Kpep Ndinyene Edu Edinọ Enọ
Kpep Ndinyene Edu Edinọ Enọ
OWO ndomokiet idahada edu edinọ enọ imana. Ndammana udọn̄ nsekeyen esidi ndiyụhọ ọkpọkpọ udọn̄ esie, ikereke iban̄a udọn̄ mbon en̄wen ọkpọkọm eke mme andise enye enyịn. Nte ededi, nte ini akade eyen oro esidi edifiọk ke idịghe imọ ikpọn̄ inyene udọn̄. Ana enye ekere aban̄a mbon en̄wen inyụn̄ ikpepke ndibọbọ kpọt, edi ana ekpep ndinọnọ n̄ko. Oyom ẹkpekpep edu edinọ enọ.
Idịghe kpukpru mbon oro ẹnọde enọ—ọkpọkọm ke ntatubọk—ẹnyene edu edinọ enọ. Ndusụk owo ẹkeme ndinọ enọ ẹda ẹnam ufọn ke ntak ufọn idemmọ. Mbon en̄wen ẹkeme ndinọ enọ man mme owo ẹtoro mmọ. Nte ededi, enọ oro ata mme Christian ẹnọde okpụhọde ye oro. Do, orụk enọ ewe ke Ikọ Abasi esịn udọn̄ ọnọ? Edineme ibio ibio mban̄a enọ oro mme Christian akpa isua ikie ẹkenọde ọyọbọrọ mbụme emi.
Mme Uwụtn̄kpọ Edinọ Enọ Christian
Nte ẹtịn̄de ke Bible, edinọ enọ Christian ke ofụri ofụri ekesidi ‘edifọn ido ye Mme Hebrew 13:16; Rome 15:26) Ikanaha ẹnyenyịk owo. Apostle Paul ekewet ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) N̄ko, uduak edinọ enọ ikedịghe man mbon efen ẹkụt. Ananias ye Sapphira ẹma ẹnam utọ mbubịk oro ẹnyụn̄ ẹbọ idiọk utịp.—Utom 5:1-10.
mme owo’ oro ẹkenen̄erede ẹdu ke unana. (Ama enen̄ede oyom ẹnọ enọ ke ini ediwak mme Jew ye mme okpono Abasi ke ido mme Jew oro ẹketode anyan ebiet ẹkedide ẹdiboho ke Jerusalem kaban̄a usọrọ Pentecost eke 33 E.N. Do ke ‘Edisana Spirit ọkọyọhọ mme anditiene Jesus ke idem, mmọ ẹnyụn̄ ẹtọn̄ọ ndisem nsio-nsio usem.’ Akwa otuowo ẹma ẹbono ẹkanade mmọ ẹkop akama-nduaidem utịn̄ikọ Peter aban̄ade Jesus Christ. Ekem mme owo oro ẹma ẹkụt nte Peter ye John ẹnamde mbụn̄ọ asan̄a ke inuaotop temple, ẹnyụn̄ ẹkop nte Peter afiakde etịn̄ aban̄a Jesus ye ufọn edikabade esịt. Ediwak tọsịn owo ẹma ẹkabade esịt ẹnyụn̄ ẹna baptism nte mme anditiene Christ.—Utom ibuot 2 ye 3.
Mbufa mme andikabade esịt oro ẹma ẹyom ndika iso ndu ke Jerusalem man ẹbọ item efen efen ẹto mme apostle Jesus. Edi mme apostle ẹkpekeme didie ndinọ se kpukpru isenowo oro ẹkeyomde? Mbụk Bible oro asian nnyịn ete: “Mmọ emi ẹnyenede in̄wan̄ m̀mê ufọk ẹnyam mmọ, ẹnyụn̄ ẹda ẹkọm-urua ẹdi ẹdinịm mme apostle ke ukot: ndien ẹdeme ẹnọ owo kiet kiet nte unana esie edide.” (Utom 4:33-35) Ke akpanikọ, obufa esop oro ẹketọn̄ọde ke Jerusalem ama enyene edu edinọ enọ!
