Oyom Nnyịn Inen̄ede Idu ke Ukpeme

“Ẹkpeme ndien: koro mbufo mîfiọkke usen eke Ọbọn̄ mbufo [edidide].”—Matthew 24:42.

1, 2. Nso iwụt ke nnyịn idu uwem ke akpatre ini eyo emi?

 EWETN̄WED oro Bill Emmott ọdọhọ ete: “Ke ọyọhọ isua ikie edịp, n̄kpọ oro ekenen̄erede otụk mme owo akan kpukpru n̄kpọ eken ekedi ekọn̄.” Ke adan̄aemi enyịmede nte ke afanikọn̄ ẹtode ekọn̄ ye afai ẹsinọmọ ubonowo kpukpru ini, enye adian ete: “Ekọn̄ ye afai eke ọyọhọ isua ikie edịp ikokpụhọkede ye eke mme isua eken, ibọhọke ke nte mmọ ẹkponde ẹtre. Ọyọhọ isua ikie edịp ekedi akpa ini oro ẹken̄wanade ekọn̄ ofụri ererimbot . . . N̄ko, ke ndinen̄ede n̄wụt ke oro edi akpanikọ, idịghe ekọn̄ ererimbot kiet kpọt ke ẹken̄wana, edi ekedi iba.”

² Jesus Christ ama ebem iso etịn̄ ke ‘idụt ayadaha an̄wana ye idụt, obio edidem kiet oyonyụn̄ adaha an̄wana ye obio edidem efen.’ Nte ededi, ekọn̄ ẹdi sụk ikpehe kiet ke otu ‘idiọn̄ọ [“edidu,” NW] Christ ye eke akpatre ini eyo emi.’ Ke akwa ntịn̄nnịm ikọ emi, Jesus ama etịn̄ n̄ko aban̄a akan̄, idiọk udọn̄ọ, ye unyekisọn̄. (Matthew 24:3, 7, 8; Luke 21:6, 7, 10, 11) Ke ediwak usụn̄, mme utọ unọmọ oro ẹmewak ẹnyụn̄ ẹsọn̄ ubọk. Ẹkụt nte idiọkido owo awakde ke usụn̄ nte enye anamde n̄kpọ ye Abasi ye owo. Mbiara ido uwem ye n̄kọri ke ukwan̄ido ye afai ẹdu. Mme owo ẹkabade ẹma inyene ẹkan Abasi, ẹnyụn̄ ẹma mbre ẹkaha. Kpukpru emi ẹwụt ẹte ke nnyịn idu uwem ke “ndiọk eyo.”—2 Timothy 3:1-5.

3. Didie ke “idiọn̄ọ ini” emi ẹkpetụk nnyịn?

³ Didie ke afo ese n̄kaowo oro ọdiọn̄de-diọn̄ ọdiọk? Ediwak owo ikereke, inyụn̄ ikopke mbọm iban̄a mme mfụhọ mfụhọ n̄kpọntịbe eke usen ke usen. Mme enyene-odudu ye mme ọfiọkn̄kpọ owo ererimbot ifiọkke se “idiọn̄ọ ini” emi ẹwọrọde; mme adaiso ido ukpono n̄ko inọhọ eti ndausụn̄ ke n̄kpọ emi. (Matthew 16:1-3) Edi Jesus ama ọnọ mme anditiene enye item ete: “Ẹkpeme ndien: koro mbufo mîfiọkke usen eke Ọbọn̄ mbufo [edidide].” (Matthew 24:42) Mi, Jesus ikesịnke udọn̄ inọ nnyịn nditetie kpọt nse, edi ọkọdọhọ ete “ẹkpeme.” Man idu ke ukpeme, oyom nnyịn idu ke edidemede inyụn̄ itịn̄ enyịn. Emi oyom se ikande sụk edifiọk nte ke nnyịn idahaemi idu uwem ke ukperedem ini, enye abuana n̄ko se ikande edifiọk ke mme ini ẹdiọk. Ana nnyịn isọn̄ọ inịm ke akpanikọ nte ke “utịt kpukpru n̄kpọ ke ẹkpere.” (1 Peter 4:7) Do ndien ke nnyịn idinen̄ede idu ke ukpeme. Ntre, mbụme oro anade ikere iban̄a edi: ‘Nso idin̄wam nnyịn ndisọn̄ọ edinịm ke akpanikọ nnyịn nte ke utịt ke ekpere?’

