‘Ẹtịm Ẹsiak Ikọ Abasi’

“Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.”—2 TIMOTHY 2:15.

1, 2. (a) Ntak emi mbonutom ẹyomde n̄kpọutom? (b) Mme Christian ẹbuana ke ewe utom, ndien didie ke mmọ ẹwụt ke mmimọ imebem iso iyom Obio Ubọn̄?

 MBONUTOM ẹyom mme n̄kpọutom ẹdin̄wamde mmọ ndinam utom mmọ. Nte ededi, ndikam nnyene n̄kpọutom ekededi ikemke. Anamutom oyom nnennen n̄kpọutom, ndien enye enyene ndida n̄kpọutom emi nnam n̄kpọ ke usụn̄ oro ọfọnde. Ke uwụtn̄kpọ, edieke oyomde ndikọn̄ obukpọk iba ndian kiet ke ini ọbọpde efe, oyoyom se ikande ukọn̄n̄kpọ ye okpukwak. Oyoyom ọfiọk ndikọn̄ okpukwak nsịn ke eto ye unana okpukwak oro ndin̄wịne. Eyenen̄ede ọsọn̄ ndidomo ndikọn̄ okpukwak nsịn ke eto, idem akamade edikpu, edieke mûfiọkke ndikama ukọn̄n̄kpọ. Edi ndifiọk nditịm n̄kama n̄kpọutom nnam utom an̄wam nnyịn ndinam utom oro ọfọnde.

² Nte mme Christian, imenyene utom oro anade inam. Enye edi ata akpan utom. Jesus Christ ama eteme mme anditiene enye ete “ẹbem iso ẹyom Obio Ubọn̄.” (Matthew 6:33) Didie ke ikeme ndinam oro? Usụn̄ kiet edi ndisịn ifịk ke utom edikwọrọ Obio Ubọn̄ ye edinam mbet. Usụn̄ efen edi ndinam utom ukwọrọikọ nnyịn enen̄ede ọkọn̄ọ ke Ikọ Abasi. Ọyọhọ usụn̄ ita edi eti edu uwem nnyịn. (Matthew 24:14; 28:19, 20; Utom 8:25; 1 Peter 2:12) Man ikụt unen inyụn̄ ikop inemesịt ke utom Christian emi, imoyom nti n̄kpọutom ye ifiọk ke nte ikpetịmde ida mmọ inam n̄kpọ. Apostle Paul ama enịm n̄wọrọnda uwụtn̄kpọ ke afan̄ emi nte anamutom Christian, enye ama onyụn̄ esịn udọn̄ ọnọ ekemmọ mme andinịm ke akpanikọ ndikpebe imọ. (1 Corinth 11:1; 15:10) Ntre, ndien, nso ke nnyịn ikeme ndikpep nto Paul, kpa ekemmọ nsan̄autom?

Paul—Ifịk Ifịk Anditan̄a Obio Ubọn̄

3. Ntak emi ẹkemede ndidọhọ ke apostle Paul ekedi ifịk ifịk anamutom Obio Ubọn̄?

³ Nso orụk anamutom ke Paul ekedi? Enye ekenen̄ede edi “ifịk ifịk” anamutom. Paul ama esịn̄ede idemesie etieti, asuande eti mbụk ntatara ntatara ke ikpehe Mediterranean. Ke owụtde ntak oro enye akatan̄ade Obio Ubọn̄ ye ifiopesịt, ifịk ifịk apostle emi ama ọdọhọ ete: “Koro edieke n̄kwọrọde gospel, nnyeneke ntak mbụre; utom  oro obiomo mi ke idem nte n̄kpọ eke nnyenede ndinam; koro idifọnke-fọn inọ mi edieke mmen̄kwọrọke gospel.” (1 Corinth 9:16) Ndi Paul okoyom ndinyan̄a uwem esie kpọt? Baba-o. Enye ikedịghe ibụk. Utu ke oro, enye okoyom mbon en̄wen n̄ko ẹtiene ẹbọ ufọn gospel. Enye ekewet ete: “Nnanam kpukpru n̄kpọ kaban̄a gospel, man ami nde nnyene udeme ke esịt.”—1 Corinth 9:23.

