Ẹnọ Abasi Ubọn̄, Ẹkûnọ Owo

KE MME ọfiọn̄ ndondo emi, mme andima edinen ido ke ofụri ekondo ẹma ẹkpep nte ẹkpenọde Abasi ubọn̄ ke mme Mbono District “Ẹnọ Abasi Ubọn̄” eke Mme Ntiense Jehovah oro mmọ ẹkedụkde. Ẹyak idụn̄ọde mme n̄kpọ emi ikekpepde do.

Ndutịm Bible emi ekedi edinam usen ita ọnọ ekese mme andidụk mbono, ke adan̄aemi ekedide edinam usen inan̄ ọnọ mbon oro ẹkekemede ndidụk mme akpan mbono ofụri ererimbot. Ke ofụri ofụri, mme andidụk mbono emi ẹma ẹkop se iwakde ibe nneme N̄wed Abasi 30, esịnede mme utịn̄ikọ oro ẹkenamde mme owo ẹnen̄ede ẹnyene ifiọk ẹban̄a mme n̄kpọ eke spirit, mme ifiọkutom oro ẹkesọn̄ọde owo mbuọtidem, mme nnamn̄wụt oro ẹkewụtde mme ata ata usụn̄ oro ẹkemede ndida mme edumbet Bible nsịn ke edinam, ye drama oro okowụtde n̄kpọ-ata oro mme Christian akpa isua ikie ẹkesobode. Edieke edide ama odụk kiet ke otu mbono emi, ntak mûdụn̄ọkede se ekewetde enịm nte okotde ibuotikọ emi? Imetịm inịm ke akpanikọ ite ke emi ayanam afiak eti akpakịp nti udia eke spirit oro, oyonyụn̄ enyene ufọn ọnọ fi.

Ibuotikọ Akpa Usen: “Ọbọn̄ . . . Afo Omodot Ndibọ Ubọn̄”

Ke ẹma ẹkekwọ ikwọ ẹnyụn̄ ẹbọn̄ akam ediberede, akpa etịn̄ikọ ama ọnọ kpukpru mme andidụk mbono ufiop ufiop ekọm ke utịn̄ikọ oro okowụkde ntịn̄enyịn ke akpan ntak oro ẹketịmde mbono oro, ibuotikọ ekedi: “Isop Idem Man Inọ Abasi Ubọn̄.” Ke okotde oto Ediyarade 4:10b, etịn̄ikọ oro ama osio ibuotikọ ofụri mbono oro owụt. Enye ama ọsọsọp etịn̄ aban̄a se edinọ Abasi ubọn̄ ọwọrọde. Enye n̄ko ama okot n̄wed Psalm ndisọn̄ọ n̄wụt nte ke ndinọ Abasi ubọn̄ abuana “utuakibuot,” “ekọm,” ye “itoro.”—Psalm 95:6; 100:4, 5; 111:1, 2.

Udiana ibuotikọ ekedi “Mbon Oro Ẹnọde Abasi Ubọn̄ Ẹbọ Edidiọn̄.” Etịn̄ikọ ama osio akpan n̄kpọ oro ekedemerede owo udọn̄ owụt. Sia se iwakde ibe Mme Ntiense Jehovah miliọn itiokiet ẹdude ke idụt 234 ke ofụri ekondo, do ẹkeme ndidọhọ nte ke akanam utịn mbon oro ẹnọde Jehovah ubọn̄ isopke. (Ediyarade 7:15) Ẹma ẹnam ndụn̄ọde ye ediwak nditọete oro ẹdude ke nsio nsio utom uyọhọ ini, ndien emi ekedi n̄kpọ oro otuowo ẹketịmde ẹma ke ikpehe enye emi, enye ama onyụn̄ enen̄ede otụk mmọ ke idem.