4, 5. (a) Nso idisọn̄ọ edinịm ke akpanikọ nnyịn nte ke utịt idiọk editịm n̄kpọ emi ke asan̄a ekpere, ndien ntak-a? (b) Nso idi n̄kpọ kiet ke ini edidu Eyen Owo oro ebietde eke eyo Noah?

⁴ Kere ban̄a mme idaha oro ẹkedade itie mbemiso akpan n̄kpọntịbe oro ke mbụk ubonowo—kpa akwa Ukwọ eyo Noah. Mme owo ẹma ẹdiọk tutu ‘esịt ayat’ Jehovah. Enye ọkọdọhọ ete: “Nyọsọhi owo emi mbotde ke isọn̄ mfep.” (Genesis 6:6, 7) Ndien se enye akakam anamde edi oro. Ke emende ini oro odomo ye idahaemi, Jesus ọkọdọhọ ete: “Koro nte mme usen Noah ẹkedide, kpasụk ntre ke [“edidu,” NW] Eyen Owo oyonyụn̄ edi.”—Matthew 24:37.

 ⁵ Ọfọn ndikere ke Jehovah ese ererimbot emi kpa nte enye ekesede ererimbot oro ekebemde Ukwọ iso. Sia enye okosobode ererimbot oro mîkabakke Abasi ke eyo Noah, enye ke akpanikọ oyosobo idiọk ererimbot eke mfịn. Nditịm mfiọk nte ini oro ebietde ini nnyịn ekpenyene ndisọn̄ọ edinịm ke akpanikọ nnyịn nte ke utịt ererimbot emi ke asan̄a ekpere. Ke nso usụn̄ ndien ke ini nnyịn ebiet ini oro? Ke usụn̄ ition ke nsụhọde n̄kaha. Akpa edi nte ke ẹtọt in̄wan̄-in̄wan̄ ẹban̄a nsobo oro edide.

Ẹtọt Ẹban̄a se “Enyịn Mîkwe Kan̄a”

6. Nso ke Jehovah ekebiere ndinam ke eyo Noah?

⁶ Ke eyo Noah, Jehovah ama atan̄a ete: “Spirit mi idin̄wanake ye owo ke nsinsi, ke edidue emi mmọ ẹduede mmọ ẹdi obụk, edi usen mmọ ẹyedi isua ikie ye edịp.” (Genesis 6:3) Ewụhọ oro Abasi ọkọnọde mi ke isua 2490 M.E.N. ama anam ẹdiọn̄ọ ntọn̄ọ utịt ererimbot oro mîkabakke Abasi. Kam kere se oro ọkọwọrọde ọnọ mbon oro ẹkedude uwem ini oro! Nte Jehovah akasiande Noah ke ukperedem, isua 120 kpọt okosụhọ Jehovah ndinam “ukwọ mmọn̄ edi ke isọn̄, edisobo kpukpru obụk owo emi ibifịk uwem odude mmọ ke esịt, ke idak enyọn̄ efep.”—Genesis 6:17.

7. (a) Didie ke Noah akanam n̄kpọ aban̄a ntọt oro aban̄ade Ukwọ? (b) Didie ke nnyịn ikpanam n̄kpọ iban̄a mme ntọt ẹban̄ade utịt editịm n̄kpọ emi?

⁷ Ẹma ẹsian Noah ẹban̄a afanikọn̄ oro edidide ediwak isua mbemiso emi etịbede, ndien enye ke eti ibuot ama ada ini oro etịm idem man ọkpọbọhọ. Apostle Paul ọdọhọ ete: “Sia Abasi ọnọde enye ntọt aban̄a se enyịn mîkwe kan̄a, ke uten̄e Abasi, [Noah] ọkọn̄ ubom ndida nnyan̄a ufọk esie.” (Mme Hebrew 11:7) Nso kaban̄a nnyịn? N̄kpọ nte isua 90 ẹmebe tọn̄ọ nte mme akpatre usen eke editịm n̄kpọ emi ọkọtọn̄ọ ke 1914. Nnyịn inen̄ede idu ke “utịt ini.” (Daniel 12:4) Didie ke nnyịn ikpanam n̄kpọ iban̄a mme ntọt oro ẹnọde nnyịn? Bible ọdọhọ ete: “Owo eke anamde se Abasi amade ododu ke nsinsi.” (1 John 2:17) Idahaemi edi ini ndinen̄ede n̄kpeme ndinam se Jehovah amade.

8, 9. Mme ntọt ewe ke ẹnọ mfịn, ndien didie ke ẹtan̄a mmọ?

