Wụt ke Imeben̄e Idem inọ Usen Jehovah
Wụt ke Imeben̄e Idem inọ Usen Jehovah
“Mmọdo mbufo nde ẹben̄e idem; koro ke ini eke mbufo mîdorike enyịn, Eyen Owo eyedi.”—MATTHEW 24:44.
1. Ntak emi nnyịn ikpekerede iban̄a usen Jehovah?
ENYE edidi usen ekọn̄ ye ifụtesịt, nnanenyịn ye ukụt, ekịm ye nsobo. “Akwa usen Jehovah emi enyenede ndịk” eyedi ke akpanikọ edisịm idiọk editịm n̄kpọ emi, ukem nte Ukwọ okosobode idiọk ererimbot eyo Noah. Enye iditreke ndidi. Edi, “kpukpru owo eke ẹsemede ẹkot enyịn̄ Jehovah ẹyebọhọ.” (Joel 2:30-32; Amos 5:18-20) Abasi oyosobo mme asua esie onyụn̄ anyan̄a ikọt esie. Ke enyenede nte ini edide usọp usọp ke ekikere, prọfet Zephaniah ọdọhọ ete: “Akwa usen Jehovah emekpere, emekpere, oyonyụn̄ ọsọp eti-eti.” (Zephaniah 1:14) Nte ededi, ini ewe ke ubiereikpe Abasi emi edida itie?
2, 3. Ntak edide akpan n̄kpọ nnyịn ndiben̄e idem nnọ usen Jehovah?
2 Jesus ọkọdọhọ ete: “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Sia nnyịn mîfiọkke nnennen ini, edi akpan n̄kpọ nnyịn ndinam mme ikọ ibuotikọ isua 2004 emi: “Ẹkpeme . . . Ẹben̄e idem.”—Matthew 24:42, 44.
3 Ke owụtde nte ẹdisọpde-sọp ẹnyan̄a mbon oro ẹdude ke mben̄eidem ye nte ẹdikpọn̄de mbon eken, Jesus ọkọdọhọ ete: “Owo iba ẹyedu ke in̄wan̄; ẹyeda kiet, ẹkpọn̄ kiet; iban iba ẹyekọk n̄kpọ ke itiat ukọk-ibokpot; ẹyeda kiet, ẹkpọn̄ kiet.” (Matthew 24:40, 41) Ke utọ ini oro, nso ididi idaha nnyịn owo kiet kiet? Ndi nnyịn iyedu ke mben̄eidem, mîdịghe ndi usen oro edisịm nnyịn ke ndueidem? Ekese ọkọn̄ọ ke se nnyịn inamde idahaemi. Man iwụt ke imeben̄e idem inọ usen Jehovah, oyom nnyịn ifep akpan edu oro atarade asuana mfịn, oyom nnyịn ifep ndiduọ ndụk akpan idaha eke spirit, inyụn̄ isọn ndusụk usụn̄ uwem.
Fep Edu Ndueidem
4. Nso edu ke mme owo eyo Noah ẹkenyene?
4 Kere ban̄a eyo Noah. Bible ọdọhọ ete: “Oto mbuọtidem Noah, sia Abasi ọnọde enye ntọt aban̄a se enyịn mîkwe kan̄a, ke uten̄e Abasi, ọkọn̄ ubom ndida nnyan̄a ufọk esie.” (Mme Hebrew 11:7) Ubom emi ekedi utịbe onyụn̄ okpon etieti. Akan oro, Noah ekedi “ọkwọrọ edinen ido.” (2 Peter 2:5) Utom ubọpn̄kpọ Noah m̀mê ukwọrọikọ esie ikanamke mme owo eyo esie ẹkpụhọde usụn̄ edinam mmọ. Ntak-a? Koro mmọ ‘ẹkediade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ.’ Mbon oro Noah ọkọkwọrọde ikọ ọnọ ẹma ẹnen̄ede ẹsịn idem ke mme ọkpọkpọ mbubehe ye ke ndikop inem uwem inyụn̄ “ifiọkke tutu ukwọ edi edimen mmọ kpukpru efep.”—Matthew 24:38, 39.
