Oyom Mbuọtidem man Ẹkop Inem Uwem

ISINEMKE owo ke idem ke ini udia abiakde enye idịbi. Oyom owo emi udia esibiakde enye idịbi enen̄ede ekpeme se enye adiade. Edi owo ikemeke nditre udia ofụri ofụri sia udia esibiakde enye idịbi. Ndinam ntre akpada mme mfịna efen efen edi utu ke ndikọkọk. Edieke owo mîdiaha udia, enye ikemeke ndidu uwem mbịghi.

Ke ukem usụn̄ oro, esibiak owo ke ini ẹbiatde mbuọtidem esie. Owo ndibiat mbuọtidem nnyịn ndien ndien ekeme ndinam inen̄ede ikere iban̄a mbon oro imekde nte nsan̄a. Edi, ndidianade ofụri ofụri n̄kpọn̄ mme owo mbak ẹdibiat mbuọtidem nnyịn idịghe usọbọ. Ntak mîdịghe? Koro nditre ndibuọt idem ye mbon efen iyakke nnyịn ikop inemesịt. Man idu uwem oro ọnọde uyụhọ, nnyịn imoyom ebuana oro ọkọn̄ọde ke mbuọtidem edem mbiba.

N̄wed oro Jugend 2002 ọdọhọ ete: “Mbuọtidem edi kiet ke otu akpan n̄kpọ oro ẹyomde kaban̄a edinam nnyịn eke usen ke usen ye mbon en̄wen.” N̄wedmbụk n̄kpọntịbe oro Neue Zürcher Zeitung ọtọt ete: “Ọdọn̄ kpukpru owo ndibuọt idem ke owo. Mbuọtidem ofori uwem owo” tutu esịm udomo oro anamde enye “edi akpan n̄kpọ emi ẹyomde man ẹka iso ẹdu uwem.” Ke akpanikọ, n̄wedmbụk n̄kpọntịbe emi aka iso ete ke mbuọtidem mîdụhe, “owo ikemeke ndidu uwem nte ọfọnde.”

Sia inyenede akpan ntak ndibuọt idem ke owo, anie ke nnyịn ikeme ndibuọt idem emi mîdikpụhu nnyịn?

Buọt Idem Fo ye Jehovah ke Ofụri Esịt Fo

Bible ọdọhọ nnyịn ete: “Buọt idem fo ye Jehovah ke ofụri esịt fo.” (Mme N̄ke 3:5) Ke akpanikọ, Ikọ Abasi esịn udọn̄ ọnọ nnyịn ediwak ini ete ibuọt idem ke Andibot nnyịn, Jehovah Abasi.

Ntak emi ikemede ndibuọt idem ke Abasi? Akpa, koro Jehovah Abasi edide edisana. Prọfet Isaiah ekewet ete: “Edisana, edisana, edisana, Jehovah.” (Isaiah 6:3) Nte ikọ oro edisana idemekede fi udọn̄? Ke akpanikọ, enye ekpenyene ndidemede fi udọn̄ koro edisana idaha Jehovah ọwọrọ ke enye edi ediden̄i, inyeneke idiọkn̄kpọ ndomokiet, onyụn̄ edi se ẹbuọtde idem ọyọhọ ọyọhọ. Enye ikemeke ndidia n̄wo m̀mê ndida odudu  esie nnam n̄kpọ ke idiọk usụn̄, inyụn̄ ikemeke ndibiat mbuọtidem oro inyenede ke enye.

Akan oro, nnyịn imekeme ndibuọt idem ke Abasi ke ntak ukeme ye udọn̄ esie ndin̄wam mbon oro ẹnamde n̄kpọ esie. Ke uwụtn̄kpọ, akakan odudu esie anam enye anam n̄kpọ. Mfọnmma unenikpe ye ọniọn̄ esie ẹnọ ndausụn̄ ke usụn̄ oro enye anamde n̄kpọ. Ndien anana-mbiet ima esie onụk enye ndinam n̄kpọ. Apostle John ekewet ete: “Abasi edi ima.” (1 John 4:8) Ima esikara kpukpru n̄kpọ oro Abasi anamde. Edisana idaha Jehovah ye mme n̄wọrọnda edu esie eken ẹnam enye edi ata eti Ete oro nnyịn ikemede ndibuọt idem ọyọhọ ọyọhọ. Idụhe n̄kpọ m̀mê owo ndomokiet oro nnyịn ikemede ndibuọt idem nte Jehovah.