⁸ Ke eyomfịn, nditọ ukpepn̄kpọ Bible oro ẹnyenede esịt akpanikọ ẹfiọk ẹto se mmọ ẹkpepde ke N̄wed Abasi oro ẹdade odudu spirit Abasi ẹwet nte ke ẹyesobo editịm n̄kpọ emi. Nte nnyịn imenịm emi ke akpanikọ? Tịm fiọk se Jesus eketịn̄de in̄wan̄-in̄wan̄ mi ete: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Jesus ama etịn̄ n̄ko ete ke imọ iyedi nte ebiereikpe oro Abasi emekde inyụn̄ ibahade mme owo nte emi ekpemerọn̄ abaharede erọn̄ ye ebot. Mbon oro mîdotke “ẹyedaha ẹkedụk ke nsinsi ufen; edi ndinen owo ẹyedụk ke nsinsi uwem.”—Matthew 25:31-33, 46.

⁹ Jehovah ọnọ ikọt esie mme ntọt emi ebe ke mme ekem-ini n̄kpọ editi oro ibọde ito  udia eke spirit oro “asan̄autom emi anamde akpanikọ, onyụn̄ enyenede ọniọn̄” ọnọde. (Matthew 24:45-47) Akan oro, ẹsịn udọn̄ ẹnọ kpukpru idụt, esien, usem ye obio ‘nditen̄e Abasi, nnyụn̄ nnọ Enye ubọn̄; koro ekem ini ikpe Esie.’ (Ediyarade 14:6, 7) Akpan ikpehe kiet ke etop Obio Ubọn̄ emi Mme Ntiense Jehovah ẹkwọrọde ke ofụri ererimbot edi nditọt nte ke Obio Ubọn̄ Abasi ayawara ndisio ukara owo mfep. (Daniel 2:44) Owo ikpenyeneke ndida etop emi mfefere mfefere. Ata Ọkpọsọn̄ Abasi isitreke ndinam se enye etịn̄de. (Isaiah 55:10, 11) Enye ama anam oro ke eyo Noah, ndien oyonyụn̄ anam ke eyo nnyịn.—2 Peter 3:3-7.

Oburobụt Ido Idan̄ Atara Asuana

10. Nso ke ẹkeme nditịn̄ mban̄a oburobụt ido idan̄ ke eyo Noah?

¹⁰ Usụn̄ efen odu oro ini nnyịn adade ebiet eyo Noah. Jehovah ama ọnọ akpa eren ye n̄wan oro ewụhọ ‘ndiyọhọ isọn̄’ ye orụk mmọ ebe ke ndida ukeme idan̄ oro Abasi ọkọnọde mmọ nnam n̄kpọ ke usụn̄ oro enyenede ukpono ke ndutịm ndọ. (Genesis 1:28) Ke eyo Noah, mme angel oro ẹkesọn̄de ibuot ẹma ẹda idan̄ oro mîkemke ye obot ẹsabade ubonowo. Mmọ ẹma ẹsụhọde ẹdi isọn̄, ẹmen idem eke owo ẹsịne, ẹnyụn̄ ẹdidụn̄ ye ndiye iban, ẹbonde nditọ oro ẹkedide ubak owo, ubak demon—kpa mme Nephilim. (Genesis 6:2, 4) Ẹmen idiọkn̄kpọ mme oburobụt angel emi ẹdomo ye mbukpo edinam Sodom ye Gomorrah. (Jude 6, 7) Nte utịp, oburobụt ido idan̄ ama atara asuana ke eyo oro.

11. Nso idaha ido uwem ke ini nnyịn ada ebiet eyo Noah?

¹¹ Nso kaban̄a idaha ido uwem mfịn? Ke mme akpatre usen emi, ediwak owo ẹdu uwem unam idan̄. Paul ama etịn̄ in̄wan̄-in̄wan̄ aban̄a utọ mbon oro nte “esịt mmọ odorode ufiọn”; ediwak mmọ ẹnyụn̄ ẹyakde idem “ẹnọ mbukpo ido, ndinam mbubiam ido ye okpụm.” (Ephesus 4:19) N̄wed ye ndise idan̄, idan̄ mbemiso ndọ, edisabade nditọwọn̄, ye idan̄ ukem uduot ẹdi ọsọ n̄kpọ. Ndusụk owo ẹtọtọn̄ọ ‘ndibọ ke idem mmọ utịp eke odotde ndudue mmọ,’ oro edi udọn̄ọ oro ẹmende ẹto idan̄, n̄wụre ke uwem ubon, ye mme mfịna n̄kaowo eken.—Rome 1:26, 27.