5. Nso ikedi edu mme andidụn̄ Sodom ke eyo Lot?
5 Kpasụk ntre ke ekedi ke eyo Lot. N̄wed Abasi asian nnyịn ete: “Kpa nte okonyụn̄ edide ke eyo Lot; mmọ ẹkedia n̄kpọ, ẹnyụn̄ ẹn̄wọn̄ n̄kpọ; mmọ ẹdep, ẹnyụn̄ ẹnyam; ẹtọ in̄wan̄, ẹnyụn̄ ẹbọp ufọk: edi ke usen oro Lot ọwọrọde ke Sodom, ikan̄ ye itai ẹto ke enyọn̄ ẹdep ẹdisobo mmọ kpukpru.” (Luke 17:28, 29) Ke mme angel ẹma ẹketọt Lot ẹban̄a nsobo oro akasan̄ade ekpere, enye ama asian mme ukot esie se iditịbede. Nte ededi, ke enyịn mmọ “enye [eketie] nte owo abian̄a.”—Genesis 19:14.
6. Nso edu ke ana nnyịn ifep?
6 Jesus ọkọdọhọ ke kpa nte ekedide ke eyo Noah ye Lot, “kpasụk ntre ke [“edidu,” NW] Eyen Owo” edidi. (Matthew 24:39; Luke 17:30) Ke akpanikọ, ọsọ edu oro ediwak owo ẹnyenede mfịn edi edu ndueidem. Ana nnyịn idu ke ukpeme mbak utọ edu emi edikara nnyịn. Inyeneke se idiọkde owo ndidia eti udia nnyụn̄ n̄n̄wọn̄ n̄kpọ ke ufat. Kpasụk ntre, ndọ edi ndutịm Abasi. Nte ededi, edieke mme utọ n̄kpọ emi ẹkabarede ẹdi akakan n̄kpọ ke uwem nnyịn, ndien inụkde mme udọn̄ n̄kpọ eke spirit inịm n̄kan̄ kiet, nte nnyịn ke idem nnyịn imeben̄e idem inọ enyene-ndịk usen Jehovah emi?
7. Nso akpan mbụme ke nnyịn ikpobụp mbemiso itọn̄ọde mbubehe ekededi, ndien ntak-a?
7 Apostle Paul ọkọdọhọ ete: “Ẹsịbe ini omụhọ; . . . yak mmọ emi ẹnyenede n̄wan ẹdu uwem nte mmọ emi mînyeneke.” (1 Corinth 7:29-31) Esisịt ini kpọt osụhọ ọnọ nnyịn ndikụre utom ukwọrọikọ Obio Ubọn̄ emi Abasi ọnọde nnyịn. (Matthew 24:14) Paul ama ọnọ idem mme ọdọ ndọ item ete yak mmọ ẹkûnọ nsan̄a ndọ mmọ ntịn̄enyịn ẹkaha tutu mmọ ẹdinịm mme ufọn n̄kpọ Obio Ubọn̄ ke udiana itie ke uwem mmọ. Nte an̄wan̄ade, Paul ikesịnke udọn̄ inọ edu ndueidem. Jesus ọkọdọhọ ete: “Ẹkam ẹbem iso ẹyom Obio Ubọn̄ [Abasi] ye edinen ido Esie; ndien ẹyedian kpukpru n̄kpọ emi ẹnọ mbufo.” (Matthew 6:33) Ke ini anamde ubiere ekededi m̀mê mbemiso ọtọn̄ọde mbubehe ekededi, akpan mbụme oro okpobụpde edi, ‘Didie ke emi editụk nte nnịmde mme ufọn n̄kpọ Obio Ubọn̄ akpa ke uwem mi?’
8. Edieke mme edinam uwem eke usen ke usen ẹnen̄erede ẹdia ini nnyịn, nso ke nnyịn ikpanam?
8 Nso edieke nnyịn ifiọkde ke imayak idem isịn ke mme edinam uwem eke usen ke usen tutu ini idụhe inọ mme n̄kpọ eke spirit? Nte ukpụhọde odu ke ufọt usụn̄ uwem nnyịn ye eke mme mbọhọidụn̄ nnyịn oro mînyeneke nnennen ifiọk N̄wed Abasi, mînyụn̄ idịghe mme anditan̄a Obio Ubọn̄? Edieke ukpụhọde mîdụhe, do nnyịn inyene ndibọn̄ akam mban̄a n̄kpọ emi. Jehovah ekeme ndinam nnyịn inyene nnennen ekikere. (Rome 15:5; Philippi 3:15) Enye ekeme ndin̄wam nnyịn ndinịm mme ufọn n̄kpọ Obio Ubọn̄ akpa, ndinam se ifọnde, ndinyụn̄ n̄kụre utom oro nnyịn inyenede ndinam nnọ enye.—Rome 12:2; 2 Corinth 13:7.