Utịn̄ikọ oro eketienede ekedi, “Mme Edibotn̄kpọ Ẹbụk Ubọn̄ Abasi.” Okposụkedi mîtịn̄ke  ikọ, mme heaven oro ẹkụtde ke enyịn ẹtoro ubọn̄ Abasi ẹnyụn̄ ẹn̄wam nnyịn ndiwụt ntotụn̄ọ esịtekọm mban̄a ima ima ukpeme esie. Ẹma ẹnen̄ede ẹnam emi an̄wan̄a.—Isaiah 40:26.

Ukọbọ, ubiọn̄ọ, odudu ererimbot, ye mme ntụhọ unam idiọkn̄kpọ ẹnam ẹdi ọkpọsọn̄ n̄kpọ mme ata Christian ndimụm mfọnmma mmọ n̄kama. Ntre, ama oyom otuowo ẹnen̄ede ẹkpan̄ utọn̄ ẹnọ utịn̄ikọ oro, “San̄a ke Usụn̄ Mfọnmma.” Enye ekedi nneme ọkọn̄ọde ke ufan̄ikọ kiet kiet ke ọyọhọ Psalm 26, ọkọrọ ye mme ndụn̄ọde oro ẹkenamde ye Ntiense oro edide eyen ufọkn̄wed emi ọsọn̄ọde ada enyene edisana ido uwem ye owo efen oro ekesibiatde ekese ini ke unọ idem inemesịt oro edemerede eyịghe, edi oro anamde n̄kpọ ndikan mfịna emi.

Utịn̄ikọ ibuotikọ mbono, “Mme Ubọn̄ Ubọn̄ Ntịn̄nnịm N̄kukụt Ẹdemede Nnyịn Udọn̄!” ama ada ndutịm usenubọk oro ekeberi. Etịn̄ikọ ama asiak uwụtn̄kpọ prọfet Daniel, apostle John, ye Peter nte mbon oro ubọn̄ ubọn̄ ntịn̄nnịm n̄kukụt emi ẹnyenede ebuana ye ediwụk Obio Ubọn̄ Messiah Abasi ye odudu edikara esie ọkọsọn̄ọde mbuọtidem mmọ. Kaban̄a owo ekededi oro etiede nte ke enye ikwe in̄wan̄-in̄wan̄ uyarade oro owụtde ke nnyịn idu ke utịt ini, etịn̄ikọ ama ọdọhọ ete: “Nnyịn imenịm ke akpanikọ ite ke utọ mbon oro ẹyefiak ẹwụk ntịn̄enyịn ke nte edidu Christ ke Obio Ubọn̄ edide ata idem n̄kpọ ẹyenyụn̄ ẹbọ un̄wam man ẹfiak ẹkop idem ke n̄kan̄ eke spirit.”

Ndutịm uwemeyo ọkọtọn̄ọ ye utịn̄ikọ oro ọdọhọde, “Ẹyarade Ubọn̄ Jehovah Ẹnọ Mbon Nsụhọdeidem.” Etịn̄ikọ ama owụt nte Jehovah enịmde uwụtn̄kpọ ke ndisụhọde idem, kpa ye oro enye edide n̄kon̄n̄kan Owo ke ekondo. (Psalm 18:35, NW) Jehovah esifọn mfọn ye mbon oro ẹtịmde ẹsụhọrede idem, edi asua mbon oro ẹnamde nte ke imosụk idem n̄kukụre ke ini ẹnamde n̄kpọ ye ubọkn̄ka mmọ m̀mê ye mbon oro ẹkponide ẹkan mmọ, edi ẹnam n̄kpọ nsọn̄ido nsọn̄ido ye mbon oro ẹdude ke idak mmọ.—Psalm 138:6.