4. Ewe n̄kpọutom ke mbonutom Christian ẹnen̄ede ẹda ke akpan n̄kpọ?

⁴ Apostle Paul ekedi anamutom oro osụhọrede idem emi ọkọfiọkde ke imọ ikekemeke ndiberi edem ofụri ofụri ke usọ oro imọ ikenyenede. Kpa nte anamusọ eto esidade ukọn̄n̄kpọ anam utom, Paul ama ada nnennen n̄kpọutom man enye esịn akpanikọ Abasi ke esịt mme andikpan̄ utọn̄ nnọ enye. Nso ikedi akpan n̄kpọutom esie? Ekedi Ikọ Abasi, kpa Edisana N̄wed Abasi. Kpasụk ntre, Bible edi akpan n̄kpọutom oro ikamade man an̄wam nnyịn ndinam mme mbet.

5. Man idi mme asan̄autom oro ẹkụtde unen, nso ke oyom inam ke adianade ye edikot itie N̄wed Abasi?

⁵ Paul ama ọfiọk ete ke nditịm nsiak Ikọ Abasi ama abuana se ikande edikot nto enye. Enye ama ada “mbukpek” anam n̄kpọ. (Utom 28:23, NW) Didie? Paul ama okụt unen ke ndida Ikọ Abasi oro ẹwetde-wet n̄kpek ediwak owo ẹnyịme akpanikọ Obio Ubọn̄. Enye ama ọkọk ibuot ye mmọ. Ke odude ke synagogue ke Ephesus ke ọfiọn̄ ita, Paul ama “ọnọ utịn̄ikọ onyụn̄ ada mbukpek etịn̄ aban̄a obio ubọn̄ Abasi.” (NW) Ke adan̄aemi ‘ndusụk owo ẹkesọn̄de esịt ẹnyụn̄ ẹtrede ndinịm ke akpanikọ,’ mbon en̄wen ẹma ẹkpan̄ utọn̄. Nte utịp utom ukwọrọikọ Paul ke Ephesus, ‘ikọ Ọbọn̄ ama ọkọri ọkpọsọn̄ onyụn̄ akara kpukpru ebiet.’—Utom 19:8, 9, 20.

6, 7. Didie ke Paul ọkọsọn̄ọ okpono itieutom esie, ndien didie ke ikeme ndinam ntre?

⁶ Nte ifịk ifịk anditan̄a Obio Ubọn̄, Paul ama ‘ọsọn̄ọ okpono itieutom esie.’ (Rome 11:13) Didie? Enye ikenyeneke udọn̄ edimenede idemesie ke enyọn̄; mme owo ndidiọn̄ọ enye nte anamutom Abasi ikonyụn̄ inamke enye bụt. Utu ke oro, enye akada utom ukwọrọikọ esie nte n̄kponn̄kan ifetutom. Paul ama ada usọ asiak Ikọ Abasi uforo uforo. N̄kọri oro utom ukwọrọikọ esie ekenyenede ekedi n̄kpọ nsịnudọn̄ ọnọ mbon en̄wen, an̄wamde mmọ ndinam utom mmọ mma. Ke usụn̄ emi n̄ko, enye ama ọsọn̄ọ okpono itieutom esie.

⁷ Ukem nte Paul, imekeme ndikpono utom nnyịn nte mme asan̄autom ebe ke ndida Ikọ Abasi nnam n̄kpọ uforo uforo kpukpru ini. Ke kpukpru ikpehe utom ukwọrọikọ nnyịn, utịtmbuba nnyịn ekpedi ndisio n̄kpọ ke N̄wed Abasi mbuana ye adan̄a ediwak owo nte ikekeme. Didie ke ikeme ndida mbukpek nnam emi? Kere ban̄a akpan usụn̄ ita emi: (1) Dụri ntịn̄enyịn wụt Ikọ Abasi ke usụn̄ oro ọnọde enye ukpono. (2) Da mbufiọk nam se Bible etịn̄de ye ebuana oro enye enyenede an̄wan̄a. (3) Da N̄wed Abasi kọk ibuot ke usụn̄ oro anamde ẹnịm.