Fep Ediyet Idap ke N̄kan̄ eke Spirit
9. Nte ekemde ye Ediyarade 16:14-16, ntak edide akpan n̄kpọ ndifep ndiyet idap ke n̄kan̄ eke spirit?
9 Ntịn̄nnịm ikọ oro etịn̄de aban̄a edidi “ekọn̄ akwa usen Abasi, Andikara kpukpru n̄kpọ” ke Armageddon ọtọt ete ke ekeme ndidi ndusụk owo ididụhe ke ukpeme. Ọbọn̄ Jesus Christ ọdọhọ ete: “Sese, ndidi nte inọ; ọfọfọn ọnọ owo eke esịnede edisịne-n̄kpọ etie ekpeme; mbak enye edisan̄a iferi, owo edinyụn̄ okụt mbubiam esie.” (Ediyarade 16:14-16) Edisịnen̄kpọ oro ẹsiakde mi ada aban̄a se inamde ẹdiọn̄ọ nnyịn nte mme Christian Mme Ntiense Jehovah. Emi abuana utom nnyịn nte mme anditan̄a Obio Ubọn̄ ye edu uwem nnyịn nte mme Christian. Edieke nnyịn iyetde idap mînyụn̄ inamke utom aba, nnyịn imekeme ndiduọk se ẹdade ẹdiọn̄ọ nnyịn nte mme Christian. Oro edi n̄kpọ o-bụt onyụn̄ akama n̄kpọndịk. Ana nnyịn ifep ndiyet idap m̀mê ndikpa mba ke n̄kan̄ eke spirit. Didie ke nnyịn ikeme ndibiọn̄ọ utọ ntụhọ emi?
10. Ntak emi edikot Bible ke usen ke usen an̄wamde nnyịn ndidu ke edidemede ke n̄kan̄ eke spirit?
10 Bible ọsọn̄ọ etịn̄ ediwak ini aban̄a ufọn nditaba idap n̄kpeme nnyụn̄ mmụm idem n̄kama. Ke uwụtn̄kpọ, mme mbụk Gospel ẹti nnyịn ẹte: “Ẹkpeme” (Matthew 24:42; 25:13; Mark 13:33, 35, 37); “ẹben̄e idem” (Matthew 24:44; Luke 12:40); “ẹtịn̄ enyịn ẹse” (Mark 13:33). Ke ama ọkọdọhọ ke usen Jehovah edidi edisịm ererimbot emi ke mbuari, apostle Paul esịn udọn̄ ọnọ ekemmọ mme andinịm ke akpanikọ ete: “Ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama.” (1 Thessalonica 5:6) Ke akpatre n̄wed Bible, Christ Jesus emi ẹnọde ubọn̄ ọsọn̄ọ etịn̄ nte imọ ididide usọp usọp, ọdọhọde: “Mmọn̄ ndi iwiwa.” (Ediyarade 3:11; 22:7, 12, 20) Ediwak mme prọfet Hebrew n̄ko ẹma ẹtịn̄ ẹnyụn̄ ẹdụri mme owo utọn̄ ẹban̄a akwa usen ubiereikpe Jehovah. (Isaiah 2:12, 17; Jeremiah 30:7; Joel 2:11; Zephaniah 3:8) Ndikot Ikọ Abasi, kpa Bible, ke usen ke usen nnyụn̄ ntie n̄kere se nnyịn ikotde edi eti n̄kpọ un̄wam ke ndika iso ndu ke edidemede ke n̄kan̄ eke spirit.
