‘Yak Jehovah Adat Fi Esịt’

‘Yak Jehovah adat fi esịt; ndien enye ọyọnọ fi se esịt fo oyomde.’—PSALM 37:4.

1, 2. Anie edi Ebiet emi ata inemesịt otode, ndien didie ke Edidem David okodụri ntịn̄enyịn owụt emi?

 “INEMESỊT edi eke mmọ oro ẹkerede ẹban̄a unana mmọ ke n̄kan̄ eke spirit, . . . inemesịt edi eke mme atua owo mbọm, . . . inemesịt edi eke mme anam emem.” Ke adianade ye mme n̄kpọ itiokiet eken oro ẹtịn̄de ẹban̄a mbon oro ẹkopde inemesịt, mme ikọ emi ẹdi mme n̄wọrọnda ikọ oro Jesus akadade ọtọn̄ọ ọwọrọetop Ukwọrọikọ Oro ke Obot, emi andiwet Gospel oro, Matthew, ekewetde. (Matthew 5:3-11, NW) Mme ikọ Jesus ẹnọ nsọn̄ọ nte ke nnyịn imekeme ndikop inemesịt.

² Psalm oro Edidem David Israel eset ekewetde odụri ntịn̄enyịn owụt Ebiet emi ata inemesịt otode, kpa Jehovah. David ọkọdọhọ ete: ‘Yak Jehovah adat fi esịt; ndien enye ọyọnọ fi se esịt fo oyomde.’ (Psalm 37:4) Edi nso ikeme ndinam edifiọk Jehovah ye ediwak ikpehe edu esie ẹdi n̄kpọ ‘idatesịt’? Didie ke edikere mban̄a se enye anamde ye se enye edinamde man osu uduak esie ẹnọ fi idotenyịn edibọ “se esịt fo oyomde.” Nditịm ndụn̄ọde Psalm 37, ufan̄ikọ 1 esịm 11, ọnọ ibọrọ.

“Kûfịbe Ufụp”

3, 4. Nte ẹwetde ke Psalm 37:1, nso item ke David ọnọ, ndien ntak odotde ndinam item emi mfịn?

³ Nnyịn idu uwem ke “ndiọk eyo” emi ọyọhọde ye idiọkido. Nnyịn imokụt edisu mme ikọ apostle Paul emi: “Mbon abian̄a ẹyedọdiọn̄ ẹdiọk ẹka iso, ẹbian̄a owo, owo ẹyenyụn̄ ẹbian̄a mmọ.” (2 Timothy 3:1, 13) Edi mmemmem didie ntem ndiyak unen ye uforo oro ẹtiede nte ke mme idiọkowo ẹnyene afịna nnyịn! Kpukpru oro ẹkeme ndiwọn̄ọde nnyịn ntịn̄enyịn, ẹnamde nnyịn ikûwụk ntịn̄enyịn ke mme n̄kpọ eke spirit. Tịm fiọk nte mme ntọn̄ọikọ Psalm 37 ẹnamde nnyịn ifiọk n̄kpọndịk emi: “Kûyat esịt uban̄a mme oburobụt owo; kûfụbe ufụp ye mme anam-idiọk.”

⁴ Ke usen ke usen, ndutịm usuanetop ererimbot esitọt nnyịn ke ubọk ke ubọk aban̄a mme edinam ukwan̄ikpe. Mme anam-mbubehe ẹsidia n̄wo ndien owo inọhọ mmọ ufen. Mme abiatibet ẹsida mbon oro mînyeneke un̄wam ẹnam mbubịne. Mme owotowo ke ẹwot owo ẹdịbe, owo inyụn̄ inọhọ mmọ ufen. Kpukpru mme utọ uwụtn̄kpọ edikwan̄a ikpe emi ẹkeme ndikama iyatesịt ẹnyụn̄ ẹnam ekikere nnyịn okûna sụn̄. Unen oro etiede nte ke mme anamidiọk ẹnyene ekeme ndikam nnam nnyịn ifịbe mmọ. Edi nte nnyịn ndiyat esịt oyokpụhọde idaha oro? Nte ndifịbe ufụp mban̄a uforo oro etiede nte ke mme idiọkowo ẹnyene oyokpụhọde utịp oro mmọ ẹdibọde? Ke akpanikọ idikpụhọke! Ndien ufọn ndomokiet idụhe nnyịn ‘ndiyat esịt.’ Ntak-a?

