Obube Eke Mîkamake Mmọn̄

KE MME ini Bible, obube mmọn̄ ẹkedi ndudu oro ẹkesitịbide akpan akpan man ẹda ẹdọn̄ mmọn̄. Ke ndusụk ini, ke Isọn̄ Un̄wọn̄ọ, mmọ ẹkedi n̄kukụre akpan usụn̄ ndida nnyene mmọn̄.

Ke ẹwetde ubiereikpe Abasi, prọfet Jeremiah ama etịn̄ aban̄a mme obube emi ke ndamban̄a usụn̄ ete: “Ikọt mi ẹmenam idiọk n̄kpọ iba; ẹmekpọn̄ mi idịm mmọn̄ uwem, ẹnyụn̄ ẹtịbi obube ẹnọ idem mmọ kpa ndisiaha obube eke mîkamake mmọn̄.”—Jeremiah 2:13.

Ke ndikpọn̄ Jehovah Abasi mmọ—kpa “idịm mmọn̄ uwem”—nditọ Israel ẹkewọn̄ọde ẹkediana ye anana-odudu udịmekọn̄ idụt mme okpono ndem ye utuakibuot mme anana-odudu nsunsu abasi. Ke ndida uwụtn̄kpọ oro Jeremiah ọkọnọde, mme utọ ebiet oro ẹkedoride enyịn do ekedi ndisiaha obube mmọn̄ oro mîkemeke ndinọ ukpeme m̀mê edinyan̄a.—Deuteronomy 28:20.

Nte nnyịn imekeme ndikpep n̄kpọ nto uwụtn̄kpọ eset emi? Kpa nte ekedide ke eyo Jeremiah, Jehovah, kpa nsinsi Abasi osụk edi n̄kukụre Andinọ ọnọ-uwem mmọn̄. (Psalm 36:9; Ediyarade 4:10b) Enye ikpọn̄ ekeme ndinọ owo nsinsi uwem ebe ke Eyen esie, Jesus Christ. (John 4:14; 17:3) Edi, ukem nte mbon eyo Jeremiah, ubonowo mfịn ẹsịn ndikam nda ikọ Abasi oro ẹwetde ke Bible ke akpan n̄kpọ. Utu ke oro, mmọ ẹkọn̄ mbuọtidem ke ukara owo oro ẹkerede nte enyenede eti usọbọ, ẹfiak ẹkọn̄ mbuọtidem ke ukpọk ukpọk ekikere ye ukpepn̄kpọ akwaifiọk owo oro mînọhọ Abasi ukpono. (1 Corinth 3:18-20; Colossae 2:8) Isọn̄ke ndifiọk ebiet oro ẹkpekọn̄de mbuọtidem. Afo edikọn̄ mbuọtidem ke anie? Ndi edikọn̄ mbuọtidem ke Jehovah kpa “idịm mmọn̄ uwem,” m̀mê ke “ndisiaha obube eke mîkamake mmọn̄”?

[Ndise ke page 32]

Mbiet eka abasi oro ẹdade mbat ẹbot oro ẹkekụtde ke udi eyen Israel

[Ebiet Ẹdade N̄kpọ Ẹto]

Ndise ẹsiode ke ẹma ẹkebọ unyịme ẹto British Museum