mfọnmma owo, kpa Jesus, apostle Paul ọkọdọhọ ete: “Enye edi mbiet Abasi emi enyịn owo mîkwe; Abasi okobon Enye ete edi Akpan, ndien edibot ofụri ererimbot. Koro ke Enye ke ẹkebot kpukpru n̄kpọ ke enyọn̄ ye ke isọn̄.” (Colossae 1:15, 16) Ih, owụt ifiọk ndikere nte ke Jehovah eketịn̄ ikọ eke Genesis 1:26 ye ikpọn̄-ikpọn̄ edibon Eyen esie, kpa “etubom anamutom,” (NW) emi okodude enye ke n̄kan̄ ke ini ẹkebotde enyọn̄ ye isọn̄. (Mme N̄ke 8:22-31) Mbiet ikọ oro odude ke Genesis 3:22 ọnọ ekikere nte ke Jehovah akafiak etịn̄ ikọ emi ye owo oro ekperede enye akan, kpa ikpọn̄-ikpọn̄ edibon Eyen esie.

Ana in̄wan̄-in̄wan̄ nte ke ikpọn̄-ikpọn̄ edibon Eyen Abasi ama ọfiọk “eti ye idiọk.” Ke ntak n̄kpet n̄kpet itie ebuana oro enye ekenyenede ye Jehovah ke anyanini, enye ama enen̄ede ekpep ekikere, mme edumbet, ye mme idaha Ete esie. Ke ọfiọkde ete ke Eyen imọ ama ọdiọn̄ọ ekikere, mme edumbet, ye mme idaha imọ onyụn̄ ọsọn̄ọ etiene mmọ, ekeme ndidi Jehovah ama ọnọ enye ifụre ndise mban̄a mme n̄kpọ ye unana enye ndibụp Ete esie kpukpru n̄kpọ. Ntre, ye kpukpru emi, Eyen ama ekeme, ẹma ẹnyụn̄ ẹnọ enye odudu, ndibiere se idide eti ye idiọk. Nte ededi, ke mîbietke Satan, Adam, ye Eve, enye ikọtọn̄ọke idaha oro atuahade ye eke Jehovah.