Ererimbot Oro Ubiatibet Mîdụhe ke Edi ke Iso

EDIEKE ekemede, kere ise nte ererimbot emi mme abiatibet mîdụhe editiede! Owo idiyomke aba mme bodisi, mme ufọk-n̄kpọkọbi m̀mê mme ọsọn̄urua ye awak-n̄kukọhọ ndutịm ibet. Enye edidi ererimbot oro kpukpru owo ẹdinyenede ukpono ẹnọ uwem ye inyene mbon en̄wen. Ndi emi etie nte se mîkemeke nditịbe? Afo emekeme ndikere ntre, edi Bible ọn̄wọn̄ọ utịbe utịbe ukpụhọde emi. Ntak mûkereke uban̄a se N̄wed Abasi ekebemde iso etịn̄ aban̄a ubiatibet ye ndiọi n̄kpọ eken ke ererimbot emi-e?

Ke n̄wed Psalm, nnyịn ikot ite: “Kûyat esịt uban̄a mme oburobụt owo; kûfịbe ufụp ye mme anam-idiọk. Koro ẹyewara ndisịbe mmọ nte mbiet, mmọ ẹyenyụn̄ ẹken̄e nte awawa ikọn̄. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:1, 2, 11) Ke akpanikọ, owo ndomokiet ikemeke ndikpan Abasi ndisu un̄wọn̄ọ emi ye kpukpru un̄wọn̄ọ esie eken oro ẹnọde nsịnudọn̄.

Abasi edida mme edidiọn̄ emi idi ebe ke Obio Ubọn̄ esie. Ke Akam Ọbọn̄, Jesus Christ ama ekpep mme anditiene enye ndibọn̄ akam mben̄e Obio Ubọn̄ emi ndidi, man ẹnyụn̄ ẹnam uduak Abasi ‘ke isọn̄ kpasụk nte ẹnamde ke heaven.’ (Matthew 6:9, 10) Ibịghike, ke idak Obio Ubọn̄ oro, owo ndomokiet ke isọn̄ idibiatke ibet ke ntak unana, ufịk, m̀mê ke ntak ibụk. Utu ke oro, Ikọ Abasi ọdọhọ ete: “Uwak ibokpot ẹyedu ke isọn̄ ke nsom ikpọ obot.” (Psalm 72:16) Ke akpanikọ, Jehovah Abasi ọyọnọ kpukpru owo ke isọn̄ nti n̄kpọ barasuene. Ke edide akpan n̄kpọ akan, mme owo ẹyenyene ima ẹnọ Abasi ye mbọhọidụn̄ mmọ, ndien ubiatibet iditịmekede aba ererimbot tutu amama.