“Ẹnyene Esịt Ekọm”
“Ẹnyene Esịt Ekọm”
“Ẹyak emem Christ akara ke esịt mbufo; . . . Mbufo ẹnyụn̄ ẹnyene esịt ekọm.”—COLOSSAE 3:15, 16.
1. Nso ukpụhọde ke nnyịn ikụt ke ufọt esop Christian ye ererimbot emi odude ke idak Satan?
KE ESOP 94,600 eke Mme Ntiense Jehovah ke ofụri ererimbot, nnyịn imokụt edu ediwụt esịtekọm. Ẹsiberede ẹnyụn̄ ẹberi mbono esop kiet kiet ke akam oro esịnede mme ikọ ẹkọm oro ẹkọmde Jehovah. Nnyịn imesiwak ndikop Mme Ntiense, n̄kpri ye ikpọ ọkọrọ ye mbufa ye mbon oro ẹma ẹkedodu ẹbịghi, ẹdọhọde “sọsọn̄ọ,” “nnyịn imadat esịt ndikụt fi,” m̀mê mme mbiet ikọ ntre, ẹnyụn̄ ẹnyenede inem inem itie ebuana. (Psalm 133:1) Emi okpụhọrede didie ntem ye ibụk oro ọyọhọde ke otu ediwak mbon oro “mîfiọkke [Jehovah], mînyụn̄ isụkke ibuot inọ gospel”! (2 Thessalonica 1:8) Nnyịn idu ke ererimbot oro ananade esịtekọm. Ndien idịghe n̄kpọ n̄kpaidem ke ini nnyịn ikerede iban̄a owo emi edide abasi ererimbot emi—Satan kpa Devil, kpa akakan owo oro esịnde udọn̄ ọnọ ibụk, emi edu ntan̄idem ye nsọn̄ibuot esie ẹyọhọde n̄kaowo!—John 8:44; 2 Corinth 4:4; 1 John 5:19.
2. Nso item ke oyom nnyịn inam, ndien mme mbụme ewe ke nnyịn idikere iban̄a?
2 Sia nnyịn idude ke ererimbot Satan, oyom nnyịn idu ke ukpeme man mme edu ererimbot emi ẹdibiat nnyịn. Ke akpa isua ikie, apostle Paul ama eti mme Christian ke Ephesus ete: “Mbufo [ẹkesan̄a] ke esịt ke ini oko, nte ido eyo eke ererimbot emi edide, ẹkenyụn̄ ẹsụk ibuot ẹnọ ọbọn̄ emi akarade edem ikpa-enyọn̄, kpa spirit emi anamde utom kemi ke esịt nditọ ntụt-utọn̄. Kpukpru nnyịn n̄ko ikonyụn̄ isan̄a ye mmọ ke ini oko, idu uwem ke idiọk itọn̄ obụkidem nnyịn, inam se idọn̄de obụkidem ye ekikere nnyịn, ikonyụn̄ idi nditọ iyatesịt ke uduot nnyịn, kpa nte mmọ eken.” (Ephesus 2:2, 3) Ukem oro ke edi ye ediwak owo mfịn. Didie ndien ke nnyịn ikeme ndika iso nnyene edu ediwụt esịtekọm? Nso un̄wam ke Jehovah ọnọ? Ke mme ata ata usụn̄ ewe ke nnyịn ikeme ndiwụt ke nnyịn imenen̄ede iwụt esịtekọm?
Mme Ntak Ndiwụt Esịtekọm
3. Nnyịn iwụt esịtekọm inọ Jehovah kaban̄a nso?
3 Nnyịn inyene ndiwụt esịtekọm nnọ Jehovah Abasi, Andibot ye Ọnọ-Uwem nnyịn, akpan akpan ke ini ikerede iban̄a ndusụk ke otu uwak enọ oro enye ọnọde nnyịn ke ntatubọk. (James 1:17) Ke usen ke usen, nnyịn imesikọm Jehovah ke uwem oro enye ọnọde nnyịn. (Psalm 36:9) Nnyịn imokụt akpakịp uyarade utom Jehovah oro ẹkande nnyịn ẹkụk, utọ nte utịn, ọfiọn̄, ye mme ntantaọfiọn̄. Akpakịp n̄kpatan̄a n̄kpọ isọn̄ nnyịn oro ẹnọde uwem, mme akpan ofụm oro ẹbuahade nte ọfọnde, ye awak n̄kukọhọ n̄kpọ-obot ndisan̄a n̄kanade, kpukpru ẹwụt isọn oro nnyịn ikamade ima ima Ete nnyịn eke heaven. Edidem David ọkọkwọ ete: “Afo, O Jehovah Abasi mi, amanam utịbe ido fo, ye ekikere fo eke ekerede nnyịn, ẹwak: idịghe nte ẹtịn̄de mmọ ẹnọ fi: mmoyom ndisiak nnyụn̄ mbụk mmọ, edi mmọ ẹkan nte ẹbatde.”—Psalm 40:5.