5. Ntak ẹmende mme anamidiọk ẹdomo ye mbiet?

 ⁵ Andiwet psalm ọbọrọ ete: “Koro ẹyewara ndisịbe mmọ nte mbiet, mmọ ẹyenyụn̄ ẹken̄e nte awawa ikọn̄.” (Psalm 37:2) Awawa ikọn̄ ekeme ndiye, edi mmọ ẹsisọp ndiyemede nnyụn̄ n̄kpa. Kpa ntre ke edi ye mme anamidiọk. Uforo oro etiede nte ke mmọ ẹnyene ididịghe ke nsinsi. Ke ini mmọ ẹkpade, uforo oro mmọ ẹkenyenede ke idiọk usụn̄ idin̄wamke mmọ aba. Kpukpru owo ẹyebọ utịp mmọ ke akpatre. Paul ekewet ete: “N̄kpọ-eyen-utom idiọk-n̄kpọ edi n̄kpa.” (Rome 6:23) Kpukpru mme anamidiọk ẹyebọ “n̄kpọ-eyen-utom” mmọ ke akpatre, ndien mmọ ididụhe aba. Nso anana-udori usụn̄ uwem ke emi edi ntem!—Psalm 37:35, 36; 49:16, 17.

6. Nso ke nnyịn ikeme ndikpep nto Psalm 37:1, 2?

⁶ Nte nnyịn ndien ikpayak uforo ibio ini oro mme anamidiọk ẹnyenede afịna nnyịn? Se nnyịn ikpepde ito akpa ufan̄ikọ iba eke Psalm 37 edi emi: Kûyak unen oro mmọ ẹkụtde anam fi ọwọn̄ọde ọkpọn̄ usụn̄ uwem oro afo emekde ndinam n̄kpọ Jehovah. Utu ke oro, wụk ntịn̄enyịn ke mme edidiọn̄ ye mme utịtmbuba eke spirit.—Mme N̄ke 23:17.

“Buọt Idem ye Jehovah, Nyụn̄ Nam Se Ifọnde”

7. Ntak emi nnyịn ikpeberide edem ke Jehovah?

⁷ Andiwet psalm eteme nnyịn ete: “Buọt idem ye Jehovah, nyụn̄ nam se ifọnde.” (Psalm 37:3a) Ke ini ikopde editịmede esịt m̀mê inyenede eyịghe, oyom nnyịn inen̄ede ikọn̄ mbuọtidem nnyịn ke Jehovah. Enye edi Andinọ ọyọhọ ifụre ke n̄kan̄ eke spirit. Moses ekewet ete: “Owo eke etiede ke ndịbe ebiet Ata Edikon̄, ke odụn̄ ke mfụt Ata Ọkpọsọn̄.” (Psalm 91:1) Enen̄ede oyom nnyịn iberi edem ke Jehovah ke ini ikopde editịmede esịt iban̄a ukwan̄ido nditọt ke editịm n̄kpọ emi. Edieke nnyịn idororede ukot, nnyịn imesinem esịt edieke ufan ọnọde nnyịn un̄wam. Kpasụk ntre, nnyịn imoyom un̄wam Jehovah ke ini nnyịn idomode ndisan̄a ke edinam akpanikọ.—Isaiah 50:10.

8. Didie ke ndibuana ke utom ukwọrọikọ Christian an̄wam nnyịn ndifep nditịmede esịt nte mîdotke mban̄a uforo mme idiọkowo?