8. Mme n̄kpọutom ewe ke inyene mfịn ndida ntan̄a Obio Ubọn̄, ndien didie ke afo esida mmọ anam n̄kpọ?

⁸ Mme anditan̄a Obio Ubọn̄ eyomfịn ẹnyene mme n̄kpọutom oro Paul mîkenyeneke ke ini utom ukwọrọikọ esie. Mmọ emi ẹsịne mme n̄wed, mme magazine, ndiye uduot n̄kpri n̄wed, n̄wedikot, mme tract, ye mme ọkpọ umụmikọ kaset ye vidio. Ke isua ikie oro ẹkebede, ẹma ẹkama n̄ko mme kad unọ ikọ ntiense, ukwak ubre usanikwọ, ubomisọn̄ usuanetop, ye ndutịm usuanetop ekebe ukopikọ. Nte ededi, mfọnn̄kan n̄kpọutom nnyịn edi Bible, ndien oyom ida akpan n̄kpọutom emi inam n̄kpọ nte ọfọnde.

Ana Utom Ukwọrọikọ Nnyịn Ọkọn̄ọ ke Ikọ Abasi

9, 10. Kaban̄a edida Ikọ Abasi nnam n̄kpọ, nso ke ikeme ndikpep nto item oro Paul ọkọnọde Timothy?

⁹ Didie ke ikeme ndida Ikọ Abasi nnam n̄kpọ nte eti n̄kpọutom? Ebe ke ndinam mme ikọ emi Paul ekewetde ọnọ Timothy, nsan̄autom esie: “Sịn ifịk wụt Abasi idem fo, ete idi owo eke  ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.” (2 Timothy 2:15) Nso ke ‘nditịm nsiak ikọ akpanikọ’ abuana?

¹⁰ Ikọ Greek oro ẹkabarede ‘nditịm nsiak’ ke ata ata usụn̄ ọwọrọ “ndisịbe nnennen nnennen” m̀mê “nditịm nsiak afan̄ nnennen nnennen.” N̄kukụre itie oro ẹdade ikọ emi ke N̄wed Abasi Christian Usem Greek edi ke item oro Paul ọkọnọde Timothy. Ẹkeme ndida ikọ emi ntịn̄ mban̄a edifụn̄ udịm ebono ke in̄wan̄ nnennen nnennen. N̄kakwan̄a ufan̄ ebono edinen̄ede edi n̄kpọ bụt ọnọ ọtọin̄wan̄ oro enyenede mbufiọk. Man enye edi “anam-utom eke mînyeneke ntak ndikop bụt,” ẹma ẹti Timothy nte ke owo idinyịmeke ẹwọn̄ọde ẹkpọn̄ ukpepn̄kpọ akpanikọ oro ẹdude ke Ikọ Abasi. Ikanaha Timothy ayak mme ọkpọkpọ ekikere esie ẹkara ukpepn̄kpọ esie. Ukwọrọikọ ye ukpepn̄kpọ esie ẹkenyene ndikọn̄ọ nnennen nnennen ke N̄wed Abasi. (2 Timothy 4:1-4) Ke usụn̄ emi, ẹyenam mbon esịt akpanikọ ẹnyene ekikere Jehovah ke mme n̄kpọ, utu ke ndinyịme mme ukpepn̄kpọ akwaifiọk eke ererimbot. (Colossae 2:4, 8) Ntre ke edi mfịn.

Ana Inyene Eti Edu Uwem

11, 12. Nso ebuana ke edu uwem nnyịn enyene ye editịm nsiak Ikọ Abasi?

¹¹ Ana inam se ikande editịm nsiak Ikọ Abasi ebe ke nditan̄a akpanikọ oro odude ke enye. Edu uwem nnyịn enyene ndidu ke n̄kemuyo ye Ikọ Abasi. “Nnyịn isan̄a ikpat kiet idi mme anam-utom Abasi,” ke ntre inaha idi mme anamutom enyịn owo. (1 Corinth 3:9) Ikọ Abasi ọdọhọ ete: “Afo emi ekpepde owo efen, nte ukpepke idem fo? afo emi ọkwọrọde ete owo okûyịp inọ, nte emeyịp ke idem fo? afo emi ọdọhọde  ete owo okûsịn efịbe, nte emesịn efịbe? afo emi abatde ndem ke mbubiam, nte omowo n̄wo ke mme temple?” (Rome 2:21, 22) Ke ntre, nte mme anamutom Abasi eke eyomfịn, usụn̄ kiet oro itịmde isiak Ikọ Abasi edi ndinam item emi: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”—Mme N̄ke 3:5, 6.