4. Ntak emi nnyịn ikpọkọmde Jehovah kaban̄a inem inem itie ebuana oro nnyịn inyenede ke esop nnyịn?
4 Okposụkedi mmọ mîdụhe ke ata ata paradise, mme asan̄autom Jehovah mfịn ẹdara ndidu ke paradise eke spirit. Ke mme Ufọkmbono Obio Ubọn̄ nnyịn ye ke mme n̄kpri ye ikpọ mbono, nnyịn imesikụt ekemmọ mme andinịm ke akpanikọ ẹsion̄ode mbun̄wụm spirit Abasi. Ke akpanikọ, ke ini ẹkwọrọde ikọ ẹnọ mme owo oro ẹnyenede esisịt ifiọk ẹban̄a ido ukpono m̀mê mbon oro mînyeneke-nyene, ndusụk Ntiense ẹsitịn̄ ẹtụk se Paul eketịn̄de aban̄a ke leta esie oro enye ekewetde ọnọ ẹsọk mbon Galatia. Mmọ ẹsibem iso ẹdụri ntịn̄enyịn ẹwụt “ubọk-utom obụkidem” ẹnyụn̄ ẹbụp se mme andikpan̄ utọn̄ nnọ mmọ ẹkerede. (Galatia 5:19-23) Ata ediwak mmọ ẹsisọsọp ẹnyịme ẹte ke emi edi se idude ke n̄kaowo mfịn. Ke ini ẹwụtde se ẹtịn̄de ẹban̄a mbun̄wụm spirit Abasi ye ke ẹma ẹkekot mmọ ẹdi Ufọkmbono Obio Ubọn̄ n̄kann̄kụk man ẹdikụt uyarade emi ke idemmọ, ediwak mmọ ẹsisọsọp ẹnyịme ẹte: “Abasi odu ke otu mbufo ke akpanikọ.” (1 Corinth 14:25) Idịghe ke Ufọkmbono Obio Ubọn̄ n̄kann̄kụk kpọt ke ẹsikụt emi. Ebiet ekededi oro afo akade, ke ini afo osobode ye ekededi ke otu Mme Ntiense Jehovah miliọn itiokiet, afo edikụt ukem idara idara edu emi. Ke akpanikọ, ebuana oro ọbọpde-bọp mi edi ntak ndinọ Jehovah ekọm, kpa enye emi ọnọde spirit esie man emi ekeme ndidu.—Zephaniah 3:9; Ephesus 3:20, 21.
5, 6. Didie ke nnyịn ikeme ndiwụt esịtekọm mban̄a ufak, kpa n̄kponn̄kan enọ?
5 N̄kponn̄kan enọ, kpa enọ eke ọfọnde ama oro Jehovah ọnọde edi Eyen esie, kpa Jesus, emi ẹnọde uwa ufak ebe ke enye. Apostle John ekewet ete: “Edieke Abasi akamade nnyịn ntem, nnyịn nde ikpama kiet eken.” (1 John 4:11) Ih, nnyịn iwụt esịtekọm iban̄a ufak oro idịghe sụk ke ndiwụt ima ye esịtekọm nnọ Jehovah edi n̄ko ke ndidu uwem ke usụn̄ oro owụtde ke imama mbon en̄wen.—Matthew 22:37-39.
6 Nnyịn imekeme ndikpep ekese mban̄a ediwụt esịtekọm ebe ke ndikere mban̄a usụn̄ oro Jehovah akanamde n̄kpọ ye Israel eset. Ke Ibet emi enye ọkọnọde idụt oro ebe ke Moses, Jehovah ama ekpep mme owo ediwak n̄kpọ. Nnyịn imekeme ndikpep ekese nto “mbiet ifiọk ye akpanikọ ke ibet” oro edin̄wamde nnyịn nditiene item Paul emi: “Ẹnyene esịt ekọm.”—Rome 2:20; Colossae 3:15.