Buọt Idem ke Jehovah Nyụn̄ Nem Esịt

Eti ntak efen ndibuọt idem ke Jehovah edi nte ke enye ọfiọk nnyịn ọfọn akan nte owo efen ekededi ọfiọkde. Andibot ọfiọk ke owo kiet kiet enyene akpan udọn̄ aban̄a edinyene itie ebuana ye imọ oro enyenede ifụre, ebịghide, ẹnyụn̄ ẹkemede ndibuọt idem. Mbon oro ẹnyenede utọ itie ebuana oro ẹsinen̄ede ẹnyene ifụre. Edidem David ọkọdọhọ ete: “[“Inemesịt edi eke,” NW] owo eke enịmde Jehovah ke ibetesịt esie.” (Psalm 40:4) Ediwak miliọn owo mfịn ẹtịn̄ ukem ikọ David oro.

Kere ban̄a ndusụk uwụtn̄kpọ emi. Doris ama odụn̄ ke Dominican Republic, Germany, Greece, ye United States. Enye ọdọhọ ete: “Enem mi esịt etieti ndibuọt idem ke Jehovah. Enye ọfiọk ndise mban̄a mi ke n̄kan̄ eke obụk, eke spirit, ye eke ntụk. Enye edi ata akpan ufan oro owo ekemede ndinyene.” Ekpeibet kiet emi ekerede Wolfgang anam an̄wan̄a ete: “Edi inem inem n̄kpọ ndikeme ndiberi edem ke owo oro enen̄erede enyene udọn̄ aban̄a mfọnọn̄kpọ fo, owo emi ekemede—edinyụn̄ enyịmede—ndinam mfọnn̄kan n̄kpọ nnọ fi!” Ham oro akamanade ke Asia edi odụn̄de ke Europe idahaemi, ọdọhọ ete: “Mmenịm nte ke kpukpru n̄kpọ ẹsịne Jehovah ke ubọk, enye inyụn̄ inamke ndudue, ntre mmenem esịt ndiberi edem ke enye.”

Nte ededi, oyom nnyịn owo kiet kiet ibuọt idem ke mme owo n̄ko, idịghe ke Andibot ikpọn̄. Ntem, Jehovah, kpa ufan emi enyenede ọniọn̄ ye mbufiọk, ọnọ nnyịn item aban̄a utọ owo oro nnyịn ikpenyenede ndibuọt idem. Ke itịmde ikot Bible, nnyịn imekeme ndikụt item oro enye ọnọde ke n̄kpọ emi.

Mme Owo Oro Nnyịn Ikemede Ndibuọt Idem

Andiwet psalm ekewet ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem.” (Psalm 146:3) Ikọ eke odudu spirit emi an̄wam nnyịn ndifiọk nte ke odu ediwak owo emi mîdotke nnyịn ibuọt idem. Ọkpọkọm mmọ ẹdi “mbọn̄” ererimbot emi, oro ẹnen̄erede ẹkpono, utọ nte mbon oro ẹdide nta ke akpan ikpehe ifiọk m̀mê edinam, emi inamke mmọ ẹdot nnyịn ibuọt idem ke mmọ. Ndausụn̄ mmọ esiwak nditụn owo usụn̄, ndien ndibuọt idem ke utọ “mbọn̄” oro ekeme ndisọsọp n̄kpu nnyịn.