⁸ N̄kpọ kiet oro edin̄wamde nnyịn itre ndiyat esịt mban̄a uforo mme idiọkowo edi ndisịn ifịk nyom nnyụn̄ n̄n̄wam mbon mbieterọn̄ ẹnyene nnennen ifiọk uduak Jehovah. Kpa ye oro idiọkido akade-ka iso nditọt, oyom nnyịn inen̄ede isịn ifịk ke ndin̄wam mbon en̄wen. Apostle Paul ọkọdọhọ ete: “Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” Akakan “eti n̄kpọ” oro nnyịn ikemede ndinam edi ndibuana ubọn̄ ubọn̄ eti mbụk Obio Ubọn̄ Abasi ye mbon en̄wen. An̄wan̄wa ukwọrọikọ nnyịn enen̄ede edi “uwa ekọm.”—Mme Hebrew 13:15, 16; Galatia 6:10.

9. Nam item David oro aban̄ade ‘ndidụn̄ ke isọn̄’ an̄wan̄a.

⁹ David aka iso ete: “Dụn̄ ke isọn̄, nyụn̄ dia akpanikọ.” (Psalm 37:3b) Ke eyo David, “isọn̄” ekedi ikpehe oro Jehovah ọkọnọde Israel, kpa Isọn̄ Un̄wọn̄ọ. Ke ini ukara Solomon, mme adan̄a esie ẹketọn̄ọ ke Dan ke edem edere esịm Beer-sheba ke edem usụk. Emi ekedi ebietidụn̄ Israel. (1 Ndidem 4:25) Mfịn, ke ebiet ekededi emi nnyịn idude ke isọn̄, nnyịn ibet ini oro ofụri ekondo edikabarede edi paradise ke obufa ererimbot edinen ido. Kan̄a ke emi, nnyịn idu ke ifụre eke spirit.—Isaiah 65:13, 14.

10. Nso idi utịp ke ini nnyịn ‘idiade akpanikọ’?

 ¹⁰ Nso ididi utịp ke ini nnyịn ‘idiade akpanikọ’? N̄ke eke odudu spirit eti nnyịn ete: “Owo akpanikọ okụt ediwak ufọn.” (Mme N̄ke 28:20) Nnyịn ndika iso nsịn ifịk ke edikwọrọ eti mbụk ke ebiet ekededi oro nnyịn idude nnyụn̄ n̄kwọrọ nnọ owo ekededi oro nnyịn ikemede iditreke ndinam nnyịn ibọ Jehovah utịp. Ke uwụtn̄kpọ, Frank ye n̄wan esie, Rose, ẹketọn̄ọ utom usiakusụn̄ ke isua 40 oro ẹkebede ke idụt kiet ke edem edere Scotland. Ibat ibat mbon oro ẹkenyenede udọn̄ ke akpanikọ do ẹma ẹyo ẹkpọn̄ usụn̄. Ye unana edikpa mba, n̄wan ye ebe oro ẹdide asiakusụn̄ mi ẹma ẹtọn̄ọ utom edikwọrọ ikọ ye edinam mme mbet. Idahaemi esop oro ọsọn̄de idem odu ke obio oro. Nsịnifịk ebe ye n̄wan emi enen̄ede ada edidiọn̄ Jehovah edi. Frank anam an̄wan̄a ke nsụhọdeidem ete: “Akakan edidiọn̄ edi nte ke nnyịn ke isụk idu ke akpanikọ, Jehovah ke onyụn̄ ada nnyịn anam n̄kpọ.” Ih, ke ini nnyịn ‘idiade akpanikọ,’ nnyịn imesibọ ediwak edidiọn̄ inyụn̄ iwụt esịtekọm iban̄a emi.