N̄kpọ Ita Oro Ikpepde ito Ibet Moses
7. Didie ke ndutịm edinọ ọyọhọ mbak duop ọkọnọ nditọ Israel ifet ndiwụt esịtekọm nnọ Jehovah?
7 Ke Ibet Moses, Jehovah ama ọnọ nditọ Israel usụn̄ ita oro mmọ ẹkpewụtde ata esịtekọm oro mmọ ẹnyenede ẹban̄a mfọnido esie. Akpa ekedi ọyọhọ mbak duop. Ọyọhọ mbak duop ke otu mbun̄wụm isọn̄, ọkọrọ ye “ọyọhọ duop ke otu enan̄, ye ke otu n̄kpri ufene,” ẹkenyene ndidi “edisana n̄kpọ Jehovah.” (Leviticus 27:30-32) Ke ini nditọ Israel ẹkenamde item emi, Jehovah ama enen̄ede ọdiọn̄ mmọ. “Mbufo ẹda kpukpru ọyọhọ mbak duop ẹdisịn ke ufọk unịm-n̄kpọ, man udia odu ke ufọk mi, ndien ẹda emi ẹdomo mi, Jehovah mme udịm ọdọhọ, m̀mê ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.”—Malachi 3:10.
8. Nso ikanam enọ unyịmesịt okpụhọde ye ọyọhọ mbak duop?
8 Ọyọhọ iba, ke adianade ye edinọ ọyọhọ mbak duop oro ẹkeyomde, Jehovah ama anam ndutịm ọnọ nditọ Israel ndinọ enọ unyịmesịt. Enye eketeme Moses ndidọhọ nditọ Israel ete: “Ke adan̄aemi mbufo ẹdụkde ke isọn̄ emi ndade mbufo ndụk ke esịt; ndien ama ekem, ke ini mbufo ẹdiade udia isọn̄ oro, mbufo ẹmenede edimenede uwa ẹnọ Jehovah.” Mmọ ẹkenyene ndida ndusụk akpa ‘ibokpot emi ẹkọkde nnam uyo’ nnọ ‘Jehovah nte edimenede uwa’ ke ofụri emana mmọ. Tịm fiọk ete ke owo ikọnọhọ akpan udomo oro ẹdinọde akpa mbun̄wụm emi. (Numbers 15:18-21) Edi ke ini nditọ Israel ẹketịpde etịbe ke esịtekọm, Jehovah ama ọn̄wọn̄ọ ndidiọn̄ mmọ. Ukem ndutịm oro ama odu ke temple oro Ezekiel okokụtde ke n̄kukụt. Nnyịn ikot ntem: “Mme akpa-ubak kpukpru orụk n̄kpọ eke ẹdide mbemiso, ye kpukpru edimenede uwa kpukpru orụk n̄kpọ eke otode ke mme edimenede uwa mbufo, eyenyene mme oku: mbufo ẹnyụn̄ ẹda akpa-ubak ndom ibokpot mbufo ẹnọ mme oku, man ufọn osụk ana ke ufọk mbufo.”—Ezekiel 44:30.
9. Nso ke Jehovah ekekpep ebe ke ndutịm editan̄ se ibọhọde iduọn̄ọ?
9 Ọyọhọ ita, Jehovah ama anam ndutịm ọnọ editan̄ se ibọhọde iduọn̄ọ. Abasi eketeme ete: “N̄ko ke ini mbufo ẹkpen̄ede udia in̄wan̄ mbufo, kûkpen̄e inụk in̄wan̄ fo uma, kûnyụn̄ utan̄ se ibọhọde iduọn̄ọ ke ukpen̄e fo. Kûnyụn̄ utet kpukpru mfri ke in̄wan̄ vine fo uma, kûnyụn̄ utan̄ kpukpru se iduọn̄ọde ke in̄wan̄ vine fo; yak mmọ kpọn̄ nọ mme ubuene ye isen owo: ami ndi Jehovah Abasi mbufo.” (Leviticus 19:9, 10) Ini kiet efen, owo ikọnọhọ akpan udomo. Ekedi mbiomo eyen Israel kiet kiet ndibiere udomo emi anade enye osụhọ ọnọ mme ubuene. Enyene-ọniọn̄ Edidem Solomon ama etịn̄ nte odotde ete: “Atua-ubuene mbọm ọbuọt Jehovah n̄kpọ: ndien Enye ọyọnọ enye usiene utom esie.” (Mme N̄ke 19:17) Ntem Jehovah ekekpep mmọ ndiwụt mbọm ye edikere mban̄a nnọ mbon unana.
