Ntak Emi Mmọ Ẹsikade Ufọkabasi

“REPUBLIC OF KOREA idahaemi enyene mbon Presbyterian oro ẹkperede ndiwak utịm ikanan̄ n̄kan mbon Presbyterian ke America.” Eyedi ikọ oro ẹkewetde mi ke magazine Newsweek ama akpa ediwak mme andikot idem, sia ata ediwak owo ẹsibatde Korea nte idụt mbon Confucius m̀mê Buddha. Mfịn, esenowo oyokụt ediwak ufọkabasi mme “Christian” do, emi ẹsidade mme ndat ndat nsem nsem cross ẹdiọn̄ọ. Esidi ọsọ n̄kpọ ndikụt mme owo ẹsan̄ade iba iba m̀mê ita ita, ẹkama Bible ke ubọk ẹka ufọkabasi ke Sunday. Nte ekemde ye ndụn̄ọde oro ẹkenamde ke 1998, n̄kpọ nte mbahade 30 eke ikie ke otu mbon Korea ẹsika ufọkabasi Catholic m̀mê Protestant, ndien emi awak akan mbon oro ẹdọhọde ke idi mbon Buddha.

Ke eyo nnyịn emi, ọsọsọn̄ ndikụt mme owo ẹwakde ntre, ke ebiet ekededi, ẹkade ufọkabasi kpukpru ini. Edi, emi idịghe ke Korea kpọt edi edi ntre n̄ko ke mme idụt Asia en̄wen, ọkọrọ ye ke Africa ye Latin America. Ntak emi ata ediwak owo ẹsụk ẹdọhọde ke imọbuọt idem ke Abasi ke ini etiede nte ke unana udọn̄ ke ido ukpono ke enen̄erede atara asuana? Ntak emi mmọ ẹsikade ufọkabasi?

Ndụn̄ọde oro ẹkenamde ayarade nte ke se iwakde ikan mbahade iba ke otu mme aka ufọkabasi ke Korea ẹyom ifụre ekikere; n̄kpọ nte mbahade kiet ke itie ita ẹdori enyịn ndinyene nsinsi uwem ke ẹma ẹkekpan̄a; ndien owo kiet ke otu owo duop oyom nsọn̄idem, uforo, ye edikụt unen.

Tọn̄ọ nte ukara Communist ọkọkpọn̄ itie sụn̄sụn̄ ọnọ ukara uforo, ediwak owo ke China ẹbụn̄ọ ẹka ufọkabasi ye idotenyịn ndikoyụhọ mme udọn̄ n̄kpọ eke spirit mmọ. Kpukpru isua, ẹsimịn̄ ẹnyụn̄ ẹsuan ediwak miliọn Bible ke China, ndien etie nte ke mme owo ke ẹkot enye nte mmọ ẹkesikotde ekpri ndat ndat n̄wed Mao.

Ndusụk mbon Catholic ke Brazil, akpan akpan mme uyen, iyụhọke ye un̄wọn̄ọ edikop inemesịt ke ini iso—mmọ ẹyom ndikop inemesịt idahaemi. Magazine mbụk n̄kpọntịbe oro Tudo ọdọhọ ete: “Edieke edide ukpepn̄kpọ uwọrọ-ufụn̄ ekedemerede mme owo udọn̄ ke mme iduọk isua 1970, edi ukpepn̄kpọ aban̄ade uforo  edemede mme owo udọn̄ mfịn.” Ke ndụn̄ọde oro ẹkenamde ke Britain, ẹma ẹdọhọ mme aka ufọkabasi ẹsiak n̄kpọ kiet oro mmọ ẹmade ẹban̄a ufọkabasi mmọ. Kpukpru ini akpa ibọrọ ekedi ebuana ọtọkiet.

Ofụri emi owụt nte ke adan̄aemi akamba ubak owo ẹsụk ẹbuọtde idem ke Abasi, ata ediwak owo ẹnen̄ede ẹkere ẹban̄a se mmọ ẹkemede ndinyene idahaemi ẹkan nte mmọ ẹkerede ẹban̄a se ididide—m̀mê ndikam n̄kere mban̄a Abasi. Afo ekere ke nso idi nnennen ntak ndibuọt idem ke Abasi? Nso ke Bible enyene nditịn̄ mban̄a n̄kpọ emi? Afo oyokụt ibọrọ ke ibuotikọ oro etienede.