“Ẹben̄e Idem  Ndinam Kpukpru Nti Utom”

“TI MMỌ ẹte ẹsụk idem ẹnọ mme andikara ye mme enyene-idaha, ẹnyụn̄ ẹsụk ibuot, ẹnyụn̄ ẹben̄e idem ndinam kpukpru nti utom.” (Titus 3:1) Ewe nti utom ke apostle Paul ekenyene ke ekikere ke ini enye ekewetde mme ikọ emi ọnọ ẹsọk ekemmọ mme andinịm ke akpanikọ? Eyen ukpepn̄kpọ Bible oro E. F. Scott osio orụk eti utom kiet owụt, ọdọhọde ete: “Mme Christian ikenyeneke ndikop uyo nnọ enyene-idaha kpọt, edi akana mmọ ẹben̄e idem ndinam eti utom ekededi. . . . Ke ini idaha oyomde, mme Christian ẹkpenyene ndidu ke otu mbon oro ẹbemde iso ẹwụt edu edinam n̄kpọ oro enyenede ufọn ọnọ kpukpru owo. Kpukpru ini ikan̄, udọn̄ọ, nsio nsio orụk afanikọn̄ ẹyedu, emi kpukpru nti mbio obio ẹdiyomde ndin̄wam mme mbọhọidụn̄ mmọ.”

Mme Christian ẹsitiene ẹbuana ke ndusụk utom obio adan̄a nte mme utom emi mîtuahake ye mme ibet Abasi. (Utom 5:29) Ke uwụtn̄kpọ, ke nditiene ndausụn̄ itieutom unịme ikan̄ n̄kann̄kụk, ọfis n̄kọk itieutom Mme Ntiense Jehovah ke Japan, emi odude ke Ebina, esinam ndomonse ke isua ke isua ke nte ẹkpenamde n̄kpọ edieke ikan̄ obụberede. Ke mme utọ ini oro, kpukpru mbonubon Bethel ẹsiwọrọ ẹdisobo ọtọkiet ndikpan̄ utọn̄ ke item oro owo emi otode itieutom unịme ikan̄ n̄kann̄kụk ọnọde.

Ke adianade do, ke se iwakde ikan isua duop emi ẹbede, ọfis n̄kọk itieutom ebere ye ukara n̄kann̄kụk ke edinam oro enye odiomide man ẹteme nte ẹkemede ndikpan ikan ndibụberede. Ke edinam oro, mme usiakifia oro ẹdude ke obio oro ẹsinam ẹwụt nte mmimọ idude ke mben̄eidem ndinịme nnyụn̄ n̄kpan ikan ndibụbede. Ẹsiwak nditoro n̄kọk itieutom emi ke usọ ye edidianakiet eke mbonutom esie. Ke 2001, ẹma ẹnọ mmọ n̄kponn̄kan enọ ke edinam oro. Mmọ ẹdu ke mben̄eidem ndinam eti utom oro ekemede ndinyan̄a uwem edieke ikan̄ obụberede.

Eti Utom

Nte ededi, Mme Ntiense Jehovah ẹnyene udọn̄ ke orụk eti utom oro edide akpan n̄kpọ akan, emi n̄ko edide utom unyan̄a uwem. Kpukpru ini mmọ ẹsiwaha ẹtiene mme mbọhọidụn̄ mmọ man ẹbuana eti mbụk Obio Ubọn̄ Abasi ye mmọ. (Matthew 24:14) Mme Ntiense ẹsisịn udọn̄ ẹnọ mme owo ndikpep nnyụn̄ nda mme edumbet Bible nsịn ke edinam man ẹnam uwem mmọ ọfọn idahaemi ẹnyụn̄ ẹnyene idotenyịn edidu nsinsi uwem ke ererimbot oro ata emem ye ifụre ẹdiyọhọde.

Eyedi ndusụk owo ifiọkke ufọn utom oro Mme Ntiense Jehovah ẹnamde, ke ntre ẹdade mmọ nte mbon mfịna. Nte ededi, Ebiereikpe oro Jean Crepeau eke Akakan Esopikpe Quebec ke Canada ekenyene isio isio ekikere. Mme Ntiense Jehovah emi ẹdude do ẹma ẹfan̄a ibet obio Blainville, Quebec, oro okoyomde mmọ ẹbọ unyịme mbemiso mmọ ẹkemede ndikwọrọ ikọ to ke enyịnusụn̄ sịm enyịnusụn̄. Ke ubiereikpe esopikpe, Ebiereikpe oro Crepeau ọkọdọhọ ete: “Ke ndiwaha ntiene mme owo, Mme Ntiense Jehovah ẹnam utom Christian oro enyenede ufọn ọnọ mbio obio ndien . . . mme n̄wed oro Mme Ntiense ẹnọde mbio obio oro ẹnyenede udọn̄ ẹdi ata nti n̄wed oro ẹtịn̄de n̄kpọ ẹban̄a ido ukpono, Bible, n̄kpọsọn̄ ibọk, mbumehe un̄wọn̄ ọkpọsọn̄ mmịn, mme uyen ndika ufọkn̄wed, mme mfịna ndọ, ye usiondọ.” Ẹma ẹka iso ke ubiereikpe oro ntem: “Esopikpe emi n̄kukụre ekeme ndibiere nte ke ndimen Mme Ntiense Jehovah ndomo ye mbon mbubịne edi usọn̄enyịn, esuene, emiom, ye ubiat enyịn̄.”

Mme Ntiense Jehovah ẹtịp ẹsịn ke mfọnọn̄kpọ obio oro mmọ ẹdụn̄de ke ndin̄wam mme owo ndikan mme mfịna oro mmọ ẹsobode ke uwem eke usen ke usen ye ke ndinam mmọ ẹnyene idotenyịn ẹban̄a ini iso. Bible etịm mmọ idem ndinam utom oro. “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”—2 Timothy 3:16, 17.

Nte afo akpama ndifiọk nte Mme Ntiense Jehovah ẹsan̄ade “ẹben̄e idem ndinam kpukpru nti utom”? Nnyịn imesịn udọn̄ inọ fi ndinyịme un̄wam oro mmọ ẹnọde mme owo ndikpep n̄kpọ efen efen mban̄a Bible ndien ke ntem ọbọde ufọn oto akpan utom obio oro mmọ ẹnamde mi ke n̄kann̄kụk mbufo ye ke ofụri ererimbot.

[Mme ndise ke page 30, 31]

Mme Ntiense Jehovah ẹsibere ye ukara

[Mme ndise ke page 31]

Ẹtịm ẹdiọn̄ọ Mme Ntiense ke mmọ ndisin̄wam mme mbọhọidụn̄ mmọ