Ke ukperedem, mme esop efen ẹma ẹwụt ukem edu edinọ enọ oro. Ke uwụtn̄kpọ, okposụkedi ẹkedide ubuene, mme Christian ke Macedonia ẹma ẹnam ẹbe nte ukeme mmọ edide ke nditịp etịbe nnọ nditọete mmọ oro ẹkedude ke unana ke Judea. (Rome 15:26; 2 Corinth 8:1-7) Esop Philippi ama an̄wam utom ukwọrọikọ Paul ke n̄wọrọnda usụn̄. (Philippi 4:15, 16) Esop Jerusalem ama esideme udia ke usen ke usen ọnọ mme ebeakpa oro ẹkedude ke unana, ndien mme apostle ẹma ẹmek iren itiaba oro ẹdotde man ẹkụt ẹte ke owo ifụmike mme ebeakpa oro ẹdotde.—Utom 6:1-6.
Mme akpa esop Christian ẹma ẹsisọp ndinọ un̄wam idem ke ini ẹfiọkde ke n̄kpọ ọyọsọn̄ ke ini iso. Ke uwụtn̄kpọ, ke ini prọfet Agabus ekebemde iso etịn̄ nte ke akamba akan̄ ọmọn̄ odu, mme mbet ke esop Syria eke Antioch ẹma “ẹduak nditịp n̄kpọ, adan̄a nte ukeme mmọ kiet kiet ẹdide, nnọ ẹsọk nditọete emi ẹdụn̄de ke Judæa.” (Utom 11:28, 29) Nso eti edu ke mmọ ẹkewụt ntem ke ndibem iso nda n̄kụt se mbon efen ẹdiyomde!
Nso ikonụk akpa mme Christian oro nditat ubọk nnyụn̄ nnyene ima ntre? Ke nditịm ntịn̄, ẹsisan̄a didie ẹnyene edu edinọ enọ? Nnyịn imekeme ndikpep ekese ke ndikere mban̄a uwụtn̄kpọ Edidem David.
Nte David Akatatde Ubọk An̄wam Utuakibuot Akpanikọ
Ke se ikperede ndisịm isua 500, ekebe ediomi—edisana ekebe oro akadade aban̄a edidu Jehovah—ikenyeneke ata ufọk oro ẹnịmde. Ẹkesinịm enye ke ufọkọfọn̄, m̀mê ataya, oro ẹkesimende-men ẹsan̄a ke itie ke itie ke ini Israel okoyode ke wilderness tutu edisịm Isọn̄ Un̄wọn̄ọ. Edidem David ama enen̄ede oyom ndimen ekebe oro nsio ke ufọkọfọn̄ oro ẹkesinịmde enye nnyụn̄ mbọp ufọk oro odotde nnọ Jehovah oro ẹdinịmde edisana ekebe oro. Ke etịn̄de ikọ ye prọfet Nathan, David ama ọdọhọ ete: “Sese, ami ntie ke ufọk cedar, ndien ekebe ediomi Jehovah etie ke idak ikpehe.”—1 Chronicles 17:1.
Nte ededi, David ekedi owoekọn̄. Ntre Jehovah ama ebiere ete ke Solomon eyen esie edibọp temple oro ẹdinịmde ekebe ediomi oro, ke ini emem emem ukara esie. (1 Chronicles 22:7-10) Edi, emi ikọbiọn̄ọke edu edinọ enọ oro David ekenyenede. Ke etịmde ediwak mbonutom, enye ama ọtọn̄ọ ndinọ mme n̄kpoduoho oro ẹdidade ẹbọp temple. Ekem enye ama ọdọhọ Solomon ete: “Mma mbon tọsịn talent gold ke itie ikie, nnọ ufọk Jehovah, ye tọsịn talent silver ke itie tọsịn; edi idomoke okpoho ye ukwak: koro mmọ ẹwakde eti-eti; mma nnyụn̄ mbon eto ye itiat.” (1 Chronicles 22:14) Sia mîyụhọke ye oro, David ama etịp ọkpọkpọ gold ye silver ẹwakde ẹbe $1,200,000,000 ke ekọmurua eyomfịn. Akan oro, mbọn̄ ẹma ẹnyụn̄ ẹtat ubọk ẹtịp etịbe n̄ko. (1 Chronicles 29:3-9) Ke akpanikọ, David ama enen̄ede enyene edu edinọ enọ!