12. Ntak emi nnyịn ikpasuade se idiọkde?

¹² Ke eyo Noah, Jehovah ama anam akwa Ukwọ ada utịt ọsọk ererimbot oro akadamade idat unam idan̄. Inaha nnyịn ifre nte ke eyo emi enen̄ede ebiet eyo Noah. “Akwa ukụt” oro edidide oyosio ‘mbon-use, mme esịn-efịbe, mmọ eke ẹbietde iban ye mmọ eke ẹsabarede idem’ efep ke isọn̄. (Matthew 24:21; 1 Corinth 6:9, 10; Ediyarade 21:8) Enen̄ede oyom nnyịn isua se idiọkde inyụn̄ ifep mme idaha oro ẹkemede ndida n̄kosụn̄ọ ke oburobụt ido didie ntem!—Psalm 97:10; 1 Corinth 6:18.

“Afai Ọyọhọ” ke Ererimbot

13. Ke eyo Noah, ntak emi ‘afai ọkọyọhọde’ ererimbot?

¹³ Ke nditịn̄ mban̄a n̄kpọ efen oro okodude ke eyo Noah, Bible ọdọhọ ete: “Ererimbot etie oburobụt ke iso Abasi, afai  onyụn̄ ọyọhọ ke ererimbot.” (Genesis 6:11) Afai ikedịghe obufa n̄kpọ. Cain emi ekedide eyen Adam ama owot eyeneka esie emi ekedide edinen owo. (Genesis 4:8) Ke owụtde afai oro okodude ke eyo esie, Lamech ama ewet uto oro enye akadade atan̄ ase nte imọ ikowotde akparawa kiet, ọdọhọde ke ikanam oro ndinyan̄a idem imọ. (Genesis 4:23, 24) Se ikedide obufa ke eyo Noah ekedi udomo oro afai okodude. Nte mme otụtutọn̄ nditọiren Abasi oro ẹkedide mme angel ẹkedọde iban ke isọn̄ ẹnyụn̄ ẹbonde nditọ—kpa mme Nephilim—afai ama atara ke udomo oro akanam mîdụhe. Akpasarade ikọ Greek oro adade ọnọ mme afai afai nnyan owo oro ọwọrọ “Mme Owotowo.” (Genesis 6:4) Nte utịp, ‘afai ama ọyọhọ’ ke isọn̄. (Genesis 6:13) Kere ban̄a mme mfịna oro Noah ekenyenede ndibọk ubon esie ke utọ n̄kann̄kụk oro! Kpa ye oro, Noah ekedi ‘edinen owo ke iso Jehovah ke eyo oro.’—Genesis 7:1.

14. Didie ke “afai ọyọhọ” ererimbot mfịn?

¹⁴ Afai ama odu ke ofụri mbụk ubonowo. Edi kpa nte ekedide ke eyo Noah, afai odu ke ini nnyịn n̄ko ke udomo oro ananade mbiet. Nnyịn imesiwak ndikop mban̄a afai esịtufọk, mme edinam oyomonsia, ubịnikọt uwot ofụri orụk, ye mme owotowo ndida ikan̄ ntop akpakịp owo n̄wot ye unana uduak. Ndien uduọkiyịp otode ekọn̄ adiana do n̄ko. Ererimbot afiak ọyọhọ ye afai. Ntak-a? Nso inam afai atara ntem? Ibọrọ mbụme emi ayarade n̄kpọ efen oro ebietde eke eyo Noah.

15. (a) Nso inam afai atara ke mme akpatre usen emi? (b) Nso ke nnyịn ikeme ndidori enyịn ndikụt?

