Nte Abasi Ekere Aban̄a Nnyịn?

NTE afo emenyene mfịghe eke ntụk ke ntak mfịna ke ubon fo, unana nsọn̄idem, utom, m̀mê mme ndodobi mbiomo efen? Ediwak owo ẹnyene. Ndien anie ke ukwan̄ikpe, ubiatibet, ye afai mîtụkke mfịn? Ke akpanikọ, edi kpa nte Bible ọdọhọde ete: “Ofụri ekondo ke omụm mmụm, onyụn̄ odu ke ubiak uman tutu esịm emi.” (Rome 8:22) Eyịghe idụhe ediwak owo ẹbụpde ẹte: ‘Nte Abasi ekere aban̄a nnyịn? Nte enye ayan̄wam nnyịn?’

Enyene-ọniọn̄ Edidem Solomon ọkọdọhọ Abasi ke akam ete: ‘Afo ikpọn̄-ikpọn̄ ọfiọk esịt nditọ Adam.’ Solomon ama enyene mbuọtidem nte ke ikụreke ke Abasi ndifiọk nnyịn edi ke enye n̄ko ekere aban̄a nnyịn owo kiet kiet. Enye ama eben̄e Abasi ete ‘etie ke enyọn̄ okop,’ onyụn̄ ọbọrọ akam oro owo kiet kiet oro abakde enye ọbọn̄de ayararede ‘ufen esie, ye ndutụhọ esie’ ọnọ enye.—2 Chronicles 6:29, 30.

Mfịn, Jehovah Abasi ke osụk ekekere aban̄a nnyịn onyụn̄ ọdọhọ nnyịn iseme inọ imọ ke akam. (Psalm 50:15) Enye ọn̄wọn̄ọ ndiyere mme akam ofụri esịt oro ẹdude ke n̄kemuyo ye uduak esie. (Psalm 55:16, 22; Luke 11:5-13; 2 Corinth 4:7) Ih, Jehovah esikpan̄ utọn̄ ọnọ ‘kpukpru akam, kpukpru n̄kpe-ubọk eke kpukpru owo, ye eke ofụri ikọt esie.’ Ntem, edieke nnyịn ibuọtde idem ke Abasi, ibọn̄de akam iyom un̄wam esie, inyụn̄ isan̄ade ikpere enye, nnyịn iyokụt ima ima ukpeme ye ndausụn̄ esie. (Mme N̄ke 3:5, 6) James andiwet Bible ọsọn̄ọ ọnọ nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.