Mbonubon Jesus Mmọ Ẹkedi Mmanie?

KE December ke ediwak ikpehe ererimbot, afo emesiwak ndikụt ndise emana Jesus emi Mary, eka esie ye Joseph, ete oro ekemende enye akama, ẹsede ẹban̄a enye ke ima ima usụn̄. Mme utọ ndise usen emana emi ẹkeme ndidemede udọn̄ mbon oro mîdịghe mme Christian. Sia mme ndise emi ẹsiwụkde ntịn̄enyịn ke Jesus, nso ke N̄wed Abasi asian nnyịn aban̄a ubon Jesus eke isọn̄?

Jesus akamana odụk ata inem inem ubon. Eyenan̄wan emi mîkọfiọkke erenowo emi ekekerede Mary akaman Jesus, ntem enye ama edimana odụk ubon eke owo. Nte Bible ọdọhọde, ẹkeda edisana spirit ẹsio uwem esie ke heaven ẹdisịn ke idịbi Mary. (Luke 1:30-35) Mbemiso ẹketọtde ke ẹyeyomo Jesus ke utịbe utịbe usụn̄, Mary ama ododụk ediomi ndọ ye Joseph, emi edikabarede edi ete oro emende Jesus akama.

Ke Jesus ama akamana, Joseph ye Mary ẹma ẹnyene nditọ en̄wen emi ẹkedide nditọeka Jesus. Mbụme oro mbon Nazareth ẹkebụpde ke ukperedem ẹban̄a Jesus anam ẹfiọk emi: “Nte Enye idịghe eyen anam-usọ? Nte eka Esie ikereke Mary? nte nditọ-eka Esie inyụn̄ ikereke James, ye Joseph, ye Simon, ye Judas? nte kpukpru nditọ-eka Esie iban inyụn̄ idụhe ye nnyịn?” (Matthew 1:25; 13:55, 56; Mark 6:3) Nnyịn imekeme ndida emi mbiere nte ke n̄kpet n̄kpet mbonubon Jesus ẹma ẹsịne ete ye eka esie, nditọeka iren inan̄, ndien ke nsụhọde n̄kaha nditọeka iban iba.

Nte ededi, ndusụk owo mfịn inịmke ke akpanikọ ite ke nditọeka Jesus iren ye iban ẹkedi nditọ Joseph ye Mary. Ntak-a? New Catholic Encyclopedia ọdọhọ ete: “Ufọkabasi ekekpep toto ke ntọn̄ọ ntọn̄ọ eyo esie nte ke kpukpru ini Mary ekedi eyenan̄wan emi mîfiọkke erenowo. Do, ke ikerede iban̄a emi, ana in̄wan̄-in̄wan̄ nte ke Mary ikenyeneke nditọ efen.” N̄wed oro ọdọhọ ke ẹkeme ndida ikọ emi “eyeneka” ntịn̄ mban̄a “owo m̀mê mme owo emi ido ukpono m̀mê n̄kpọ efen adiande mmọ ọtọkiet,” mîdịghe ẹkeme ndida enye ntịn̄ mban̄a iman, ndusụk eyen eyeneka ete m̀mê eka.

Nte oro enen̄ede edi akpanikọ? Idem ndusụk mme ekpep ukpepn̄kpọ ido ukpono Catholic inyịmeke ye akani ukpepn̄kpọ emi, edi ẹnyịme nte ke Jesus ama enyene nditọeka iren ye iban eke obụk. John P. Meier, akani etieibuot ke Catholic Bible Association of America, ekewet ete: “Ke O[bufa] T[estament], ke ini owo mîdaha adelphos [eyeneka] itịn̄ ikọ ke ndamban̄a usụn̄ edi ẹdade ndiwụt orụk itie ebuana eke obụk m̀mê itie ebuana oro ibet ọbọpde, enye ọwọrọ ata ata eyeneka m̀mê eyenete, iwọrọke n̄kpọ ndomokiet ikan oro.” * Ih, N̄wed Abasi owụt ete ke Jesus ama enyene nditọeka iren ye iban emi ẹkemanade ẹnọ Joseph ye Mary.

Mme Gospel ẹsiak mme iman Jesus eken, edi ẹyak nnyịn iwụk ntịn̄enyịn idahaemi ke n̄kpet n̄kpet mbonubon Jesus inyụn̄ ise se nnyịn ikemede ndikpep nto mmọ.

[Ikọ idakisọn̄]