Mme Mbụme Ẹtode Mme Andikot

Didie ke mme Christian ẹkpese edisịne itiat emana?

Ke ndusụk obio, ẹsidọhọ ke itiat emana ẹnyene ebuana ye ọfiọn̄ emi owo akamanade. Edide Christian eyesịne n̄kpanuen emi enyenede ọsọn̄urua itiat edi ọkpọkpọ mbubehe. (Galatia 6:5) Ke ndinam ubiere oro, mme akpan n̄kpọ ẹdu ndikere mban̄a.

Encyclopaedia Britannica ọdọhọ ete ke itiat emana edi “ọsọn̄urua itiat emi enyenede ebuana ye usen emi owo akamanade, ndien mme owo ẹkere ke ndisịne enye esinam owo enyene mfọniso m̀mê okop nsọn̄idem.” N̄wed emi adian do ete: “Ke anyan ini emi ekebede mme asiak ntantaọfiọn̄ ẹdọhọ ke ndusụk itiat emana ẹnyene odudu oro akande eke owo.”

Akpan akpan ke eset, ediwak owo ẹma ẹnịm ke akpanikọ ẹte ke itiat emana esinam andisịne enye enyene mfọniso. Ndi ata Christian enịm emi ke akpanikọ? N̄wan̄ansa-o, koro enye ọfiọkde ete ke Jehovah ama obiom mbon oro ẹkekpọn̄de enye ẹnyụn̄ ẹbuọtde idem ke “abasi Mfọniso,” ikpe.—Isaiah 65:11, NW.

Ke Ntọn̄ọ Ntọn̄ọ Eyo Ntatenyịn, mme etịn̄ ini iso ẹma ẹmek ọsọn̄urua itiat ẹnọ ọfiọn̄ kiet kiet ke isua. Mmọ ẹma ẹdọhọ mme owo ẹsịne n̄kpanuen enyenede ọsọn̄urua itiat oro asan̄ade ekekem ye ọfiọn̄ emi mmọ ẹkemanade, ẹkerede ke enye eyekpeme mme andisịne enye. Edi idikemke ye N̄wed Abasi Christian nditiene ndausụn̄ mbia-idiọn̄, koro Bible obiomde mmọ ikpe.—Deuteronomy 18:9-12.

Idinenke n̄ko mme Christian ndikere ke itiat emana ndisịne ke n̄kpanuen enyene se ọwọrọde. Mme Ntiense Jehovah isinịmke usọrọ usen emana. Emi edi koro mme utọ usọrọ oro ẹsinen̄ede ẹwụk ntịn̄enyịn ke owo, ndien n̄kukụre n̄wetnnịm n̄kpọ Bible aban̄ade usọrọ usen emana edi eke mme andikara oro mîkanamke n̄kpọ Abasi.—Genesis 40:20; Matthew 14:6-10.

Ndusuk owo ẹkere ke ndisịne n̄kpanuen emi enyenede itiat emana esinam andisịne enye enyene eti edu. Nte ededi, ata mme Christian inịmke emi ke akpanikọ koro mmọ ẹfiọk ẹte ke edisana spirit Abasi ye edida mme edumbet N̄wed Abasi nsịn ke edinam ẹn̄wam owo ndimen “obufa owo” nsịne.—Ephesus 4:22-24.

Se ẹkpenen̄erede ẹkere ẹban̄a edi ntak emi ẹsịnede enye. Ke ndibiere m̀mê ikpesesịne n̄kpanuen emi enyenede itiat emana m̀mê ikpesịneke, Christian ekeme ndibụp idemesie ete, ‘Ndi ami nyom ndisịne n̄kpanuen emi koro ọsọn̄urua itiat esie eyede mi, okposụkedi ẹdọhọde ke enye edi itiat emana? Mîdịghe nte nsunsu ekikere emi ndusụk owo ẹnyenede ẹban̄a utọ ọsọn̄urua itiat emi anam mi nsịne enye?’

Ana Christian odụn̄ọde esịt esie man ọfiọk ntak emi enye esịnede. N̄wed Abasi ọdọhọ ete: “Tịm kpeme esịt fo kan kpukpru se ekpemede; koro uwem otode enye.” (Mme N̄ke 4:23) Ke ndinam ubiere esie aban̄ade itiat emana, ọkpọfọn Christian kiet kiet ekere aban̄a ntak emi enye esịnede ye nte oro ekemede nditụk enye ye mbon efen.—Rome 14:13.