¹⁵ Ke ini ẹkewụkde Obio Ubọn̄ Messiah eke heaven ke 1914, Edidem oro ẹkedoride ke ebekpo, kpa Jesus Christ, ama anam enịm-mbụk edinam. Ẹma ẹsio Satan kpa Devil ye mme demon esie ke heaven ẹduọn̄ọ ke isọn̄. (Ediyarade 12:9-12) Mbemiso Ukwọ, mme angel oro ẹkesọn̄de ibuot ẹma ẹmek ndikpọn̄ itie oro mmọ ẹkenyenede ke heaven; nte ededi, ke eyomfịn, ẹma ẹda odudu ẹbịn mmọ ẹsion̄o. Ke adianade do, idahaemi mmọ inyeneke ukeme ndimen idem eke owo nsịne ndu ke isọn̄ man ẹyụhọ oburobụt udọn̄. Ntre, ke ntak edikpu, iyatesịt, ye ndịk ubiereikpe oro ekperede, mmọ ẹmenụk mme owo ye mme esop ẹsịn ke mme ibak ibak edinam ubiatibet ye afai oro okponde akan eke eyo Noah. Jehovah ama ọsọhi ererimbot oro ekebemde Ukwọ iso efep ke mme ọsọn̄ibuot angel ye nditọ mmọ ẹma ẹkeda idiọkido ẹyọhọ ke isọn̄. Kûdede ukere ke enye idinamke ukem n̄kpọ oro ke eyo nnyịn! (Psalm 37:10) Nte ededi, mbon  oro ẹdude ke ukpeme mfịn ẹfiọk ẹte ke edinyan̄a mmimọ asan̄a ekpere.

Ke Ẹkwọrọ Etop Emi

16, 17. Nso idi ọyọhọ usụn̄ inan̄ oro eyo nnyịn ebietde eyo Noah?

¹⁶ Ọyọhọ usụn̄ inan̄ oro eyo nnyịn ebietde ererimbot oro ekebemde Ukwọ iso edi utom oro ẹkedọn̄de Noah ndinam. Noah ama ọkọn̄ akamba ubom. Enye ekedi ‘ọkwọrọikọ’ n̄ko. (2 Peter 2:5) Nso etop ke enye ọkọkwọrọ? Nte an̄wan̄ade, ukwọrọikọ Noah ama abuana ndidọhọ mme owo ẹkabade esịt ye nditọt mban̄a nsobo oro edidide. Jesus ọkọdọhọ ete ke mbon eyo Noah ‘ikọfiọkke tutu ukwọ edi edimen mmọ efep.’—Matthew 24:38, 39.

¹⁷ Ukem ntre, nte Mme Ntiense Jehovah ẹsịnde ifịk ẹnam utom ukwọrọikọ oro ẹkedọn̄de mmọ, ke ẹtan̄a etop Obio Ubọn̄ oro ke ofụri ererimbot. Ke ekperede ndidi kpukpru ikpehe ke ererimbot, mme owo ke ẹkop ẹnyụn̄ ẹkot etop Obio Ubọn̄ ke usem mmọ. Ẹsuan se ibede magazine Enyọn̄-Ukpeme, ọnọ ntọt Obio Ubọn̄ Jehovah, 25,000,000 ẹnyụn̄ ẹmịn̄ ke se iwakde ibe usem 140. Ke akpanikọ, ẹkwọrọ eti mbụk Obio Ubọn̄ Abasi “ke ofụri ekondo nte ntiense ẹnọ kpukpru mme idụt.” Ke ini ẹma ẹkenam utom oro ọyọhọ ọyọhọ nte Abasi oyomde, ke akpanikọ utịt eyedi.—Matthew 24:14.

18. Didie ke nte ediwak owo ẹnamde n̄kpọ ẹban̄a utom ukwọrọikọ nnyịn ebiet eke ata ediwak owo ke eyo Noah?

¹⁸ Ke ikerede iban̄a usụhọde idaha eke spirit ye eke ido uwem oro okodude mbemiso Ukwọ, edi mmemmem n̄kpọ ndifiọk nte mme mbọhọidụn̄ mmọ oro mîkenịmke ke akpanikọ ẹkesisakde ẹnyụn̄ ẹsụn̄ide ubon Noah. Nte ededi, utịt ama edi. Ukem ntre, ‘mbon nsahi ẹda nsahi’ ẹdi ke mme akpatre usen emi. Bible ọdọhọ ete: “Edi Usen Ọbọn̄ edibuat nte inọ.” (2 Peter 3:3, 4, 10) Enye edidi ke ini emi ẹnịmde. Enye idibehe ini. (Habakkuk 2:3) Owụt eti ibuot didie ntem nnyịn ndidu ke ukpeme!

Ibat Ibat Owo Kpọt Ẹbọhọ

19, 20. Didie ke nsobo editịm n̄kpọ emi edibiet eke Ukwọ oro?