 Nte ededi, emi ikpanamke nnyịn iyịk kpukpru owo. Edi, oyom nnyịn inen̄ede isasat mbon oro nnyịn ibuọtde idem. Nso ke nnyịn ikpada ibiere emi? Uwụtn̄kpọ kiet ke idụt Israel eset ekeme ndin̄wam nnyịn. Ke ini okoyomde ẹmek mme owo oro ẹdibiomde ndodobi mbiom ke Israel, ẹma ẹteme Moses ẹte ‘emek mbon ikike ke otu kpukpru owo, owo eke ẹbakde Abasi, mbon akpanikọ eke ẹsuade n̄wo.’ (Exodus 18:21) Nso ke nnyịn ikeme ndikpep nto emi?

Mme owo emi ẹkedi iren oro ẹkewụtde mme akpan edu Abasi mbemiso ẹnọde mmọ mme ifetutom. Mmọ ẹma ẹbebem iso ẹwụt ke mmimọ imenyene mbak Abasi; mmọ ẹma ẹnen̄ede ẹten̄e Andibot inyụn̄ iyomke ndiyat enye esịt. Kpukpru owo ẹma ẹkụt ke iren emi ẹma ẹsịn ofụri ukeme nditiene mme idaha Abasi. Mmọ ẹma ẹsua n̄wo, emi okowụtde ke mmọ ẹma ẹnyene ukeme ke n̄kan̄ ido uwem oro mîkayakke mmọ ẹkama odudu ke idiọk usụn̄. Mmọ ikabiatke mbuọtidem man ẹyom ufọn idemmọ, eke mme iman, m̀mê eke mme ufan mmọ.

Nte ikpowụtke eti ibuot ndida ukem n̄kpọ oro mbiere mfịn ke ini imekde mbon oro nnyịn ibuọtde idem? Nte nnyịn imọfiọk mbon oro edu uwem mmọ owụtde ke mmọ ẹnyene mbak Abasi? Ndi mmọ ẹbiere ndimụm idaha ido uwem esie n̄kama? Ndi mmọ ẹnyene iwụk ke ndisịn ndinam se idiọkde? Ndi mmọ ẹnam akpanikọ, inyụn̄ idaha ifet oro ẹbererede iyom ufọn idemmọ? Ke akpanikọ, iren ye iban oro ẹwụtde mme utọ edu emi ẹdot se ikpọbuọtde idem.

Kûyak Edikpu eke Ini ke Ini Anam Idem Emem Fi

Ke ini iyomde ndibiere owo oro ikemede ndibuọt idem, ana inyene ime, sia esidade ini ndinyene mbuọtidem. Edinam oro owụtde eti ibuot edi nditọn̄ọ sụn̄sụn̄ ndibuọt idem ke owo. Didie? Ọfọn, nnyịn imekeme ndida ndusụk ini ndụn̄ọde edu uwem owo, isede nte enye anamde n̄kpọ ke ndusụk idaha. Nte ẹkeme ndibuọt idem ye enye ke n̄kpri n̄kpọ? Ke uwụtn̄kpọ, ndi enye esikpọn̄ se enye ọkọbuọtde ọnọ nte ọkọn̄wọn̄ọde, ndien nte enye esika n̄kpọ ke ini? Edieke edide ntre, do nnyịn imekeme ndikere ndibuọt idem ye enye ke ikpọ n̄kpọ. Emi odu ke n̄kemuyo ye edumbet emi: “Owo eke anamde akpanikọ ke ata ekpri n̄kpọ onyụn̄ anam akpanikọ ke akamba n̄kpọ.” (Luke 16:10) Ndisasat owo nnyụn̄ nnyene ime ayan̄wam nnyịn ifep ikpọ edikpu.

Nso ndien edieke owo okpude nnyịn? Nditọ ukpepn̄kpọ Bible ẹyeti ẹte ke okoneyo oro ẹkemụmde Jesus Christ, mme apostle esie ẹma ẹnen̄ede ẹkpu enye. Judas Iscariot ama atap enye, mbon eken ẹnyụn̄ ẹfen̄e ke ntak ndịk. Peter ama akam akan̄ Jesus utịm ikata. Edi Jesus ama ọfiọk ke Judas kpọt okokokoi okpu imọ. Ndikụt edikpu ke utọ akpan ini oro ikakpanke Jesus ndifiak nsọn̄ọ mbuọtidem oro enye ekenyenede ke idem apostle esie 11 oro ẹkesụhọde ke urua ifan̄ kpọt ke ukperedem. (Matthew 26:45-47, 56, 69-75; 28:16-20) Kpasụk ntre, edieke owo oro nnyịn ibuọtde idem okpude nnyịn, nnyịn iyanam ọfọn ndikere m̀mê se nnyịn idade nte edikpu mi edi edu owo oro m̀mê edi mmeme ikpọkidem eke ibio ini.