¹² Nso utịp ke ikeme ndidori enyịn ndinyene nto editịm nsiak Ikọ Abasi? Kere ban̄a odudu oro Ikọ Abasi oro ẹwetde-wet ekemede ndinyene ke uwem mbon esịt akpanikọ.

Ikọ Abasi Enyene Odudu Ndikpụhọde Owo

13. Nso utịp ke edida Ikọ Abasi nsịn ke edinam ekeme ndinyene ke idem owo?

¹³ Ke ini ẹdade enye nte se ẹkemede ndiberi edem, etop Ikọ Abasi enyene akwa odudu ndin̄wam mme owo ẹnam n̄wọrọnda ukpụhọde ke uwem mmọ. Paul ama okụt odudu ye eti utịp oro ikọ Abasi ekenyenede ke idem mbon oro ẹkekabarede ẹdi mme Christian ke Thessalonica eset. Ke ntre, enye ama ọdọhọ mmọ ete: “Ndien ke ntak emi nnyịn itreke ndinọ Abasi ekọm, ite, ke ini mbufo ẹbọde ikọ emi Abasi ọnọde ke ubọk nnyịn ẹsọk mbufo, mbufo idaha enye nte ikọ owo, edi ẹda enye nte ikọ Abasi—ke akpanikọ edi oro—ikọ oro onyụn̄ anam utom ke esịt mbufo emi ẹnịmde ke akpanikọ.” (1 Thessalonica 2:13) Ye mme Christian oro—ke akpanikọ, ye kpukpru mme ata anditiene Christ—owo ikemeke ndimen ikpîkpu ifiọk owo ndomo ye akakan ọniọn̄ Abasi. (Isaiah 55:9) Mbon Thessalonica ẹma “ẹbọ Ikọ Abasi ye idat esịt Edisana Spirit” ẹnyụn̄ ẹkabade ẹdi uwụtn̄kpọ ẹnọ mme andinịm ke akpanikọ eken.—1 Thessalonica 1:5-7.

14, 15. Etop Ikọ Abasi enyene odudu adan̄a didie, ndien ntak-a?

¹⁴ Ikọ Abasi okop odudu, ukem nte Andinyene enye, kpa Jehovah. Enye oto “Abasi uwem,” enye emi ẹkedade ikọ esie “ẹnam enyọn̄,” ndien kpukpru ini ikọ oro ‘esikụt unen ke utom oro ẹdọn̄de enye.’ (Mme Hebrew 3:12; Psalm 33:6; Isaiah 55:11) Eyen ukpepn̄kpọ Bible kiet ọkọdọhọ ete: “Abasi isinamke n̄kpọ isio isio ikpọn̄ Ikọ esie. Enye isikan̄ke Ikọ esie nte n̄kpọ eke ẹdọhọde ke edi esen n̄kpọ ọnọ enye. . . . Ke ntre akananam Ikọ esie idịghe se mînyeneke uwem, emi n̄kpọ ekemede ndibiọn̄ọ ke ẹma ẹketịn̄; koro Abasi uwem idian̄akede ikpọn̄ Ikọ esie.”

¹⁵ Etop Ikọ Abasi enyene odudu adan̄a didie? Enye enen̄ede enyene odudu. Nte odotde, Paul ama ewet ete: “Koro ikọ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, ekịm abahade ukpọn̄ ye spirit, ye ikek ye ndia; onyụn̄ enyene ukeme ndidụn̄ọde ekikere ye uduak esịt owo.”—Mme Hebrew 4:12.

16. Didie ke Ikọ Abasi ekeme ndinen̄ede n̄kpụhọde owo?

¹⁶ Etop Ikọ Abasi oro ẹwetde-wet “ọsọp akan kpukpru ofụt iso iba.” Ntem, enye enen̄ede enyene odudu tutu owo ikemeke ndimen enye ndomo ye n̄kpọutom ekededi. Ikọ Abasi ekịm abahade ata esịt idem owo onyụn̄ ekeme ndikpụhọde owo ke esịt esịt, otụkde nte owo ekerede n̄kpọ ye se enye amade, onyụn̄ anam owo edi anamutom oro ẹmade, onyụn̄ abakde Abasi. Nso okopodudu n̄kpọutom ke enye edi ntem!