Ekem, ẹma ẹneme nneme ntịn̄nnịm ikọ Bible oro owụtde nsio nsio ikpehe akpan ibuotikọ emi: “Ntịn̄nnịm Ikọ Amos—Etop Emi Enye Akamade Ọnọ Eyo Nnyịn.” Ke etịn̄de aban̄a uwụtn̄kpọ Amos, akpa etịn̄ikọ ama anyan ubọk owụt mbiomo oro nnyịn inyenede nditọt mme owo mban̄a ubiereikpe Jehovah emi edide. Ibuotikọ utịn̄ikọ esie ekedi “Tịn̄ Ikọ Abasi ye Uko.” Udiana etịn̄ikọ ama obụp mbụme emi: “Nte Jehovah ayada utịt ọsọk idiọkido ye ndutụhọ ke isọn̄ emi tutu amama?” Ibuotikọ utịn̄ikọ esie, “Abasi Ebiere Ikpe Ọnọ Mme Idiọkowo,” ama owụt nte ke ubiereikpe Abasi esidot kpukpru ini ye nte ke mme idiọkowo isibọhọke, n̄ko ke ẹsisasat owo. Ibuotikọ akpatre etịn̄ikọ ke nneme emi ekedi, “Jehovah Odomo Esịt.” Mbon oro ẹyomde ndinem Jehovah esịt ẹyenam item oro odude ke Amos 5:15 emi: “Mbufo ẹsua idiọk, ẹnyụn̄ ẹma eti.”

Ẹkeme ndida ọkpọsọn̄ mmịn, utọ nte wine oro esinamde esịt owo adat, nnam n̄kpọ ke idiọk usụn̄. Ke utịn̄ikọ esie, “Ẹfep Afia Edin̄wọn̄ Ọkpọsọn̄ Mmịn Mbe Ubọk,” etịn̄ikọ ama abat mme n̄kpọndịk eke obụk ye eke spirit oro edin̄wọn̄ ọkpọsọn̄ mmịn mbe ubọk ekemede ndida ndi, idem okposụkedi owo mîkpaha mmịn. Enye ama ọnọ edumbet oro ọnọde ndausụn̄ ete: Sia udomo ọkpọsọn̄ mmịn oro ekemede ndinam owo okpụhọrede ke owo ye owo, udomo ekededi oro ekemede ndibiat “ekikere ye ọniọn̄” fo awak akaha ọnọ fi.—Mme N̄ke 3:21, 22.

Sia nnyịn idude uwem ke ndiọkeyo, ibuotikọ oro eketienede, “Jehovah, ‘Odudu Nnyịn ke Ini Ukụt,’” ama ọnọ otuowo ndọn̄esịt. Akam, edisana spirit, ye ekemmọ mme Christian ẹkeme ndin̄wam nnyịn ndiyọ.

Akpatre utịn̄ikọ usen oro, “Eti Isọn̄—Ntabinse Paradise” ama ada ndutịm emi ekesịm utịt ye inem inem n̄kpọ n̄kpaidem—edisio obufa n̄wed oro enyenede ediwak ndise obio Bible! N̄wed oro ekere Kụt Eti Isọn̄.

Ibuotikọ Ọyọhọ Usen Iba: “Ẹtịn̄ Ubọn̄ Esie ke Otu Mme Idụt”

Ke ẹma ẹkeneme itien̄wed eke usen ke usen, ẹma ẹneme ọyọhọ nneme iba ke mbono emi, ndien ibuotikọ ekedi, “Ẹwụt Ubọn̄ Jehovah nte Ukụtiso.” Akpa ikpehe akatat ibuotikọ oro, “Ke  Ndisuan Eti Mbụk ke Kpukpru Ebiet,” emi ekesịnede edifiak nnam se ikenen̄erede itịbe ke an̄wautom n̄wụt. Ọyọhọ utịn̄ikọ iba ama esịne nnamn̄wụt oro aban̄ade mfiakn̄ka nte etịn̄ikọ ekenemede ibuotikọ oro, “Ke Ndidian̄ade Mbon Oro Enyịn Ekịmde N̄kpan̄.” Akpatre ikpehe nneme emi, “Ẹdọdiọn̄ Ẹnam Ntre ebe ke Utom Ukwọrọikọ Nnyịn,” ọkọyọhọ ye inem inem ndụn̄ọde ọkọn̄ọde ke mme ifiọkutom an̄wautom.