‘Yak Jehovah Adat Fi Esịt’

11, 12. (a) Didie ke nnyịn ikeme ‘ndiyak Jehovah adat nnyịn esịt’? (b) Nso utịtmbuba ke afo ekeme ndinịm kaban̄a ukpepn̄kpọ idemowo, ndien ye nso utịp?

¹¹ Man isọn̄ọ itie ebuana nnyịn ye Jehovah inyụn̄ ika iso ibuọt idem ye enye, ana nnyịn ‘iyak Jehovah adat nnyịn esịt.’ (Psalm 37:4a) Didie ke nnyịn inam oro’? Utu ke nditịmede esịt mban̄a idaha nnyịn, idem ọkpọkọm idaha oro ọsọsọn̄, nnyịn iwụk ntịn̄enyịn ke Jehovah. Usụn̄ kiet ndinam emi edi ndida ini n̄kot Ikọ esie. (Psalm 1:1, 2) Nte edikot Bible esinọ fi idatesịt? Enye ọyọnọ fi idatesịt ke ini afo okotde ye uduak ndikpep ekese mban̄a Jehovah. Ntak mûtuakke uda ke ama okokot ikpehe kiet unyụn̄ ubụp idemfo, ‘Nso ke udọn̄ikọ emi ekpep mi aban̄a Jehovah?’ Afo emekeme ndikụt nte enyenede ufọn ndikama n̄wed m̀mê babru ke ini afo okotde Bible. Ke ini kiet kiet oro afo atuakde ada ndikere se se afo okotde ọwọrọde, wet ubak udịmikọ oro anamde fi eti kiet ke otu nti edu Abasi. Ke psalm efen, David ọkọkwọ ete: “Ndien ikọ inua mi, ye ekikere esịt mi ẹyenem fi esịt, O Jehovah, akwa itiat mi, ye andifak mi.” (Psalm 19:14) Nnyịn ndinọ Ikọ Abasi ntịn̄enyịn ‘eyenem’ Jehovah esịt onyụn̄ enem nnyịn esịt n̄ko.

¹² Didie ke nnyịn ikeme ndinyene inemesịt nto edikpep n̄kpọ nnyụn̄ ntie n̄kere? Nnyịn imekeme ndinam edi utịtmbuba nnyịn ndikpep n̄kpọ mban̄a Jehovah ye mme usụn̄ esie adan̄a nte ikekeme. Mme utọ n̄wed nte Akakan Owo Oro Akanam Odude Uwem ye San̄a Kpere Jehovah * ẹnọ nnyịn ekese n̄kpọ oro nnyịn ikemede ndikere mban̄a ye esịtekọm. Nte utịp, David ọsọn̄ọ etịn̄ ọnọ edinen owo ete, Jehovah “ọyọnọ fi se esịt fo oyomde.” (Psalm 37:4b) Anaedi utọ mbuọtidem emi okonụk apostle John ndiwet mme ikọ emi: “Nnyịn imonyụn̄ ibụre ifiọk iban̄a Enye, ite, edieke nnyịn iben̄ede n̄kpọ ekededi nte ekemde uduak Esie, Enye ọbiọn̄ utọn̄ ke eben̄e nnyịn; ndien edieke nnyịn ifiọkde ite, Enye ọbiọn̄ utọn̄ ke eben̄e nnyịn, nnyịn imonyụn̄ ifiọk ite, imọbọ se ikeben̄ede Enye.”—1 John 5:14, 15.