10. Nso utịp ke nditọ Israel ẹkebọ ke ini mmọ ẹkekpude ndiwụt esịtekọm?
10 Jehovah ama esidiọn̄ nditọ Israel ke ini mmọ ke n̄kopitem ẹkenọde ọyọhọ mbak duop, ẹnọde enọ unyịmesịt, ẹnyụn̄ ẹnọde mme ubuene n̄kpọ. Edi ke ini nditọ Israel ẹkekpude ndiwụt esịtekọm, mmọ ẹma ẹtaba mfọn Jehovah. Emi ama ada ekesịm afanikọn̄ ye ntan̄mfep ke akpatre. (2 Chronicles 36:17-21) Nso, ndien, ke nnyịn ikeme ndikpep nto emi?
Nte Nnyịn Ikemede Ndiwụt Esịtekọm
11. Nso idi akpan usụn̄ oro nnyịn ikemede ndiwụt esịtekọm nnọ Jehovah?
11 Akpan usụn̄ oro nnyịn ikemede nditoro Jehovah nnyụn̄ n̄wụt esịtekọm abuana “uwa” n̄ko. Ke akpanikọ, nte mme Christian, nnyịn idụhe ke idak Ibet Moses, emi inyenede ndiwa mme uwa unam m̀mê eke mfri. (Colossae 2:14) Edi, apostle Paul akakpak mme Christian ẹdide mme Hebrew ete: “Yak nnyịn iwa uwa ekọm inọ Abasi kpukpru ini ke enyịn̄ Jesus, kpa mfri n̄kpọk-inua eke ẹkponode enyịn̄ Esie.” (Mme Hebrew 13:15) Nnyịn imekeme ndinen̄ede n̄wụt esịtekọm nnọ ima ima Ete nnyịn eke heaven, Jehovah Abasi, ebe ke ndida mme ukeme ye mme inyene nnyịn n̄wa uwa ekọm nnọ enye, edide ke an̄wan̄wa utom ukwọrọikọ m̀mê ke “otu mbon-esop” ekemmọ mme Christian. (Psalm 26:12) Ke ndinam ntre, nso ke nnyịn ikeme ndikpep nto mme usụn̄ oro nditọ Israel ẹkenyenede ndiwụt esịtekọm nnọ Jehovah?
12. Ke se iban̄ade mbiomo Christian, nso ke nnyịn ikeme ndikpep nto ndutịm edinọ ọyọhọ mbak duop?
12 Akpa kan̄a, nte nnyịn ima ikokụt, ndutịm edinọ ọyọhọ mbak duop ikedịghe n̄kpọ oro owo anamde edieke amade; edi ekedi mbiomo eyen Israel kiet kiet ndinam emi. Nte mme Christian, edi mbiomo nnyịn ndibuana ke utom ukwọrọikọ nnyụn̄ ndụk mme mbono esop Christian. Mme edinam emi idịghe n̄kpọ oro owo anamde edieke amade. Ke akwa ntịn̄nnịm ikọ esie aban̄ade utịt ini, Jesus eketịn̄ in̄wan̄-in̄wan̄ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14; 28:19, 20) Kaban̄a mme mbono esop Christian, ẹma ẹnọ apostle Paul odudu spirit ndiwet ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Nnyịn iwụt esịtekọm oro inyenede inọ Jehovah ke ini nnyịn ke idatesịt inyịmede ndibiom mbiomo nnyịn ndikwọrọ ikọ nnyụn̄ n̄kpep mbon en̄wen n̄kpọ nnyụn̄ mbuana ye nditọete nnyịn kpukpru ini ke mme mbono esop, idade emi nte akwa ifet ye ukpono.
