Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• N̄wed Micah enyene ibuot ifan̄, ẹkewet enye ini ewe, ndien n̄kpọ eketie didie ini oro?

N̄wed Micah enyene ibuot itiaba. Prọfet Micah ekewet n̄wed emi ke ọyọhọ isua ikie itiata M.E.N., ke ini ẹkebaharede ikọt ediomi Abasi ẹsịn ke idụt iba—Israel ye Judah.—8/15, page 9.

• Nte Micah 6:8 ọdọhọde, nso ke Abasi oyom oto nnyịn?

Enye oyom nnyịn ‘inam se inende.’ Usụn̄ unam n̄kpọ Abasi owụt nte unenikpe ekpetiede, ntre ana nnyịn ika iso itiene mme edumbet esie ẹban̄ade edinam akpanikọ ye nsọn̄ọnda. Enye ọdọhọ nnyịn ete ‘ima ima Abasi.’ Mme Christian ẹwụt ima Abasi emi ke ndin̄wam mbon en̄wen, utọ nte ke afanikọn̄ ama eketịbe. Man nnyịn ‘isụk idem isan̄a ye’ Jehovah, ana nnyịn ifiọk ke ukeme nnyịn enyene adan̄a inyụn̄ iberi edem ke Abasi.—8/15, page 20-22.

• Nso ke Christian akpanam edieke ẹsiode enye ke utom?

Oyowụt ifiọk enye ndifiak ndụn̄ọde usụn̄ uwem esie. Ekeme ndiyom enye anam uwem esie emem ke ndiwọrọ n̄kodụn̄ ke uke uke ufọk m̀mê nditre ndibịne mme inyene obụkidem oro enye mînen̄ekede iyom. Ke nditịm ntịn̄, oyoyom enye etre nditịmede esịt mban̄a se enye ediyomde ke usen ke usen, enyenede mbuọtidem nte ke Abasi ọyọnọ se ẹdade ẹdu uwem. (Matthew 6:33, 34)—9/1, page 14-15.

• Nso ke nnyịn ikpeti ke ini inọde m̀mê ibọde mme enọ ndọ?

Owo ikpoyomke m̀mê ndidori enyịn ndibọ mme enọ oro ẹsọn̄de urua ẹkaha. Esịt andinọ enọ edi se itịmde isọn̄ urua. (Luke 21:1-4) Idifọnke ndisiak enyịn̄ andinọ enọ. Oro ekeme ndinam owo okop bụt. (Matthew 6:3)—9/1, page 29.

• Ntak emi nnyịn mîkpodopke akam?

Ndibọn̄ akam ofụri ini ekeme ndisọn̄ọ itie ebuana nnyịn ye Abasi onyụn̄ an̄wam nnyịn ndiyọ n̄kpọsọn̄ idomo. Akam nnyịn ekeme ndidi ibio ibio onyụn̄ ekeme ndiniọn̄, ọkọn̄ọde ke se iyomde ye mme idaha oro isobode. Akam ọsọn̄ọ mbuọtidem onyụn̄ an̄wam nnyịn ise iban̄a mme mfịna.—9/15, page 15-18.

• Didie ke 1 Corinth 15:29 akpan̄wan̄a nnyịn, emi ndusụk edikabade akabarede nte ‘baptism emi ẹnade ẹban̄a mme akpan̄kpa’?

Ikọ Paul ọkọwọrọ ke mme Christian oro ẹyetde aran ẹna baptism, m̀mê ẹbụhọ ke mmọn̄, ẹdụk usụn̄ uwem oro edidade ekesịm mmọ ndimụm nsọn̄ọnda n̄kama tutu esịm n̄kpa nte eke Christ. Ke oro ebede, ẹyenam mmọ ẹset ẹdidu uwem eke spirit kpa nte Christ.—10/1, page 29.

• Nnyịn isan̄a didie ifiọk ke ndidi Christian esịne se ikande editre ndinam ndiọi n̄kpọ oro ẹbatde ke 1 Corinth 6:9-11?

Apostle Paul iketreke ke ndibat mme utọ ndiọi edu nte use, ukpono ndem, ye uyụhọ mmịn. Ke ndiwụt nte ke ẹyom mme ukpụhọde efen efen, enye ama aka iso ke ufan̄ikọ oro etienede ete: “Kpukpru n̄kpọ ẹnen mi ndinam; edi idịghe kpukpru n̄kpọ ẹfọn.”—10/15, page 18-19.

• Mmanie ẹkedi ndusụk iban ke eset oro ẹkedatde Abasi esịt?

Ndusụk mmọ ẹkedi mme omụm-uman oro Shiphrah ye Puah, oro mîkokopke uyo Pharaoh inyụn̄ iwot nseknditọ iren Israel. (Exodus 1:15-20) Akpara kiet ke Canaan ekerede Rahab ama ada mbon uyep Israel iba edịp. (Joshua 2:1-13; 6:22, 23) Eti ibuot Abigail ama etịp esịn ke enye ndinyan̄a uwem mme owo onyụn̄ ọbiọn̄ọ David ndidue isop iyịp. (1 Samuel 25:2-35) Mmọ ẹdi uwụtn̄kpọ ẹnọ iban mfịn.—11/1, page 8-11.

• Didie ke “mme ntantaọfiọn̄” ẹken̄wana ye Sisera, nte ẹtịn̄de ke Judges 5:20?

Ndusụk owo ẹkere ke ikọ emi aban̄a un̄wam oro Abasi ọkọnọde. Mbon efen ẹkere ke enye aban̄a un̄wam oro angel ọkọnọde, m̀mê itiat obuma ndikọduọ ntọ mme asua oro, mîdịghe, nte ke enye aban̄a ibetedem oro Sisera ekenyenede ke se mme asiak ntantaọfiọn̄ ẹketịn̄de. Sia Bible mînamke emi an̄wan̄a, nnyịn imekeme ndida mme ikọ emi nte un̄wam oro Abasi ọkọnọde mbonekọn̄ Israel.—11/15, page 30.

• Ntak emi ata ediwak owo ẹsụk ẹdọhọde ke imọbuọt idem ke Abasi, ke ini mme owo ke ofụri isọn̄ ẹnen̄erede ẹnana udọn̄ ke ido ukpono?

Ndusụk owo ẹka ufọkabasi man ẹnyene ifụre ekikere. Mbon eken ẹdori enyịn ndinyene nsinsi uwem ke ẹma ẹkekpan̄a, m̀mê ndinyene nsọn̄idem, uforo, nnyụn̄ n̄kụt unen. Ke ndusụk ebiet, mme owo ẹyom nte ẹkpeyụhọde mme udọn̄ n̄kpọ eke spirit mmọ tọn̄ọ nte ukara Communist ọkọkpọn̄ itie sụn̄sụn̄ ọnọ ukara uforo. Ndifiọk mme utọ ntak emi ekeme ndin̄wam Christian nditọn̄ọ eti nneme.—12/1, page 3.