13. Ke mme isua ndondo emi, nso editat utom ukwọrọikọ Obio Ubọn̄ ke ẹkụt ke ediwak idụt?

¹³ Nte mbon nsọn̄ọnda, n̄kponn̄kan idatesịt  nnyịn edi ndikụt nte ẹdiwụtde unen itie edikara Jehovah. (Mme N̄ke 27:11) Nte esịt nnyịn iyọhọke ye idara ke ini nnyịn ikopde iban̄a akwa utom ukwọrọikọ oro nditọete nnyịn ẹnamde ke mme idụt oro ẹkesidude ke idak ukara owo kiet m̀mê ukara ufịk? Nnyịn ke ibet ye ọkpọsọn̄ udọn̄ ndikụt ifụre efen efen oro ekemede ndida itie mbemiso utịt editịm n̄kpọ emi. Ediwak asan̄autom Jehovah oro ẹdude ke mme idụt edem usoputịn ẹbuana ifịk ifịk ke ndikwọrọ ikọ nnọ nditọ ufọkn̄wed, mbon itọkekọn̄, ye mbon eken oro ẹdude ke mme idụt edem usoputịn ke ibio ini ẹnyụn̄ ẹnyenede ifụre utuakibuot. Enen̄ede ọdọn̄ nnyịn nte ke ini mme owo emi ẹfiakde ẹnyọn̄ọ obio emana mmọ, mmọ ẹkpeka iso ẹyak un̄wana akpanikọ ayama idem ke ekịm oro etiede nte ke owo ikemeke ndibe ndụk.—Matthew 5:14-16.

“Kpat Usụn̄ Fo nọ Jehovah”

14. Nso uyarade idu nte ke nnyịn imekeme ndiberi edem ke Jehovah?

¹⁴ Edi n̄kpọ ndọn̄esịt didie ntem ndifiọk nte ke ẹkeme ndimen mme mfịna nnyịn ye se itiede nte ata ndodobi mbiomo mfep! Didie? David ọdọhọ ete: “Kpat usụn̄ fo nọ Jehovah, nyụn̄ buọt idem fo ye enye, ndien enye ayanam.” (Psalm 37:5) Ke mme esop nnyịn, nnyịn imenyene ekese uyarade nte ke Jehovah edi owo oro ikemede ndiberi edem. (Psalm 55:22) Mbon oro ẹdude ke utom uyọhọ ini, edide nte mme asiakusụn̄, mme esenyịn oro ẹsan̄ade-san̄a, mme isụn̄utom, m̀mê mme anamutom unyịmesịt oro ẹnamde utom ke Bethel, ẹkeme ndisọn̄ọ ntịn̄ nte ke Jehovah ẹsinen̄ede ese aban̄a mmimọ. Ntak mûnyeneke nneme ye mbon oro afo ọfiọkde unyụn̄ ubụp nte Jehovah an̄wamde mmọ? Nte eyịghe mîdụhe, afo oyokop ediwak ifiọkutom oro ẹwụtde nte ke idem ke ini nsọn̄ọn̄kpọ, ubọk Jehovah isimụhọke. Enye kpukpru ini esinọ mme n̄kpọ oro iyomde ke uwem.—Psalm 37:25; Matthew 6:25-34.

15. Didie ke edinen ido ikọt Abasi esiyama?

¹⁵ Ke ini nnyịn ibuọtde idem ke Jehovah inyụn̄ iberi edem ke enye ofụri ofụri, nnyịn imekeme ndikụt nte mme ikọ andiwet psalm emi ẹdide akpanikọ: “Enye ayada eti ido fo ọwọrọ nte un̄wana, ye ikpe fo nte ufọt uwemeyo.” (Psalm 37:6) Nte Mme Ntiense Jehovah, ẹsiwak nditịn̄ idiọk ndian nnyịn. Edi Jehovah esitat mbon eti esịt enyịn man an̄wam mmọ  ẹfiọk nte ke edi ima oro imade Abasi ye mbọhọidụn̄ ẹnụk nnyịn ndikwọrọ ikọ an̄wan̄wa. Ke ukem ini oro, eti edu uwem nnyịn ikemeke ndidịbe okposụkedi ediwak owo ẹtịn̄de idiọk ẹdian nnyịn. Jehovah esisọn̄ọ nnyịn idem ke kpukpru ubiọn̄ọ ye ukọbọ. Nte utịp, edinen ido ikọt Abasi esiyama nte utịn ke ufọt uwemeyo.—1 Peter 2:12.