13. Nso ke nnyịn ikpep ito mme ndutịm enọ unyịmesịt ye editan̄ se ibọhọde iduọn̄ọ?
13 Ke adianade do, nnyịn imekeme ndibọ ufọn nto edikere mban̄a ndutịm iba efen oro nditọ Israel ẹkesidade ẹwụt esịtekọm—enọ unyịmesịt ye editan̄ se ibọhọde iduọn̄ọ. Ke edide isio ye edinọ ọyọhọ mbak duop, oro ẹkeyomde ẹkenyụn̄ ẹtịn̄de in̄wan̄-in̄wan̄ se anade ẹnọ, ndutịm enọ unyịmesịt ye editan̄ se ibọhọde iduọn̄ọ ikenyeneke akpan udomo. Utu ke oro, mme ndutịm emi ẹma ẹyak ntotụn̄ọ esịtekọm oro asan̄autom Jehovah enyenede onụk enye ndinam n̄kpọ. Ke ukem usụn̄ oro, okposụkedi nnyịn ifiọkde ite ke edibuana ke an̄wautom ye edibuana ke mme mbono esop Christian ẹdi akpan mbiomo kpukpru asan̄autom Jehovah, nte nnyịn imesinyịme ndinam emi ke ofụri esịt? Nte nnyịn imesida mmọ nte ifet ndiwụt ntotụn̄ọ esịtekọm mban̄a kpukpru se Jehovah anamde ọnọ nnyịn? Nte nnyịn imesibuana ọyọhọ ọyọhọ ke mme edinam emi, ke udomo oro mme ọkpọkpọ idaha nnyịn ẹyakde? Mîdịghe nte nnyịn ida kpukpru emi n̄kukụre nte mbiomo oro onyụn̄ anade nnyịn ibiom? Nte ededi, mmọ emi ẹdi mme mbụme oro anade nnyịn ibọrọ ke idem nnyịn. Apostle Paul eketịn̄ ntem ete: “Yak owo kiet kiet odomo utom esie ọfiọk, ekem enye eyenyene se enye obụrede aban̄a ke idem esie ikpọn̄, idibụreke ke idem owo en̄wen.”—Galatia 6:4.
14. Nso ke Jehovah oyom oto nnyịn ke utom oro nnyịn inamde inọ enye?
14 Jehovah Abasi etịm ọfiọk mme idaha nnyịn. Enye ọfiọk mme unana ukeme nnyịn. Enye ada mme uwa, ikpọ m̀mê n̄kpri, oro mme asan̄autom esie ẹnọde ke unyịmesịt ke ọsọn̄urua. Enye iyomke kpukpru nnyịn inọ ukem udomo, nnyịn inyụn̄ ikemeke ndinam ntre. Ke ini eketịn̄de aban̄a edinọ enọ, apostle Paul ama asian mme Christian ke Corinth ete: “Edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” (2 Corinth 8:12) Edumbet emi abuana n̄ko utom oro inamde inọ Abasi. Se inamde Jehovah enyịme utom nnyịn idịghe udomo oro nnyịn inamde edi edi usụn̄ oro inamde enye—ke idatesịt ye ke ofụri esịt.—Psalm 100:1-5; Colossae 3:23.
Kọri Nyụn̄ Ka Iso Nyene Edu Usiakusụn̄
15, 16. (a) Nso ebuana idu ke ufọt utom usiakusụn̄ ye ediwụt esịtekọm? (b) Didie ke mbon oro mîkemeke ndisiak usụn̄ ẹkeme ndiwụt edu usiakusụn̄?
15 Eti usụn̄ kiet ndiwụt esịtekọm nnọ Jehovah edi ndidụk utom ukwọrọikọ uyọhọ ini. Ke ima oro ẹmade Jehovah ye esịtekọm oro ẹwụtde ẹban̄a mfọnido esie oro owo mîdotke ẹnụkde, ediwak mme asan̄autom Jehovah oro ẹyakde idem ẹnọ ẹnam akwa ukpụhọde ke uwem mmọ man ẹnyene ekese ini ndinam n̄kpọ Jehovah. Ndusụk mmọ ẹkeme ndinam utom nte mme asiakusụn̄ ofụri ini, ẹbiatde hour 70 kpukpru ọfiọn̄ ke ẹbaharede ukem ukem ndikwọrọ eti mbụk nnyụn̄ n̄kpep mme owo akpanikọ. Mbon eken, oro nsio nsio idaha mîyakke, ẹsinam ndutịm ke ini ke ini ndibiat hour 50 ke ọfiọn̄ ndikwọrọ ikọ nte mme asiakusụn̄ unọ un̄wam.