Ikpehe efen ke ndutịm akakama ibuotikọ emi “Ẹsua ke Unana Ntak.” Enye ama esịne mme okopodudu ndụn̄ọde oro ẹban̄ade nte mme anam-akpanikọ ẹsọn̄ọde ẹda ke odudu Abasi kpa ye ubiọn̄ọ.

Ikpehe edinam oro ẹsinen̄erede ẹtie ẹbet ẹsidi edibụk mbufa mbet oro ẹdotde ke mmọn̄ ke ẹma ẹkenọ utịn̄ikọ baptism ẹma. Ndina  baptism owụt ke owo ayak idemesie ofụri ofụri ọnọ Jehovah. Ntre, ibuotikọ emi ama enen̄ede odot: “Ndidu Uwem Ekekem ye Uyakidem Nnyịn Ọnọ Abasi Ubọn̄.”

Ndutịm uwemeyo ọkọtọn̄ọ ye utịn̄ikọ oro esịnde udọn̄ ọnọ owo ndidụn̄ọde idem: “Nyene Ekikere Christ Kaban̄a Uwọrọiso.” Etịn̄ikọ ama osio inem inem akpan n̄kpọ emi owụt: Owo oro ekpebede nsụhọdeidem Christ edi ọwọrọiso owo. Ntem, Christian ikpoyomke ifetutom man ada oyụhọ ọkpọkpọ udọn̄ unyene ikpọ itie. Enye ekpenyene ndibụp idemesie nte, ‘Nte ami mmeben̄e idem ndinam nti utom oro owo mîdisọpke ikụt?’

Ndi akanam afo amakpa mba? Ufọn idụhe ndibobụp. Kpukpru owo ẹma ẹma utịn̄ikọ oro, “Ẹkop Mmemidem edi Ikpọtke ke N̄kan̄ eke Spirit.” Mme ndụn̄ọde oro ẹkenamde ye Mme Ntiense oro ẹbịghide ke esop ẹma ẹwụt nte ke Jehovah ekeme ndinam nnyịn ‘ikop odudu ke spirit.’—Ephesus 3:16, NW.

Ntatubọk edi edu oro nnyịn mîdaha-da imana, edi enye edi edu oro anade ikpekpep. Se ẹkesiode ẹwụt edi oro ke utịn̄ikọ oro “Ẹtat Ubọk, Ẹnyịme Ndinọ Owo N̄kpọ.” Ẹma ẹbụp mbụme oro edemerede owo udọn̄ ẹte: “Nte nnyịn imeben̄e idem ndibuana ndusụk minit oro inyenede ke usen ye nditọete nnyịn oro ẹdide mbonusọn̄, mbon oro ẹdọn̄ọde, mbon oro ẹkopde mfụhọ, m̀mê ẹkopde ndobo?”

Ibuotikọ oro “Ẹkpeme Idem ye ‘Uyo Isen Owo’” ama enen̄ede otụk otuowo. Utịn̄ikọ emi ekemen mme anditiene Jesus odomo ye mme erọn̄ oro ẹkopde sụk uyo esie nte “eti ekpeme-erọn̄,” mînyụn̄ ikopke “uyo isen owo” oro Devil adade ediwak usụn̄ asuan.—John 10:5, 14, 27.

Mbemiso ikwọ an̄wan̄ade owo, ana n̄ka ikwọ ẹkwọ enye ke n̄kemuyo. Man ẹnọ Abasi ubọn̄, ana mme ata andituak ibuot ke ofụri ererimbot ẹdiana kiet. Ntem, ibuotikọ oro “Ẹda ‘Inua Kiet’ Ẹnọ Abasi Ubọn̄” ama ọnọ eti item ke nte kpukpru nnyịn ikpekemede ndisem “edisana usem” (NW) kiet nnyụn̄ nnam n̄kpọ Jehovah “ke esịt kiet.”—Zephaniah 3:9.