“Dop Uyo . . . Bet”

16, 17. Nte ekemde ye Psalm 37:7, ini emi edi ini nso, ndien ntak-a?

¹⁶ Mme ikọ andiwet psalm en̄wen ẹdi: “Dop uyo nọ Jehovah, nyụn̄ bet enye, kûyat esịt uban̄a owo eke okụtde unen ke usụn̄ esie, uban̄a owo eke anamde idiọk uduak.” (Psalm 37:7) Mi David ọsọn̄ọ owụt nte oyomde nnyịn ibet Jehovah ke ime man enye anam n̄kpọ. Okposụkedi utịt editịm n̄kpọ emi mîdịghe kan̄a, emi idịghe ntak ndiseme. Nte nnyịn ikwe nte ke mbọm ye ime Jehovah ẹnen̄ede ẹkpon ẹkan nte nnyịn ikekerede ke akpa? Nte nnyịn imekeme ndiwụt idahaemi nte ke nnyịn n̄ko ke ibet ke ime nte nnyịn isịnde ifịk ikwọrọ eti mbụk mbemiso utịt edide? (Mark 13:10) Ini edi emi ndifep ibụmede ibụmede edinam oro ekemede ndinam nnyịn ikûnyene idatesịt ye ifụre eke spirit. Ini edi emi ndinen̄ede mbiọn̄ọ idiọk odudu ererimbot Satan akan nte akanam edide. Ndien ini edi emi ndika iso nnyene edisana ido uwem nnyụn̄ ntre ndisịn edinen idaha oro inyenede ye Jehovah ke itiendịk. Ẹyak nnyịn ika iso ifụmi oburobụt ekikere inyụn̄ itre ndinam n̄kpọ nte mîdotke ye mbon isio uduot m̀mê mbon ukem uduot.—Colossae 3:5.

¹⁷ David ọnọ nnyịn item ete: “Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba. Koro ẹyekpok mme idiọk owo ẹfep: edi mmọ eke ẹbetde Jehovah ẹyeda isọn̄ ẹnyene.” (Psalm 37:8, 9) Ih, nnyịn ke mbuọtidem imekeme ndisak iso nse ini—emi enen̄erede ekpere idahaemi—oro Jehovah edisiode kpukpru idiọkido ye mbon oro ẹdide ntak idiọkido efep ke isọn̄.

“Osụk Esisịt”

18, 19. Nso nsịnudọn̄ ke afo ọbọ oto Psalm 37:10?

¹⁸ “Koro osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe.” (Psalm 37:10) Mme ikọ oro ẹsịn udọn̄ didie ntem ẹnọ nnyịn nte nnyịn isan̄ade ikpere utịt editịm n̄kpọ emi ye utịt akama-afanikọn̄ edida ke idem n̄kpọn̄ Jehovah! Orụk ukara m̀mê odudu ekededi emi owo osiode edi omokpu idiọk idiọk. Ndien idahaemi nnyịn imekpere ini oro nnyịn idifiakde ikodu ke idak ukara Abasi, kpa Obio Ubọn̄ Jehovah ke ubọk Jesus Christ. Enye eyenen̄ede ese aban̄a se ikade iso ke ererimbot onyụn̄ osion̄o kpukpru mme andibiọn̄ọ Obio Ubọn̄ Abasi efep.—Daniel 2:44.

¹⁹ Ke obufa ererimbot emi edidude ke idak Obio Ubọn̄ Abasi, yom nte afo okpoyoyom, afo udukwe “idiọk owo.” Ke akpanikọ, ẹyesọsọp ẹsio owo ekededi oro edisọn̄de ibuot ye Jehovah adan̄aoro ẹfep. Owo ndomokiet oro edin̄wanade ye itie edikara esie m̀mê oro edisịnde ndisụk ibuot nnọ odudu Abasi ididụhe do. Kpukpru mbọhọidụn̄ fo ẹdiyom ndinem Jehovah esịt. Nso ifụre ke oro edida edi ntem—ukpọhọde m̀mê anyan ukwak emi ẹsidade ẹsịn usụn̄ ididụhe aba, n̄kpọ ndomokiet oro edibiatde ọyọhọ ibetedem ye inemesịt idinyụn̄ idụhe aba!—Isaiah 65:20; Micah 4:4; 2 Peter 3:13.