16 Edi nso kaban̄a ediwak mme asan̄autom Jehovah oro mîkemeke ndinam utom nte mme asiakusụn̄ ofụri ini m̀mê eke unọ un̄wam? Mmọ ẹkeme ndiwụt esịtekọm ke ndikọri nnyụn̄ n̄ka iso nnyene edu usiakusụn̄. Didie? Ebe ke ndisịn udọn̄ nnọ mbon oro ẹkemede ndisiak usụn̄, ke ndinam nditọ mmọ ẹnyene udọn̄ ndibịne utom uyọhọ ini nte ubọkọkọ, ye ke ndibuana ifịk ifịk ke utom ukwọrọikọ nte ekemde ye mme idaha mmọ. Se nnyịn inamde ke utom ukwọrọikọ nnyịn enen̄ede ọkọn̄ọ ke udomo esịtekọm oro inyenede iban̄a se Jehovah ama akananam, se enye osụk anamde, ye se enye edinamde ọnọ nnyịn.
Ndida “Inyene” Nnyịn N̄wụt Esịtekọm
17, 18. (a) Didie ke nnyịn ikeme ndida “inyene” nnyịn n̄wụt esịtekọm? (b) Didie ke Jesus ekese etịbe ebeakpa kiet, ndien ntak-a?
17 Mme N̄ke 3:9 ọdọhọ ete: “Kpono Jehovah ke inyene fo, ye ke akpa ubak kpukpru mbun̄wụm fo.” Iyomke mme asan̄autom Jehovah ẹnọ ọyọhọ mbak duop aba. Utu ke oro, Paul ekewet ọnọ esop ke Corinth ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Nditịp etịbe unyịmesịt man inọ utom edikwọrọ Obio Ubọn̄ ibetedem owụt n̄ko esịtekọm oro nnyịn inyenede. Ntotụn̄ọ esịtekọm esinụk nnyịn ndinam emi kpukpru ini, ndusụk isiode n̄kpọ inịm ke urua ke urua, nte mme akpa Christian ẹkesinamde.—1 Corinth 16:1, 2.
18 Idịghe udomo oro nnyịn inọde owụt esịtekọm oro inyenede inọ Jehovah. Utu ke oro, edi edu oro idade inọ. Emi edi se Jesus okokụtde ke ini ekesede nte mme owo ẹsịnde enọ mmọ ke usịn-etịbe ke temple. Ke ini Jesus okokụtde ubuene ebeakpa kiet esịnde “n̄kpri okudọk iba ke esịt,” enye ọkọdọhọ ete: “Ke akpanikọ ke ndọhọ mbufo nte, Ebe-akpa emi ama esịn okụk akan kpukpru mmọ: koro kpukpru mmọ ẹkesiode n̄kpọ ke nyọhọ-nsụhọ mmọ ẹsịn ke etịbe: edi ke unana esie enye osio kpukpru se enye akpadade odu uwem ọnọ.”—Luke 21:1-4.
19. Ntak ọfọnde ndifiak ndụn̄ọde mme usụn̄ oro nnyịn ikemede ndiwụt esịtekọm?
19 Ukpepn̄kpọ emi aban̄ade nte nnyịn ikemede ndiwụt esịtekọm mi akpakam onụk nnyịn ndifiak ndụn̄ọde mme usụn̄ oro nnyịn iwụtde esịtekọm. Nte nnyịn imekeme ndifori uwa ekọm oro inọde Jehovah ọkọrọ ye nte idade inyene obụkidem inọ utom ofụri ererimbot ibetedem? Ke udomo oro nnyịn inamde oro, nnyịn imekeme nditịm mfiọk nte ke Jehovah, kpa ima ima Ete nnyịn emi atatde ubọk, eyenen̄ede enem esịt nte ke nnyịn imowụt esịtekọm.
Nte Afo Emeti?
• Ke mme ntak ewe ke nnyịn ikpowụt esịtekọm inọ Jehovah?
• Nso ke nnyịn ikpep ito edinọ ọyọhọ mbak duop, enọ unyịmesịt, ye editan̄ se ibọhọde iduọn̄ọ?
• Didie ke nnyịn ikpọkọri edu usiakusụn̄?
• Didie ke nnyịn ikeme ndida “inyene” nnyịn n̄kọm Jehovah?
[Mme Mbụme Ukpepn̄kpọ]
[Mme ndise ke page 15]
“Kpukpru eti edinọ ye kpukpru enọ eke ẹfọnde ẹma ẹto ke enyọn̄”
[Mme ndise ke page 16]
Ewe ukpepn̄kpọ ita ẹtode Ibet ke ẹwụt mi?
[Mme ndise ke page 18]
Mme uwa ewe ke nnyịn ikeme ndiwa?