Nso ikonụk David nditat ubọk ntre? Enye ama ọfiọk ete ke kpukpru se imọ ikenyenede inyụn̄ inamde ẹkedi utịp edidiọn̄ Jehovah. Enye ama etịn̄ ke akam ete: “O Jehovah Abasi nnyịn, kpukpru ekese n̄kpọ emi nnyịn itịmde ndibọp ufọk nnọ fi ye edisana enyịn̄ fo, ẹto fi ke ubọk, kpukpru ẹnyụn̄ ẹdi okwommọ. Mmonyụn̄ mfiọk, O Abasi, nte afo odomode esịt, onyụn̄ amade mmọ eke ẹnende. Ami n̄katat ubọk mi nnọ kpukpru n̄kpọ emi ke 1 Chronicles 29:16, 17) David ama ama itie ebuana esie ye Jehovah. Enye ama ọfiọk ke oyom inam n̄kpọ Abasi ke “ofụri esịt, ye ke ima ukpọn̄,” ndien enye ama adat esịt ndinam ntre. (1 Chronicles 28:9) Kpa mme edu emi ẹkenụk akpa mme Christian ndinyene edu edinọ enọ.
edinen esịt: ndien ke emi ke ndat esịt ndikụt ikọt fo emi ẹdude mi, nte ẹtatde ubọk ẹnọ fi.” (Jehovah—Akakan Andinọ
Jehovah enịm mfọnn̄kan uwụtn̄kpọ edinọ enọ. Enye enen̄ede enyene ima onyụn̄ ekere aban̄a tutu ‘anam utịn Esie asiaha ọnọ mme idiọk owo ye nti owo, onyụn̄ anam edịm edep ọnọ ndinen owo ye mme anam ukwan̄-ido.’ (Matthew 5:45) Enye ọnọ kpukpru owo “uwem, ye ibifịk, ye kpukpru n̄kpọ.” (Utom 17:25) Ke akpanikọ, nte mbet oro James ọkọdọhọde, “kpukpru eti edinọ ye kpukpru enọ eke ẹfọnde ẹma ẹto ke enyọn̄, ẹto ke ubọk Ete mme un̄wana ẹsụhọde ẹdi.”—James 1:17.
Akakan enọ oro Jehovah ọnọde nnyịn edi enye ndisio ‘ikpọn̄-ikpọn̄ Eyen emi Enye obonde nnọ, man owo ekededi eke ọbuọtde John 3:16) Idụhe owo oro ekemede ndidọhọ ke imọ imodot se ẹnọde utọ enọ oro, “koro kpukpru owo ẹma ẹnam idiọk-n̄kpọ, ẹnyụn̄ ẹtaba ubọn̄ Abasi.” (Rome 3:23, 24; 1 John 4:9, 10) Ufak Christ edi ntak ye usụn̄ emi Abasi ọnọde “akwa mfọn,” oro edi, ‘enọ Abasi emi ayan̄ade edeme.’ (2 Corinth 9:14, 15) Ke ndiwụt esịtekọm mban̄a enọ Abasi, Paul ama anam ‘edikwọrọ gospel mfọn Abasi’ edi akpan utom esie ke uwem. (Utom 20:24) Enye ama ọfiọk ke edi uduak Abasi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.”—1 Timothy 2:4.
idem ye Enye okûtak, edi enyene nsinsi uwem.’ (Mfịn, ẹnam emi ebe ke akwa utom edikwọrọ ye edinọ ukpep oro atarade idahaemi esịm isọn̄ 234 ke ofụri ererimbot. Jesus ama ebem iso etịn̄ aban̄a n̄kọri emi ke ini ọkọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ih, “ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Isua oko se iwakde ibe mme anditan̄a eti mbụk miliọn itiokiet ẹma ẹsịn hour 1,202,381,302 ke utom emi ẹnyụn̄ ẹnịm se iwakde ibe ukpepn̄kpọ Bible 5,300,000. Unọ ukpep emi enen̄ede edi akpan n̄kpọ sia uwem ẹdude ke itiendịk.—Rome 10:13-15; 1 Corinth 1:21.