17. Nam odudu oro Ikọ Abasi enyenede ndikpụhọde owo, an̄wan̄a.

¹⁷ Ikọ Abasi ayarade se owo enen̄erede edi ke esịt esịt, ke edide isio ye se enyene idem ekerede nte imọ idide m̀mê se enye anamde nte imọ idide. (1 Samuel 16:7) Idem idiọkowo ekeme ke ndusụk ini ndida edinam mfọnido m̀mê edu ukpono Abasi ndịp se enye edide ke esịt esịt. Ndiọi owo ẹsidịp se mmọ ẹdide man ẹnam ibak. Mbon ntan̄idem ẹsinam nte ke imosụhọde idem man ẹnyene uma mme owo. Nte ededi, ke ndiyarade se inen̄erede idu owo ke esịt, Ikọ Abasi ekeme ndinen̄ede nnụk owo oro osụhọrede idem ndisio akani owo nduọk nnyụn̄ ‘mmen obufa owo nsịne, emi ẹbotde ebiet Abasi ke edinen ido ye edisana ido akpanikọ.’ (Ephesus 4:22-24) Ukpepn̄kpọ Ikọ Abasi ekeme n̄ko ndikpụhọde mbon o-bụt nnyụn̄ nnam mmọ ẹdi Mme Ntiense Jehovah ye ifịk ifịk mme anditan̄a Obio Ubọn̄ oro ẹnyenede uko.—Jeremiah 1:6-9.

18, 19. Ọkọn̄ọde ke mme ikpehe ekikere emi m̀mê ke ifiọkutom an̄wautom fo, wụt nte akpanikọ N̄wed Abasi ekemede ndikpụhọde owo.

¹⁸ Odudu oro Ikọ Abasi enyenede ndikpụhọde  owo enyene eti utịp ke idem mme owo ke kpukpru ebiet. Ke uwụtn̄kpọ, mme anditan̄a Obio Ubọn̄ ẹtode Phnom Penh, Cambodia, ẹma ẹkwọrọ ikọ ke mbahade obio ukara Kompong Cham ikaba ke ọfiọn̄. Ke ama okokop nte mme ọkwọrọ ederi eken ẹtịn̄de ikọ ẹdian Mme Ntiense Jehovah, n̄wan kiet emi edide pastọ ama odiomi ndisobo ye Mme Ntiense isan̄ efen oro mmọ ẹdifiakde ẹdi mbahade obio ukara oro. Enye ama obụp mmọ ediwak mbụme aban̄a edinịm usọrọ ini nduọkodudu onyụn̄ etịm akpan̄ utọn̄ nte mmọ ẹdade N̄wed Abasi ẹkọk ibuot ye enye. Ekem enye ama ofiori ete: “Idahaemi ke ndifiọk nte ke se ekemmọ mme pastọ ẹketịn̄de ẹban̄a mbufo idịghe akpanikọ! Mmọ ẹkedọhọ ke mbufo isidaha Bible inam n̄kpọ, edi ke usenubọk emi enye ke mbufo ẹkama!”

¹⁹ N̄wan emi ama aka iso ke nneme Bible esie ye Mme Ntiense ikonyụn̄ iyakke ndịghe edisio enye mfep ke itieutom pastọ anam enye etre ndikpep Bible. N̄wan oro ama asian ufan esie nneme N̄wed Abasi oro ẹkenyenede ye enye, ndien ufan esie ama ọtọn̄ọ ndikpep Bible ye Mme Ntiense. Ufan esie emi ama enen̄ede okop nduaidem aban̄a se enye ekekpepde tutu enye ọdọhọ ini kiet ke ufọkabasi esie ete: “Ẹdi ẹdikpep Bible ye Mme Ntiense Jehovah!” Ibịghike ke oro ebede, enye ama etre ndibuana ke ufọkabasi oro. Akani pastọ oro, ufan esie, ye mbon en̄wen ẹma ẹtọn̄ọ ndikpep Bible ye Mme Ntiense Jehovah.