11. Ntak emi ọkpọkpọ ukpepn̄kpọ Bible edide akpan n̄kpọ ke ndinam owo odu ke edidemede ke n̄kan̄ eke spirit?
11 Ih, owo ndisịn ifịk nda mme n̄wed oro ẹkọn̄ọde ke Bible emi “asan̄autom emi anamde akpanikọ, onyụn̄ enyenede ọniọn̄” ọnọde n̄kpep N̄wed Abasi anam nnyịn idu ke edidemede didie ntem ke n̄kan̄ eke spirit! (Matthew 24:45-47) Nte ededi, man ọkpọkpọ ukpepn̄kpọ enyene ufọn, ana enye enyene n̄kọri ẹnyụn̄ ẹnịm enye kpukpru ini. (Mme Hebrew 5:14–6:3) Ana nnyịn idia ọkpọsọn̄ udia eke spirit kpukpru ini. Ndiyom ini nnọ ọkpọkpọ ukpepn̄kpọ mfịn ekeme ndidi n̄kpọ-ata. (Ephesus 5:15, 16) Edi, ndikot Bible ye mme n̄wed ẹkọn̄ọde ke N̄wed Abasi n̄kukụre ke ini inyenede ini ikemke. Ọkpọkpọ ukpepn̄kpọ ofụri ini edi akpan n̄kpọ edieke nnyịn iyomde ‘ndisọn̄ọ idem ke ikọ mbuọtidem’ nnyụn̄ ndu ke edidemede.—Titus 1:13.
12. Didie ke mme mbono esop Christian ye n̄kpri ye ikpọ mbono ẹn̄wam nnyịn ndin̄wana mbiọn̄ọ ediyet idap ke n̄kan̄ eke spirit?
12 Mme mbono esop Christian ye n̄kpri ye ikpọ mbono n̄ko ẹn̄wam nnyịn ndin̄wana mbiọn̄ọ ediyet idap ke n̄kan̄ eke spirit. Didie? Ebe ke item oro nnyịn isibọde. Ke mme mboho emi, nte owo isitịghi nnyịn kpukpru ini iban̄a nte usen Jehovah ekperede? Mme mbono esop Christian eke urua ke urua n̄ko ẹsinọ mme ifet ‘ndidemede kiet eken nnọ ima ye nti utom.’ Utọ edidemede emi an̄wam owo nditre ndide idap ke n̄kan̄ eke spirit. Idịghe n̄kpọ n̄kpaidem ẹwụkde nnyịn ndisop idem kpukpru ini ‘adan̄a nte ikụtde ite usen oro ke asan̄a ekpere.’—Mme Hebrew 10:24, 25.
13. Didie ke utom ukwọrọikọ Christian an̄wam nnyịn ndidu ke edidemede ke n̄kan̄ eke spirit?
13 Ẹn̄wam nnyịn n̄ko ndidu ke edidemede ke ini ibuanade ke ofụri esịt ke utom ukwọrọikọ Christian. Ewe mfọnn̄kan usụn̄ en̄wen odu ndinam ẹti idiọn̄ọ ini emi ye se mmọ ẹwọrọde akan nditịn̄ mmọ nnọ mbon en̄wen? Ndien ke ini ikụtde mbon oro nnyịn ikpepde Bible ẹnamde n̄kọri ẹnyụn̄ ẹtọn̄ọde ndinam se mmọ ẹkpepde, oro esinam nnyịn inen̄ede idu ke ukpeme. Apostle Peter ọkọdọhọ ete: ‘Ẹfak ọfọn̄ esịt mbufo, ẹfara ke idem ọyọhọ ọyọhọ.’ (1 Peter 1:13) ‘Ndiyọhọ kpukpru ini ke utom Ọbọn̄’ edi eti usọbọ ọnọ edikpa mba ke n̄kan̄ eke spirit.—1 Corinth 15:58.
Sọn Mme Usụn̄ Uwem Oro Ẹkamade Mbiara eke Spirit
14. Nte etịn̄de ke Luke 21:34-36, mme usụn̄ uwem ewe ke Jesus odụri owo utọn̄ aban̄a?
14 Ke akwa ntịn̄nnịm ikọ esie aban̄ade idiọn̄ọ edidu esie, Jesus ama afiak odụri owo utọn̄. Enye ọkọdọhọ ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọ emi ẹdụn̄de ke iso isọn̄. Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo.” (Luke 21:34-36) Jesus ama etịn̄ nnennen nnennen aban̄a mme usụn̄ uwem oro mme owo ke ofụri ofụri ẹbịnede: ebeubọk udia, ukpammịn, ye usụn̄ uwem oro adade ekikere uwem emi edi.