Mme ete ye eka, akpan akpan mbon oro ẹnyenede n̄kpri nditọ, ẹma ẹnen̄ede ẹkop idatesịt ẹban̄a akpatre utịn̄ikọ usen emi: “Nditọ Nnyịn—Ọsọn̄urua Udeme.” Ẹma ẹsio obufa n̄wed oro edide page 256, emi ekedi ata inem inem n̄kpọ n̄kpaidem ọnọ otuowo. Kpep N̄kpọ to Akwa Andikpep edi n̄wed oro edin̄wamde mme ete ye eka ndida ini ntie nneme mme n̄kpọ eke spirit ye nditọ mmọ oro ẹdide enọ Abasi.

Ibuotikọ Ọyọhọ Usen Ita: “Ẹnam Kpukpru [N̄kpọ] Ẹnọ Abasi Ubọn̄”

Ẹketọn̄ọ akpatre usen mbono emi ye nneme eke spirit ebe ke ndikere mban̄a itien̄wed eke usen ke usen. Akpa ikpehe ke ndutịm usen emi ekenen̄ede owụk ntịn̄enyịn ke ubon. Ibuotikọ akpa utịn̄ikọ oro ekedi, “Mme Ete ye Eka, Ẹsọn̄ọ  Ubon Mbufo Idem.” Ke ama okodụn̄ọde mbiomo oro mme ete ye eka ẹnyenede ndinọ ubon mmọ mme n̄kpọ obụkidem, etịn̄ikọ ama owụt nte ke ata akpan mbiomo mmọ edi ndinọ nditọ mmọ mme n̄kpọ eke spirit.

Etịn̄ikọ oro eketienede okowụk ntịn̄enyịn ke nditọwọn̄ nte enye ekenemede ibuotikọ oro “Nte Mme Uyen Ẹtorode Jehovah.” Enye ọkọdọhọ ke mme uyen ẹbiet “mbara” koro mmọ ẹwakde, n̄ko sia ifịk ini uyen mmọ edide n̄kpọ nsịnudọn̄ ọnọ mme owo. Ikpọ owo ẹdara ndidiana ye mmọ nnam utom Jehovah. (Psalm 110:3) Ikpehe emi ama esịne inem inem ndụn̄ọde oro ẹkenamde ye n̄kparawa owo oro ẹnịmde nti uwụtn̄kpọ.

Drama Bible esidi ikpehe oro esiduaide owo idem ke mme mbono district, ntre owo ikosioho mbono enye emi eto. Drama oro “Ndinọ Ikọ Ntiense Uko Uko Kpa ye Ukọbọ,” ama owụt mme anditiene Jesus eke akpa isua ikie. Enye ama enem onyụn̄ enen̄ede ekpep owo n̄kpọ. Utịn̄ikọ oro eketienede, “‘Ẹkûdop Uyo’ Nditan̄a Eti Mbụk,” ama osio mme akpan ukpepn̄kpọ drama oro owụt.

Kpukpru mme andidụk mbono ẹkedu ke mben̄eidem ndikop akpan ikpehe ndutịm Sunday, kpa utịn̄ikọ an̄wa oro, “Mmanie Ẹnọ Abasi Ubọn̄ Mfịn?” Etịn̄ikọ ama owụt nte mbon ido ukpono ye mme ntaifiọk ke ofụri ofụri mînọhọ Abasi ubọn̄. Ikọt esie kpọt, kpa mbon oro ẹkwọrọde ẹnyụn̄ ẹkpepde akpanikọ ẹban̄a Jehovah, ẹnen̄ede ẹnọ enyịn̄ esie ubọn̄ mfịn.