20. Didie ke ifiọk n̄kpọntibe n̄wan kiet ke Ghana owụt odudu oro Ikọ Abasi enyenede?

²⁰ Ẹkụt n̄ko odudu oro Ikọ Abasi enyenede ke se iketịbede inọ Paulina, n̄wan kiet ke Ghana. Anditan̄a Obio Ubọn̄ uyọhọ ini ama enịm ukpepn̄kpọ Bible ye enye ke n̄wed Ifiọk Oro Adade Osịm Nsinsi Uwem. * Paulina ekedi kiet ke otu uwak iban oro ebe esie ọkọdọde ndien enye ama okụt ke oyom imọ inam ukpụhọde, edi ebe esie ye kpukpru iman esie ẹma ẹbiọn̄ọ enye idiọk idiọk. Ete ete esie, emi ekedide ebiereikpe ke esop enyọn̄ ye adaidaha ke ufọkabasi, ama odomo ndibiọn̄ọ enye ke ndibuan Matthew 19:4-6 nte mîdotke. Eketie nte ke ebiereikpe oro ama enen, edi Paulina ama ọsọsọp ọfiọk ke emi ekedi ukem usụn̄ oro Satan okoyụrọrede N̄wed Abasi ke ini enye okodomode Jesus Christ. (Matthew 4:5-7) Enye ama eti in̄wan̄-in̄wan̄ ikọ Jesus aban̄ade ndọ, emi ọkọdọhọde nte ke Abasi okobot eren ye n̄wan, idịghe eren ye iban, ye nte ke mmọ mbiba, idịghe mmọ mbita, ẹkenyene ndikabade ndi obụk kiet. Enye ama ọsọn̄ọ eyịre ke ubiere esie ndien ke akpatre ẹma ẹnyịme enye ọwọrọ ndọ ke ntak oro ebe esie ọkọdọde uwak iban. Ikebịghike, enye ama akabade edi anditan̄a Obio Ubọn̄ oro okopde inemesịt.

Ka Iso Nditịm Nsiak Ikọ Abasi

21, 22. (a) Nso ikpedi ubiere nnyịn nte mme anditan̄a Obio Ubọn̄? (b) Nso ke idineme ke ibuotikọ oro etienede?

²¹ Ikọ Abasi oro ẹwetde-wet enen̄ede edi okopodudu n̄kpọutom ọnọ nnyịn ndida n̄n̄wam mbon en̄wen ẹnam mme ukpụhọde ke uwem mmọ man ẹsan̄a ẹkpere Jehovah. (James 4:8) Kpa nte mme anamutom oro ẹnyenede usọ ẹsidade n̄kpọutom mmọ ẹnam eti utom, nnyịn ikpakam ibiere ndisịn ukeme ofụri esịt ke ndida Ikọ Abasi, kpa Bible nnam n̄kpọ ye usọ ke utom oro Abasi ọnọde nnyịn nte mme anditan̄a Obio Ubọn̄.

²² Didie ke ikeme ndida N̄wed Abasi nnam n̄kpọ uforo uforo ke utom nnyịn ndinam mbet? Usụn̄ kiet edi ndifori mme ukeme nnyịn nte mme andikpep oro ẹnyenede mbukpek. Mbọk dụn̄ọde ibuotikọ oro etienede, koro enye owụt mme usụn̄ oro ikemede ndikpep nnyụn̄ n̄n̄wam mbon en̄wen ẹnyịme etop Obio Ubọn̄.

[Ikọ idakisọn̄]

Nte Afo Emeti?

• Mme n̄kpọutom ewe ke mme anditan̄a Obio Ubọn̄ ẹnyene?

• Ke mme usụn̄ ewe ke Paul ekenịm uwụtn̄kpọ nte anamutom Obio Ubọn̄?

• Nditịm nsiak Ikọ Abasi abuana nso?

• Ikọ Jehovah oro ẹwetde-wet okop odudu adan̄a didie?

[Mme Mbụme Ukpepn̄kpọ]

[Mme ndise ke page 10]

Ndusụk n̄kpọutom oro mme Christian ẹdade ẹnam n̄kpọ ke utom editan̄a Obio Ubọn̄