15. Ntak emi nnyịn ikpefepde ebeubọk udia ye mmịn?
15 Uyụhọ udia ye mmịn idụhe ke n̄kemuyo ye mme edumbet Bible, ndien ana ẹsọn mmọ. Bible ọdọhọ ete: “Kûda ke otu mme ofobo wine, emi ẹtade unam ke en̄weme.” (Mme N̄ke 23:20) Nte ededi, udia ye mmịn inyeneke ndisịm udomo oro mbemiso akamade n̄kpọndịk. Enye ekeme ndinam owo eyet idap onyụn̄ ofu ifu idem mbemiso esịmde udomo oro akamade n̄kpọndịk. N̄ke Bible kiet ọdọhọ ete: “Itọn̄ ọdọn̄ owo ifu, ndien n̄kpọ idụhe: edi ukpọn̄ owo nsọpubọk eyesehe.” (Mme N̄ke 13:4) Utọ owo oro ekeme ndiyom ndinam uduak Abasi, edi enye iyụhọke udọn̄ esie ke ntak oro mînọhọ emi ntịn̄enyịn.
16. Didie ke nnyịn ikeme ndifep ndiyak mme ekikere ẹban̄ade ubon nnyịn ẹfịk nnyịn?
16 Nso idi ekikere uwem oro Jesus okodụride owo utọn̄ aban̄a? Mmọ ẹsịne mme ọkpọkpọ mfịna, edise mban̄a ubon, ye mme n̄kpọ ntre. Owụt unana eti ibuot didie ntem ndiyak mme n̄kpọ emi ẹfịk nnyịn! Jesus ama obụp ete: “Anie ke otu mbufo ekeme ndida ekikere ndian ibio idomo okụk kiet ke idaha esie?” Enye ama ọnọ mme andikpan̄ utọn̄ nnọ enye item ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? Koro mme Gentile ẹyom kpukpru n̄kpọ emi: koro Ete mbufo ke heaven ọmọfiọk ete kpukpru n̄kpọ emi ẹnana mbufo.” Ndinịm mme ufọn n̄kpọ Obio Ubọn̄ akpa ke uwem nnyịn nnyụn̄ nnyene mbuọtidem nte ke Jehovah eyese aban̄a nnyịn idiyakke ekikere uwem emi enen̄ede afịna nnyịn, oyonyụn̄ an̄wam nnyịn idu ke edidemede.—Matthew 6:25-34.
17. Didie ke edibịne inyene obụkidem ekeme ndida ekikere uwem emi ndi?
17 Edibịne inyene obụkidem ekeme n̄ko ndida ekikere uwem emi ndi. Ke uwụtn̄kpọ, ndusụk owo ẹnam uwem mmọ awak-n̄kukọhọ ebe ke ndidu uwem oro okponde akan se mmọ ẹnyenede. Ẹmetap mbon eken ẹsịn ke ndutịm unyene uforo usọp usọp ye mbubehe okụk oro akamade ntakurua. Ye mbon efen, ubọ ukpep ererimbot nte usụn̄ ndida mforo amakabade edi afia. Edi akpanikọ nte ke ndusụk udomo ifiọkn̄wed ekeme ndin̄wam owo ndinyene utom. Nte ededi, akpanikọ edi nte ke ndibịne akwa ifiọkn̄wed oro adiade ini, ndusụk owo ẹma ẹnọ idem mmọ unan ke n̄kan̄ eke spirit. Ndidu ke utọ idaha emi ekpenyene ndịk didie ntem nte usen Jehovah asan̄ade ekpere! Bible odụri owo utọn̄ ete: “Edi mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo.”—1 Timothy 6:9.
18. Man ifep ndiduọ ndụk usụn̄ uwem uma inyene, nso ukeme ke ana nnyịn ikọri?
18 Se ẹyomde man owo efep ndiduọ ndụk usụn̄ uwem uma inyene edi ndikọri ukeme edifiọk se ifọnde ye se idiọkde ke ini inamde mme ubiere. Ẹkọri ukeme emi ebe ke ndibuana kpukpru ini ke ndidia ‘ọkpọsọn̄ udia eke spirit oro enyenede mmọ emi ẹma ẹkekon̄ ẹwọrọ idaha’ ye ke ‘ndikọ ifiọk oto ke nnam mmehe.’ (Mme Hebrew 5:13, 14) Ndidomo mfiọk “se ifọnde ikan” ke ini imekde mme ebeiso n̄kpọ eyekpeme nnyịn osio ke ndinam ndiọi ubiere.—Philippi 1:10.
