“Ikọ Abasi Enyene Odudu Adan̄a Didie Ntem!”

“IKỌ Abasi enyene uwem, onyụn̄ ananam n̄kpọ.” (Mme Hebrew 4:12) Ke ndiwụt odudu oro Ikọ Abasi enyenede, 2003 Calendar of Jehovah’s Witnesses esịne ata mbụk eyouwem itiokiet oro ẹdade ẹto ofụri ererimbot. Ke ibuotikọ oro, “Mbemiso ye ke Ẹma Ẹkekpep Bible,” n̄wed usenọfiọn̄ oro owụt nte utom unọ ukpep eke Mme Ntiense Jehovah an̄wamde mme owo ndikọri nti ido uwem, n̄kpọn̄ mbiara usụn̄uwem, nsọn̄ọ uwem ubon mmọ, nnyụn̄ nnyene ọkpọkpọ itie ebuana ye Abasi.

Nnyịn imọbọ ekese leta esịtekọm iban̄a n̄wed usenọfiọn̄ 2003. Ndusụk ikọ esịtekọm oro ẹdi emi:

“N̄wed usenọfiọn̄ emi owụt ata mme Christian nte ke mbon efen ẹdu oro ẹsọn̄ọde ẹn̄wana kaban̄a ikọ mbuọtidem ukem nte mmọ. Mmọ ke emi ẹkeme ndida mme ndise emi nti mme ukpụhọde oro ndusụk owo ẹkenamde.”—Steven, United States.

“Ama enen̄ede ọdọn̄ mi ndiwet mme ikọ ifan̄ emi ndinam mbufo ẹfiọk adan̄a nte n̄wed usenọfiọn̄ 2003 otụkde mi. Akananam n̄wed usenọfiọn̄ itụkke mi ntre. Nyesisịn enye ke ekpat ukwọrọikọ mi man nda n̄wụt mme owo okopodudu uyarade oro owụtde nte Bible ekemede ndikpụhọde mme owo.”—Marc, Belgium.

“N̄wed usenọfiọn̄ oro ama enen̄ede otụk mi. Ama enen̄ede otụk mi ndikụt nte Jehovah okpụhọrede mme owo emi. Nte utịp, oro edemede mi udọn̄ ndika iso nnam mme ukpụhọde ke uwem mi. Idahaemi ke enen̄ede etie mi ke idem nte ke ndi ubak otu nditọete eke ofụri ererimbot.”—Mary, United States.

“Nnanenyịn emi mme owo ẹkesobode ke n̄kan̄ eke spirit ama enen̄ede otụk Jesus. Ẹsọsọn̄ọ ke ndikpebe Christ ebe ke ndiwet mbụk eyouwem oro ẹdude ke n̄wed usenọfiọn̄ 2003 nnyịn. Akananam n̄wed usenọfiọn̄ ndomokiet itụkke mi ntre tutu mmọn̄eyet asiaha mi ke enyịn.”—Cassandra, United States.

“N̄kọtọn̄ọ ndin̄wọn̄ sika ke ini n̄kedide isua 11; ekem mma nsida n̄kpọsọn̄ ibọk. Mma nsikere nte n̄kpowotde idem. Ke ini n̄kedide ndifiọk Jehovah, ẹma ẹn̄wam mi nditre mme edu emi. Mmenen̄ede mma n̄wed usenọfiọn̄ emi. Mme uwụtn̄kpọ nditọete mi iren ye iban oro ẹdade ẹto ofụri ererimbot mi ẹsọn̄ọ mi idem. Idahaemi, mmọfiọk nte ke idịghe ami ikpọn̄ n̄n̄wana en̄wan emi, ye nte ke se inen̄ede idi akpan n̄kpọ ikan edi ndima Jehovah nnyụn̄ nnam n̄kpọ esie ke ofụri esịt.”—Margaret, Poland.

“Oh, Ikọ Abasi enyene odudu adan̄a didie ntem! Ke ini n̄kọbọde n̄wed usenọfiọn̄ 2003, mma nnen̄ede ndomo ndimụm idem mi n̄kama man n̄kûtua. Mme ifiọk n̄kpọntịbe emi ye mme ndise oro ẹdọn̄ọde ke esịt ẹnen̄ede ẹsọn̄ọ mbuọtidem owo.”—Darlene, United States.

“N̄kani usụn̄ uwem ndusụk mbon oro ẹtịn̄de ẹban̄a mi enen̄ede ebiet uwem oro n̄kesidude. Jehovah ọnọ mi odudu nditre ndiọi usụn̄ uwem oro ẹketiede nte se owo mîkpekemeke nditre. Ẹsọsọn̄ọ etieti ke ndiwet mme ata mbụk eyouwem emi.”—William, United States.