Nte Ami Mmedi Se Ẹbuọtde Idem?

Ọfọn owo emi ebierede ndisasat mbon oro enye ọbuọtde idem obụp idemesie: ‘Nte ami mmedi se ẹbuọtde idem? Nso idaha oro owụtde eti ibuot kaban̄a edidi se ẹbuọtde idem ke n̄kpoyom nto idemmi ye mbon en̄wen?’

Ke akpanikọ, owo emi ẹkemede ndibuọt idem esitịn̄ akpanikọ kpukpru ini. (Ephesus 4:25) Enye ikpụhọkede ikọ esie man enem mbon oro ẹkpan̄de utọn̄ ẹnọ enye esịt, ntem anamde emi ke ufọn idemesie. Ndien edieke enye enyịmede ndinam n̄kpọ, owo emi ẹbuọtde idem mi ayanam se enye ekemede man anam se enye ọkọdọhọde. (Matthew 5:37) Edieke owo etịn̄de ikọ idịbi ọnọ enye, owo oro ẹbuọtde idem mi iyarakede ikọ idịbi oro inyụn̄ iken̄ke inua. Owo oro ẹbuọtde idem esinam akpanikọ ọnọ nsan̄a ndọ esie. Enye isisehe ndise idan̄, iyakke udọn̄ obụkidem akara ekikere esie, inyụn̄ ibreke mfụm mfụm ima. (Matthew 5:27, 28) Owo oro nnyịn ikemede ndibuọt idem anam utom ọkpọsọn̄ man enyene se adade ese aban̄a idemesie ye ubon esie inyụn̄ idaha mbon en̄wen  inam mbubịne man enyene okụk usọp usọp. (1 Timothy 5:8) Ndikere mban̄a nti idaha N̄wed Abasi emi ayan̄wam nnyịn ndifiọk owo oro nnyịn ikemede ndibuọt idem. Akan oro, nditiene ukem idaha edu uwem emi ayan̄wam nnyịn owo kiet kiet ndidi se mbon en̄wen ẹbuọtde idem.

Ekpedi inem inem n̄kpọ ndidụn̄ ke ererimbot emi ẹbuọtde idem ke kpukpru owo ye ke ebiet emi edikpu oro otode edibiat mbuọtidem oro inyenede ke idem owo mîdụhe! Nte oro edi ikpîkpu ndap? Idịghe ikpîkpu ndap inọ mbon oro ẹdade mme un̄wọn̄ọ Bible ke akpan n̄kpọ, koro Ikọ Abasi ebem iso etịn̄ nte ke ediye “obufa isọn̄” eyedi, emi abian̄a, nsu, utụk, mfụhọ, udọn̄ọ, ye idem n̄kpa mîdidụhe aba! (2 Peter 3:13; Psalm 37:11, 29; Ediyarade 21:3-5) Nte ikpodotke ndiyom ndifiọk n̄kpọ efen efen mban̄a idotenyịn emi? Mme Ntiense Jehovah ẹyedara ndinọ fi mme ntọt efen efen mban̄a n̄kpọ emi ye mme akpan ibuotikọ efen.

[Ndise ke page 4]

Nditre ndibuọt idem ye mbon efen iyakke nnyịn ikop inemesịt

[Ndise ke page 5]

Enen̄ede odot nnyịn ibuọt idem ye Jehovah

[Mme ndise ke page 7]

Kpukpru nnyịn imoyom ebuana oro ọkọn̄ọde ke mbuọtidem edem mbiba