20, 21. (a) Mmanie ẹdi mbon “nsụkidem” eke Psalm 37:11, ndien m̀mọ̀n̄ ke mmọ ẹnyene “ediwak emem”? (b) Nso ididi edidiọn̄ nnyịn edieke nnyịn ikpebede Akamba David?

²⁰ Adan̄aoro, “mbon nsụkidem ẹyeda isọn̄ ẹnyene.” (Psalm 37:11a) Edi mmanie ẹdi  “mbon nsụkidem” emi? Ikọ oro ẹkabarede “nsụkidem” oto akpasarade ikọ oro ọwọrọde “nọmọ, sụhọde, suene.” Ih, “mbon nsụkidem” ẹdi mbon oro ẹbetde Jehovah ke nsụhọdeidem man enye enen̄ede kpukpru mme ukwan̄ikpe oro ẹdade ẹtiene mmọ. “Ediwak emem ẹyenyụn̄ ẹnem mmọ esịt.” (Psalm 37:11b) Idem idahaemi nnyịn imenyene ediwak emem ke paradise eke spirit oro odude ke ata esop Christian.

²¹ Okposụkedi owo mînamke nnyịn ibọhọ kan̄a mme unọmọ, nnyịn imọnọ kiet eken ibetedem inyụn̄ idọn̄ mbon oro ẹfụhọde esịt. Nte utịp, ata ntotụn̄ọ uyụhọ odu ke otu ikọt Jehovah. Nditọete iren oro ẹmekde nte mme ekpemerọn̄ ẹda ima ẹse ẹban̄a mme udọn̄ n̄kpọ eke spirit nnyịn—ndien ke ndusụk idaha ẹse ẹban̄a mme udọn̄ n̄kpọ eke obụk—anamde nnyịn ikeme ndiyọ ukụt ke ntak edinen ido. (1 Thessalonica 2:7, 11; 1 Peter 5:2, 3) Nso ọsọn̄urua enọ ke emem emi edi ntem! Nnyịn n̄ko imenyene idotenyịn nsinsi uwem ke emem emem Paradise oro asan̄ade ekpere. Do, nnyịn ikpakam ikpebe Akamba David, kpa Christ Jesus, emi ifịk oro enye enyenede ọnọ Jehovah okonụkde enye ndisọn̄ọ nda nnam akpanikọ tutu esịm akpatre. (1 Peter 2:21) Ke ndinam ntre, nnyịn iyaka iso ikop inemesịt, itorode enye emi nnyịn iyakde adat nnyịn esịt, kpa Abasi nnyịn, Jehovah.

[Ikọ idakisọn̄]

Nte Afo Emekeme Ndibọrọ?

• Mme n̄kpọ ewe ke afo ekpep oto Psalm 37:1, 2?

• Didie ke afo ekeme ‘ndiyak Jehovah adat fi esịt’?

• Nso uyarade idu nte ke nnyịn imekeme ndiberi edem ke Jehovah?

[Mme Mbụme Ukpepn̄kpọ]

[Ndise ke page 9]

Mme Christian ‘ifịbeke mbon oro ẹnamde ukwan̄ido’

[Ndise ke page 10]

“Buọt idem ye Jehovah, nyụn̄ nam se ifọnde”

[Ndise ke page 11]

Yak Jehovah adat fi esịt ebe ke afo ndikpep mban̄a enye adan̄a nte ekekeme

[Ndise ke page 12]

“Mbon nsụkidem ẹyeda isọn̄ ẹnyene”