19. Edieke ikụtde ke nnyịn inyeneke ini ndibịne mme n̄kpọ eke spirit, nso ke nnyịn ikpanam?
19 Usụn̄ uwem uma inyene ekeme ndikịm nnyịn enyịn, iyakke inyene ini ndise mban̄a mme n̄kpọ eke spirit. Didie ke nnyịn ikpodụn̄ọde idem nnyịn inyụn̄ ifep ndiduọ ndụk afia utọ usụn̄ uwem oro? Oyom nnyịn itịm ikere nte ikpanamde uwem nnyịn emem ye nte ikemede ndinam oro. Edidem Solomon eke Israel eset ọkọdọhọ ete: “Idap owo utom enịn̄e, adiade esisịt, onyụn̄ adiade ediwak: edi uyụhọ owo inyene iyakke enye ede idap.” (Ecclesiastes 5:12) Nte ndise mban̄a mme inyene obụkidem oro owo mînen̄ekede iyom adia ekese ini ye odudu nnyịn? Adan̄a nte inyenede n̄kpọ awak, ntre ke nnyịn inyene nditịm ediwak n̄kpọ mbon, ndikpe okụk ubiọn̄, nnyụn̄ n̄kpeme mme n̄kpọ. Nte ekeme ndidi ke ufọn nnyịn ndinam uwem nnyịn emem ebe ke nditre ndibịne ndusụk inyene?
Ke Usụn̄ Ekededi, Wụt ke Imeben̄e Idem
20, 21. (a) Nso nsọn̄ọ ke apostle Peter ọnọ aban̄a usen Jehovah? (b) Nso edisana ido ye uten̄e Abasi ke ana nnyịn ika iso inam man iwụt ke imeben̄e idem inọ usen Jehovah?
20 Ini ama ebe ọkpọn̄ ererimbot eyo Noah, ndien enye ọmọn̄ ebe ọkpọn̄ editịm n̄kpọ emi. Apostle Peter ọsọn̄ọ ọnọ nnyịn ete: “Edi Usen Ọbọn̄ edibuat nte inọ; ke usen oro ikpa-enyọn̄ eyebe efep ye akamba uyom, se ẹdade ẹbot ererimbot ẹyenyụn̄ ẹtara ke ọkpọsọn̄ ufiop, ndien isọn̄ ye kpukpru utom eke ẹnamde ke esịt ẹyeta ikan̄ ẹbiara.” Ndamban̄a enyọn̄—ndiọi ukara—ye ndamban̄a isọn̄—ubonowo oro ẹdian̄arede ẹkpọn̄ Abasi—idikemeke ndibọhọ ikan̄-ikan̄ iyatesịt Abasi. Ke owụtde nte nnyịn ikemede ndiwụt ke imeben̄e idem inọ usen oro, Peter ọdọhọ ete: “Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido ye ke uten̄e Abasi? mbufo emi ẹtiede ẹbet ẹnyụn̄ ẹsọn̄ọde ẹyom edidi Usen Abasi.”—2 Peter 3:10-12.
21 Nnyịn ndidụk mme mbono esop Christian kpukpru ini nnyụn̄ mbuana ke edikwọrọ eti mbụk esịne ke otu edisana ido ye uten̄e Abasi emi. Ke utuakibuot ofụri esịt oro ituakde inọ Abasi, nnyịn ikpakam inam mme n̄kpọ emi ke adan̄aemi nnyịn itiede ke ime ibet akwa usen Jehovah. Ẹyak nnyịn ‘inyene ifịk ndien, man Abasi ekpesịm nnyịn nte itiede ke emem, inana ntọi, inyụn̄ inana ndo ke enyịn Esie.’—2 Peter 3:14.
Nte Afo Emeti?
• Ntak emi nnyịn ikpowụtde ke imeben̄e idem inọ usen Jehovah?
• Edieke nnyịn ikụtde ke edibịne mme n̄kpọ oro iyomde ke uwem enen̄ede adia ini nnyịn, nso ke nnyịn ikpanam?
• Nso idin̄wam nnyịn ndifep ndiyet idap ke n̄kan̄ eke spirit?
• Ewe usụn̄ uwem oro akamade mbiara ke ana nnyịn isọn, ndien didie?
[Mme Mbụme Ukpepn̄kpọ]
[Mme ndise ke page 20, 21]
Mme owo eyo Noah ikọfiọkke ke ubiereikpe oro ama ekpere —nte afo ọmọfiọk?
[Ndise ke page 23]
Nte afo emekeme ndinam uwem fo emem man enyene ini efen efen ọnọ mme n̄kpọ eke spirit?