Ẹmịn̄ ediwak miliọn n̄wed—esịnede Bible, ikpọ n̄wed, ye ndiye uduot n̄kpri n̄wed—kpukpru isua man ẹn̄wam mbon oro ẹkopde biọn̄ akpanikọ Bible. Adianade do, ẹmịn̄ se iwakde ibe idem magazine Enyọn̄-Ukpeme ye Awake! biliọn kiet. Nte mme owo ẹnamde n̄kpọ ẹban̄a eti mbụk, ẹbọp mme Ufọkmbono Obio Ubọn̄ ye mme Ufọk Mbono Mme Ntiense Jehovah efen efen, emi ẹdide iwụk ebiet unọ ukpep Bible. Ẹdiomi mme mbono circuit ye mme usen akpan mbono, ọkọrọ ye mme mbono district ke isua kiet kiet. Edinọ mme isụn̄utom, mme esenyịn oro ẹsan̄ade-san̄a, mbiowo, ye mme asan̄autom unamutom ukpep edi n̄ko edinam emi akade-ka iso. Nnyịn imọkọm Jehovah ke ndinam kpukpru ndutịm emi ẹdu ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Nnyịn imenen̄ede iyom ndiwụt esịtekọm nnọ Enye!
Ndiwụt Esịtekọm nnọ Jehovah
Kpa nte ekedide ye edibọp temple ye edise mban̄a mme udọn̄ mme akpa esop Christian, ẹda etịbe imaesịt ẹse ẹban̄a kpukpru n̄kpọ emi. Nte ededi, ana ẹti nte ke owo ndomokiet ikemeke ndifori Jehovah, Andinyene kpukpru n̄kpọ. (1 Chronicles 29:14; Haggai 2:8) Do, etịbe edi uyarade ima oro imade Jehovah ye udọn̄ nnyịn ndinam utuakibuot akpanikọ aka iso. Paul ọkọdọhọ ke ediwụt ntatubọk ntem “esịn ekọm ọwọrọ ekesịm Abasi.” (2 Corinth 9:8-13) Jehovah esịn udọn̄ ọnọ utọ enọ oro koro emi owụtde nte ke nnyịn imenyene eti edu inyụn̄ ima enye. Jehovah ọyọdiọn̄ mbon oro ẹtatde ubọk ẹnyụn̄ ẹberide edem ke enye onyụn̄ ofori mmọ ke n̄kan̄ eke spirit. (Deuteronomy 11:13-15; Mme N̄ke 3:9, 10; 11:25) Jesus ama ọn̄wọn̄ọ ọnọ nnyịn ete ke emi oyosụn̄ọ ke inemesịt, ọdọhọde ete: “Inemesịt okpon ke ndinọnọ akan ke ndibọbọ.”—Utom 20:35, NW.
Mme Christian oro ẹnyenede edu edinọ enọ isibetke tutu ini owo odude ke mbaba. Utu ke oro, mmọ ẹsiyoyom mme ifet ‘ndifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.’ (Galatia 6:10) Ke esịnde udọn̄ ọnọ edinyene edu ntatubọk ebietde eke Abasi, Paul ekewet ete: “Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” (Mme Hebrew 13:16) Ndida se nnyịn inyenede—ini, odudu, ye okụk—n̄n̄wam mbon efen nnyụn̄ nnam edisana utuakibuot aka iso enen̄ede enem Jehovah Abasi esịt. Ke akpanikọ, enye ama mbon oro ẹnyenede edu edinọ enọ.