Se iketienede utịn̄ikọ an̄wa ekedi utịn̄ikọ Enyọn̄-Ukpeme eke urua oro. Ekem ẹma ẹnọ akpatre utịn̄ikọ oro ọkọdọhọde, “‘Ẹka Iso Ndin̄wụm Ekese Mfri’ Man Ẹnọ Jehovah Ubọn̄.” Etịn̄ikọ ama okot ubiere duop ọnọ kpukpru mme andidụk mbono ndinyịme. Enye akaban̄a nsio nsio usụn̄ oro ẹkemede ndinọ Jehovah, kpa Andibot, ubọn̄. Kpukpru owo oro ẹkedụkde mme mbono emi ke ofụri ererimbot ẹma ẹbọrọ uyo kiet ẹte “Ih!”

Ibuotikọ mbono oro “Ẹnọ Abasi Ubọn̄” akamia kpukpru mme andidụk mbono emi nte n̄kanika ke utọn̄ ke mbono emi ama akasuana. Ye un̄wam spirit Jehovah ye esop esie oro ẹkụtde ke enyịn, nnyịn ikpakam ika iso inọ Abasi ubọn̄, utu ke ndinọ owo.

[Ekebe/Mme ndise ke page 23]

Ikpọ Mbono Ofụri Ererimbot

Ẹma ẹnịm ikpọ mbono ofụri ererimbot oro ekebịghide ke usen inan̄ ke Africa, Asia, Australia, Europe, ye Edem Edere ye Edem Usụk America. Mme Ntiense oro ẹkemekde ke nsio nsio itie ke ofụri ererimbot ẹkedụk mme mbono emi. Ke usụn̄ emi, isenowo emi ye mme enyene obio ẹma ‘ẹbọ ndọn̄esịt ẹto kiet eken.’ (Rome 1:12) N̄kani ufan ẹma ẹfiak ẹsobo, ẹma ẹnyụn̄ ẹnam mbufa ufan. San̄asan̄a ikpehe ikpọ mbono ofụri ererimbot oro ekedi enye oro ẹkekotde “Mme Ifiọkutom Oro Ẹtode Mme Idụt Efen.”

[Ekebe/Mme ndise ke page 25]

Mbufa N̄wed Oro Ẹnọde Abasi Ubọn̄

Ẹma ẹsio mbufa n̄wed iba ke Mbono District “Ẹnọ Abasi Ubọn̄.” N̄wed ndise Bible oro, Kụt Eti Isọn̄ enyene ikpaedem oro edibịghide onyụn̄ owụt mme ndise obio oro ẹtịn̄de ẹban̄a ke Bible ke ofụri page 36. Kpukpru page ẹdi ọyọhọ uduot ẹnyụn̄ ẹnyene ndise obio ukara Assyria, Babylon, Medo-Persia, Greece, ye Rome. Nsio nsio ndise obio ẹdu oro ẹwụtde mme obio oro Jesus ọkọkwọrọde ikọ ye mme ebiet oro Ido Ukpono Christ akatarade esịm.

N̄wed Kpep N̄kpọ to Akwa Andikpep enyene page 256 ye n̄kpọ nte mme ndise 230. Ẹkeme ndidi n̄kpọ inemesịt ndisio ini nnịm nse sụk mme ndise emi ye nditọwọn̄ nnyụn̄ mbọrọ mme mbụme oro ẹnamde owo ekere n̄kpọ oro ẹdude ke n̄wed emi. Ẹsio obufa n̄wed emi nte n̄kpọ ndida n̄kan en̄wan oro Satan an̄wanade ye n̄kpri owo nnyịn, emi uduak esie edide ndibiat ido uwem mmọ.

[Ndise ke page 23]

Mme isụn̄utom ẹma ẹbụk mme ifiọkutom oro ẹsọn̄ọde owo mbuọtidem

[Mme ndise ke page 24]

Baptism ekedi akpan ikpehe mbono “Ẹnọ Abasi Ubọn̄”

[Mme ndise ke page 24]

N̄kpri ye ikpọ ẹma ẹkop inem ndise drama Bible