¹⁹ Idịghe idiọkido mme owo ye nsobo mmọ kpọt ẹdi n̄kukụre usụn̄ oro eyo nnyịn adade ebiet eyo Noah. Kpa nte mme owo ẹkebọhọde Ukwọ oro, mme owo n̄ko ẹdu emi ẹdibọhọde utịt editịm n̄kpọ emi. Mbon oro ẹkebọhọde Ukwọ oro ẹkedi mbon nsụkidem emi mîkodụhe uwem nte mbon eken ẹkedude. Mmọ ẹma ẹnam item Abasi, ẹnyụn̄ ẹdian̄ade ẹkpọn̄ idiọk ererimbot ini oro. Bible ọdọhọ ete: “Noah okụt mfọn ke iso Jehovah . . . Noah enen onyụn̄ ọfọn ama ke eyo esie.” (Genesis 6:8, 9) Ke otu ofụri ubonowo, ubon kiet, ‘emi owo mîwakke, oro edi owo itiaita, ẹkesan̄a ke esịt ẹbe ke mmọn̄ ẹkụt edinyan̄a.’ (1 Peter 3:20) Ndien mmọ ke Jehovah Abasi ọkọnọ ewụhọ emi: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke ererimbot.”—Genesis 9:1.

²⁰ Ikọ Abasi ọsọn̄ọ ọnọ nnyịn nte ke “akwa otu owo” ẹyeto “ke akwa ukụt ẹwọn̄ọ.” (Ediyarade 7:9, 14) Akwa otuowo oro ẹdidi owo ifan̄? Jesus ke idemesie ọkọdọhọ ete: “Inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.” (Matthew 7:13, 14) Ke ẹmende ẹdomo ye ediwak biliọn owo oro ẹdude uwem idahaemi ke ererimbot, mbon oro ẹdibọhọde akwa ukụt oro edidide idiwakke. Edi ekeme ndidi mmọ ẹyenyene ukem ifet oro mme andibọhọ Ukwọ ẹkenyenede. Ekeme ndidi  mme andibọhọ emi ẹyenyene nditọ ke ndusụk ini nte ubak obufa n̄kaowo ke isọn̄.—Isaiah 65:23.

“Ẹkpeme”

21, 22. (a) Didie ke ndikere mban̄a mbụk Ukwọ oro an̄wam fi? (b) Nso idi ibuotikọ isua 2004, ndien ntak emi nnyịn ikpanamde item oro enye ọnọde?

²¹ Okposụkedi Ukwọ eketịbede ke anyan ini ko, enye nte an̄wan̄ade akama ntọt oro mîkpanaha nnyịn ifụmi. (Rome 15:4) Mme n̄kpọ oro eyo nnyịn adade ebiet eyo Noah ẹkpenyene ndinam nnyịn itịm ifiọk se mme n̄kpọ oro ẹtịbede ẹwọrọde, ẹnyụn̄ ẹnam nnyịn idu ke edidemede iban̄a edidi oro Jesus edidide nte inọ man edibiere ikpe ọnọ mme idiọkowo.

²² Jesus Christ ke ọnọ ndausụn̄ ke akwa utom ubọpn̄kpọ eke spirit oro akade iso mfịn. Paradise eke spirit oro etiede nte ubom odu ndida n̄kpeme nnyụn̄ nnyan̄a ata mme andituak ibuot. (2 Corinth 12:3, 4) Man ẹnịm nnyịn uwem ẹbe akwa ukụt oro, ana nnyịn ika iso idu ke paradise oro. Ererimbot Satan odu akanade paradise eke spirit emi okụk onyụn̄ odu ke mben̄eidem ndimụm owo ekededi emi eyetde idap ke n̄kan̄ eke spirit. Oyom nnyịn ‘ikpeme’ inyụn̄ iben̄e idem inọ usen Jehovah.—Matthew 24:42, 44.

Nte Afo Emeti?

• Nso item ke Jesus ọkọnọ aban̄a edidu esie?

• Jesus emen ini edidu esie odomo ye nso?

• Ke mme usụn̄ ewe ke eyo nnyịn ebiet eyo Noah?

• Didie ke ndikere mban̄a nte eyo nnyịn ebietde eyo Noah akpanam nnyịn inen̄ede idu ke ukpeme?

[Mme Mbụme Ukpepn̄kpọ]

[Se Ẹwetde ke Ikpọ Abisi ke page 18]

Ibuotikọ isua 2004 edi: “Ẹkpeme . . . Ẹben̄e idem.”—Matthew 24:42, 44.

[Ndise ke page 15]

Noah ama anam item Abasi. Nte nnyịn ukem ntre imesinam item Abasi?

[Mme ndise ke page 16, 17]

“Nte mme usen Noah ekedide, kpasụk ntre ke [edidu] Eyen Owo oyonyụn̄ edi”