[Ekebe/Ndise ke page 28, 29]
Mme Usụn̄ Emi Ndusụk Owo Ẹmekde Ndinọ Enọ
MME ETỊBE KABAN̄A UTOM OFỤRI ERERIMBOT
Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ oro: “Contributions for the Worldwide Work—Matthew 24:14.”
Ke ọfiọn̄ kiet kiet, mme esop ẹsinọ okụk emi aka n̄kọk itieutom Mme Ntiense Jehovah emi esede aban̄a idụt mmọ. Ẹkeme ndinọ okụk imaesịt nnennen ẹsọk Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, m̀mê n̄kọk itieutom oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.
NDUTỊM ẸNAMDE ẸNỌ SE ẸNỊMDE KE UBIỌN̄
Ẹkeme ndinọ okụk ebe ke ndutịm oro ẹnamde san̄asan̄a emi edide, edieke andinọ oyomde okụk oro, ẹkeme ndifiak nnọ ẹsọk enye. Kaban̄a ntọt efen efen, mbọk nyene nneme ye Office of the Secretary and Treasurer ke adres ẹwụtde ke enyọn̄ emi.
ENỌ EMI ẸDIOMIDE-DIOMI
Ke adianade ye edinọ okụk nte enọ ye mme etịbe okụk oro ẹsịnde ke ubiọn̄, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:
Insurance: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom.
Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower Society, mîdịghe ẹnam ẹkpe enye ẹnọ Watch Tower Society ke ini andinyene akpade, nte ekemde ye ndutịm itie unịm okụk n̄kann̄kụk.
Inyene ye Mbubehe: Ẹkeme ndinọ Watch Tower Society inyene ye mbubehe nte ata enọ.
Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide ke edinọ nte ata enọ m̀mê, edieke edide ufọk emi owo odụn̄de, ke ndimụm isọn̄ ye ufọk oro n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Tọt ọfis n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ N̄ka.
Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower Society ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower Society nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinam ẹsụhọde urua tax andinọ.
Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm. Man ẹn̄wam mme owo oro ẹnyenede udọn̄ ndin̄wam utom ofụri ererimbot eke Mme Ntiense Jehovah ebe ke ndusụk orụk enọ emi ẹdiomide-diomi, ẹtịm ediye uduot ekpri n̄wed ẹkotde Planned Giving to Benefit Kingdom Service Worldwide, ke Ikọmbakara ye ke usem Spanish. Ẹkewet ediye uduot ekpri n̄wed emi ke ntak ediwak mbụme oro ẹkebụpde ẹban̄a mme enọ, unen n̄kpọ-akpa, ye ebuọt. Enye n̄ko esịne mme ntọt efen efen ẹban̄ade isọn̄ ye ufọk, okụk, ye ndutịm tax. Enye an̄wam mme owo ẹfiọk nsio nsio usụn̄ oro ẹkemede ndinọ enọ idahaemi m̀mê ndikpọn̄ n̄kpọ-akpa nnọ ke ini owo akpade. Ke ẹma ẹkekot ediye uduot ekpri n̄wed emi ẹnyụn̄ ẹnyene nneme ye mme ekpeibet mmọ ye Charitable Planning Office (Itieutom Esede Aban̄a Enọ Emi Ẹdiomide-Diomi) , ediwak owo ẹma ẹkeme ndin̄wam Mme Ntiense Jehovah ke ofụri ererimbot ndien ke ukem ini oro, mmọ ndinam ntre enen̄ede osụhọde urua tax oro mmọ ẹkpede. Ẹkeme ndinyene ediye uduot ekpri n̄wed emi ke ndiben̄e idem esie kiet nnennen nnennen nto Itieutom Esede Aban̄a Enọ Emi Ẹdiomide-Diomi.
Kaban̄a ntọt efen efen, afo emekeme ndinyene nneme ye Itieutom Esede Aban̄a Enọ Emi Ẹdiomide-Diomi, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi m̀mê ke ọfis Mme Ntiense Jehovah emi esede aban̄a idụt mbufo.
Charitable Planning Office
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Telephone: (845) 306-0707
[Ndise ke page 26]
Nso ikonụk akpa mme Christian nditat ubọk?